Catégories
Inyigisho UMWAKA B

Inyigisho: Uko byagenze mu gihe cya Nowa

Inyigisho ku wa gatanu w’icyumweru cya 32 B gisanzwe,

Ku wa 16 Ugushyingo 2012 

AMASOMO: 1º.2 Yh 1ª.4-9; 2º.Lk 17, 26-37 

Uko byagenze mu gihe cya Nowa 

Dukomeje kugana umusozo w’umwaka wa liturujiya B tukinjira muri C. Umwaka wa liturujiya usa n’ushushanya urugendo turimo kuva twavuka tukabatizwa kuzageza ku munsi w’urupfu rwacu rw’umubiri. Kuwusoza bigenura kandi isozwa rya byose. Ivanjili ikomeza kutubwira ibyerekeye ibihe bya nyuma. Na ho isomo rya mbere rikatwibutsa iby’ingenzi mu nyigisho ziduherekeza muri urwo rugendo rugana indunduro y’iteka. 

Isomo rya mbere ryatwibukije ko ari ngombwa kubaho mu RUKUNDO rushingiye kuri YEZU KRISTU Umwana w’Imana wigize umuntu. Yohani intumwa yatwibukije ko ibanga rya YEZU KRISTU ari ryo zingiro ry’inyigisho ziboneye. Birazwi ko no mu mpera z’ikinyejana cya mbere cy’ubukristu, hari harakwiriye inyigisho z’ubuyobe, zimwe zavugaga ko YEZU atari Imana rwose izindi zikabwejagura zivuga ko ari Imana ariko ntabe umuntu koko. Iyo dusomye amateka ya Kiliziya, dushimishwa n’uko izo nyigisho z’ubuyobe zagiye ziyoyoka gahoro gahoro. Aha twahabona icyizere cy’uko n’inyigisho nyinshi zigwiriye ubu zizageraho zikagwa buguni. Hari benshi bakomeza guta igihe bangara hirya no hino bakurikiye abashukisha imyemerere y’umwijima n’ubuyobe. Duhore twibukiranya gusabira abasaseridoti bose kuba maso no kuba abanyamurava mu kwegera abo bashinzwe kuragirira roho. Kuba hafi abana, urubyiruko n’abandi bose mu bwiyoroshye ubigisha kandi ubaha urugero rutagira amakemwa mu bukristu, ni intwaro ikomeye mu kurwanya ubuyobe mu kwemera no mu rukundo. 

Uko guhuguka kw’abashumba YEZU KRISTU yitoranyirije, ni ko gutuma abantu bahugukira iby’ijuru bakirinda kubaho bandagaye mu isi kandi barangaye. Kurangara kwacu mu gihe tugifite akuka ko guhumeka ntibitwizeza kuzahuguka kuri wa munsi wa nyuma. Bagira neza abasaseridoti badushishikariza kurangamira iby’ijuru batwibutsa ko guhinga no korora bidahagije, kurongora no kubyara bitaranga ubutungane, guhaha no gucuruza bitaducungira ubuzima, kwishimisha no kwidagadura bitatudabagiza. Nyamara usanga akenshi abenshi ari ibyo dufitiye iharaka! YEZU KRISTU yabitubujije aratuburira. Abo mu gihe cya Nowa n’icya Loti bari bibereye aho mu byabo bashaka iby’isi, bikorera imirimo yabo nta cyo bikopa batitaye no ku by’Uhoraho. Umwuzure waraje ubahitana badasobanukiwe. Nyagasani YEZU aturinde ubwo burangare, duhugukire iby’ijuru tutikururira umuvumo. 

YEZU KRISTU AKUZWE MU MITIMA YACU.

UMUBYEYI BIKIRA MARIYA UTABARA ABAKRISTU ADUHAKIRWE ITEKA. 

Padiri Cyprien BIZIMANA

Catégories
Inyigisho UMWAKA B

Inyigisho: Ingoma y’Imana izaza gihe ki?

Inyigisho yo ku wa kane w’icyumweru cya 32 B gisanzwe,

15 Ugushyingo 2012

AMASOMO: 1º.Filem 7-20 ; 2º.Lk 17, 20-25

Ingoma y’Imana izaza gihe ki?

