Naje gukiza isi

KU WA GATATU W’ICYUMWERU CYA KANE CYA PASIKA,

2 GICURASI 2012

 

AMASOMO:

1º. Intu 12, 24-13,5ª

2º. Yh 12, 44-50

 

NAJE GUKIZA ISI

 

Uyu munsi YEZU KRISTU atwibukije ko nta kindi cyamuzanye usibye gukiza isi. Umugambi we, ni wo w’uwamutumye: gukiza abantu bose. Nta kindi yaharaniye kuva mu ntangiriro kitari ukutuyobora twese kuri Se wamutumye kutuvana mu mwijima. Yaje mu nsi ari urumuri. Umwemera wese ntahera mu mwijima. Kugeza igihe isi izashirira, ijambo rye riramamazwa maze rigakiza abemera kuyoborwa na ryo. Ni na yo mpamvu na nyuma y’urupfu n’izuka bye yakomeje gutora abemera kwamamaza umukiro atanga. Isomo rya mbere ryatubwiye uko Pawulo na Barinaba bagiye mu kirwa cya Shipure kwamamaza Ijambo rya Kristu bamurikiwe na Roho Mutagatifu. Bageze n’ahandi henshi bashishikajwe no kumenyesha bose Inkuru Nziza y’Umukiro.

Icyo YEZU adusaba natwe, ni ukwakira amagambo ye tukiyemeza kuyagenderaho mu buzima bwacu ariko cyane cyane tukihatira kuyabwira abandi kuko ni yo mukiro wacu twese. Mu bihe byose, icyo abayobozi ba Kiliziya bihatira ni ukuzirikana amagambo ya KRISTU no kuyibutsa ubutaretsa abantu bose. Ntabwo umurimo w’ibanze wabo ari ugutanga amasakaramentu. Ntibatumwe kuba abantu batanga amasakaramentu gusa. Batumwe mbere na mbere kwigisha Ijambo ry’Imana YEZU KRISTU yatubwiye. Nyuma rero abemeye iryo JAMBO ry’agakiza bakabona guhimbazanya ibyishimo amasakaramentu abumbye inema ntagatifuza z’Imana Data Ushoborabyose. Pawulo Mutagatifu abisobanura neza agira ati: “Kuko KRISTU atanyohereje kubatiza, ahubwo yantumye kwamamaza Inkuru Nziza, atari mu magambo y’ubuhanga ngo hato umusaraba wa KRISTU udakurizaho guta agaciro” (1 Kor. 1, 17). Itangwa ku bwinshi ry’amasakaramentu abantu batihatira kubaha amagambo ya KRISTU rituma ivangwa ry’amasaka n’amasakaramentu riba karande.

Icyo YEZU adusaba, ni ukwemera kugokera umukiro w’abantu bose: “Nihagira uwumva amagambo yanjye ntayakurikize, si jye umucira urubanza, kuko ntazanywe no gucira isi urubanza, ahubwo naje gukiza isi…ijambo navuze ni ryo rizamucira urubanza ku munsi w’imperuka”. Ibyo ni ukuri. Dushobora kwibeshya dutekereza ko gusuzugura iby’ubukirisitu nta ngaruka byadukururira. Uko biri kose, gusuzugura YEZU KRISTU nta mahoro bitanga haba muri iyi si haba na nyuma y’urupfu rudashidikanywa rw’uyu mubiri. YEZU KRISTU yazanywe no gukiza isi no kuyikura mu mwijima. Umwijima ni icyo cyose kidashobora kutugeza ku mahoro nyayo y’umutima. Umwijima ni ikintu cyose kitubuza kumenya ko hirya y’urupfu rw’umubiri hari ubuzima bw’iteka. Bityo, umwijima ni ikintu cyose gituma duhakana YEZU KRISTU tugakingurira umutima wacu sebyaha ari we sekibi. Kunnyega iby’ubukristu, kwiberaho muri iyi nta gitekerezo kindi cy’ijuru, kutubaha ibyo KRISTU yavuze, kwihitiramo kugira igabo ry’ukunangira mu nzangano, induru n’induruburi, uwo ni umwijima ukabije. Nta kidi kiweyura usibye amagambo matagatifu ya YEZU KRISTU. Muntu wiyumvamo agashashi k’urumuri rwa KRISTU, haguruka dufatanye gukwiza URUMURI aho turi hose.

