Ni jye wabatoye

KU YA 14 GICURASI: MUTAGATIFU MATIYASI INTUMWA

 

AMASOMO: 1º. Intu 1, 15-17.20-26

2º. Yh 15, 9-17

 

NI JYE WABATOYE 

Uyu munsi, aho Kiliziya ya KRISTU yogeye ku isi yose, twahimbaje Mutagatifu MATIYASI na we wabaye umwe mu Ntumwa za YEZU. Iby’itorwa rye, twabibwiwe n’isomo rya mbere. Na ho Ivanjili ya none ari na yo tumaze iminsi twumva, yatugejeje ku ngingo y’umwihariko tugiye kuzirikanaho.

Yezu abwira intumwa ze ati: “Simwe mwantoye, ahubwo ni jye wabatoye, maze mbashyiraho kugira ngo mugende, mwere imbuto, kandi imbuto yanyu igumeho” (Yh 15, 16). Ayo magambo ahumuriza bihagije intumwa. Umurimo wazo, ntukwiye kubahangayikisha kuko atari bo ubwabo bitoratoje. Gukurikira YEZU KRISTU no kumwamamaza muri rubanda, si umurimo bazakora bonyine. Uwabatoye azakorana na bo iteka ryose. Ni we nyir’ubwite. Yarabatoye kandi yabahisemo abazi. Azi neza ko bazamuhamya kugera ku ndunduro. Aha twakwibaza: Ese na Yuda Isikariyote wa wundi wamugambaniye, YEZU yari amuzi neza? Kuki yamutoye azi neza ko azamugambanira? Icyo ntitwagisubiza ijana ku ijana ariko tuzi ko mugutora intumwa ze, YEZU atabanza kubacira urubanza. Arabatora akabareresha inyigisho y’Ingoma y’Imana agenda abagezaho. Ntawe utazi ko ingaruka z’icyaha cy’inkomoko zikurikirana muntu aho ava akagera. Ububasha yifitemo n’ubwigenge yahawe bimubera akenshi nk’inkota y’amaugi abiri. Abikoresha neza akubaha Urukundo rw’Imana. Iyo abikoresheje nabi bimugeza ahabi. YEZU yatoye YUDA amuzi ariko yashatse kugaragaza urukundo yari amufitiye kugera ku ndunduro. Kubera ubugambanyi yakururiwe n’umururumba w’iby’isi, yiyahuye adasabye imbabazi. Ntitwamenya uko urubanza rwe rwaciwe cyangwa ruzacibwa. Icy’ingenzi uyu munsi kuri twebwe, ni ukwirinda gupfusha ubusa umwanya KRISTU yadushyizemo. Kuwuhagararamo twirinda kuba ba Yuda Isikariyote cyangwa ingwizamurongo. Ni icyo twakwigira kuri Matiyasi.

MATIYASI ni izina risobanura “impano y’Imana”. Yari umwe mu bari bagendanye na YEZU n’intumwa ze kuva kuri Batisimu ya Yohani kugeza igihe YEZU asubiriye mu ijuru. Matiyasi yari intungane kandi yari yarakunze inyigisho za YEZU. Ni ngombwa ko mu makoraniro yacu haboneka abantu koko buzuye Roho Mutagatifu kugira ngo imirimo inyuranye ya Kiliziya ibashe gutunganywa. Nta muntu n’umwe kamara muri Kiliziya. Ariko kandi abashinzwe ubutumwa bunyuranye, bakwiye gufashwa kubwitangira bunze ubumwe na KRISTU Nyir’ubwite. Ba Yuda ntibazabura kubera impamvu navuze mbere. Ibyo ntibyaduca intege kuko YEZU KRISTU afite ubushobozi bwo guhora atora abashaka kumukorera mu ntama ze. Kimwe mu bituma ubuhemu cyangwa uburangare bwinjiza bamwe mu murongo wa Yuda, ni uburangare bw’abakuru batita bihagije ku ikenurabushyo mu bo bakuriye. Hakenewe abayobozi bifitemo ubuzima bwa gikristu, abantu bunze ubumwe na YEZU KRISTU. Abantu bakunda YEZU KRISTU n’amabanga ye yose. MATIYASI yadusigiye urugero muri urwo rwego.

