Inyigisho: Nimwakire Roho mutagatifu kugira ngo mwigiremo amahoro kandi mukire icyaha.

INYIGISHO YO KU MUNSI MUKURU WA PENETEKOSTI, A, 2014

Ku ya 08 Kamena 2014

AMASOMO: 10. Intu 2, 1-11 ; 20. 1Kor 12, 3-7.12-13; 30.Yh 20, 19-23

  1. Umunsi mukuru wa Pentekositi utwibutsa iki?

Umunsi mukuru wa Pentekosti wari umunsi Abayahudi bahimbazaga nyuma y’iminsi mirongo itanu Pasika ibaye. Mu gihe cya Yezu bawuhimbazaga bibuka umunsi bahaweho amategeko ku musozi wa Sinayi. Muri iki gihe abakristu bawuhimbaza bazirikana Roho Mutagatifu amanukira ku Ntumwa. Kuri pentekosti duhimbaza umunsi mukuru wa Roho Mutagatifu, Nyagasani YEZU yoherereje Intumwa ze n’abamwemera bose. Ariko se uwo Roho Mutagatifu udutuyemo atumarira iki? Roho Mutagatifu atuma tugira ubugingo bw’Imana, akatubera urumuri rutwumvisha Inkuru nziza ya Yezu Kristu kandi akaduha imbaraga zo kuyikurikiza twishimye!

Ku buryo bwuzuye Roho Mutagatifu yameneyekanye nyuma ya Pasika kandi amenyekanisha Imana Data na Mwana. Koko rero mbere ya Pasika ye, Yezu yatangaje iyoherezwa « ry’undi Muvugizi » (Umurengezi), ari we Roho Mutagatifu. We watangiye umurimo we kuva mu gihe cy’iremwa ry’ijuru n’isi akaba ari We kera « wabwirije abahanuzi ibyo bavuze », ubu noneho ari kumwe n’abigishwa kandi akaba muri bo (Yh 14,26), kugira ngo abigishe kandi abayobore « mu kuri kose » (Yh 16, 13). Nuko rero, Roho Mutagatifu agaragazwa nk’Undi ufitanye isano na Yezu na Se. Inkomoko ihoraho ya Roho Mutagatifu yigaragariza mu butumwa bwe ku isi. Roho Mutagatifu wohererejwe intumwa na Kiliziya yatumwe n’Imana Data mu izina rya Yezu, yoherezwa kandi na Mwana ubwe amaze gusubira kwa Se. Iyoherezwa rya Roho Mutagatifu nyuma y’ikuzwa rya Yezu, rihishura byuzuye ibanga ry’Ubutatu Butagatifu.

Ukwemera kw’intumwa ku byerekeye Roho Mutagatifu kwatangajwe n’Inama nkuru mpuzamahanga ya kabiri ya Kiliziya yabereye i Constantinople muri 381. Ni bwo hagiyeho izi ngingo eshanu zerekeye Roho Mutagatifu dusanga mu Ndangakwemera: « Nemera Roho Mutagatifu, Nyagasani utanga ubugingo, uturuka ku Mana Data na Mwana, arasengwa agasingizwa hamwe n’Imana Data na Mwana, ni We wabwirije abahanuzi ibyo bavuze ».

  1. Izina bwite rya Roho Mutagatifu, andi mazina n’ibimenyetso bimuranga

« Roho Mutagatifu », ni ryo zina bwite ry’Uwo dusenga kandi dusingiza hamwe na Data na Mwana. Kiliziya yamuhawe na Nyagasani kandi ikabihamya muri Batisimu iha abana bayo bashya (Mt 28, 19). Ijambo « Roho » risobanura ijambo ry’igihebureyi Ruah, risobanura ngo umwuka, umuyaga. Mu by’ukuri Yezu akoresha icyo kigereranyo gifatika cy’umuyaga, kugira ngo yumvishe Nikodemu igikorwa gishya gihebuje cy’Uwitwa Umwuka w’Imana, ari we Roho w’Imana (Yh 3, 5-8).