Nk’uko nta kindi abayobozi ba Kiliziya bashyira imbere usibye nyine amagambo ya YEZU KRISTU, uwitwa umubyeyi wese, nta kindi akwiye gushyira imbere kitari ukwigisha abana be kumenya Ijambo ry’Umukiro twazaniwe na YEZU KRISTU. Nta kindi wakwiye gusangira n’inshuti yawe y’amagara. Reba hirya urebe hino, urabona abantu bakundanira gusangira ibyaha. Basabire kubura amaso bahugure ubwenge bwabo bagarukira Ijambo ry’Umukiro YEZU KRISTU atugezaho.

Buri wese muri Kiliziya akwiye gutekereza icyakorerwa abana n’urubyiruko kugira ngo bakizwe umwijima isi ya none irimo. Nibamara kuva mu mwijima, bazibera mu rumuri kandi bazaruyoboramo abo bazabyara ejo hazaza. Kuvana urubyiruko mu icuraburindi ni ko kubaka isi nziza. YEZU yatwibukije ko yaje mu nsi ari urumuri kugira ngo umwemera adahera mu mwijima. Twebwe twiyita inshuti ze rero, dukwiye kwihatira gusangiza inshuti zacu ibyo twahawe n’Inshuti yacu YEZU KRISTU. Uwabatijwe wese yahawe urumuri rw’ubugingo bw’iteka. Akwiye kumurikira abantu bose bahura kugira ngo umwijima w’isi weyuke.

BIKIRA MARIYA ADUHAKIRWE

YEZU ASINGIZWE

Padiri Sipriyani BIZIMANA

Uriya si umwana wa wa mubaji?

KU WA KABIRI W’ICYUMWERU CYA KANE CYA PASIKA.

Umunsi wa Yozefu Mutagatifu urugero rw’abakozi.

Ku ya 1 Gicurasi 2012

AMASOMO: Intg 1, 26-2,3 ( cyangwa Kol 3, 14-15.17.23-24); Mt 13, 54-58


URIYA SI UMWANA WA WA MUBAJI? NYINA NTIYITWA MARIYA?

Uyu munsi turahimbaza Yozefu Mutagatifu,urugero rw’abakozi. Uyu munsi mukuru washyizweho na Papa Piyo wa 12 ku ya 1 Gicurasi 1955. Guhera icyo gihe, Yozefu Mutagatifu yagizwe urugero rw’abakozi n’umurinzi w’ingo zabo. Mu gihe kandi duhimbaza Yozefu Mutagatifu, turishimira no gutangira ukwezi kweguriwe Bikira Mariya.

Yezu rero uyu munsi arajya iwabo maze yigishe kandi akize. Ariko abantu bo mu karere k’iwabo aho kwishimira ko Uhoraho yabigaragarije muri umwe muri bo ngo barusheho kumusingiza, basuzuguye ibyo Yezu yakoraga. Ntibumvaga ibyo yari yihangishijeho. Nk’aho bakavuze, bati “mwene Yozefu se we kandi biriya ni ibiki yadukanye? Aha! Buriya se aribwira ko tumuyobewe ra? Se si umubaji? Nyina ntiyitwa Mariya? Bashiki be ntitubatunze? Uriya we turamuzi. Nareke gukomeza kutubeshya.” Ibitekerezo n’amagambo y’abantu bo mu karere k’iwabo banze kumwemera, byatumye Yezu atahakorera ibitangaza byinshi. Ariko yarangije ababwira ko nta handi umuhanuzi asuzugurwa keretse mu gihugu cye no muri bene wabo. Uko Kuri Yezu ababwiye kurakomeye. Kuko gusuzugura umuhanuzi ni icyaha gikomeye kandi cyaranze amateka ya Israheli. Kuko ntibyarangiriraga kukutabumva gusa. Ahubwo byarangiraga bishe uwo muhanuzi. Ni ko byagendekeye abahanuzi bose. Ni nako Yezu byamugendekeye( Mt 23,29-36; Intu 7,51-53).