Iki kibazo Abafarizayi babajije YEZU, tukigire icyacu cyane cyane ko hari abantu benshi bakomeje kucyibaza. Iyo abantu b’iki gihe bibajije iki kibazo akenshi baba bafite amatsiko yo kumenya igihe isi izashirira! N’ejo hari umugabo uturuka mu gihugu cya Equateur twahuye ambaza niba isi izashira ku itariki 12/12/12! Birazwi ko akenshi abakwiza inyigisho z’ubuyobe badahwema gutanga amatariki y’ishira ry’isi. Nyamara ayo matariki arenga nta kibaye kandi na bo bagikanuye kuko batazi umunsi n’isaha bazasarurirwaho. Amasomo y’uyu munsi yose aradusubiza ku buryo bunoze ibyo twibaza ku Ngoma y’Imana. 

YEZU KRISTU ati: “Ahubwo nimumenye ko Ingoma y’Imana ibarimo”. Koko ni byo, ni We ubumbye Ingoma y’Imana. Muri We nyine amatwara y’Ingoma y’Imana arigaragaza. Igihe aje mu isi yatangaje Ubwami bw’Imana. Ubwami bw’Imana bumurimo. Kumwemera no kumwakira, ni ko kwakira Ingoma y’Imana no kuyinjiramo. Kumuhakana ni ko kwicira urubanza rwo kujugunywa hanze kure y’Ingoma y’Imana Data Ushoborabyose. Si ibitangaza bihambaye abantu bakwiye gutegereza. Ni imibereho mishya ishingiye ku Ivanjili ya KRISTU. Ahigaragaza iyo mibereho mishya, aho hari Ingoma y’Imana koko. 

Twabyumvishe mu isomo rya mbere. Ubukristu busimbura ubucakara. Umukristu w’umukire w’i Kolosi witwa Filemoni yiteguye kwakira uwahoze ari umucakara we Onezimi wahuriye na KRISTU i Roma abifashijwemo na Pawulo intumwa. Nk’uko Pawulo abishishikariza Filemoni uwo, uwahoze ari umucakara we agiye kumubera umuvandimwe w’imena. Hari Ingoma y’Imana itari iyo se? Ubukristu nyakuri ni yo nzira yinjiza mu Ngoma y’Imana. Ibyiza byose bituryohera kuri iyi si, bya bindi ariko bikomoka kuri YEZU KRISTU, ni umusingi n’umusogongero w’ibyo duteganyirijwe mu Ngoma y’Ijuru. 

Dusabirane kubisogongera hakiri kare, ejo tutazuzurizwaho ubuhanuzi bwa YEZU watubwiye ati: “Hazaza igihe muzifuza kubona nibura umwe mu minsi y’Umwana w’umuntu, ariko ntimuzawubona”.

YEZU KRISTU NASINGIZWE MU MITIMA YACU.

UMUBYEYI BIKIRA MARIYA UTABARA ABAKRISTU ADUHAKIRWE.

Padiri Cyprien BIZIMANA

Catégories
Inyigisho UMWAKA B

Inyigisho: Yezu, Mwigisha, tubabarire

Inyigisho yo ku wa gatatu w’icyumweru cya 32 B gisanzwe,

Ku wa 14 Ugushyingo 2012

AMASOMO: 1º.Tito 3,1-7; 2º.Lk 17, 11-19

Inyigisho yateguwe na Padiri Cyprien BIZIMANA 

Yezu, Mwigisha, tubabarire” 

Ababembe cumi babonye YEZU baramutakambira nuko arabakiza. Nta wigeze atakambira YEZU KRISTU ngo amwirengagize. Kutamutakambira, ni ukubura ukwemera guhagije, ni ukutamenya ububembe bwacu. Kumutakambira tutabikuye ku mutima na byo, ntacyo bidufashaho. Kumwegera tubikuye ku mutima, ni ukwemera ko ari We Buzima bwuzuye ko ari We juru. Ikigaragaza ko umukiro we tutawakiriye neza, ni uko n’iyo adukijije tutamenya kumushimira. Kumushimira kandi ni uguhagurukira kumukurikira ubuzima bwose no kwishimira kubana na We iteka. Umubembe wagarutse kumushimira, yari yakize ububembe bwose ku mubiri no ku mutima. Sinshidikanya ko abakize bakikomereza, ububembe bwo ku mutima babugumanye. 

