Catégories
Inyigisho UMWAKA B

Inyigisho: Twahawe ingabire ngo twere imbuto

Inyigisho yo kuwa gatandatu w’icyumweru cya 29 B,

Ku wa 27 Ukwakira 2012 

Amasomo: Ef 4, 7-16; LK 13, 1-9 

Twahawe ingabire ngo tugire umwanya muri Kiliziya kandi twere imbuto. 

Imbuto y’umugisha yera ku giti cy’umuruho. Ku mukristu, uyu mugani ntabwo uvuga ko agomba kuba Miruho cyangwa Magorwa, ahubwo umwibutsa umuhate, ishyaka n’imbaraga agomba gukoresha ngo abyaze imbuto impano yahawe. Kwera imbuto ni ikimenyetso simusiga ku muntu wakiriye Yezu Kristu n’ingabire atanga kugira ngo agire umwanya muri Kiliziya, kurangiza umurimo ashinzwe, abigiriye akamaro rusange no kungura umubiri wa Kristu. Kwera imbuto, ni ikimenyetso cy’ubutungane kuko Yezu ubwe agira ati: “igiti kigaragazwa n’imbuto zacyo” (Mt 12, 33). Kwera imbuto ni ikimenyetso cy’ubutore mu rugero rwa Kristu ugira ati: “Simwe mwantoye, ahubwo ni jye wabatoye, mbashyiraho kugira ngo mugende mwere imbuto…”( Yh 15,16). Byongeye kwera imbuto ni icyifuzo cya Kristu, kikaba n’icyemezo nyakuri cyo guhesha Imana ikuzo: Igihesha Data ikuzo ni uko mwakwera imbuto nyinshi… (Yh15,8). 

Kwera imbuto se tubikesha iki? Tubikesha kwakira ingabire Kristu yatugeneye ku bubasha bwa Roho Mutagatifu. Bene izi ngabire, tuzihabwa igihe tubatizwa kandi tukazisenderezwa dukomezwa. Bumwe mu butumwa uwabatijwe akanakomezwa ahabwa, ni ukuba umuhamya w’Inkuru Nziza ya Yezu Kristu. Ni yo musingi nyakuri wo kwera imbuto. Mu gihe cya Pawulo Mutagatifu, bene abo bahamya b’Inkuru nziza bitwaga abigisha ari bo: intumwa, abahanuzi, abogezabutumwa n’abashumba. Intumwa n’abogezabutumwa bavaga mu mugi bajya mu wundi gushinga za Kiliziya nshya. Abahanuzi bo, rimwe na rimwe, bavaga mu ikoraniro bajya mu rindi ngo bashishikaze abakristu. Abashumba na bo, bitangiraga inyigisho zisanzwe mu ikoraniro ryabo, bo rero ntibajyaga hirya no hino. Muri iki gihe turimo dukwiye guhora dusaba Imana ngo itugwirize bene aba bafasha dukeneye kugira ngo badufashe kubyaza imbuto ingabire twahawe. Koko rero, ubu Kristu nta yandi maguru, nta yandi maboko afite, nta rundi rurimi afite ngo ageze Inkuru nziza ku bakene. Ni twe maguru ye, ni twe maboko ye, ni twe kandi rurimi akoresha ngo Ijambo rye rigere kuri bose. Na none, kwakira, kumvira no kubaha abashumba bacu ni ubundi buryo bwo kwera imbuto. Kandi ntitunahweme kubasabira. 

Usibye ibi tumaze kuvuga, hari n’impano Imana yaduhaye, dukoresha mu buzima bwacu bwa buri munsi. Umwe ni umunyeshuri, undi ni umwarimu, umuganga, umufundi,…. Ni ngombwa ko na zo zidufasha kwera imbuto. Ni ibyo twita guhuza ubukristu n’umurimo. Erega urubanza rw’iteka ni aha rushingiye. Nyagasani we ati: “babiri bazaba bahuriye ku murimo umwe, umwe azagenda undi asigare”. Wenda Nyagasani azasanga umunyeshuri arangaye, umwarimu atita ku burere n’uburezi bw’abo ashinzwe, umuganga afasha abantu gukuramo inda, umufundi amaze kunyereza agasima n’ibindi. 