Yezu rero uyu munsi arigishiriza iwacu. Uyumunsi arakorera ibitangaza iwacu. Ariko se twe aho turamwumva? Cyangwa natwe ibiba Kuri bariya ni byo bitwuzurizwaho? Yezu koko arigisha iwacu. Yezu arakora ibitangaza iwacu. Ariko ntitumwemera. Umutego bariya baguyemo natwe ni wo tugwamo. Nawe se Umwana w’Imana ihoraho yarabagendereye. Arigisha akora ibitangaza bigaragaza ko ari Imana ishobora byose; maze bo aho kuvuga bati “dore Uhoraho nguyu rwgati muri twe”, ahubwo baravuga bati “dore umwana wa wa mubaji Yozefu”. Natwe Yezu yadutumyeho Abasaseridoti bahagaze rwose mu izina rye, nk’uko na we yaje mu izina rya Se ( Yh 20,21; 13,20). Ariko se tubakira dute? Ese iyo batwigisha twumva ari Yezu utubwira cyangwa ko ari kanaka uvuka kwa kanaka? Ndetse benshi turabazira. Atari uko badututse cyangwa batugiriye nabi. Ahubwo tubaziza inyigisho batanga. Tubaziza ukuri batubwiye mu izina rya Kristu. Kristu Yezu akorera mu basaseridoti ibitangaza byinshi buri munsi. Kimwe muri byo cy’ibanze ni uko ku bw’ububasha bwa Roho Mutagatifu bahawe, Yezu Kristu wapfuye akazuka, Umutegetsi n’Umukiza rukumbi w’abantu bose, Imana Nzima, anyura mu biganza byabo akaza mu Ukaristiya maze tukamuhabwa. Ese icyo gitangaza tujya tuzirikana uburemere bwacyo burenze kure inabi n’ineza ya muntu? Turamutse twumva iryo banga ntabwo twavuga ngo sinzongera kujya mu misa yasomwe na kanaka. Ariko se uwo kanaka ko atari we uhazwa, rwose kuki wakwitesha iyo migisha? Ese niba akora nabi hari ubwo uhazwa ibyaha bye, ko uhazwa Yezu Kristu wapfuye akazuka? Hagowe umuntu ugusha abandi kubera ingeso mbi ze (Luka 17,1-3). Ariko kandi Umukristu uzi uwo yemeye azi neza ko uwo ahanze amaso ari Yezu (Heb 12, 2; 2 Tim 1,12).Ariko tuzi neza kandi ko turi abanyantegenke. Kubera iyo mpamvu, twisunze Yozefu Mutagatifu uyu munsi we na Bikira Mariya ngo badufashe gukira ubwo buhumyi, butuma tutabona Yezu mu Misa no mu masakaramentu anyuranye. Ubwo buhumyi butuma tutabona ibitangaza bikomeye Yezu akorera buri munsi muri Kiriziya iwacu. Nitumubona tuzaboneraho kumubanira no kumuyoboraho abandi. Kumuyoboka kandi bigaragarira mu gukorana ibyo dushinzwe urukundo nka Yozefu Mutagatifu (1 Kor 16,14) urugero rw’abakozi ba Kristu. Koko Yezu Kristu wapfuye akazuka ni we Byishimo byacu ubu n’iteka ryose.

 

Padri Jérémie Habyarimana

Ni jye rembo ry’intama

KU WA MBERE W’ICYUMWERU CYA KANE CYA PASIKA,

30 MATA 2012

 

AMASOMO:

1º. Intu 11, 1-18

2º. Yh 10, 1-10

 

 

NI JYE REMBO RY’INTAMA

 

Ivanjili y’uyu munsi iradufasha gukomeza kwerekeza isengesho ryacu ku bashumba b’intama z’Imana. Dushobora no gukomeza iryo sengesho iminsi yose y’iki cyumweru cya kane cyitwa ICYUMWERU CY’UMUSHUMBA MWIZA. Ni uburyo bwo kwishimira ukuntu YEZU KRISTU yaje mu isi aje kudukiza. Yatweretse igisobanuro nyacyo cy’ubuzima. Yatweretse inzira nyayo igana ijuru. Ikindi twakwitaho ni ugusabira abashumba b’intama z’UMUSHUMBA MUKURU YEZU KRISTU.