Kilimenti wa Alexandiriya atubwira ko MATIYASI yitangiye ubutumwa muri Etiyopiya. Yigishize ashize amanga. Yahinduye abakristu abantu batagira ingano. Yarangije ubuzima bwe ahowe YEZU KRISTU ahabwa ikamba ry’ubumaritiri. Kuva muri ibyo bihe Kiliziya yakomeje kugira abantu b’intwari bitangira ubutumwa. N’uyu munsi bariho kuko YEZU KRISTU Nyir’ubwite ariwe ubwe ubitorera. Gusa rero, bamwe bashobora kumubera ba Yuda. Nta we bikwiye guca intege kuko, uko byagenda kose. Icy’ingenzi ni ugupfukama tugahora dusabira Kiliziya kugira ngo abayikuriye bahore bumvira Roho Mutagatifu mbere ya byose, bazashobore kujya bahangana n’ibihe bikomeye, bashaka ikintu cyose cyatuma abemeye KRISTU badacika intege kandi bakarindwa ibitekerezo bibayobya. 

MATIYASI INTUMWA, UDUSABIRE

BIKIRA AMARIYA ADUHAKIRWE

YEZU KRISTU ASINGIZWE UBU N’ITEKA RYOSE.

Padiri Cyprien BIZIMANA

Imana ntirobanura

ICYUMWERU CYA GATANDATU CYA PASIKA

13 GICURASI 2012 

AMASOMO: 1º. Intu 10, 25-26.34-35.44-48

2º. 1 Yh 4, 7-10

3º. Yh 15, 9-17

 

IMANA NTIROBANURA 

Amaze kubona ukuntu Koruneli w’i Kayizareya afite ishyushyu ryo kumva Inkuru Nziza, Petero intumwa yariyamiriye mu byishimo ati: “Noneho numvise mu by’ukuri ko Imana itarobanura, ahubwo inyurwa n’umuntu wa buri hanga iryo ari ryo ryose uyitinya kandi agaharanira ubutungane” (Intu 10, 34b-35). Ni uko rero Imana Data Ushoborabyose yigaragarije umuryango wayo Isiraheli. Mu mateka maremare abayisiraheli banyuzemo, si ko bahise bumva iyo mimerere y’Imana y’ukuri. Ni igihe kirekire bamaze bibwira ko Imana yabibwiye ibinyujije kuri Musa, yari umwihariko wabo. Nyamara Imana Ishoborabyose yakomeje umugambi wayo wo kwigaragariza n’andi mahanga yose yo ku isi. Ibyo byabaye impamo ubwo YEZU KRISTU yaje kuzuza umugambi w’Imana Data mu bantu. We nyine, ibyo kwifungirana mu bayahudi yagaragaje ko bidafite ukuri. Ni yo mpamvu yagiye agirira neza uwo bahuraga na we wese yaba umuyahudi cyangwa umunyamahanga. Kuri iki cyumeru, tureke amatwara yacu amurikirwe n’urwo rukundo rurenga imipaka yose y’abantu n’ibihugu.

