Nimunkurikire nzabagira abarobyi b’abantu

Ku wa mbere w’icya mbere Gisanzwe, A, 13/1/2020

1º. 1 Sam 1, 1-6; Zab 116 (115), 12-14.17-19; . Mk 1, 14-20

1.Turyoherwe n’inyigisho

Turongeye dutangiye ibyumweru bisanzwe by’umwaka wa Lirurujiya A. Dukomeze turyoherwe n’inyigisho Nyagasani ashaka kutugezaho muri uyu mwaka wose twongeye gutangira. Muri uyu mwaka w’imbangikane, isomo rya mbere rizibanda cyane ku bitabo by’Amateka y’Umuryango w’Imana.

2. Amateka y’Imana n’abantu

Ayo mateka azatwigishe byinshi. Amateka y’abantu muri rusange yarahindanye. Yahindanyijwe n’ubwigomeke bwa muntu. Adamu na Eva bihaye kugena ubwabo icyiza n’ikibi. Bahisemo nabi kuko Sekibi ari yo yabayugiriyemo ibyo bibwiye ko bikwiye. Nyamara ibyo Sekibi ibona ko ari byiza, ni umwanda imbere y’Imana. Ibya Sekibi bihindanya mwene muntu agasiribanganya icyubahiro yahawe n’Imana agahindanya isi na bagenzi be. Amateka ya muntu yahindanyijwe kandi by’akarusho n’amaraso y’inzirakarengane nka Abeli. Gahini yaramwishe bityo akwiza inabi n’urupfu muri bene muntu bose. N’ibyaremwe byose icyo gihe byarakebanye.

Tuzamara ukwezi kose twumva mu isomo rya mbere Igitabo cya Samweli. Tuzumva amateka ye kuva na mbere y’uko avuka kugeza ku bigwi yagize muri Isiraheli. None twumvise umuryango Samweli yavukiyemo. Ise yari afite abagore babiri. Umwe yari yarahiriwe n’urubyaro agira kobwa na hungu. Nyamara Ana ari we uzaba nyina wa Samweli, we yari yarabuze urubyaro. Mu gihe kiri imbere tuzumva uko byagenze kugira ngo agire akana.

3. Ukuri kw’amateka yacu

Ukuri kw’amateka yacu ni uku: bamwe barahirwa abandi bakabura epfo na ruguru. Bamwe baravuka bagasanga ibyo bakeneye byose bihari, bakarya neza bagakura neza bakiga mu mashuli meza. Nyamara hari abandi bavuka bagasanga iwabo barakennye. Abo bavukira mu miruho basangira inyanya n’inyoni kuva bavutse kuzagera bavuyemo umwuka. Ibyo tubyumva dute? Ko Imana ishaka ko abantu bose bamererwa neza muri iyi si bayigana, iyo miruho yose ituruka he? Ni cya cyaha twavuze cyahobeye gihombanya Adamu na Eva gicuramisha Gahini.

Isi irimo ibyangombwa byose byo kubaho ariko bamwe bikubira byinshi bagacura abandi cyangwa bakabacura bufuni na buhoro. Yego hariho n’abarangara ugasanga ntibazi iyo bava n’iyo bagana. Ariko inabi ya muntu ni yo nkuruzi y’amagorwa ya bene se. Hariho n’ibyago nk’ibyo dusanga mu isi tubona ko nta muntu wabidukururiye…Nko kubona bamwe babyara bagaheka abandi bagapfa bihirika…Ibyo tutabashije kwisobanurira tubirekera Imana kuko ni yo yonyine izi impamvu zose z’ibintu byose.

4. Imibereho ishobora guhinduka myiza

Ivanjiri twumva yo ku buryo bwumvikana itwereka ko amateka ahinduka meza iyo abantu bemeye kumva icyo Yezu Kirisitu yigisha. Nta kindi cyamuzanye usibye kutumenyesha Data Ushoborabyose. Nta kindi kindi agamije usibye kutwerekeza mu nzira igana ijuru. Ni yo mpamvu umwe mu mirimo y’ingenzi Yezu Kirisitu yakoze wabaye uwo gutora intumwa ze yagombaga gutegurira kuzakomeza ubutuma mu gihe azaba yarasubiye mu ijuru. Izo ntumwa kandi, ni zo zakomeje gutora abasimbura bazo kugira ngo abantu bose bo mu bihe byose bazamenye ko Umwana w’Imana yigize umuntu kugira ngo bakire bazagere mu ijuru.

N’ubwo mu bihe byose hagiye hagaragara ba kagaraga cyangwa ba Nyamurwanyakirisitu, Inkuru Nziza y’umukiro ntizahwema kwigishwa. Muri iki gihe mu bihugu byinshi hagaragara abantu biterera hejuru bagashingarika ijosi ngo Imana ntacyo ivuze. Bahereye mu bihugu byibwira ko byateye imbere i Burayi bakwirakwiza inyigisho z’amajwe zigeze ku buce mwene muntu. Izo nyigisho zose z’amanusu ntizizigera zisumba Ivanjili ya Yezu Kirisitu mu kugeza mwenemuntu ku mahoro n’Urukundo rugeza mu ijuru.

5. Tube abarobyi

Dusabirane cyane, uko Simoni na Andereya, Yakoba na Yohani bemeye gusiga byose bagakurikira Yezu, natwe twigiremo amatwara yo gukurikiza Yezu maze amateka yacu tuyagire mashya twirinda icyaducumuza cyose kigamije kudutandukanya n’ukuri Yezu yaje kwamamaza. Izo ntumwa zahawe umurimo wo kurohora abantu barohamye mu mihengeri y’isi. Twitoze kuba abarobyi b’abantu. Yezu yaraturobye. Mu gihe twari hafi kumira nkeri, Yezu yaradutabaye adusubiza ubuzima.

Nasingizwe. Bikira Mariya aduhakirwe. Abatagatifu Hilari, Ivona, Serivi, Vivensi, Godifiridi, Remiji, Gumerisindo n’Umuhire Voronika wahowe Imana badusabire kuri Data Ushoborabyose.

Padiri Cyprien Bizimana            

ante. mattis dolor adipiscing sit Aliquam leo venenatis,