Iyo tuzirikanye amateka y’umuryango w’Imana, tubona ko Imana ubwayo ari yo yagiye yiyoborera abayo. Kuva kuri Aburahamu kugeza YEZU aje mu isi, Imana Data Ushoborabyose yagaragaje ko yitaye ku bantu. Ubwayo yihishuriye abantu kugira ngo bayimenye bityo bareke kugenda biyonona. Cyakora imibereho y’abantu mbere ya YEZU KRISTU wasangaga isa n’aho iri mu icuraburindi. Amateka yabo yose yari yaraziritswe n’imico karande myinshi ku buryo ITEGEKO ryatanzwe rinyuze kuri Musa ryari ryaravangiwe n’uducogocogo tw’amategeko ya kiyahudi. Igihe gishya cy’Isezerano Rishya kandi rizahoraho iteka cyafunguwe na KRISTU. Bityo rero, kuva aho tumumenyeye, ntibikwiye ko tugendera mu nzira z’ubuyobe.

Nta yindi nzira igeza ku Mana y’Ukuri. Ni WE rembo ry’intama. Abantu bose bashakashakaga kuyobora intama za Nyagasani batanyuze mu nzira ze zagaragajwe kuva kera yabise abajura n’ibisambo: “Abandi bose baje mbere yanjye, ni abajura n’ibisambo, n’intama zanze kubumva”. Ijambo rye rizanye ihumurizwa. Kuva ubu intama zashakashakiraga umukiro ahandi zimenyeshwe ko umuryango winjira mu rwuri nta wundi, ni YEZU KRISTU. Ni We wabaye Isezerano Rishya kandi rizahoraho iteka. Ni We Mushumba utarumanza izo aragiye. Ni We Mukiro nyakuri. Ni We rembo riyobora mu rwuri rutoshye. Uzamunyuraho wese azakizwa. Icyiza cyo kunyura kuri YEZU KRISTU, ni amahoro n’ukwishyira ukizana. Nta muntu n’umwe ndumva washyize amiringiro ye muri YEZU KRISTU ngo abure amahoro n’ituze. N’abamukurikiye bakabitoterezwa, ntibigeze babura amahoro y’umutima ngo bagamburuzwe. N’ubu kandi izo ngabire ziracyariho kandi zizahoraho kugeza igihe azagarukira. Ni ngombwa ko twitoza kuba ari We dushingiraho ubuzima bwacu kugira ngo ejo tutazahuhwa n’umuyaga.

Hashize imyaka irenga ibihumbi bibiri YEZU KRISTU yeretse isi aho umuryango w’ijuru uherereye. Ni We ubwe. Abawinjiriyemo tuzi kandi twiyambaza badusigiye umurage dukwiye gukurikiza. Cyane cyane abashumba babaye intwari mu kunga ubumwe na YEZU KRISTU babashije gukingurira intama nyinshi irembo ry’ijuru. Twese adusaba kwinjirira mu irembo ry’intama. Ku buryo bw’umwihariko, abashumba bose barasabwa kwinjirira mu irembo ry’intama. Umushumba wese winjiriye mu irembo, izo ayoboye na zo ni ho zinjirira. Uwayobye akuririra ahandi, uwo nguwo ayobya benshi. YEZU atwigisha igihe cyose akoresheje ibigereranyo. Gusobanura Ijambo rye ni ukumvikanisha ibyo bigereranyo mu buzima bw’abantu n’amateka yabo. Abayoboke ba KRISTU bashobora gucika intege cyangwa bakayoba, bakayoberwa aho binjirira bitewe n’uko bayobowe n’abantu badasobanukiwe n’irembo iryo ari ryo. Birashoboka, kandi byabayeho no mu mateka ya Kiliziya, ko umusaseridoti ashobora kuyobagurika mu bukristu bwe. Icyo gihe hari benshi bayoba. Hari abantu usanga bitwaza intege nke z’abasaseridoti bagahakana ibikwiye gutunga roho zabo. Hari abazinukwa kujya mu misa, bakanga guhabwa penetensiya n’andi masakaramentu kubera ko bazi ko padiri kanaka akora ibyaha ibi n’ibi. Uburyo bwiza bwo gukomera ku ngabire YEZU aha buri wese, si ugushengerera ibyaha by’abo bantu. Urabishengerera bikagushegesha. Ikihutirwa ni ukujya ku mavi ugasabira abatorerwa kuba abasaseridoti mu rwego rwa gihereza. Ni ukudata icyizere kuko nta kintu na kimwe cyabuza ijwi rya YEZU KRISTU kumvikana. Dukeneye abashumba bazima. Dukeneye ariko kandi n’intama zishishoza zikumva ijwi rya KRISTU ubwe. Izo ni zo YEZU yavuze ko zidakurikira uw’ahandi. Zimenya kumuhunga kuko ziba zitazi ijwi ry’ab’ahandi. Aha dusobanukirwe ko ingabire YEZU atanga zituma buri mukristu wese ashobora gusobanukirwa akirinda abashobora kumuyobya. Mu bihe by’urujijo, by’umwijima mu bijyanye no gukurikira YEZU hakunze kuboneka amatsinda menshi kandi anyuranye yo gushakisha inzira y’umukiro. Icyo kiba ikimenyetso cy’uko ibihe abantu baba barimo biba bitoroshye. Hagomba rero abashumba basobanukiwe bita ku ntama za Nyagasani baziyobora kuri YEZU KRISTU nta rujijo. Tubisabe tubikuye ku mutima.

