Catégories
icyumweru cya 15 B gisanzwe Inyigisho UMWAKA B

Nimungane mwese abarushye n’abaremerewe

KU WA KANE W’ICYUMWERU CYA 15 GISANZWE B,

19 NYAKANGA 2012:

AMASOMO:

1º. Iz 26,7-9. 12.16-19

2º.Mt 11, 28-30

NIMUNGANE MWESE ABARUSHYE N’ABAREMEREWE

Amasomo yose y’uyu munsi agamije kutugarurira icyizere. Cyane cyane abantu bumva baremerewe, ababuze aho berekera kubera ibibazo by’urudubi barimo, Nyagasani agamije kubabwiriza kumwizera by’ukuri. Mu nyigisho y’umuhanuzi Izayi turabonamo amizero y’ubuzima muri Nyagasani. Inyigisho ye igera no hirya y’urupfu. Ab’Uhoraho bapfuye, bazongera kubaho. Abari mu mukungugu bazakanguka basabwe n’ibyishimo. Mu murongo w’uko kwemera, nta kintu na kimwe cyagombye kutudurumbanya kuko turi abagenerwamurage b’Uhoraho kuva isi yaremwa. Kutabimenya, ni ko gusambira ahatarangwa Umukiro. Ayo mizero yose yo mu Isezerano rya Kera aruzuye rwose mu Isezerano Rishya muri YEZU KRISTU Umwami wacu. Nta handi tuzahungira. Nta handi tuzabona amahoro. Ni muri YEZU KRISTU Umwami w’amahoro.

Nta hantu handi dushobora guhungira imiruho ku isi. Benshi bihebye bahora baganya bavuga ngo: “Kuba ku isi ni ukubonabona”. Nta kundi twabigenza. Ni uko bimeze kubera ko isi yinjiwemo n’ingaruka z’icyaha cy’inkomoko nk’uko twakunze kubivuga. YEZU yaje kudukiza. Kudukiza, si ukudukura ku isi nk’uko abivuga mu Ivanjili yanditswe na Yohani umutwe wa 17. Kudukiza ni ukuduha imbaraga zo kuba ku isi mu mibabaro yaho tutitandukanyije na Soko y’ubuzima n’ubutungane bwose. Ni benshi bitotomba ndetse bagatandukana n’Imana bitewe n’imibabaro yo ku isi badashoboye kwihanganira. Ntitwakwibagirwa n’imbaraga za Nyakibi zituvangira zitubuza guhamya ibirindiro muri Nyagasani Umukiza wacu. Imibabaro n’imiruho duhura na byo, bituma twijujuta dukeka ko ari Imana Data Ushoborabyose wabiduteje. Ibyo si byo kuko adashobora kutugirira nabi. Turi abana be yifuriza amahoro muri we. N’iyo twitandukanyije na we bitewe no kurembuzwa na Sebyaha, ntadutererana, ahubwo akomeza kudutegerezanya icyizere cy’uko tuzashyira tukinyugushura inzara za Sekibi. Ese umuntu ashobora kwigobotora ibimuremereye ku giti cye?

Ntibishoboka. Mu mateka ya Kiliziya, habayeho inyigisho z’ubuyobe zemezaga ko umuntu ashobora kugera ku butungane ku mbaraga ze. Ibyo byari ukwibeshya. Nta muntu n’umwe uvukana kamere y’abamalayika. Umubiri we ni umunyantege nke. Ku mubiri no ku mutima, afite intege nke. Ibyo birumvikana. Bikira Mariya ni we wenyine warinzwe inenge zose kuko yategurirwaga kuba Nyina w’Imana YEZU KRISTU. Inyigisho igororotse, ni iyemeza ko umuntu ashobora gutsinda ibimurushya afashijwe n’Ingabire y’Imana. Imbaraga za muntu zifatanya n’ingabire y’Uhoraho, muntu agatsinda kakahava. Iyo ngabire ishyikirwa n’uwemeye guca bugufi akareka inzira ze za runturuntu agatakambira Umubyeyi we wo mu ijuru. Ni uwemera gupfukamira mu bwiyoroshye YEZU KRISTU. Ni uwiyumvisha ko inzira y’Umusaraba wa KRISTU ari yo dushobora gutsindiramo imisaraba yacu. Bityo rero, abarushye n’abaremerewe n’imitwaro, ntibashobora kuruhuka no koroherwa bategereye YEZU KRISTU ubaruhura. Ivanjili ivuga Ukuri, YEZU ni we KARUHURA. YEZU ni byose k’umufite, urushye wese ni we agana, izina twamuhaye ni ryiza…YEZU ni we Karuhura…Uko ni ko tujya turirimba kandi ibyo turirimba ni isengesho riducengezamo Ukuri kw’amabanga ya KRISTU adutagatifuza.

