Catégories
Inyigisho

“Nimwicishe bugufi”

Umunsi Mukuru wa Mutagatifu Mariko umwanditsi w’Ivanjili

Amasomo  1Pet 5,5b-14  Zab 88,2-17    Mk 16,15-20   

Petero Intumwa aradushishikariza ubufatanye no kwicisha bugufi. Kwicisha bugufi ni umugenzo ntasimburwa mu bukristu ndetse no mu mibereho y’abantu muri rusange. Ni akaga iyo mu muryango w’Imana, iyo mu bakristu habuze ukwicisha bugufi.

Ikinyuranyo cy’ukwicisha bugufi ni ubwibone n’agasuzuguro. Twese tugomba kumva ko turi abavandimwe. Tugomba guharanira ikuzo ry’Imana. Hari ubwo bamwe bumva barusha abandi agaciro ko begereye Imana ho gato gusumba abandi.

Kwicisha bugufi bituma twumva abandi, tukabatega amatwi. Kwicisha bugufi bituma twihanganira abandi, bikaturinda kwigira abacamanza n’abasesenguzi b’ibyaha by’abavandimwe bacu kandi bihabanye n’Ivanjili. Biduha guhora tuzirikana ko twese buri wese ku giti cye dutegereje umucamanza w’intabera, ko byose bitarangirira kuri iyi si.

Kwicisha bugufi bituma twibuka gusabira abavandimwe bacu bari mu byago cyangwa bari mu bigeragezo bikomeye aho kubacira imanza no kubishimaho.

Kwicisha bugufi bituma tugira umwanya mu mutima wacu wo kwakira uje atugana cyane cyane ukeneye ko tumuba hafi tumufasha.Bituma twumva akababaro k’abandi.

Kwicisha bugufi bituma tubona umuntu wese ko aremye mu ishusho y’Imana bityo akaba ari akataraboneka. Kumva ko umuntu wese ari akataraboneka ni ikintu cy’ingenzi cyatuvura ubugome,ubwirasi n’ubwibone.Biturinda kwibwira ko hari uwaba arusha undi kuba umuntu. Ibi  bikenewe mu mibereho yacu uko tuvuga n’uko tubana n’abandi bitarangiriye mu magambo meza gusa. Abenshi barabivuze ndetse barabyandika igikenewe cyane ni ukubigaragaza. Kwicisha bugufi ntibigomba kuba nk’ikinamico ngo tubikine. Bigomba kugenda byisanisha n’uko tubayeho muri byose.

Uyu munsi turahimbaza Mutagatifu Mariko umwanditsi w’Ivanjili. Tuzi umwanya w’ibanze Ivanjili ifite mu kwemera kwacu. Bayobowe na Roho Mutagatifu abanditsi b’Ivanjili bakoze umurimo ukomeye udufasha gusobanukirwa n’ibyo twemera. Iyo batandika ibyo babonye n’ibyo bumvise ubu tuba tubyumva nk’umugani harivanzemo amakabyankuru menshi. Ntabwo babishyize mu nyandiko gusa ahubwo bagerageje no kubikurikiza mu mibereho yabo. Kiliziya ibaduhaho urugero kuko babayeho mu butungane.

Mariko Mutagatifu udusabire.

Padiri Charles HAKORIMANA

Madrid Espagne