 

BIKIRA MARIYA ADUHAKIRWE

YEZU KRISTU ASINGIZWE.  

Padiri Sipriyani BIZIMANA

Ni jye Mushumba mwiza

ICYUMWERU CYA KANE CYA PASIKA-ICYUMWERU CY’UMUSHUMBA MWIZA

Ku wa 29 Mata 2012

AMASOMO: Intu 4, 8-12; Zab 118(117); 1 Yh 3, 1.2; Yh 10, 11-18


NI JYE MUSHUMBA MWIZA; NZI INTAMA ZANJYE NA ZO ZIKAMENYA. NDETSE NEMERA GUHARA UBUGINGO BWANJYE, NKABUTANGIRA INTAMA ZANJYE.

Uyu munsi Yezu aribwira abigishwa be ku buryo bw’ikigereranyo ko we ari Umushumba mwiza. Akaba afite intama ze aragiye, zimuzi na we akazimenya. Kandi akaba aziha ubugingo bwe ku bushake bwe. Yezu arakomeza ababwira ko izindi ntama afite zitari mu rugo rwe agomba kuzizana . Maze hakaba igikumba kimwe n’umushumba umwe. Yezu akomeza ababwira ko gutanga ubugingo bwe ngo abusubirane bitera Se kumukunda. Kandi uko Yezu na Se bunze ubumwe,baziranye ni na ko yunze ubumwe kandi aziranye n’intama ze. Uko kuri Isomo rya kabiri riragushimangira. Umwanditsi w’Iyo baruwa arataraka maze agatangarira urukundo ruhebuje Imana Data yadukunze kugeza n’aho twitwa abana bayo kandi tukaba turi bo koko! Naho uburyo Data uhoraho akunda Yezu, Isomo rya mbere rirabitugaragariza. Muri iryo zina YEZU ni ho Imana Data yashyize ububasha bwose bukiza abantu nyuma y’aho apfiriye maze akazuka ku munsi wa gatatu.

Umushumba mwiza, Yezu Kristu wapfuye akazuka, uyu munsi rero araturarikira kwemera kuragirwa na we mu rwuri rw’ubugingo bw’iteka . Urwuri Yezu ashaka kuturagiramo ntirujya rwuma. Amaraso ye matagatifu ahora aruvomerera. Nta kirura gishobora kumurwanya ngo kimutsinde. Ngo hanyuma gishimute intama ze. Urupfu rwe rwatsinze urupfu rw’intama ze. Izuka rye rizizanira ubuzima buzira iherezo. Yiguranye intama ze. Yapfuye urwo zari gupfa. Yapfuye mu cyimbo cyazo. None yarazutse ntagipfa. Ari kumwe n’intama ze ubuziraherezo.