Kwera imbuto ntibishoboka igihe bitabanjirijwe no kwivugurura no kwisubiraho byimbitse. Ni byo Yezu yabwiye abamutekererezaga ibyo Pilato yakoze yica Abanyagalileya maze amaraso yabo akayavanga n’ay’ibitambo baturaga agira ati: nimuticuza muzapfa kimwe na bo. Kwera imbuto, gukoresha neza ingabire twahawe, kubaha no kumvira intumwa, kwicuza no kwisubiraho nyabyo, bizatuma twunga ubumwe mu kwemera no mu kumenya umwana w’Imana tukazaba abantu bashyitse, bageze ku rugero ruhamye, ruyingayinga igihagararo cya Kristu. 

Mwamikazi utabara abakristu udusabire! 

Diyakoni Théoneste NZAYISENGA,

Seminari Nkuru ya Nyakibanda

Catégories
Inyigisho UMWAKA B

Inyigisho: Tumenye ibimenyetso by’Ingoma y’Imana

Ku wa gatanu w’icyumweru cya 29 gisanzwe B,

26 ukwakira 2012 

Amasomo: Ef 4,1-6, Lk 12,54-59 

Tumenye ibimenyetso by’Ingoma y’Imana 

Mu masomo matagatifu yo kuri uyu wa gatanu, Yezu Kristu wapfuye akazuka araturarikira kumenya ibimenyetso by’Ingoma y’Imana. Koko rero, Ingoma y’Imana yaraje kandi iturimo rwagati. Yazanywe na Yezu Kristu wigize umuntu kandi ubwe ayibera Umwami. Ni ingoma ihoraho iteka kandi isumba byose. Abami baratanga, abandi bakima, ariko ingoma ya Yezu Kristu yo ihoraho. Iyo ngoma y’Imana rero igaragazwa cyane n’ibimenyetso, ibitangaza n’ibikorwa by’urukundo Yezu akora cyangwa akoresha bamwe mu bo yatoye ngo bakomeze kugaragaza iyo ngoma ye mu bantu. Ese ingoma ya Kristu ni iyihe? Yagenewe ba nde? Ingoma ya Kristu ni iy’urukundo n’impuhwe, kandi yagenewe abantu bose cyane cyane abemera. 

Bavandimwe,urukundo n’impuhwe ni na byo gipimo kigaragaza umuntu wakiriye ingoma y’Imana kandi akayisakaza mu bandi. Bityo rero, ni ngombwa ko duhora tuvugurura urukundo dukunda Imana na mugenzi wacu. Urukundo rurihangana, rwitangira abandi, ntirugira ishyari, ntirwikuririza, ntirurondera akari akarwo kandi ntirwishimira akarengane (1Kor 13, 4-6). Byongeye, umuntu wakiriye iyi ngoma y’Imana arangwa n’impuhwe, akababarira, ntagire uwo yitura inabi, akabana na bose mu mahoro, bityo inabi akayiganjisha ineza (Rom 12, 21). 

Ingoma y’Imana na none, igaragazwa n’ubumwe ababatijwe bagirana kugira ngo bungure umubiri wa Kristu. Koko rero, abahamagariwe gusangira ukwemera kumwe muri Roho Mutagatifu,bagahamagarirwa kunga ubumwe na Nyagasani Yezu Kristu, bagahabwa Batisimu imwe, bakagira Imana ho umubyeyi wa bose(Ef 4,3-4), uko byagenda kose ntibakwiye kwitandukanya. Ubwitandukanye cyangwa amacakubiri (division), ni imwe mu ntwaro zikomeye Gatanya (Diable-Dayimoni) akoresha ngo atatanye abana b’Imana, ngo atume ya ngoma y’Imana bimitse yibyaramo amahari. Aha ni ho ubushyamirane buturuka: umuhungu na se, umukobwa na nyina,umukazana na nyirabukwe, umuyobozi n’uyoborwa, umwigisha n’umwigishwa kugeza n’aho abigisha batavuga rumwe na Kristu we Mwigisha mukuru. 

