Catégories
Inyigisho

“Nimudakomera ku Mana, ntimuzakomera.”

Inyigisho yo ku wa kabiri w’icyumweru cya 15 gisanzwe, A

Ku ya 15 Nyakanga 2014, Mutagatifu Bonaventure, Umwepiskopi n’Umwalimu wa Kiliziya

Amasomo: Izayi 7, 1-9; Zab 47, 2-3a, 3b-4, 5-6, 7-8; Mt 11, 20-25

Mu myaka 750 mbere ya Yezu, Ashuru cyari igihugu cyari gikomeye cyane gifite amaboko. Kigashaka no kwigarurira ibindi nk’uko icyo gihe byagendaga. Ni bwo gishatse gutera Israheli na Aramu maze abami b’ibi bihugu bishyira hamwe ngo barwanye Ashuru, ndetse basaba Akhazi Umwami wa Yuda ngo abafashe. Akhazi ariko arabyanga yivuye inyuma. Kugira ngo bamuhane, abami ba Israheli na Aramu biyemeza kumutera ngo bamusigire isomo rikomeye, Akhazi we ashakira amaboko ku mwami w’umunyamahanga wa Ashuru nuko aramuhuruza ngo amutabare. Iyi myifatire ntabwo yigeze ishimisha na mba Uhoraho Umutegetsi w’ingabo, we nyaguhungirwaho akaba na nyakwiringirwa. Ni yo mpamvu yohereje umuhanuzi Izayi kugirango ajye kubwira Akhazi ko akwiye kugira ihumure kuko bari kumwe. Aragira ati: “Humura! Witinya kandi ntugire ubwoba. Wihagarika umutima…” Arongera ati: “Nimudakomera ku Mana, ntimuzakomera.”

Bavandimwe, natwe tuzirikane uyu munsi ko Nyagasani adusaba kumwiringira n’umutima wacu wose, n’imbaraga zacu zose, n’ubwenge bwacu bwose. Ntidukwiye guhagarika umutima byatuma twumva ko hari icyamunanira ku buryo turamutse tumutabaje byaba amanjwe. Uhoraho nta kimunanira ahubwo nitwe dushaka kumunanira twiha no kumunaniza. Igihe cyose twumva twugarijwe n’ibibazo bitandukanye; ubukene, uburwayi, ubumuga, ubupfubyi, ubupfakazi, akarengane, kutitabwaho, intege nke, gusuzugurwa, kutumvwa,… nta wundi wundi dukwiye kwiringira uretse Nyagasani. Ntitwakagombye gushyira amiringiro yacu muri ba runaka dukekaho ubushozi kandi nabo ari abantu nkatwe bafite intege nke za muntu. Nta wakogombye guhungira mu bintu ngo aha ni byo byamutera akanyamuneza igihe yugarijwe n’amakuba. Ibintu n’abantu ni ibiremwa, uwabiremye abitambuje kure ubushobozi. Ibintu n’abantu birahita ariko uwabiremye we ahoraho. Ibizashira ntibigira ubushobozi buhoraho. Kandi byo bishobora no kugutenguha ariko Nyagasani urukundo n’impuhwe bye bihoraho. Uhoraho ni we dukwiye rwose kwiringira. Mwene Siraki ni we ugira ati: “Nimusubize amaso mu bisekuru bya kera murebe: ni nde wiringiye Uhoraho maze agakorwa n’ikimwaro? Cyangwa ni nde watinye Uhoraho maze akamutererana? Ni nde wamwiyambaje maze akamusuzugura?…reka twishyire mu maboko y’Uhoraho,twoye kwiringira abantu kuko ari We Nyirububasha, akaba na Nyirimpuhwe”(Sir 2, 10.18). Yemwe n’igihe umuntu yaba yanacumuye, Nyagasani ntashimishwa n’uko yakwiheba byageza aho ahunga uruhanga rwe cyangwa se ngo yumve ko atababarirwa; ahubwo ashimishwa n’abahungira mu mpuhwe ze kuko zirohora roho zarohamye, zikazizanzamura, zikazisubiza bya byishimo by’umwimerere byo kwiturira mu rukundo rwe. Ni na byo mwene Siraki avuga agira ati: “Koko rero Uhoraho ni Nyirimbabazi n’impuhwe, akiza ibyaha kandi agatabara mu gihe cy’amakuba”(Si2,11). 

Mu Ivanjiri Yezu arahimbazwa na Roho Mutagatifu maze agataraka agira ati : “Dawe, Mutegetsi w’ijuru n’isi, ngushimiye ko ibyo wabihishe abanyabwenge n’abahanga, ukabihishurira abaciye bugufi…” Bavandimwe, n’ubundi nk’uko Mutagatifu Pawulo intumwa yabivuze, “ububasha bw’Imana bwigaragariza cyane cyane mu banyantege nke”(2Cor12,9). Nta wakwitwaza ubwenge bw’isi, nta wakwitwaza ubuhanga bw’isi ngo azinjire kandi yishimire kuba muri iyo myumvire y’Imana yo kugaragariza ububasha mu ntege nke. Yemwe nta n’uwakwitwaza ubukire, ikuzo n’ubuhangange by’isi ngo azabure gusobwa n’imyitwarire y’Imana ikunda kugaragariza ubuhabasha bwayo mu guca bugufi. Ndetse rimwe na rimwe, abantu bashobora kwibwira ahari ko ntacyo ishoboye. Urugero rusumba izindi ni ukubona Imana yigira umuntu nkatwe muri Yezu Kristu nuko umunsi umwe abantu bakazamubona abambye ku musaraba hagati y’ibisambo kabuhariwe, akanawupfiraho! Koko urukundo rw’Imana ruratangaje. Ineza yayo irahebuje n’impuhwe zayo ziraturenze. Aho rukomeye iratabara ariko ititwaje ibitwaro bya karundura (nk’iby’abantu), ahubwo iza yitwaje ineza n’ubuntu, urukundo n’impuhwe. Ngibyo rero iby’abanyabwenge n’abahanga batajya basobanukirwa. Byumvwa n’abaciye bugufi. Binezeza abaciye bugufi. Iyo Akhazi twumvise mu isomo rya mbere aza kubimenya, aba yarahisemo kumva inama z’umuhanuzi Izayi maze ntashyire amiringiro ye mu mwami wa Ashuru. Nawe, nanjye, cya gihe…iyo tubimenya, tuba twarashyize amiringiro yacu yose muri Uhoraho maze tukaronka amahoro arambye. Ariko nta we uvuma iritararenga, nimucyo dufate ingamba zo kwiturira mu rukundo n’impuhwe by’Imana kuko ari byo buhungiro butavogerwa.

Mutagatifu Bonaventure duhimbaza none adusabire

Bikira Mariya aduhakirwe ku Mwana we Yezu Kristu.

Padiri Léandre NSHIMYIYAREMYE

Seminari nkuru ya RUTONGO