Uzashaka kwikorera imitwaro ye wenyine adasaba imbaraga YEZU, imisaraba ye izikuba kabiri kandi irusheho kumuremerera no kumurembya. Ingero z’abaremerewe ni nyinshi. Iyo baremerewe bari kumwe na YEZU, ntibaheranwa. Imfubyi idafite amahirwe yo kumenya YEZU iba imfubyi kabiri. Umupfakazi utunze ubumwe na YEZU asa n’uwapfakaye kabiri. Uwarenganyijwe udafite intege zo kwizera YEZU, imibabaro ye yikuba kabiri.

Dusabire abantu bose bareganiwe n’amage menshi. Abari mu kangaratete bahumurizwe n’Impuhwe za YEZU KRISTU we ugira umutima ugwa neza kandi woroshya. Duhore twisabira kandi dusabirana kugira ngo igihe tuzagomba guheka imisaraba tuzagire imbaraga z’umutima zituma twerekeza amaso kuri YEZU KRISTU we wenyine ushobora kuturokora.

BIKIRA MARIYA ADUHAKIRWE

YEZU KRISTRU AKUZWE ITEKA MU MITIMA YACU.

Padiri Sipriyani BIZIMANA

Catégories
icyumweru cya 15 B gisanzwe Inyigisho UMWAKA B

Inyigisho za Yezu zihishurirwa abaciye bugufi

KU WA GATATU W’ICYUMWERU CYA 15 GISANZWE B,

18 NYAKANGA 2012:

 

AMASOMO:

1º. Iz 10, 5-7. 13-16

2º.Mt 11, 25-27

 

INYIGISHO ZA YEZU ZIHISHURIRWA ABACIYE BUGUFI

 

Ivanjili twumvishe ni igisingizo YEZU aganisha ku Mana Data Ushoborabyose. Gishobora kudutangaza kuko amusingiriza uburyo amabanga ye yahishwe abanyabwenge n’abahanga! Ese barazira iki? Kuki bo badashobora guhabwa ibintu byiza kurusha ibindi? Ese ubwenge n’ubuhanga bushyamiranye n’amabanga y’Imana? Ese abanyabwenge n’abahanga batamitswe iki gituma batanyungutira ibyiza by’Ingoma y’Imana? Ese noneho Ivanjili yagenewe “abantu b’injiji?”. Ibyo ni bimwe mu bibazo dushobora kwibaza mu kuzirikana iyi Vanjili ya YEZU KRISTU uko yanditswe na Matayo. Igisubizo cyabyo byose, tugisanga muri kamere muntu ubwayo. 

