Nyuma y’urupfu rw’umuntu hari iki?

Inyigisho yo ku cyumweru cya XXXII gisanzwe/ Umwaka C, 10/11/2019

Amasomo: 2 Mak 1-2.9-14; 1Tes 2,16-3,5; Lk 20,27-38

1.Benshi bavuga byinshi

Yezu naganze iteka.

Hari abantu batari bake bakunze kwibaza amaherezo y’ubuzima. Bakibaza igikurikira iyo umuntu amaze gupfa. Ese haba hari ubundi buzima? Ese koko abantu bazazuka? Ese hari iki nyuma y’urupfu? N’ibindi bibazo binyuranye. Hakaba n’abavuga ko byose birangira iyo umuntu apfuye. Nta kindi, gikurikiraho dore ko nta n’uwapfuye ngo agaruke abwire abe n’inshuti uko byifashe. Kuri iyi ngingo havugwa byinshi.

  1. Ku bakirisitu bite?

Ariko se twe abakristu bite? Twe nta gushidikanya, kuko Yezu Kirisitu, Umwana w’Imana, yaje muri iyi si, afata imimerere y’abantu, asa natwe muri byose, uretse icyitwa icyaha. Kugira ngo asubize muntu mu nzira ikwiye, yahisemo kuza mu isi atwereka uko twanyura Imana umubyeyi wacu, tukaronka ubugingo bw’iteka, ni ko kudupfira ku musaraba, arahambwa ku munsi wa gatatu arazuka. Dore isezerano yaduhaye: “Ubu ngiye kubategurira umwanya. Nimara kubategurira umwanya, nzagaruka mbajyane hamwe nanjye, kugira ngo aho ndi, namwe abe ari ho muba” (Yh14, 2-3)

  1. Bene Kanyarwanda bo hambere

Kuri iyi ngingo twavuga gato uko abakurambere bacu b’abanyarwanda bemeraga ibintu. Abakuru batubwira ko, iyo umuntu yapfaga yahindukaga umuzimu. Ariko bakemera ko umuzimu afite ububasha ku bazima, ari na ho bakoraga umuhango wo kubagusha neza, babaterekera ngo batazabateza ibyago. Nyamara n’ubwo bakoraga uwo muhango bari bazi ko, uwakoze neza, ineza ye itarangirana n’urupfu kimwe n’uwakoze nabi. Ni ho bavugaga ko, Abapfuye bararanzwe n’ibikorwa byiza, nyuma y’urupfu bajyaga kwibera mu kirunga cya Karisimbi aho bibera hatuje. Na ho abakoze nabi, bo bakerekeza muri Nyiragongo, aho baba mu muriro wacyo mu bubabare. Aha haratwereka ko n’ubwo batari bakamenye umukiro dukesha Yezu, bo bemeraga ko ukoze neza aruhukira mu mahoro.

4.Inzira yo kumva ibiza nyuma yo gupfa

None se koko, nyuma y’urupfu hari iki? Buri munsi nyamara uretse ko duhora tujagaraye muri byinshi, ntidufate umwanya wo gutekereza, mbona buri wese, buri munsi anyura mu nzira y’urupfu n’izuka. Iyo dusinziriye, ntawe uba uzi iyo ari, hakaba n’ubwo twitabaza ibitubyutsa ku isaha dushaka, nyamara byavuza inzogera na yo ntituyumve, nyamara nyuma ukikangura na ko ineza y’Imana ikadukangura. Ku mugani wa cya gisakuzo ngo: “Karuhura umukuru w’urupfu. Igisubizo cyacyo ni urupfu”. Ese aho ntihava inzira yo kumva neza igikurikira urupfu. Dore ko niba ibitotsi bituganza bikarangira ntawe umenye aho ari, ugakanguka, bikaba buri munsi, nabigereranya no kubaho ugapfa bigakurikirwa n’izuka. Kubera ko ari ibyo twiberamo, ntabwo dufata umwanya ngo twiyumvishe ukuri bihatse.

5.Ruza aho rushakiye ku cyavutse cyose

Abantu baravuka, bagakura, bikarangira bapfuye. Icyavutse cyose, ikifitemo ubuzima kirazimira. Hafi ya twese, iyo mu buzima bwacu ibintu bimeze, tubona ko ubuzima ari bugfi, nyamra iyo bwashaririye, usanga umunsi cyangwa ijoro byatubanye umwaka wose. Urupfu ntirugira isaha ruzira aho rushakiye, ruhutera rugahuta bamwe abandi rubizigamiye ejo cyangwa ejo bundi.

Ubuzima buranezeza, burashimisha. Muzitegereze umwana asekera bose, utunyoni iyo turirimba, uturabo tukarabya, urukundo rukogera hagati y’abashakanye, ubibonye wese ahanika amajwi yishimira impano y’ubuzima. Nyamara muri uko kwishimira iyo mpano y’ubuzima, byose birangira urupfu rubihitanye. Ubu buzima tubamo busozwa n’urupfu.