Mu Ivanjili ya YEZU KRISTU yanditswe na Yohani, twakomeje guvomamo muri iyi minsi inyigisho zidukangurira gukunda YEZU KRISTU no gukora byose dukurikije urugero yadusigiye. Zadukanguriye kugendera mu nzira z’urukundo, rwa rundi ruranga abana b’Imana by’ukuri kuko nyine “Imana ni urukundo” nk’uko Yohani yabitubwiye mu isomo rya kabiri. Imibereho iyobowe n’Urukundo, ni yo iranga umuntu wifitemo ubuzima bw’Imana y’ukuri. Tuzi ko imana nyinshi zo muri iyi si na zo zizeza abantu amahirwe. Izo mana abantu bihangira, ni imana zitabaho kuko ubuzima bw’uwazikurikiye busozwa n’urupfu nta kindi. Kugira amaboko, kugira amafaranga n’iby’isi bindi, ntibihagije. Ingorane zikomeye ariko, ni iz’umuntu washyize amiringiro ye muri ibyo byose by’isi maze akarwanya Imana y’ukuri, Data Ushoborabyose, Se wa YEZU KRISTU natwe twese. Ayobowe na shitani kuri iyi si cyane cyane iyo arwanya iby’Imana akanangira rwose mu mutima we. Uwo nguwo, sebyaha twita serupfu aba amutegereje. Rimwe na rimwe abantu nk’abo, ntibabura gupfana agahinda n’ugukuka umutima. Umunsi umwe, nahurujwe na benewabo b’umugabo wari urembye cyane mbese agiye gupfa. Yari mu kigero cy’imyaka nka mirongwine. Bambwiye ko ubuzima bwe bwabaye ubw’amaraha gusa. Ngo yiberaga mu bagore no mu nzoga. Ageze ku ruvumba rwa nyuma, bene wabo ba hafi bamubwiye ko bagiye guhamagara Padiri akamuzanira amasakaramentu. Yabasubije ko adakeneye ibyo! Ariko kubera bo bari bazi akamaro k’amasakaramentu, bantumyeho. Narahageze arasakuza cyane ngo nta byo ashaka, aranangira rwose. Icyadutangaje ni uko yapfuye yakutse umutima rwose avuga ngo arabona ibintu biteye ubwoba: ibiyoka n’ibikoko by’inkazi. Yapfuye mu by’ukuri ahangayitse cyane. Ntidushobora kwemeza ko amahoro n’Urukundo yivukije ku bwende, yabibonye avuyemo umwuka. Twemera impuhwe z’Imana isendereza ku bantu bose ababi n’abeza. Icyo duhamya ariko, ni uko zigirira akamaro uwemeye kuzakira. Uwemera YEZU KRISTU muri iyi si, azabana na we iteka. Azishima iteka mu ijuru.

Ikimenyetso cy’ibyishimo by’iteka, ni ukwigishwa ibya YEZU KRISTU ukabikunda ukemera kuyoborwa n’Inkuru Nziza ye. Uwo waba uri we wese: yaba umwirabura cyangwa se umwera, umugiraneza n’umugiranabi, umukire n’umukene, uwize n’utarize…bose iyo bumvise Inkuru Nziza y’Urupfu n’Izuka bya KRISTU bakabyemera, barakira. Ni ko byagendekeye Koruneli wari umunyamahanga akaba n’umutegeka w’abasirikare. Muri rusange, iyo umuntu atifitemo kabutindi y’umutima unangiye, ibyiza byose by’ukuri abikingurira umutima. Urugero ni Koruneli uwo. Ngo “yari umuntu wubaha kandi agatinya Imana, we n’urugo rwe rwose, akagirira Ubuntu bwinshi rubanda kandi agasenga Imana ubudahwema” (Intu 10, 2). Abantu bifitemo amatwara nk’ayo, ntibarwanya Urukundo rw’Imana. Igihe cyose babwiwe Inkuru Nziza bashobora kuyemera maze ikabakiza bagakiza n’abandi. YEZU bemera kwakirana urukundo abakiza ibyaha byabo byose kuko ni We “gitambo cyo guhonerera ibyaha byacu” (1 Yh 4, 10).

Imana ntirobanura. Nimucyo kuri iki cyumweru tuyerekezeho amaso y’umutima wacu. Dusabire abantu bifitemo umutima unangiye kugira ngo bakire impuhwe zayo, bashobore kwakira YEZU KRISTU mu ngo zabo, mu miryango yabo, mu karere kabo, mu bihugu byabo. Dusabire kandi abantu bose barengana hirya no hino biturutse ku ivangura iryo ari ryo ryose. Hari benshi bavutswa uburenganzira bwabo bitewe n’uko ababakuriye bimitse sebyaha mu mitima yabo. Tubasabire kwihangana no kurangamira YEZU KRISTRU kugira ngo ibikomere byabo bitabavutsa ubugingo bw’iteka. Twisabire natwe ubwacu kugira ngo buri munsi turusheho kuyoborwa n’Ijambo ry’Ukuri kwa YEZU KRISTU, dukunde bose nta vangura kandi twiyemeze kuvuga hose Inkuru Niza y’UMUKIRO NYAKURI.