Muri kamere muntu, habamo akantu gatuma yiyemera. Ako gatima gatuma yitera hejuru kamubuza amatwara yo gucisha bugufi no kwemera ibirenze ubwenge bwe busanzwe. Ibyo umuntu atumva akunze kubyanga. Bityo amabanga y’Ingoma y’Imana ntashobora gukwirwa mu gatwe kacu. Bisaba ukwiyoroshya no kwicisha bugufi. YEZU yaje ku isi yiyoroheje adaharaniye icyubahiro ndengakamere. Tuzi aho yavukiye n’ubukene yakuriyemo. Ibyo byose yabyemeye kugira ngo atwigishe ko icyo tugomba guharanira no guhatanira atari iby’isi. Aho iby’isi byasumbye iby’ijuru, ya Nkuru Nziza y’Umukiro ntibe igihawe intebe. Hicazwa umugenga w’isi y’umwijima! N’aho umuntu yakwiga ibingana iki, n’aho yakwandika ibitabo amagana ariko yanga Ibyanditswe bitagatifu, ubwenge bwe buhinduka ubuswa mu by’ingenzi. Ni kenshi twibeshya ko kuba abantu b’impuguke mu bumenyi bunyuranye bishobora kudutera ubwenge bw’iby’ijuru. Ufite ubuhanga n’ubumenyi bya muntu akagerekaho gucengerana ubwuzu amagambo ya YEZU KRISTU, uwo nguwo ateza isi n’abayituye imbere. Uwo nguwo aba yifitemo bwa bwenge n’ubuhanga buturuka ku Mana. Ubwo bwenge buhanitse, ni bwo buha umurongo ugororotse ubwenge bwa hano ku isi. Bene abo bantu babarirwa mu gice cy’abaciye bugufi YEZU yatubwiye. Ni ingabire ikomeye tugomba guhora dusaba. Nta muntu n’umwe uyitanga n’ubwo ashobora kugira abo ayobora neza iyo ayifite. Ntitangwa n’ibintu byo ku isi n’ubwo bikoreshwa neza n’uyifite. Ni ngombwa kwihugura ubutaretsa kugira ngo dusobanukirwe n’ubumenyi YEZU ashaka kutugezaho. 

Kwiga ni byiza. Kwiga byinshi ni akarusho. Ariko iyo umuntu atihatira kwinjira mu gice cy’abaciye bugufi, ibyo yiga nta cyo bimwongereraho uretse kwigiramo agasuzuguro. Uwize byinshi adafite umutima wo guca bugufi, uwo nguwo yonona byinshi mu muryango w’Imana. Hari igihe dukeka ko nitwiga byinshi tukagera n’i Burayi no mu yandi mahanga ari bwo tuzabasha kumenya gusobanura iby’Imana! Izo ni inzozi zitagize aho zihuriye n’ukuri. Ibyo twigisha bigirira abantu akamaro, si ibyo twavomye mu bitabo gusa. Ibigirira roho akamaro, ni ibituma zitera imbere mu buzima nyobokamana. Iyo twifitemo ubwo buzima nyobokamana, ni bwo dushobora kubugeza ku bandi bukabagirira akamaro. Iyo nta cyo twifitemo cy’ireme ry’Ukuri kwa YEZU KRISTU, inyigisho zacu zitugaragaza nk’imyirongi cyangwa ibyuma-sahani birangira nk’uko Pawulo Mutagatifu abisobanura. Ntushobora kwigisha ukuri utakwifitemo. Ubwenge bw’ijuru ntibubangamira ubwenge n’ubuhanga bwo ku isi. Iyo ubwenge n’ubuhanga bwo ku isi byihaye kuvuguruza no kurwanya Ukuri YEZU yaduhishuriye, ubwo bwenge buba atari nyabwo. Buhinduka ubukorikori bwa nzikoraho. Ubwenge n’ubuhanga nyakuri bugeza muntu ku bumenyi bw’Imana Data Ushoborabyose. Ubuhanga nyabwo ntibuvuguruzanya. 

Buri mukristu wese, niyihatire kwisuzuma amenye niba ari mu gice cy’abahanga b’isi cyangwa niba ari mu gice cy’abaciyebugufi. Ubutumwa dushinzwe burakomeye. Kuba abahamya b’Ukuri kwa YEZU KRISTU, bigomba ubwenge bw’abaciye bugufi. Si ukuvuga amagambo y’icyuka. Ni ugupfukama tugasaba ingabire yo gusobanukirwa n’ibyo YEZU yigisha. Ni ugusaba kuba abaswa b’ikibi n’abahanga b’icyiza. Ubuhanga bw’isi gusa, ni ubusazi mu maso y’Imana. Ibyo abantu bita ubuhanga, ni ubuswa n’ubusazi. Ibyo bita ubuswa n’ubusazi kuko batabyumva, ni bwo buhanga bugeza ku Mukiro w’ijuru (soma 1Kor 2). Uko dutera imbere mu by’ubwenge bw’isi twiyibagiza Ukuri kwa YEZU KRISTU, ni ko dutakaza ubuhanga tukaba twabura byose nk’ingata imennye. Nitwisuzume uyu munsi turebe niba ubuzima bwacu buciye bugufi kugira ngo turonke amabanga y’Umwami wacu YEZU KRISTU.