Twe ababatijwe rero, ntitukagenze dutyo. Tujye duharanira gushyira urukundo ahari urwango, dushyire imbabazi n’impuhwe ahari ubushyamirane n’intonganya, dushyire ibyishimo ahari agahinda n’imibabaro, ahari amacakubiri tuhashyire ubumwe. Ikindi kandi, ingoma ya Kristu ni yo mukiro n’ubukungu nyabyo. Tukazirikana ariko ko uwo mukiro tuwutwaye mu tubindi tumeneka ubusa. Bityo natwe tugasabwa kwigengesera, twirinda kwishora mu ngeso mbi no kwigaburira ibyonnyi. Igihe kandi tugize intege nke tukabyaza ingoma y’Imana mo amahari, twihutire kugaruka no kwigorora n’Imana ndetse na mugenzi wacu. Ni byo Yezu Kristu atubwira agira ati: “nuko rero nujyana n’umuburanyi wawe agiye kukurega, gerageza kwigorora nawe mukiri mu nzira, hato ataguteza umucamanza, umucamanza na we akakugabiza umurinzi w’uburoko ngo agufunge”. Tudatinze ku gisobanuro cy’uburoko mu buzima busanzwe, uburoko bukabije ni ubw’umutima. Aha ni ho Sekibi asubiza bamwe mu babatijwe mu ngeso mbi zinyuranye zibatandukanya na Nyir’ingoma. Ikibazo nyakuri kiri ku buroko imitima yacu ifungiyemo kurusha ko cyaba uburoko bw’abana b’abantu. Ni ngombwa rwose kwigobotora ingoyi za Sekibi buri munsi, kuko ari cyo Batisimu yaturonkeye. 

Ni muri ubu buryo, umuntu wibohoye ingoyi za Sekibi ashobora kubohora n‘abandi, maze hamwe na Pawulo Mutagatifu akazirikana iki cyishongoro: “Nk’uko umubiri ari umwe, na Roho akaba umwe, ni na ko mwahamagariwe gusangira ukwizera kumwe. Nyagasani ni umwe, batisimu ni imwe n’Imana ni imwe, Yo Mubyeyi wa bose, usumba bose, agakorera muri bose, kandi agatura muri bose”. Ubu ni bwo buryo nyabwo bufasha umukristu kugira ati: Ingoma y’Imana yogere hose, tubabarirwe ibicumuro byacu nk’uko natwe tubabarira

UMWAMIKAZI WA ROZARI ADUHAKIRWE 

Inyigisho yateguwe na Diyakoni Théoneste NZAYISENGA, Nyakibanda

Catégories
Inyigisho UMWAKA B

Inyigisho: Naje kubateranya

Ku wa kane w’icyumweru cya 29 B gisanzwe,

25 Ukwakira 2012 

AMASOMO: 1º.Ef 3,14-21

2º.Lk 12,49-53 

Inyigisho yateguwe na Padiri Cyprien BIZIMANA

Naje kubateranya” 

Mu nyigisho y’ejo, twazirikanye ku buhamya bwa Pawulo intumwa wagiraga ati “Nacengewe n’ibanga rya KRISTU”. Twavuze ko twe tutaragera ku gipimo cy’ubuhamya bwe ariko ko twifuza kuhagera.Twirinze kwirata no kwishyira imbere. N’uyu munsi rero, amagambo tugize umutwe w’inyigisho, si ayacu. Ni aya YEZU nyirizina. Tugerageze kuyumva neza kugira ngo natwe nitwinjira mu mabanga ye twe kuzatitira tubonye twagirijwe hirya no hino. 

YEZU KRISTU avuga ko yazanywe no gukongeza umuriro ku isi. Yifuza ko waba ikibatsi kigurumana. Kuri We, uwo muriro ufitanye isano na batisimu yahawe. Uwo muriro, ni ikibatsi giteye ukwacyo gituma umuntu adatinya iriya batisimu YEZU avuga. Erega ni batisimu y’amaraso ku musaraba! Ni yo igaragaza rwa RUKUNDO na rwo rumuturukaho rukamera nk’umuriro ushyushya abari akazuyazi. Iyo batisimu, ni yo ishobora no gutera ubwitandukanye mu bantu. Bamwe barayemera, abandi bakayirwanya. Byumvikana neza iyo twibutse uburyo ingo zagiye zisenyuka bitewe no kurwanya YEZU. Cyane cyane mu ikubitiro, hari abashakanye batandukanye bitewe n’uko umwe ahindutse umukristu maze unangiye akajyana urubavu rwe mu nkiko bakarushwanyaguza. Hari ababyeyi bahize abana babo baranabicisha babaziza ko bemeye YEZU KRISTU. Habaye ubuhemu bukomeye no gutatira ibihango kamere biranga abafitanye isano y’amaraso. 