Andi mazina ya Roho Mutagatifu yatangajwe na Yezu ubwe ni « Umuvugizi », risobanura ngo : « Ubana na twe », Umurengezi(Yh 14,16.). Ubusanzwe iryo zina « Umuvugizi » risobanurwa ngo « Umuhoza », kuko Yezu ari we Muhoza w’ibanze. Roho Mutagatifu uwo nyine, Nyagasani ubwe amwita « Roho Nyir’ukuri » (Yh 16, 3). Uretse izina rye bwite rikoreshwa cyane mu gitabo cy’Ibyakozwe n’Intumwa, mu Mabaruwa ya Mutagatifu Pawulo dusangamo andi mazina: Roho wasezeranywe (Gal 3, 14 ;), Roho utugira abana b’Imana (Rom 8, 15 ), Roho wa Kristu (Rom 8, 11), Roho wa Nyagasani (2 Kor 3, 17), Roho w’Imana (Rom 8, 9.), na ho Mutagatifu Petero akamwita Roho nyir’ikuzo (1 Pet 4, 14).

  1. Ibimenyetso biranga Roho Mutagatifu

Amazi: ikimenyetso cy’amazi gisobanura igikorwa cya Roho Mutagatifu muri Batisimu, kuko nyuma y’isengesho ry’iyambaza Roho Mutagatifu, amazi ahinduka ikimenyetso cy’ingenzi cy’isakaramentu ry’ivuka rishya.

Ugusigwa amavuta: ikimenyetso cy’isigwa ry’amavuta na cyo gisobanura Roho Mutagatifu, kugeza ndetse n’ubwo gihinduka Uwo gisobanura. Mu masakaramentu yinjiza mu buzima bwa gikristu, isigwa ni ikimenyetso cy’isakaramentu ry’Ugukomezwa, ari na ryo muri Kiliziya z’iburasirazuba bita « isigwa rya krisima ». Ariko kugira ngo bigire ireme, ni ngombwa ko tugaruka ku isigwa rya mbere ryakozwe na Roho Mutagatifu, ari ryo rya Yezu.

Umuriro: mu gihe amazi asobanura ivuka n’uburumbuke bw’Ubugingo butangwa muri Roho Mutagatifu, umuriro wo ugaragaza imbaraga zihindura z’ibikorwa bya Roho Mutagatifu. Ku bw’isengesho rye, Eliya yamanuye umuriro wo mu ijuru utwika igitambo ku musozi wa Karumeli, ari wo ushushanya umuriro wa Roho Mutagatifu uhindura icyo ukozeho cyose. Yohani Batisita amenyekanisha Kristu nk’umuntu « uzabatiriza muri Roho Mutagatifu n’umuriro » (Lk 3, 16), uwo Roho Mutagatifu ni we Yezu azavuga ati « Nazanywe no gukongeza umuriro ku isi, mbega ukuntu nifuza ko wagurumana ! »  (Lk 12, 49). Mu gitondo cy’umunsi wa Pentekositi, Roho Mutagatifu yaje ku bigishwa mu ndimi « zisa n’iz’umuriro ». Uwo Roho ni We Pawulo Mutagatifu ahamiriza Abanyatesaloniki ati: « Muramenye ntimuzimye Roho w’Imana » (1 Tes 5, 19).

Igihu n’urumuri: Ibyo bimenyetso byombi ntibitana mu kumenyekanisha Roho Mutagatifu. Uhereye ku kwigaragaza kw’Imana mu Isezerano rya kera, Igihu mu kanya gato kibuditse, ubundi kimurika cyagaragazaga Imana Nzima n’Umukiza, cyabaga gitwikiriye ikuzo ryayo rihebuje. Nuko rero, ibyo bimenyesto byose byujujwe na Kristu muri Roho Mutagatifu. Uwo Roho Mutagatifu ni we wamanukiye kuri Bikira Mariya maze amubundikira mu « gicucu cye », kugira ngo asame kandi abyare Yezu (Lk 1, 35).

