“Nyagasani Yezu, ubishatse wankiza”

Inyigisho yo ku wa kane w’icyumweru cya mbere gisanzwe/ A

Amasomo:1Samweli 4,1-11; Mariko 1,40-45

Yezu Kirisitu, naganze iteka ryose.

Iyo umwaka urangiye undi ugatangira, ni igihe cyiza cyo kwibaza, ibyo umuntu akwiye gukomeraho akarushaho kubinoza, guhanga cyangwa gutekereza ibindi byamufasha kurushaho kuzuza no gusohoza umuhamagaro we. Dore ko ibyahise uba utabasha kugira icyo ubihinduraho kuko biba bigize amwe mu mateka y’ubuzima bwawe. Nyamara ukaba ugifite amahirwe yo kunoza none n’ejo hawe hakaba heza, ukosora ibitaragenze neza, kandi ugafata n’ingamba z’ibyo urimo gukora n’ibyo uteganya gukora.

None se ni nde wakwirahira ati: “Uko mundeba uku ndi nta makemwa, nta nenge, nta bumuga, yewe ubanza n’uwashungura ubuzima bwanjye kubona urukumbi byamubana ihurizo”. Niba rero ku mugani w’abakuru baragize bati: “Ugushungura ntakuburamo inkumbi kandi ati: Nta mwiza wabuze inenge, na nyirahuka igira amabinga” ni uko bitegereje bagasanga kubaho uri nta makemwa ari ibintu bigoye. Umuntu agira intege nke mu buryo bunyuranye, ni yo mpamvu byarangiye bashatse bene izo mvugo ngufi zuje ukuri. Mu yandi magambo izo nenge ziranga mwene muntu nazigereranya n’uburwayi bwo kubemba buri muntu agendana kandi ngira ngo ntawe utifuza ko yakira inenge zose zimucisha bugufi cyangwa zigatuma icyubahiro cye kigabanuka.

Niba rero, turi abashaka kugera aho Imana ishaka, cyangwa aho inzozi zacu zitwereka, mbere ya byose ni ngombwa, kwemera gusanga, Muganga ukiza ubumuga n’uburwayi bwose, ari we Yezu Kirisitu, tukamwikubita imbere n’umutima wiyoroheje, ngo adukize ubusembwa bwose buhumanya ya shusho y’Imana twambuwe n’icyaha cy’inkomoko tukayigarurirwa n’isakaramentu rya Batimu, rikatugabira ubugingo bushya bw’abana b’Imana.

Turebere urugero ku murwayi tumaze kumva mu Ivanjili aho batubwiye bati: “Umubembe aza amugana, apfukama imbere ye, amwinginga agira ati: “Ubishatse wankiza”. Iyi myifatire y’uyu murwayi wapfukamiye Yezu, akamutabaza amusaba ko byose byagenda bikurikije ineza ye, ni iyo ikwiye kuranga umuntu wese, ushakashaka kandi ushaka gukorera Imana nta buryarya. Dore ko hari igihe umuntu asaba, atabaza bigasa nk’aho ari itegeko, cyangwa uwo usaba hari ibyo wamubikije akaba yaribagiwe kubigusubiza cyangwa yarishe amasezerano mwagiranye ubimuha, none bikaba ari ngombwa gusubizwa ibyawe nta yandi mananiza. Aha twiyibutse ko muri icyo gihe, indwara y’ibibembe yafatwaga nk’igihano cyahawe uyirwaye, bityo akaba yaragombaga kubaho yitaruye abandi, nko mu masenga, kugira ngo adahumanya abazima. Iyi ndwara rero yakwicaga uhagaze kuzagera upfuye burundu. Uyirwaye nta ejo heza yari yiteze, uretse urupfu rumutegereje.

Natwe hari ubwo tugera mu bihe bikomeye, mu bibazo by’insobe, mu burwayi, mu nenge n’intege nke, tukisanga mu bihe bidukomereye, tukabura amajyo cyangwa amerekezo, mbese bigasa no gukurikira umuhanda banditseho, ngo umuhanda cyangwa inzira itagira aho ijya. Ese iyo tugeze mu bihe by’amahina tubyitwaramo dute? Ese aho ntiducika intege tukiheba? Aho ntiduhebera urwaje tukipfumbata? Oya, uzahore wizeye Yezu, ni inshuti idasubira mu gutabara uyizera.