Aya magambo YEZU avuga ni indunduro y’ibyo umusaza Simewoni yahanuriye ababyeyi be agira ati: “Dore uyu nguyu yashyiriweho kubera benshi muri Israheli impamvu yo korama cyangwa gukira, azaba n’ikimenyetso bazagiriraho impaka. Nawe kandi inkota izakwahuranya umutima. Maze ibitekerezo biri mu mitima ya benshi bigaragare” (Lk 2, 34-35). Cyane mu ntangiriro za Kiliziya, abantu bararwanye karahava, bapfa kwemera YEZU KRISTU WAPFUYE AKAZUKA. Yabaye koko ikimenyetso bagiriyeho impaka za ngo turwane. Umubyeyi Bikira Mariya na we yashenguwe n’imibabaro myinshi nk’uko tubizi. Iyo usomye neza amateka y’isi n’aya Kiliziya by’umwihariko, usanga abantu bamwe na bamwe bagiye bagerageza kwakira UKURI kwa YEZU KRISTU batarabuze guhura n’ibitotezo. Abenshi muri bo bahuye n’abanzi benshi kandi rimwe na rimwe ugatangazwa n’uko abo banzi bagaragara nk’abayoboke muri Kiliziya. Ibyo ariko ntibitangaje cyane kuko Sekibi ikomeza umurimo wayo kandi irishima cyane iyo ibashije kwifatira umuntu akaba mu Kiliziya ariko mu by’ukuri yaraviriyemo: kubamo utarimo, umutima wuzuyemo ibitajyanye n’inyigisho ya YEZU ariko nyine ukibonekeza nk’umukristu. 

Urugamba ntirwarangiye. Ibihe turimo si byo byumva neza UKURI kwa YEZU KRISTU. Na none hari abatotezwa bitewe n’uko biyemeje gukurikirana Umukiro bamenye muri YEZU KRISTU. Ingero zirahari. Ari izoroheje ari n’izo usanga zihanitse. None umuntu ushyingiwe agatangira gutotezwa na nyirabukwe kuko yanze imihango ya gipagani amuhatira, ubwo se ntaba agaragaje ukuri kw’amagambo ya YEZU? Umuntu uhindutse akitandukanya n’agaco k’abakora ibi, ko hari igihe abo bahoranye mu mwijima bamuhiga, ubwo se amagambo ya YEZU ntaba antakomeje kuzuzwa? Hari nk’abasore baba bari mu duco tw’ibirara, abanywa urumogi, abajura, abasambanyi…Iyo YEZU amukozeho rikaka, abakiboshywe ntibamwumva, bashobora no kumutoteza. Umuntu wiyumvamo ingabire yo kwigisha ashize amanga UKURI kwa YEZU KRISTU, ese mugira ngo abura guhura n’ibitotezo. Ntitugahunge ibitotezo n’ingorane duterwa no gukunda YEZU ku isi ya none. Dutsinde igishuko cyo kunywana n’isi twishakira kubaho neza gusa. Kwemera kubabara kubera YEZU KRISTU, ni ko kwifatanya na We ku musaraba. None se umusaraba si ikimenyetso ntasibangana cy’ugucungurwa kwacu? 

Twisabire gutera imbere mu bumenyi bw’amabanga ya KRISTU nk’uko Pawulo abiduhamo urugero n’impanuro. Dusabirane gushora imizi mu RUKUNDO rwa KRISTU. Ntituzagira ubwoba bw’uko ibyo yavuze byuzuzwa. 

YEZU KRISTU ASINGIZWE ITEKA MU MITIMA YACU.

UMUBYEYI BIKIRA MARIYA ADUHAKIRWE.

 

Catégories
Inyigisho UMWAKA B

Inyigisho: Nacengewe n’ibanga rya Kristu

Ku wa gatatu w’icyumweru cya 29 B gisanzwe,

24 Ukwakira 2012 

AMASOMO: 1º.Ef 3,2-12

2º.Lk 12,39-48

Inyigisho yateguwe na Padiri Cyprien BIZIMANA 

“Nacengewe n’ibanga rya Kristu” 

Aya magambo nshyize ku mutwe w’inyigisho y’uyu munsi, si ayanjye. Cyakora icyifuzo gikomeye mfite, ni ugusaba Nyirimpuhwe kungabira kuzayavuga mbere yo guhinguka imbere ye. Icyo cyifuzo kandi ni cyo mfitiye abo dusangiye ibanga rya gisaseridoti aho bari hose ku isi, abo nzi n’abo ntazi. Niducengerwa n’ibanga rya KRISTU bizoroha kurihereza isi ya none ikeneye ihumurizwa ryuzuye. N’umuntu wese wabatijwe, ni cyo mwifurije. Utarabatizwa na we wasoma iyi nyigisho, mwifurije kubyifuza no kubigeraho kugira ngo abe ikiremwa gishya muri KRISTU azanamenye amabanga y’ugukizwa. 