Muri iki gihe, ni benshi dutemberana ububembe n’ubumuga butagira ingano. Ubwo burwayi bwigaragaza mu kwikanyiza no gukandamiza, mu gutukana no kwigomeka twanga ibyiza YEZU KRISTU atwereka, kurwana n’ibindi byose bitagize aho bihuriye n’umurimo mwiza duhamagariwe gukora. Twisuzume mu mitima yacu maze dutabaze YEZU KRISTU , aratwumva ni Umukiza w’isi yose. Nidukira, tuzaha abantu bose ubuhamya nk’ubu Pawulo yatugejejeho, tubasabira gukira. 

Nitwemera ko YEZU adukiza, tuzatobora duhamirize abandi ibyo twakijijwe, mbese nk’uko Pawulo abivuga muri aya magambo: “Koko rero natwe kera twari ibicucu, n’intumvira, n’ibirara; twari twaratwawe n’irari ry’ibibi bitagira ingano, tukibera mu bugizi bwa nabi n’ishyari, dufite n’icyangiro kandi natwe ubwacu tuzirana”. Ayo magambo ni igisingizo cyo gushimira YEZU KRISTU witegukiza umuntu wese umutakambiye. Ashaka gukiza buri wese urwaye ubucucu n’ukutumvira. Uwo ni uwirengagiza nkana Ubuhanga bw’Imana Data Ushoborabyose, akannyega inyigisho ziboneye ahabwa na Kiliziya kandi akimiriza imbere gusa ibye by’isi. Aradukiza uburara n’uburaruke. Ababibembye (abarwaye ubwo bubembe) bifitemo gutwarwa n’iby’isi no kunodoka bakurikiranye ibyishimo by’umubiri n’amaraha yose yo ku isi. YEZU nasingizwe kuko akomeje gukiza abasaritswe n’ububembe bwitwa ubugizi bwa nabi, ishyari n’urwango mu bantu. Ababembye batyo, iyo batemeye YEZU KRISTU ngo abakize, nta cyo bunguka kuri iyi si usibye guhora bahekenya amenyo bumvira Sekibi mu gihe bategereje kwinjira mu muriro utazima ha handi urunyo rubanyunyuza rudapfa, aho bazarira bakiheba bagahangayika ubuziraherezo. Gushimira YEZU KRISTU udukiza ayo mage akarishye, ni ngombwa kandi tubikirizwamo. Tumushimire cyane kubera ingabire nyinshi atanga muri Kiliziya igahora yivugurura yumvira ROHO MUTAGATIFU ikayobora roho nyinshi mu ijuru. 

YEZU KRISTU AKUZWE ITEKA MU BUZIMA BWACU BWOSE.

UMUBYEYI BIKIRA MARIYA ADUHAKIRWE.

Catégories
Inyigisho UMWAKA B

Inyigisho: Jya uvuga ibikwiranye n’inyigisho ziboneye

Inyigisho yo ku wa kabiri w’icyumweru cya 32 gisanzwe B,

13 Ugushyingo 2012 

AMASOMO: 1º.Tito 2,1-8.11-14; 2º.Lk 17, 7-10

Inyigisho mwateguriwe na Padiri Cyprien BIZIMANA

Jya uvuga ibikwiranye n’inyigisho ziboneye 

Mu ibaruwa Pawulo intumwa yandikiye Tito amushishikariza kwita ku murimo wo kwigisha. Ejo twavuze uburyo bwo kurwanya ibigusha abantu mu byaha. Iyo ni ingingo ijyanye neza n’umurongo w’inyigisho za Pawulo intumwa. Kurwanya ibyo bigusha byose, ni intambara ya gikristu. Ni ukurwana inkundura tugamije gutsinda Sekibi. Urwo rugamba tururiho tudafite ubwoba kuko intwaro zirahari. YEZU KRISTU ubwe aturangaje imbere. BIKIRA MARIYA na we adufatiye iry’i buryo. Abatsinze urugamba mbere yacu, na bo baradusabira ari na ko batumurikirisha ubuhamya badusigiye. Ubwo buhamya bwerekeye inyigisho bagiye batanga batarya indimi. Tuzi ko aho bigishwa by’ukuri Sekibi ihatsindirwa. Ahari inyigisho z’ubuyobe zigandiyemo ubujiji n’umwijima, harika Sekibi maze kuyarurira no kuyimenesha bikazaba ingorabahizi. 