 

BIKIRA MARIYA ADUHAKIRWE.

YEZU AKUZWE ITEKA MU MITIMA YACU.

 

Padiri Sipriyani BIZIMANA

Catégories
icyumweru cya 15 B gisanzwe Inyigisho UMWAKA B

Naho wowe Kafarinawumu, ubona ko uzakuzwa kugera mu bicu?

KU WA KABIRI W’ICYUMWERU CYA 15 GISANZWE B,

17 NYAKANGA 2012:

 

AMASOMO:

1º. Iz 7, 1-9

2º.Mt 11, 20-24

 

NAHO WOWE KAFARINAWUMU, UBONA KO UZAKUZWA KUGERA MU BICU?

 

Iyi nyigigisho ya YEZU ishaka kudukangurira uyu munsi kwemera ibyo atubwira. Kwitegereza no kuzirikana ibimenyetso byose yagaragaje igihe yari kuri iyi si bamubona. Gukunda amabanga ye yose kuva ku ivuka rye kugeza asubiye mu ijuru. Kuzirikana uburyo na nyuma y’ubuzima bwe bwo mu mubiri yakomeje kuyobora Kiliziya yashinze ku ntumwa ze. Ibyo byose, ni ibitangaza bihagije kugira ngo twemere Inkuru Nziza yatugejejeho. Uko biri kose, kwanga kuyoborwa n’Ijambo ry’ukuri riturutse ku Mana, guhakana ubuzima bwa YEZU KRISTU, ibyo byose bigira ingaruka zikomeye. Bishobora no kuba impamvu y’amakuba umuntu yikururira. Ni uko twumva ibyago binyuranye umuryango w’Imana wagiye wikururira igihe cyose witandukanyaga n’inzira Uhoraho yaberekaga gukurikiza. No mu bihe turimo, hari amakuba abantu bikururira kubera gusuzugura Imana Data Ushoborabyose. Gushaka kuvuguruza Ivanjili no kwihangira amayeri yandi yo kuyobora ubuzima bwacu, ni ko kwikururira amakara. Hari ingero nyinshi zibitwumvisha. Kubeshya no kwiba imitungo y’igihugu bituma ubukene buzambira abaturage. Guha urwaho Sekibi mu buzima bwacu bw’abihayimana bipyinagaza ubukristu muri rusange. Kutayobora ubuzima bwa muntu uko Imana ibishaka, ni isoko y’ibyago byinshi bituma abantu babaho nta mahoro. Nk’i Burayi uhabona abantu benshi bahahamuka bitewe n’uburyo bitwaye mu buzima: nk’abakuramo inda ku bushake bitewe n’uko bashaka kwiberaho mu maraha y’umubiri, bahura n’ingorane zishobora gutuma baniyahura. Kutita ku burere buhuje n’Inkuru Nziza ya YEZU KRISTU, bituma urubyiruko rukurana imigirire idashobora kugira icyo itugezaho.

 