Ikiganza: Yezu yakizaga abarwayi, kandi agasabira abana umugisha abaramburiraho ibiganza. Intumwa ze na zo zabigenje zityo mu izina rye. Byongeye kandi, intumwa zagaha abantu Roho Mutagatifu zibaramburiraho ibiganza. Ibaruwa yandikiwe Abahebureyi, umuhango wo kuramburirwaho ibiganza iwushyira mu « mahame shingiro » y’inyigisho itanga. Icyo kimenyetso gikomeye cyane mu itangwa rya Roho Mutagatifu, Kiliziya yagikomeyeho mu isengesho ryo gusabira amaturo umugisha wa Roho Mutagatifu, igihe cy’itangwa ry’amasakramentu.

Urutoki: « Urutoki rw’Imana ni rwo (Yezu) yirukanisha roho mbi » (Lk 11, 20).

Inuma: nyuma y’umwuzure (ari cyo kimenyetso cya Batisimu), inuma Nowa yarekuye yagarutse itwaye mu kanwa ishami ritoshye ry’umuzeti, ari cyo kimenyetso cy’uko isi ishobora kongera guturwa. Igihe Kristu avuye mu mazi amaze kubatizwa, Roho Mutagatifu yamumanukiyeho mu ishusho y’inuma kandi amugumaho.

 

  1. Akamaro ka Roho Mutagatifu muri Kiliziya

Ubuzima nyabwo ni ingabire ya Roho Mutagatifu: Ubutumwa bumenyesha Mariya ivuka rya Yezu, bwabaye intangiriro « y’igihe cyagenwe » (Gal 4,4), ari cyo cy’iyuzuzwa ry’amasezerano. Mariya yahamagariwe gusama Uwo « ubusendere bwose bwa kameremana butuyemo mu buryo bw’umubiri ». Igisubizo Imana yahaye Mariya ku kibazo cye ngo : « Ibyo bizashoboka bite, kandi nta mugabo mfite ? » (Lk 1, 34), cyatanzwe ku bw’ububasha bwa Roho Mutagatifu :« Roho Mutagatifu azakumanukiraho » (Lk 1, 35). Ubutumwa bwa Roho Mutagatifu bujyana kandi bukaganisha iteka ku bwa Mwana. Roho Mutagatifu ni We Nyagasani utanga ubugingo.

Roho mutagatifu atubashisha kumenya Imana n’uwo yatumye Yezu Kristu : « Nta wavuga ngo “Yezu ni Nyagasani ”, atabibwirijwe na Roho Mutagatifu » (1 Kor 12, 3). « Imana yohereje Roho w’Umwana wayo mu mitima yacu ngo arangurure ijwi agira ati “Abba, Data !” » (Gal 4, 6). Icyakora uko kwemera ntigushoboka, niba kutaronkewe muri Roho Mutagatifu. Kugira ngo umuntu amenye Kristu, agomba mbere na mbere kubwirizwa na Roho Mutagatifu. Ni We utuyobora kandi akatubyutsamo ukwemera. Ku bwa Batisimu twahawe, ari ryo sakaramentu ry’ibanze dukesha ukwemera, Ubugingo bukomoka kuri Data twabuhawe muri Mwana, kandi tubushyikirizwa na Roho Mutagatifufu ubwe muri Kiliziya.

Ku bw’ingabire ze, Roho Mutagatifu ni we w’ibanze mu kudushishikazamo ukwemera n’ubugingo bushya, ari bwo « kumenya Imana Data n’uwo yatumye Yezu Kristu » (Yh 17, 3).

Kumenya amabanga y’Imana : « Nta wamenya amabanga y’Imana, uretse Roho wayo nyine » (1 Kor 2, 11). Nuko rero, Roho w’Imana ari na we uyimenyekanisha atuma tumenya na Kristu Jambo wayo, Ijambo ryayo ribeshaho, ariko ntiyivuge ubwe. « Uwavuzwe n’abahanuzi » atwumvisha Ijambo rya Data ; ariko We ubwe ntitumwumva. Tumumenyera gusa mu bikorwa aduhishuriramo Jambo, kandi akaduha ubushobozi bwo kumwakira mu kwemera. Roho Nyir’ukuri « utumenyesha » Kristu, « ntavuga ibyo yitumirije » (Yh 16, 13). Uko kutimenyekanisha kw’Imana, gusobanura impamvu « isi idashobora kumwakira kuko itamubona kandi ntimumenye », naho abemera Kristu bo baramuzi kuko abana na bo (Yh 14, 17).

