Catégories
Igihe cya Pasika Inyigisho UMWAKA B

Ni jyewe Mugati utanga ubugingo. Unsanga ntazasonza bibaho

KU WA KABIRI W’ICYUMWERU CYA GATATU CYA PASIKA

Ku wa 24 Mata 2012

AMASOMO:

Intu 7,51-8,1ª; Zab 31 (30): Yh 6,30-35


‹NI JYEWE MUGATI UTANGA UBUGINGO.UNSANGA WESE NTAZASONZA BIBAHO, N’UNYEMERA NTAZAGIRA INYOTA BIBAHO›

Yezu araganiriza abantu yari yaraye agaburiye imigati n’amafi yatubuye. Yari yafashe imigati itanu y’ingano za bushoki n’amafi abiri agaburira ikivunge cy’abantu. Bararya barijuta baranasagura. Muri icyo kivunge cy’abantu , abagabo barimo bari nk’ibihumbi bitanu. Uyu munsi Yezu arahura n’abo bantú kuko bwarakeye bongera kumushaka. Yezu agihura na bo bamubwiye amagambo meza bamwereka ko bamukeneye rwose. Ariko Yezu we arababwira, ati “ndababwira ukuri koko: ntimunshakira ko mwabonye ibimenyetso, ahubwo muranshakira ko mwariye imigati mugahaga. Nimujye mukora mudaharanira ibiribwa bishira, ahubwo nimuharanire ibiribwa bihoraho mu bugingo bw’iteka, ibyo Umwana w’umuntu azabaha, kuko ari we Imana Data yashyizeho ikimenyetso”(Yh 6,26-27). Ikiganiro kirakomeza baka Yezu ikimenyetso kigaragaza ko yaturutse Kuri Uhoraho nk’uko Musa yagaragaje ko ibyo akora bituruka ku Mana ihoraho agaburira manu abasekuruza babo mu butayu. Nyamara Yezu arabakosora ababwira ko atari Musa wabagaburiye umugati wo mu Ijuru ahubwo ko ari Se wa Yezu uri mu ijuru wawubagaburiye. Yezu ahera aho ngaho abasobanurira ko umugati Uhoraho atanga ari uw’ukuri, uturuka mu ijuru kandi ukazanira isi ubugingo. Amaze kubabwira iby’uwo mugati bumvise bifuje guhora bawurya maze bamusaba guhora awubaha. Nibwo Yezu abasubije, ati “ni jyewe mugati utanga ubugingo. Unsanga wese ntazasonza bibaho,n’unyemera wese ntazagira inyota bibaho”.

Nk’iyo mbaga,uyu munsi ni twe Yezu abwira ko ari umugati utanga ubugingo. Nitwe abwira ko nitumusanga tutazasonza. Ko nitumwemera tutazagira inyota bibaho. Natwe arabitubwira kuko atubonamo inzara n’inyota y’ibindi bitari we cyangwa se y’ibindi bisenya rwose ubuzima bwe muri twe. Arabitubwira kuko abona tumukurikiye, tumushakira kubura hasi no hejuru, ariko tugira ngo atugaburire turye nta kindi dupfana na we. Aratubwira ariya magambo kubera ko abona duhangayitse kubera ibiribwa n’ibinyobwa cyangwa kubera n’ibindi bintu bijyanye n’imibereho ya hano ku isi. Arabitubwira aduha nk’igisubizo cy’amasengesho menshi tuvuga dusabira abantu imibereho ya hano ku isi: abo dusabira kubona akazi, dipolome, uruhusa rwo gutwara ibinyabiziga, n’andi mahirwe anyuranye ya hano munsi nko kushyingirwa cyangwa kubyara. Yezu natwe aratubwira ririya Jambo nk’aho yagize ati, “ibyo byose murarikiye, mufitiye inzara cyangwa inyota, mumenye ko atari byo bitanga ubugingo. Ni jyewe mugati utanga ubugingo”. Koko rero mu buzima busanzwe, umuntu ntaramuka kuko yariye cyangwa yanyoye. Umuntu amara kabiri kuko Nyagasani Uhoraho akimuhagaritse. Akenshi rero twebwe abantu twibeshya ko tubeshejweho n’umugati turya wa hano munsi. Nyagasani uyu munsi aratwereka ko twibeshya rwose. Ko ubuzima atari ubwo dukesha amafunguro. Ahubwod ko ubuzima bwacu bw’ukuri ari We ubwe, Mugati nyakuri utanga ubugingo.Kwemera ko Yezu ari Umugati utanga ubugingo bivuga rero kwemera kugaburirwa na we. Kwemera kubeshwaho na we.