Amatwara yo kudakurikira inzira ya YEZU KRISTU duhereye ku buzima bwe bwatwigishije gukurikira Imana y’ukuri, aturuka ku bwirasi bwa muntu. Ni yo mpamvu YEZU abaza Kafarinawumu aho izagarukira n’ubwirasi bwayo yanga kumwemera. Uwo mugi ntushobora guhakana ibimenyetso bigaragara YEZU yabakoreyemo. Mu Isezerano rya Kera, abantu bakurikiraga Imana ariko batarayimenya bihagije. Abantu bo mu gihe cya Sodoma na Gomora ntibagize amahirwe yo kwibonera ikuzo ry’Imana muri YEZU KRISTU. Ni yo mpamvu icyaha cyabo kidasumbye icya Kafarinawumu yabonye ibitangaza by’Umucunguzi w’abantu ikarenga igakomeza kunangira umutima. Muri urwo rwego, icyaha cy’umuntu wigishijwe Inkuru Nziza ya YEZU KRISTU kiremereye kurenza icy’utarigeze yigishwa inzira za KRISTU. Icyaha nakora (ndi padiri) gifite uburemere kurenza icyo umuntu ubonetse wese wibereye mu bye utarigeze yiyemeza kuba umuhamya wa KRISTU. Icyaha cyanjye kiremereye kuko nemereye YEZU kumutumikira maze nkabirengaho nkana. Kimwe mu bimenyetso by’ubukristu buhamye, ni ukurangwa no kwiyoroshya bituma twumvira mbere ya byose YEZU KRISTU Umukiza wacu. Iyo twihitiyemo izindi nzira zitugeza ahabi.

 

Dusabirane umutima wiyoroshya kandi wiziritse ku Nkuru Nziza y’Umukiro twazaniwe na YEZU KRISTU Umukiza wacu.

 

BIKIRA MARIYA ADUHAKIRWE

YEZU KRISTU AKUZWE ITEKA MU MITIMA YACU.

 

Padiri Sipriyani BIZIMANA

Catégories
icyumweru cya 15 B gisanzwe Inyigisho UMWAKA B

Uzahara ubugingo bwe ari jye agirira, azabuhorana

KU WA MBERE W’ICYUMWERU CYA 15 GISANZWE B,

16 NYAKANGA 2012:

 

AMASOMO:

1º. Iz 1, 11-17

2º.Mt 10, 34-11,1

 

 

UZAHARA UBUGINGO BWE ARI JYE AGIRIRA, AZABUHORANA

 

Uyu munsi, YEZU KRISTU ashaka kutwumvisha ko kumukurikira biruta byose. Kwemera kwitwa umukristu, ni ukwitegura guhangana n’imigirire y’isi ihora ibangamira Inkuru Nziza y’Umukiro. Ni yo mpamvu YEZU atwerurira ko atazanywe no gukwiza amahoro ku isi. Niba uri umukristu koko, uzagera aho ugomba no guhangana n’abo muva inda imwe. Nta rwango uzabagirira kuko Ivanjili itarushyigikira, ariko bo bazakwanga igihe cyose uzaba utemera kugendera mu nzira z’umwijima bo bahisemo. Uzirinde kwihimura ahubwo ubasabire kubona YEZU. Ibyo bibazo byarabaye no kuva mu ntangiriro za Kiliziya. Mu rugo rumwe, hari ubwo wasangaga nta mahoro kuko ababaga bakirwanya YEZU KRISTU batotezaga uwo ari we wese ukomeye ku mahame ye.

 

Kugira ubwoba bwo gukomera Kuri YEZU KRISTU, ni cyo gituma tworeka ubuzima bwacu. Gukeka ko kwemera ibyo abantu batubwira kabone n’aho byaba ari umwaku, ari yo nzira dukeka ko yatugeza ku mahoro, ni ukwibeshya. Kubyanga ni nko kwiyemeza kubaho wenyine. Ubwoba buhita bugutaha maze ugahakana KRISTU. Yatubwiye ko umuntu wese uzakunda se cyangwa nyina kumuruta adakwiriye kuba uwe. Ukunda abana be cyangwa inshuti ze kuruta YEZU, na we ntakwiye kwitwa uwe. Gukunda abantu kuruta YEZU KRISTU, kwikundira ibintu by’isi kuruta iby’ijuru, ni ko kwikunda ubwawe no gukunda ubuzima bwawe gusa. Ni na ko kubutakaza kuko ikintu cyose gituma wibanda ku buzima bwo ku isi wirengagiza ko atari ryo herezo ry’ubuzima, icyo ni cyo gituma utakaza ubuzima bwawe. Isi ya none isa n’aho iri mu mwijima. Si none gusa kuko amateka turayazi n’ibyagiye biyabamo biteye ubwoba! Ese inzira yo kugeza isi aho YEZU ashaka, ni iyihe?