Roho Mutagatifu akoresha Kiliziya : ubusabane buzima mu kwemera kw’intumwa yamamaza, ni yo tumenyeramo Roho Mutagatifu :mu Byanditswe bitagatifu byandikishijwe na We ; mu Ruhererekane, aho Abakurambere ba Kiliziya badahwema guhamya ibye ; mu Buyobozi bwa Kiliziya atera imbaraga ; muri liturujiya y’amasakaramentu ku bw’amagambo n’ibimenyetso, ari byo Roho Mutagatifu yifashisha kugira ngo adusabanye na Kristu ; mu isengesho igihe atwingingira ; mu ngabire n’imirimo Kiliziya yahawe ; mu bimenyetso biranga imibereho ya gitumwa n’iy’umwogezabutumwa ; mu buhamya bw’abatagatifujwe, Roho Mutagatifu agaragarizamo ubutungane bwe kandi agakomeza igikorwa cyo gukiza abantu.

Roho Mutagatifu atuma abana b’Imana barumbuka imbuto: Ku bw’imbaraga za Roho Mutagatifu, abana b’Imana bashobora kurumbuka imbuto. Koko rero, Uwatugemetse ku Muzabibu nyakuri azatuma turumbuka « imbuto ya Roho ari yo urukundo, ibyishimo, amahoro, kwihangana, ubugwaneza, ubuntu, ubudahemuka, imico myiza, kumenya kwifata » (Gal 5, 22-23). « Roho ni we bugingo bwacu »; uko turushaho kwiyibagirwa, niturushe « kuyoborwa na Roho ». Ku bw’ubusabane tugirana na We, Roho Mutagatifu aradutagatifuza, adusubiza Ihirwe ry’Imana, atugeza mu Ngoma y’ijuru kandi akatugira abana bishingiwe kibyeyi, atanga icyizere gituma Imana tuyita Data kandi tukagira uruhare ku ngabire ya Kristu, kwitwa abana b’urumuri kandi tukagira uruhare ku ikuzo ry’iteka.

  1. Icyo tuzirikana

Yezu ati: “ndabatumye”: umwigishwa (umukristu) wa Yezu wese ni intumwa. Ndabatumye, si ijambo rya kera, si iry’ejo hashije, uyu munsi n’ejo cyangwa ejobundi. Ni irya buri munsi. Turi intumwa. Tugomba kwitangira ubwo butumwa aho turi hose kugera n’aho twabupfira. Ese twatumwe he cyangwa kuri ba nde? Mu bantu tubana, twigana,dukorana, dukundana, mu bakomeye, mu bakene, mu bakire, mu mbohe, mu batagetsi no mu bajijutse, mbese ni kuri bose. Mu butumwa tugengwa na Roho w’imbaraga, Roho w’umutegetsi, Roho w’ubuzima, Roho w’uwazutse. Bose buzura Roho Mutagatifu: natwe tumwakire, aduhe imbaraga zo kubera Kristu abagabo mu bantu. Turamukeneye ngo turusheho kuba umuryango w’Imana, ngo tube umubiri wa Kristu n’ingoro ya Roho Mutagatifu. Mwebwe abakristu b’akazuyazi, mwebwe abadohotse mu butumwa, mwebwe abanebwe n’indangare, mwebwe abirata amaboko, mwebwe abirata ubwenge n’ubuhanga mugahumwa amaso n’ikoranabuhanga…Nimwakire Roho mutagatifu kugira ngo mwigiremo amahoro kandi mukire icyaha. Umutima n’imbaraga by’intumwa ni Roho Mutagatifu ni We uyobora Kiliziya akayikomeza kugeza igihe Kristu azagarukana ikuzo.

Mbifurije mwese umunsi mwiza wa Pentekosti!!

Padiri Théoneste Nzayisenga.

Publié le
Catégorisé comme Inyigisho