Nacengewe n’ibanga rya KRISTU”, ni ubuhamya Pawulo intumwa yahaye Abanyefezi ubwo yabandikiraga. Ubwo buhamya yabuhaye n’abantu bose bahuye na we igihe amariye kwigobotora ubujiji bwari bwaramuhejeje kure ya YEZU KRISTU Umukiza w’abantu bose. Kiliziya zose Pawulo yashinze yazihaye ubwo buhamya bw’uko yagize amahirwe yo gucengerwa n’ibanga rihebuje rya KRISTU. Ubwo buhamya bweze imbuto nyinshi kuko butaheze ku rurimi gusa. Yabushyizeho umukono udasibangana igihe apfuye ahowe YEZU KRISTU. Kugeza igihe isi izashirira, ubwo buhamya bw’intwari Pawulo wabyirukiye gutsinda, buzakomeza kumurikira isi yose. N’aho ari mu ijuru aradusabira kugira ngo twigobotore ibyaduhotoreye roho bishaka koreka benshi muri iki gihe turimo. 

Gucengerwa n’ibanga rya KRISTU, ni byo bitanga imbaraga zo kwitangira umurimo wa gitumwa. Ubwangwe dushobora kugaragaza mu mibereho yacu, ni ikimenyetso cy’uko tukiri kure mu kunga ubumwe na KRISTU MUZIMA. Iyo turangwa n’ubunyanda mu butumwa, kugenda duseta ibirenge, kwigisha ibitekerezo by’abantu gusa tudashinze imizi mu Nkuru Nziza Pawulo yitangiye, tuba dukwiye kwisuzuma bihagije kugira ngo tubeho dukurikije umurimo twatorewe. Twese, abalayiki n’abasaserodoti, dukwiye kongera kwigira kuri Pawulo intumwa wamamaje YEZU KRISTU igihe n’imburagihe. Tuzirikane ukwigora yagaragaje, imvune, imvura yamucikiyeho, urubura rwamutitije n’ibindi. Nta kindi yari agamije, nta nyungu z’amafaranga yari yimirije imbere, nta kwishakira imitungo ye, nta n’ubwo yigeze ashaka umugore. Ibyo byose tubitekerezeho maze twibaze igihe tuzatangira ubuhamya nk’ubwe tubwira bose ko twacengewe n’ibanga rya KRISTU.

Ingabire dukeneye gusaba, ni ukuba maso igihe cyose. Ni kenshi dushaka kubaho nk’abatagatifu dusoma mu bitabo banditse cyangwa byabanditsweho, ni kenshi twigisha tubwira abantu ibyo guhinduka no kuba abakristu nyabo. Ariko na none, ni kenshi nyuma y’ubutumwa duhangana n’imyambi ya Sekibi. Iyo itwirukankanye tugahunga twonjoroka, iduhonda hasi, tugacika intege, tukabera benshi ibigusha.

YEZU KRISTU mu Ivanjili yatugiriye inama yo kuba maso kuzageza igihe azazira kutujyana aho ari. Nasanga turangariye mu bindi, ntituzahita tujyana na we. Tuzagomba kuborera mu bubabare bwa Purugatori igihe kirekire. Ibyo ntabishaka. Kuko adukunda cyane, ashaka ko tugera mu byishimo hamwe na We tudatinze. Mama wacu BIKIRA MARIYA na we ahora adusabira. Twisuzume kugira ngo dutangire gutanga ubuhamya bw’ibanga rya KRISTU ari na ko turisobanurira abatarizi. Ntituzatungurwe, ntituzakubitwe nyinshi.

YEZU KRISTU NASINGIZWE ITEKA MU MITIMA YACU.

BIKIRA MARIYA ADUHAKIRWE UBU N’ITEKA RYOSE.