Intwaro rero ikomeye YEZU aduha ni inyigisho iducengezamo Ijambo rye ry’ukuri. Pawulo intumwa ni ryo yitangiye kwamamaza igihe n’imburagihe. Ni wo murimo yashishikarizaga abo bafatanyaga mu butumwa. Twumvishe ukuntu ashishikariza Tito guhugukira gutanga inyigisho ziboneye. Umuntu wese wihatira kunga ubumwe na YEZU KRISTU aho ari hose, nta kabuza atanga inyigisho iboneye. Iyo nyigisho iboneye, ni ubuzima buzira gutatira uwatwitangiye. Inyigisho nyinshi zaratanzwe, mu isi habayemo abantu b’ibyamamare mu kuvuga neza no kwigisha ku buryo iyo twigisha muri iki gihe, urebye, nta gishya navuga ko dutangaza. Dusubira gusa mu byo twabwiwe na YEZU KRISTU, intumwa ze n’abazisimbuye. Nta yindi Nkuru Nziza twamamaza itari YEZU KRISTU WATSINZE URUPFU AKAZUKA. Igishyashya kandi cy’umwihariko ari na cyo mu by’ukuri gituma inyigisho dutanga zigira akamaro, ni ubuzima buzira umuze muri YEZU KRISTU. Umusaseridoti uri muri paruwasi cyangwa ahandi hose akorera ubutumwa, n’aho yaba adafite ingabire zo kuvuga neza no kwigisha, iyo ari umukunzi wa YEZU KRISTU kandi yihatira gusenga cyane abikuye ku mutima no kwanga icyaha icyo ari cyo cyose, no kuba maso ngo atava aho asingiza Sekibi, nta kabuza abera impamvu yo gukira roho nyinshi. Guhagararira YEZU KRISTU utamukunda kuruta byose, birutwa no gusezera kuri uwo murimo ugakora ibyo ushoboye bindi aho kugusha abandi no kuba nk’icyuma kirangira ngo urigisha. Nta muntu n’umwe wikururira ayo makuba. Ni yo mpamvu tugomba guhora dusabirana kandi duterana inkunga mu butumwa. Ni na yo mpamvu Pawulo yazinduwe no kubwira buri wese muri twe ati: “Nawe ubwawe kandi jya ubabera urugero rwiza mu byo ukora byose: haba mu nyigisho ziboneye, haba se mu kwiyubaha, cyangwa mu magambo aboneye kandi adahinyuka; bityo umubisha azabure ikibi yatuvugaho maze amware”.

Ibice byose by’abantu bigomba kwigishwa no kwibutswa UKURI. Abasaza n’abakecuru bazibutswa cyane cyane kwirinda isindwe, bibutswe kwiyubaha no gushyira mu gaciro kugira ngo bakomere mu kwemera, mu rukundo n’ubudacogora. Nibabyibutswa bakabikurikiza, bazaha urugero rwiza abagore bakiri bato babashe kwitonda no kwirinda ingeso mbi. Urubyiruko na rwo, abasore n’abakobwa bazitabwaho bigishwe kandi bafashwe kumvira YEZU KRISTU no gutsinda ibishuko bibugarije byuririra mu mibiri yabo. Hamwe na hamwe mu ma paruwasi, abasaseridoti bashyiraho gahunda ihamye yo guhuza abayoboke ba KRISTU mu byiciro binyuranye. Kubigishiriza muri ibyo byiciro ni uburyo bwiza bw’ikenurabushyo. Ariko cyane cyane kwihatira kubaha urugero rwiza mu mvugo no mu ngiro, nta nyigisho irenze iyo kandi ni ko kuba umugaragu mwiza ushimishwa no gukora icyo ashinzwe nta nyungu zindi. 

YEZU KRISTU ADUFASHE MU BUZIMA BWACU BWOSE

UMUBYEYI BIKIRA MARIYA UTABARA ABAKRISTU ADUHAKIRWE.