6.Roho yo ntipfa

N’ubwo birangira dupfuye ariko hari icyo tutagomba kwibagirwa, ni uko twifitemo ibanga, nta rindi ni roho muntu afite yo ikaba idapfa. Mu isomo rya mbere, twiyumviye abana badatinya kwicwa kuko, bizeraga ko ubu buzima nta kavuro ahubwo ko, upfuye azukira kubaho. Tuzirikane ubuhamya bwabo aho babahatiraga kwica amategeko y’abakurambere, bagahitamo kwemera kwicwa bazira ukwemera kwabo aho guhemuka: “Uratwambura ubu buzima turimo, ariko Umwami w’isi azatuzura, tubeho iteka,….Ikiruta ni ukugwa mu biganza by’abantu upfanye icyizere uhabwa n’Imana cy’uko izakuzura

7.Gupfa aho guhemuka

Abo bana bakomeye ku mategeko y’Imana, bahitamo gupfa aho guhemuka, kuko bemera ko ubuzima Imana yabahaye izabubasubiza ibazura. Natwe mu Ndangakwemera yacu turabihamya tuti: “Kandi ntegereje izuka ry’abapfuye, n’ubugingo bwo mu gihe kizaza”. Niba se tubihamya ni kuki twahindukira, tugashidikanya ko nyuma y’urupfu hari izuka? Ibaze nawe wishakemo igisubizo.

8.Yezu: Urupfu si iherezo rya byose

Yezu rero uyu munsi aratwereka ko urupfu atari iherezo rya byose, si rwo rufite ijambo rya nyuma ku buzima. Ahubwo urupfu ni umuryango utwinjiza mu buzima butazima ari bwo ubugingo bw’iteka. Ubwo bugingo yabuturonkeye, ubwo yazaga muri iyi si, akarangwa n’ineza aho anyuze hose, akereka bose ko ineza igiriwe bose ihabwa igihembo cyo kudaheranwa n’urupfu ahubwo cyo kuzukira kubaho nka We.

9.Ibihe bibiri bikomeye: Kuvuka no gupfa

Icyo tutagomba kwibagirwa ni uko, habaho ibihe bibiri bikomeye mu mateka ya muntu. Ni Ukuvuka no Gupfa.

Kuvuka ni ukugera kuri iyi si. Uzirikanye iryo yobera ry’ubuzima usanga rwose harimo ineza n’urukundo rw’Imana kuva mu isamwa kugera tuvutse. Tugera ku isi tukakirwa n’abacu, bagakora ibyo tutibashirije kuko muntu mbere yo kubaka amateka ye, abanza guhabwa umusanzu n’abo asanze hamwe n’Imana yo Mugenga w’ubuzima. Turiyubaka tukiteza imbere, tukabungabunga ubuzima dushaka ko hatagira ikibuhungabanya. Ubwo buzima buryoha iyo nyirabwo abayeho arangwa n’ineza n’urukundo kuko ubyihungije aba yarapfuye ahagaze.

10.Imana ntawe ishaka ko arimbuka

Naho Gupfa, ni uko inyuma yacu tuba tuhasize amateka tudashobora kugira icyo duhinduraho. Ni uko tugahorana ya Neza n’urukundo rw’Imana ruduhamagara, ikatwakira nk’abana bayo, ngo dusangire ikuzo na Yo. Iyo neza yo kwakirwa n’Imana mu ikuzo ryayo, ni twe tubyiyaka, kuko Imana itishimira ko umunyabyaha yarimbuka, ahubwo ishaka ko yakwisubiraho, akareka imigenzereze ye mibi akarangwa n’ineza maze akazabaho, mu bugingo bw’iteka.

11.Imana y’abazima

Imana yacu rero, yo idukunda urudacuya, ntabwo rero ari Imana y’abapfuye, ahubwo ni iy’abazima. Koko bose ni Yo babereyeho. Iki kikaba igisubizo Yezu yahaye abasaduseyi batemeraga izuka, kandi bagahindukira bakigisha imbaga ibyo Musa yabwiwe byose n’Uhoraho. Ni uko abafatira ku byo bigisha ahugura ubwenge abasobanurira ko na MUSA yerekanye neza ibirebana n’izuka bo batemeraga ubwo yari imbere y’igihuru kigurumana: “Akita Nyagasani, ngo Imana ya Abrahamu, Imana ya Izaki, n’Imana ya Yakobo” ikaba Imana y’Abazima.

12.Ubugingo bw’iteka dukesha Yezu Kirisitu

Nguko ukwemera kwacu, rero nyuma y’ubu buzima duhishiwe ubugingo bw’iteka dukesha Yezu Kristu Umwana w’Imana wigize umuntu, ngo Inyoko muntu ive mu cyaha no mu rupfu ahubwo igane mu nzira igana ubugingo bw’iteka. Dusabwe rero kuba ababibyi b’ubuzima, amahoro, ibyishimo n’urukundo aho tunyuze hose, ngo bitubere inzira yo kuzaronka ubugingo bw’iteka. Amina

Padiri Anselimi Musafiri

odio ut dolor. vel, elit. felis et, diam ut leo. Donec ante.