Catégories
Inyigisho

Nimugire amahoro

Inyigisho yo ku cyumweru cya 2 cya Pasika,B, Ku ya 12 Mata 2015

Agaciro ku muntu, agaciro k’inshuti kumvikana neza iyo tumubuze. Ni kimwe n’ibintu twomva umumaro wabyo iyo bibuze. Hari byinshi tutibazaho kuko tubibona nta ruhare tubigizemo. Umunyarwanda ati: “ribara uwariraye“ cyangwa yibyinira ati :“ sinarinzi ko inzara iryana narabwiriwe ndaburara, nizirika agashumi mu nda, imbeba zaho ziragatwara…“.

Hari ibizira igihe , amahoro ya Kristu ari nayo soko y’impuhwe ze yari akenewe ku bigishwa be.

  1. Nimwakire Roho Mutagatifu

Hari abo isi Imana yaduhaye ngo tuyituremo ibana ntoya bakabura umwanya n’uwo guhagararamo. Bikaba nka bimwe bya Magorwa yurira igiti ahunga intare akagisangamo inzoka. Abigishwa ba Yezu bari bageraniwe bari babuze amahoro. Bari babuze Umwigisha bari barashyizemo amizero yabo. Ejo habo ntahariho. Bimwe mu byago twagira nk’abakristu ni ugutakaza amizero. Utakaje amizero ubuzima buta icyanga. Kubaho bigasigara ari uguhata inzira ibirenge.

N’ubwo iriya isanzwe ari indamukanyo y’abayahudi “ Nimugire amahoro“ (Shalom), abigishwa bayumvise neza kuko iziye igihe. Ije mu gihe babuze amahoro kandi babibwirwa n’utanga amahoro y’ukuri. Ntabwo ari ayo abifuriza ayabahaye. Ije kubasubiza amizero, kubamurikira ngo boye guhata inzira ibirenge bagende bemye kuko bafite iyo bajya. Bigaragarira mu butwari bahise bagira bwo kwamamaza , inkuru y‘izuka rye.

Abahaye Roho Mutagatifu uzabarinda ubwoba, uzatuma basoka ntibikingirane. Uzatuma bavuga bashize amanga nta bwoba. Ngiyo impamvu y’ibyishimo. Guhura na Yezu wazutse bitanga amahoro n’ibyishimo. Turabizi twese amizero atera ibyishimo. No mu buzima busanzwe iyo umuntu abona ibyo ateganya n’ibyo yifuza imishinga ye bifite icyerekezo arishima. Nkanswe amize yubakiye kuri Yezu. Imwe mu mbuto zigaragaza ko twamenye Yezu koko ni amahoro n’ibyishimo. Imana yacu ni Urukundo , mu rukundo habamo amahoro n’ibyishimo. Guhangayika ubwoba no kwiheba ibyo ntibituruka ku Mana. Imana ntidutera ubwoba ahubwo muri Yezu Kristu iratubwira iti “ Nimugire amahoro”. Tubona ko uko Yezu yabonekeraga abigishwa be amaze kuzuka byateraga ibyishimo. Kuko Imana ubwayo ishaka umuntu utunganiwe.

  1. Nyagasani, Mana yanjye!”

Yohani atubwira ko hari ku munsi wa mbere ni ukuvuga nyuma ya Sabato niwo waje kuba umunsi wa Nyagasani , Icyumweru. Ni umunsi Nyagasani Yezu yazutseho Yohani abigarukaho kenshi mu ivanjili ( Yh 20,1). Ubukurikiyeho ubwo Tomasi yari ahari nabwo byari kuwa mbere wa Sabato kuko hari hashize iminsi umunani. Mu Ivanjili ya Yohani Yezu wazutse yabonekeye abigishwa be gatatu gusa kandi kabiri byari kuwa mbere wa Sabato.

Tomasi ntabuze ibyari bimuhugije. Ko abandi bari bikingiranye kubera ubwoba we bite? Wasanga yari amenyereye umujyi ku buryo ntacyo yari bube. N’ubwo Yezu atanga kudusobanurira hari ubwo dutawanyika. Ntitube hamwe n’abandi ntitube hamwe na Kiliziya. Bityo igihe Yezu aje ntitumubone kuko tuba twagiye ahandi atari budusange. Ibiduhuza ni byinshi ntitube hamwe n’abakristu ku munsi wa Nyagasani.

Tomasi avuga yeruye ko Yezu ari Imana ye. Ahamije ukwemera gukomeye. Dushobora kwemera Imana ariko ntituyemere nk’Imana yacu. Kwemera Imana nk’Imana yacu ni ukureka ikatwiyoborera. Dusuzume ukwemera kwacu niba atari uko “hakurya”. Imana twemera itagomba kuza mu byacu. Imana iraho itari Imana muri twe. Imana dusanga muri za Kiliziya ku cyumweru ubundi tukayisigayo tukazagaruka kuyireba ku kindi cyumweru. Imana itagera mu ngo zacu, Imana itagera mu midugudu, mu kazi kacu.

Nka Tomasi tugire tuti “ Mana yanjye

  1. Hahirwa abagira impuhwe , kuko bazazigirirwa”

Kuri iki cyumweru turazirikana Impuhwe z’Imana tukagira tuti ni icyumweru cy’impuhwe. Abavandimwe benshi barangije noveni yo kwiyambaza Impuhwe z’Imana n’andi masengesho menshi tuzagira muri iyi minsi kugira ngo Impuhwe z’Imana zidusakaremo.

Impuhwe z’Imana zizigaragariza muri twe. Kuziririmba no kuziyambaza byagombye kuba bijyana no kwitoza kugira impuhwe twebwe ubwacu. Yezu yatubwiye uburyo bwiza bwo kugwiza impuhwe, ni ukuzigira. “ Hahirwa abagira impuhwe , kuko bazazigirirwa” ( Mt 5,7). Iyaba ishyaka twagiraga mu kwiyambaza Impuhwe z’Imana ari ryo twagiraga mu kwitoza kuzigirira abandi. Ni benshi babaye, ni benshi bahangayitse bakeneye ubagirira impuhwe. Kugira impuhwe nta handi biva uretse kubona ishusho y’Imana muri bagenzi bacu. Ubugome abantu bashobora kugirira abandi barabanza bakabambura iyo shusho. Ntawuremye mu ishusho y’Imana gusumbya abandi ngo abe ari umwimerere (original) ngo abandi bakurikireho (photocopie). Ishusho y’Imana iri muri mugenzi wawe ituma umwibonamo ukamugirira impuhwe igihe azikeneye.

Ndahamyako isi ikeneye kumenya Impuhwe z’Imana kurusha igihe cya Mutagatifu Mama Faustina. Abashobora guheranwa n’ikibi bakiheba bakumva n’Imana itabagirira impuhwe n’abo ni benshi.

Kuri iki cyumweru twongere twereke u Rwanda Impuhwe z’Imana ngo abanyarwanda baziringire kandi na bo ubwabo bitoze kugira impuhwe mu mibanire yabo bitari mu magambo gusa.

Padiri Charles HAKORIMANA