Iki cyumweru cyahuje n’itariki ya 13 gicurasi, itariki itibagirana abana b’i Fatima muri Porutugali babonekewe. Hari mu mwaka w’ 1917. Bikira Mariya ashaka ko twakira Umutima mutagatifu wa YEZU wo soko y’URUKUNDO n’impuhwe za Nyagasani.

BIKIRA MARIYA ADUHAKIRWE

YEZU ASINGIZWE UBU N’ITEKA RYOSE.

Cyprien BIZIMANA

Isi nibazira, mumenye ko ari jye yabanje kwanga

KU WA GATANDATU W’ICYUMWERU CYA GATANU CYA PASIKA,

12 GICURASI 2012 

AMASOMO: 1º. Intu 16, 1-10

2º. Yh 15, 18-21

 

ISI NIBAZIRA, MUMENYE KO ARI JYE YABANJE KWANGA 

Yohani intumwa akoresha ijambo isi, ashaka kuvuga abantu bose batuye mu isi ariko badakunda Umuremyi wayo. Ejo YEZU yatubwiye ko yemeye guhara amagara ye agirira incuti ze. Uyu munsi atubwiye ko isi yamwanze. Bityo, intumwa n’abigishwa be, ntibazatungurwe n’uko isi ibanze. YEZU bamugiriye urwango ari umuziranenge. Bamwishe urupfu rubi bamubambye ku musaraba. Abamukurikiye na bo, bamwe barabambwe, abandi bavugijwe ubuhumetso baraca, abandi batawe mu nzuzi. Ibyo byabaye mu ntangiriro za Kiliziya. N’ubu ariko ruracyageretse. Hirya no hino twumva abantu bicwa bazira ko ari abakristu. Uko byagenda kose, isi igira uburyo bwinshi bwo gutoteza intore z’Imana. Iyo ariko, si impamvu yatuma muri iki gihe turuca tukarumira. Igihe cyose KRISTU adusaba kwamamaza ineza n’urukundo bye kugira ngo turokore roho za benshi bashoboka mu Izina rye. Nimucyo dusabe none ingabire yo gutsinda ibitotezo byose twahura na byo mu bukristu bwacu.

Umuntu wese utaratoterezwa amatwara mazima yiyemeje yo kugendera ku Ivanjili ya KRISTU, ntashobora kumenya igipimo cy’Urukundo rwa KRISTU agezeho. Intwari iboneka ku rugamba. Umukristu wituramiye mu gihe sebyaha yigaragaza, uwo ntashobora kujya mu ruhando rw’abatagatifu. Nyamara kandi Imana yaturemeye kuyihora imbere turi abaziranenge n’abatagatifu. Umugambi idufiteho, ni ukudutagatifuza mu Mwana wayo YEZU KRISTU. Guharanira ubwo butagatifu, si ukwituramira duturanye n’icyaha. Kuba intwari kuri urwo rugamba ni uguhagarara tugashengerera YEZU KRISTU twakira mu buzima bwacu imigenzereze ye. Iyo nzira irakomeye kubera amakuzo y’isi duharanira. Nyamara nta mugaragu usumba shebuja. Ibyabaye kuri YEZU, nta cyahindutse na n’ubu. Guhitamo korohera isi, ni ko gutatira igihango cy’Umusaraba YEZU yagaragarijeho umutsindo.