Nk’uko uyu mubembe, yanze guheranwa n’amabwiriza, amategeko n’agahinda, ahubwo agafata icyemezo cya kigabo agasanga uwo yizeraga ko yamukura muri ako kaga ari we YEZU KIRISITU. Ntiyatinye, yemeye kurenga ku byo abujijwe, kuko burya igihe cyose amagara atewe hejuru, ugomba kuyaramira no kuyarengera utitaye kuvuga ngo hari amabwiriza, kuko byose bibereyeho kurengera ubuzima. Gusa ibanga ni rimwe, ni uko iyo utakamba, ugomba kubikorana ubwiyoroshye n’ikizere ufitiye uwo ubwira, ntumusange uca ibiti n’amabuye ahubwo mu bwitonzi uti: “Ubishatse wankiza… wareba uko ungenza”. Dufate urugero: iyo turi gutura igitambo cy’Ukaristiya twibuka kandi tukizera ko Yezu ari rwagati muri twe, kandi ko tumuhabwa ngo atumare inzara n’inyota ya roho, ndetse akatubera ikiramiro mu buzima bwacu bwa buri munsi. Ese tumwegerana kandi tukamuhabwana icyubahiro akwiye? Ese tumenya kwiyoroshya iyo tumugezaho ibitubangamiye byose ngo adutabare cyangwa adufashe kubona ibisubizo by’ingorane duhura na zo? Tubikorana uwuhe mutima, iyo tubihawe se ho twitwara gute? Aho twibuka gushimira Imana n’abo yaduhaye ngo batube hafi?   Twibaze ariko tunashaka igisubizo gikwiye.

Igisubizo Yezu Kirisitu yahaye umubembe ni na cyo aha buri wese umugannye akamutabaza. Wowe kimwe nanjye aratubwira ati: “Ndabishatse kira”. Tujye rero twegera Yezu, tumwizeye kandi twiyoroheje kuko ari we uzi icyo dukeneye kurusha ibindi tumubwire abikore uko ashaka. Azaduha igisubizo gikwiye.

Aha twakwibuka ko abayisiraheli bari bategereje, Umukiza, Uwasizwe, uzaza yuje ikuzo n’ububasha maze akabakiza abanzi babo. Mbese ihanga ryabo rikigaranzura andi mahanga yose yari yarababoneyeho urw’agashinyaguro, nk’uko twabyumvise mu isomo rya mbere aho barwanye n’abafilisitiya, bagatsindwa, bakitabaza Ubushyinguro bw’Isezerano ry’Uhoraho, ngo buze bujye hagati yabo bubarinde gutsindwa urugamba, ariko intambara ikangira abayisaraheli bayitsinzwe n’ubushyinguro bari biringiye bukanyagwa. Kandi bizeraga ko buzabahesha umutsindo. Inzira z’Imana zihabanye n’izacu, ni yo mpamvu tugomba ubwitonzi mu byo dukora kugira ngo tutava aho dukora ibidakwiye.

Utabaza Imana akwiye kuyisaba atuje kandi yizeye ko izamugenera igikwiye kuko ari umubyeyi uzi neza icyo buri mwana we akeneye. Hari ubwo dusaba tukagira ngo Imana yapfutse amatawi yayo, ntiyumvise, nyamara yaratwumvise ikaduha ibyo yabonaga dukennye kandi dukeneye kurusha ibindi ariko kuko tutahawe ibihuje n’ubukirigitwa (ibyifuzo byacu) bw’amatwi yacu, ugasanga twayivumbuyeho, ngo turasenga ntiyumve. Nyamara se ni iki wagurana kuryama ugasinzira, ugakanguka ugakomeza ubuzima…Jya wibuka ko hari ababonye rirenze ntaribone rirasa n’uwaribonye rirasa ntabone rirenga, maze ushimire ikigutije ubuzima kandi ube umuhamya w’urukundo n’ineza byayo muri bagenzi bawe.

Bavandimwe, iyo ndwara yo kubemba tuyigereranye n’ibitugora hano ku si tugahemuka maze dutakambire Yezu, niba abona bikwiye ayidukize, maze uko uwo mubembe yakize ntiyihererane Ineza n’Uwayimugiriye, natwe twamamaze ibitangaza Yezu adahwema kutugirira, maze aduhunde imbaraga tube abagabuzi b’urukundo, impuhwe, ubutabera, amahoro n’ibyishimo muri bagenzi bacu. Amina

Padiri Anselimi Musafiri.

vel, libero. commodo massa dapibus risus. pulvinar leo. libero accumsan at