Yezu Kristu wapfuye akazuka rero ni Umushumba mwiza uturagiriye muri Kiriziya ye Gatolika Ntagatifu. Dore uko uwo Mushumba mwiza aturagiye: aratubyara akaduha ubuzima (Batisimu). Akatugaburira akoresheje Amabere abiri ya Kiriziya ye (Ijambo ry’Imana n’Ukaristiya). Iyo turwaye aratuvura kandi akaduha n’urukingo (Penetensiya). Yakenera kudutuma kuko azi nitege nke zacu akadukomeza (Isakaramentu ry’Ugukomezwa). Kuko azi ko imiyaga ihuha n’imivu itemba bisenya amazu, iyo tugiye gushinga urugo ariyizira we Rutare twikingaho tugakira. Nuko akaba ariwe turwubakaho. Maze rugakunda rukaremya. Urukundo rugakura kandi rukororoka rubikesha Umugisha we udashira (Ugushyingirwa). Iyo ashatse abamufasha kuhira, kwahura no kwahirira intama ze mu izina rye, abiha abo yishakiye maze na bo babishaka akabambika ububasha bwo guhagarara mu ruhame bamuhamya (Ubusaseridoti). Iyo igihe kigeze cyo kumusanga no kumusingiza ubuziraherezo, arongera akatuvugururamo ubuzima bwose yaduhaye. Nuko akadusiga amavuta ku biganza ngo tuganze umwanzi ubuziraherezo. Maze akayadusiga no ku gahanga ngo tuzahore tumuhanze amaso (Ugusigwa kw’abarwayi).

Ng’uko uko Yezu Kristu wapfuye akazuka aturagiriye muri Kiriziya ye Ntagatifu Gatolika. Turamenye rero ntitukiteshe ibyo byiza byose. Tumenye ko amasakaramentu yose abereyeho guha intama za Kristu ubugingo bwe buhoraho. Tumenye ko Ukaristiya n’Ijambo ry’Imana mu Misa bigomba guhora ari Ifunguro ryacu ridutunga buri munsi uko bishoboka kose. Tumenye ko Penetensiya ari ngombwa rwose. Kuko Yezu ni Umuganga wa roho zacu. Twitabire kandi gutabariza abarwayi amasakaramentu hakiri kare kugira ngo Umusaseridoti abahe ayo mahirwe ahoraho yo guhinguka imbere ya Nyagasani Uhoraho buhagiwe kandi basizwe amavuta y’ubutungane.

Yezu Kristu ni Umushumba mwiza . Ntabwo ari umucancuro uhunga aho rukomeye maze agata intama mu kangaratete. Kuri uyu munsi dusabire abaragiye intama ze mu izina rye bose. Kugira ngo Roho Mutagatifu abamurikire, abatere ubutwari mu bihe bikomeye. Ahumurize abahungabanyijwe n’ubukana bw’ibirura n’ubugome bwabyo. Yomore ibikomere by’abakubiswe hasi n’ibihe. Maze akomeze ahe Kiriziya ye Abashumba banyuze umutima we (Yer 3,15). Kandi ayirinde kwinjirwamo cyangwa kwigarurirwa n’abacancuro. Nuko buri wese amugire intama nzima yumva Ijwi ry’Umushumba ikamukurikira. Maze ikirinda burundu kohoka inyuma y’ibirura. Kabone n’ubwo byaza byambaye uruhu rw’intama. Kuko intama ze zidashobora kwemera na rimwe kuragirwa mu rwuri rutari urwa Kristu.

Umubyeyi Bikira Mariya, Umwamikazi w’Intumwa nahe buri wese uyu munsi guhura na Yezu Kristu Umushumba mwiza. Maze kuva none ature mu rwuri rwe kandi atungwe na rwo muri Kiriziya Gatolika. Umubyeyi Bikira Mariya nahe Kiriziya Abashumba b’abatagatifu. Badatinya gutanga ubuzima muri Kristu kugira ngo intama zibugire kandi zibugire busagambye (Fil 2,17; 1Tes 2,8; Yh 10, 10).

 

Padri Jérémie Habyarimana

neque. venenatis, Lorem eleifend vulputate, non