 

Icyizere kiboneka mu bavandimwe biyemeza guhara ubuzima bwabo bagirira Inkuru Nziza ya YEZU KRISTU watsinze urupfu akazuka. Abo ni abiyemeza gusiga ibintu byabo byose bakegukira Ivanjili. Abiyeguriyimana, ntibashaka kubera Ingoma y’ijuru. Tuzi ko abasaseridoti benshi batirirwa bashaka abagore kuko biyemeje nyine gusiga abagore n’abana kubera Inkuru Nziza. Mu muco wa Kiliziya z’i Burasirazuba, abasaseridoti bashobora guhitamo gushaka cyangwa kudashaka. Ikigaragara ariko, ni uko abadashaka usanga bafite umwanya uhagije wo kwitangira umuryango w’Imana. Ni na bo batorwamo abepiskopi bashobora kwitangira umuryango w’Imana Kiliziya. Abo bose biyemeza guhara ibyabo kubera Inkuru Nziza ya YEZU KRISTU, ni bo badufatiye runini. Batwibutsa ubudahwema icyo dukwiye gukora kugira ngo turonke ubugingo bw’iteka. Baradufasha Kuri roho. Baduha amasakaramentu. Badufasha kwigorora n’Imana Data Ushoborabyose. YEZU KRISTU abafite ku mutima. Tuzirikane icyo yabatubwiyeho.

 

YEZU KRISTU ashishikariza abantu kwakira neza intumwa ze. Gusabira abasaseridoti, kubakunda, kubafasha gutsinda ibishuko byo Kuri iyi si, kutabatega imitego igamije kubayobya, kubafasha mu byo bakeneye mu buzima bwabo bwa buri munsi, ni ko kwiteganyiriza ingororano mu ijuru. Ni kimwe kandi no kwakira neza umuntu wese uje atumenyesha Ukuri kwa YEZU KRISTU. Uwo wese ugirira neza inshuti za YEZU KRISTU, ntazabura ingororano ye. Kwanga abasaseridoti, gusuzugura inyigisho batanga mu Kiliziya mu izina rya YEZU KRISTU, kubagambannira, kubababaza, kubatoteza, kubica, ni ko kwikururira urubanza isi itazigera ihonoka mu gihe itisubiyeho. Abasaseridoti ntibashyirirwaho gushyigikira ibibi. Ni yo mpamvu hari abantu babangamiwe n’ubutumwa butangwa. Abo bose bahekenya amaenyo kubera Ukuri kwa YEZU gutangazwa, ni bo bakururira isi amakuba menshi.

 

Dukeneye cyane muri iyi minsi kwivugurura kugira ngo imibereho yacu ituganishe mu ijuru. Hari amakoraniro menshi y’abasenga, hari amaparuwasi menshi baturiramo misa ntagatifu. Ntidushobora kwibeshya ko dukora neza kuko twuzuza amategeko ya Kiliziya gusa twitabira isengesho na misa. Icy’ingenzi, ni ugukora ku buryo ayo masengesho yose yigaragaza mu mutima wacu ukunda Imana Data Ushoborabyose uhora witeguye kwakira Ukuri no kugusakaza hose. Iyo dusenga nta mutima ukunda Imana twifitemo, yezu atubwira atwerurira ati: “Ibitambo byanyu bitagira ingano bimbwiye iki?Iyo muje kunshengerera, ni nde uba yababwiye kuza kumvogerera Ingoro?…Nimwiyuhagire mwisukure…Nimwige gukora ikiri icyiza, nimuharanire ubutabera, murenganure urengana, murwane ku mpfubyi, mutabare umupfakazi”. Ayo magambo twayumvishe mu isomo rya mbere. Si amagambo ya kera yashaje. N’uyu munsi arumvikana kandi agamije kuduhugura. Ntitukemere kugira uruhare ku kibi ngo aha turashaka kurengera ubuzima bwacu bwa hano ku isi.

 

BIKIRA MARIYA BWIZA BWA KARUMELI ADUHAKIRWE.

YEZU KRISTU AKUZWE ITEKA MU MITIMA YACU.

Padiri C. BIZIMANA