Kuki umukristu agomba gutotezwa kuri iyi si? YEZU yaduhaye igisubizo: “Isi nibazira, mumenye ko ari jye yabanje kwanga. Iyo muba ab’isi, isi yakunze ikiri icyayo; ariko kuko mutari ab’isi, kandi nkaba narabatoye mbakura mu isi, ni cyo isi izabaziza”. Nta kintu na kimwe cyagombye gutungura umukristu nyawe mu gihe atoterezwa ubukristu bwe. Hari abagabo batoteza abagore babo ngo kuko bajya gusenga. Akenshi bakomeza kuryana kugeza aho batandukana. Akenshi abakobwa bapfa guhitamo fiancé (uwo bazashakana) nta gushishoza ku bijyanye na roho. Cyane cyane ariko, impamvu ni uko batangirira urukundo rwabo ku byaha: kutubaha umunsi w’Imana bihitiramo kujya gutembera no kuryoha mu isi; kudatekereza ku nshingano zibahuje; kwibanira mu cyaha cy’ubusambanyi nta cyo bikopa. Ibyo bireze i Burayi. Dusabe kugira ngo iyo mico idakomeza kwanduza roho y’umunyafurika muri rusange n’umunyarwanda ku buryo bw’umwihariko. Duhore twisuzuma: Ese incuti zacu zidufasha kubaka neza ubuzima bwacu cyangwa ni amarangamutima aduhuza? Abana batari bake bakura bikundira isi kuko imico myiza dukomora kuri KRISTU batigeze bayonka mu mashereka y’ababyeyi babo. Bakeya bacika kuri iryo cumu rya sekibi, bagorwa no kwitandukanya n’isi maze uko bakura bakagenda bakora nabi kuko baba banga kwitandukanya n’isi ibakikije. Umwe mu miti ishoboka, waturuka mu kwihara kw’abakuriye Kiliziya ku nzego zose bashobora guhara amagara yabo ngo bageze ubutagatifu bwa Kristu ku bo bashinzwe. Twese dukwiye gusaba imbaraga zo kumurika muri iyi si nk’inyenyeri iboneshereza mu bwijima.

BIKIRA MARIYA ADUHAKIRWE

YEZU ASINGIZWE UBU N’ITEKA RYOSE MU MITIMA YACU.

Cyprien BIZIMANA

Nimujye mukundana nk’uko nanjye nabakunze

KUWA GATANU W’ICYUMWERU CYA GATANU CYA PASIKA,

     11 GICURASI 2012 

AMASOMO: 1º. Intu 15, 22-31

2º. Yh 15, 12-17

 

NIMUJYE MUKUNDANA NK’UKO NANJYE NABAKUNZE 

Uyu munsi, YEZU KRISTU aduhaye uburyo bwo kongera kuzirikana ku Itegeko ribumbye andi yose yatwigishije: GUKUNDA. Isezerano Rishya rigaragaza neza URUKUNDO icyo ari cyo. Uwarugezeho aba yageze ku Mukiro. Twumve icyo YEZU atubwira maze tumusabe imbaraga zo kumukunda. Iyo tumukunze koko, tumenya gukunda nk’uko yakunze. Na ho ubundi, kamere yacu ntishobora kugera kuri urwo rukundo.

Bimwe mu biranga urukundo rwa YEZU, Ivanjili ya none irabitubwira: guhara amagara ye kubera incuti ze; kuzimenyesha ibyo yumvanye Data byose. Ibyo bintu uko ari bibiri, ni byo byaranze urukundo YEZU yadukunze.

Urukundo ruzatubeshaho, ni urukundo rwitanga. Kwitanga utizigama. Kwemera kubabara kugira ngo abawe cyangwa abantu bose babeho. Ni ukubapfira. Kwemera guhara icyubahiro cyawe ukegera abaciye bugufi ugira ngo ubazamure. Pawulo intumwa abivuga neza mu ibaruwa yandikiye Abanyafilipi 2, 5-11: N’ubwo yari afite imimerere imwe n’iy’Imana bwose, YEZU KRISTU ntiyagundiriye kureshya na Yo. Tuzi ko yihinduye ubusabusa akaza gusangira natwe imibabaro yo ku isi. Kuki yemeye kuza mu bukene bwo ku isi? Aho ni ho nyine yagaragarije urukundo. Yabanye natwe agamije kutwereka inzira y’Umukiro. Iyo nzira ni iyo gutsinda icyaha kugeza ku ndunduro. Kwemera kubabara aho gukora icyaha. Icyaha gikomeye, ni ukwitandukanya n’Imana Data Ushoborabyose. Ni ukwanga kumva ibyo idushakaho. Ni kenshi twebwe tugera mu mahina tugahakana Imana. Ni kenshi isi idushoraho ibitotezo maze tukemera ibyayo bityo tukitandukanya n’isoko y’ubuzima. Ni kenshi icyaha kiturembuza kikadukurura tugatsindwa. Birumvikana ko iyo duhisemo korohera secyaha, kwereka abandi inzira y’umukiro biratuyobera. Aho rero YEZU yagaragarije urukundo, ni uko yatubereye urumuri kugera ku ndunduro. Abamukurikiye mu bihe by’ikubitiro, na bo bamenye gukunda kugera ku ndunduro. Imisaraba yabo, ni yo yeze imbuto nyinshi z’ubukristu. Iyo bumvira isi bakitandukanya n’Imana, sinatinya kuvuga ko amahirwe yacu yo kumenya Umukiro yari kuba arangiriye aho.

Ikindi rero kiranga Urukundo rushyitse, ni ukwihatira kumenyesha abandi ibibafitiye akamaro. Urwo rukundo ni na rwo ruhuriza abantu mu bucuti nyakuri. Ni byo YEZU avuga ati: “…ahubwo mbise incuti kuko nabamenyesheje ibyo numvanye Data byose” (Yh 15, 15b). Ntabwo ushobora kuvuga ko kanaka ari incuti yawe mu gihe utamubwira ibyamugirira akamaro byose. Niba umubeshya, niba umurerega cyangwa umubwira ibintu bidafite akamaro, nta bucuti mufitanye. Uko kugeza ku bandi ibyabagirira akamaro, ni ikimenyetso kiranga umuntu wakiriye urukundo nyakuri rwa YEZU KRISTU. Umunyacyubahiro imbere y’ uwo ategeka, umuntu mukuru imbere y’ukibyiruka, umukire imbere y’umukene…nta manga iharangwa iyo bakiriye urukundo ruzima. Buri wese, cyane cyane umukuru ahora ageza ku bo akuriye ibyabagirira akamaro haba kuri roho, haba ku mubiri. Iyo tubeshyana, iyo dusuzugurana, iyo tutifurizanya icyiza, nta Rukundo ruba rurangwa hagati yacu.

Twiyemeze iki uyu munsi? Bidufitiye akamaro kwakira urwo rukundo rwitangira ineza y’abandi. Hanze yarwo nta mbuto dushobora kwera, nta n’icyo twashobora gusaba Data mu izina rya YEZU KRISTU. Twiyemeze kwicuza ibintu byose byadutandukanyije n’urukundo nyarwo. Ibyo byose biruvangira ni nk’amarangamutima ya muntu: Urukundo nyakuri rukunze kononwa n’intege nke z’umubiri. Kamere muntu, kuva aho ikomerekejwe n’icyaha cy’inkomoko, yifitemo rukuruzi y’ibiyiryoheye gusa. Ikintu cyose kigufitiye inyungu ifatika, usanga akenshi ari cyo wikundira. Gukurikirana inyungu z’ibituma wigwizaho ibintu, ni cyo wumva waha ubuzima bwawe bwose. Ugera ha handi wibwira ko iby’Imana bitagufitiye akamaro! Iyo rukuruzi y’ifaranga, y’ibiribwa n’ibindi byose by’isi, ni na yo ifitanye isano n’irari ry’umubiri. Ntawe uyobewe ko hari abahuzwa n’iraha ry’umubiri bakabyitiranya n’urukundo. Ari abahungu ari abakobwa, ari abagabo ari abagore, hari igihe usanga batakirwambaye kubera gushaka gusa gucubya irari ry’umubiri wabo. Ibyo bakabikora kandi birengagije akamaro k’isakaramentu ry’ugushyingirwa. Urwo si rwo rukundo. Urukundo ruzima ni urwitanga, rwemera kuvunika aho gukora icyaha, rumenya gutandukanya amarangamutima n’ubucuti nyakuri, urwo rukundo ni rwo rugeza mu ijuru kubana yo na YEZU. Ni rwo dusaba mu gitambo cya misa cy’uyu munsi.

BIKIRA MARIYA ADUHAKIRWE

YEZU KRISTU ASINGIZWE UBU N’ITEKA RYOSE MU MITIMA YACU.

Cyprien BIZIMANA

venenatis mattis Praesent suscipit dictum Aliquam