Ni byo koko Nyagasani uyu munsi araduhamagarira guhindura “imirire n’iminywere”. Hari abajya bavuga ngo mbwira icyo urya nzakubwira uwo uri we. Ni yo mpamvu twakwibaza uyu munsi: ku byerekeranye n’umubiri,;ese ibitunga umubiri wanjye bikomoka Kuri Yezu Kristu Mugati utanga ubugingo? Mu yandi magambo ibintunga cyangwa ibyo ntunze ari na byo ntekereza ko bintunze nabironse binyuze mu zihe nzira? Niba bikomoka Kuri ruswa, uburaya, ubwicanyi, amanyanga, ubujura bunyuranye, amahugu…Yezu uyu munsi araguhamagarira kubigenza nka Zakewusi (Lk 19,1-10) cyangwa nka Mariya Madalena. Wishidikanya. Yezu waremye umubiri ntazawuburira n’ikiwutunga kimuturukaho, niba wiyemeje gutura muri we. Naho ku birebana n’ifunguro rya roho; twakwibaza ibitunze roho yacu. Muri make mu buzima bwawe ni iki kigutera guhimbarwa ngo wumve uguwe neza mu mutima wawe? Ese ibyo bigutera akanyamuneza no guhimbarwa bikomoka kuri Kristu bikamuganaho? Ese bifitanye isano n’ibyamuhimbaje na n’ubu bikimutera kwishima hamwe n’Ijuru ryose ( Mt 11,25-30; Lk 15,7)? Ese ni iki kijya gitera umutima wawe kubabara? Ese ibikubabaza mu mutima wawe ni cyo bibabaza na Kristu (Lk 6,21; 19,41)? Koko rero kubabarana na Kristu no kwishimira muri we ni ibanga rya Pasika ye mu buzima bwacu. Ni bwo buzima bushya aduha (Kol 3,1-4).Kubera iyo mpamvu rero, Ibyo cyangwa abo twirukaho bose, tumenye neza ko nta n’umwe ufite ububasha bwo kutubeshaho. Kristu ni we Mugati utanga ubugingo bw’ukuri.

Umubyeyi Bikira Mariya, Nyina wa Yezu Kristu uri mu Ukaristiya nadusabire twese uyu munsi kwakira Yezu Kristu Mugati utanga ubugingo. Twemere gutura muri we, gutungwa na we no gutagatifuzwa n’ubutungane bumuturukaho.

Padiri Jérémie Habyarimana

Catégories
Igihe cya Pasika Inyigisho UMWAKA B

Igikorwa Imana ishima

KU WA MBERE W’ICYUMWERU CYA GATATU CYA PASIKA,

23 MATA 2012

 

AMASOMO:

1º. Intu 6, 8-15

2º. Yh 6, 22-29

 

IGIKORWA IMANA ISHIMA

 

Imana Data Ushoborabyose ni umubyeyi wacu udukunda. Ibyo dusanzwe tubizi kuko twabibwiwe kenshi. Nta sakaramentu na rimwe twateguriwe tutabwirwa ko Imana twemera ari Umubyeyi wacu. Twagize amahirwe tunamenya ko yohereje Umwana wayo mu isi ngo atumare amazeze ku byerekeye Umugenga wa byose, Data wacu udukunda. Niba rero twemera ko Imana ari Umubyeyi wacu, ni ngombwa kwihatira gukora ibyo ishaka. Gukora ibyo Imana Data ishaka, ni yo nzira y’Umukiro.

Uyu munsi, YEZU KRISTU ubwe ashaka kutwigisha ko igikorwa Imana ishima ari ukwemera uwo yatumye. Kwemera YEZU KRISTU ni cyo gishimisha Imana. Ayo ni yo magambo dukoresha mu mvugo ya muntu. Ariko icyo bishatse kuvuga, ni uko ibyishimo n’amahoro tubikesha kunga ubumwe n’Imana Data Ushoborabyose muri YEZU KRISTU.

Hari ibintu bibiri bitubuza gukora icyo Imana ishima: inda nini n’ikinyoma. Inyigisho y’uyu munsi iradufasha kwipakurura ibyo bibi no kwibibamo imbuto y’ubugingo bw’iteka. Reka tubizirikaneho mu magambo akurikira.

Gushyira imbere inda yacu cyangwa se kwibanda ku by’isi, kuba ari byo duhibikanira gusa, ni uburyo butuzuye bwo kuba ku isi. Birakomeye kumva inzira ya YEZU utibohoye ibyo by’isi. YEZU yatubuye imigati abayahudi bayirira ubuntu bahaga bavuga ngo: “Koko ni ukuri, uyu ni wa Muhanuzi ugomba kuza mu isi” (Yh 6, 14). Ukwemera kuje gutyo, ni kwa kundi kwa Bashimiramwiriro. Ibindi bimenyetso yari yarerekanye mbere akiza abarwayi, yigishanya ububasha, byose bisa n’aho nta cyo byari byarababwiye. Ubwenge bwabo bwari bwerekeje mu isi gusa. YEZU KRISTU yababwije ukuri ati: “Nimujye mukora mudaharanira ibiribwa bishira, ahubwo nimuharanire ibiribwa bihoraho mu bugingo bw’iteka”. Ibyo biribwa kandi YEZU arahamya ko ari we ubitanga. Mwene muntu azi ubwenge bwo gushakashaka ibimufitiye inyungu kugira ngo abeho neza, arye neza, yambare neza n’ibindi. Ubwo bwenge n’abanyarwanda barabuzi kuva kera kuko bemezaga ko kimwe mu bigeza ku mahirwe nyakuri ari ugutunga no gutunganirwa. Hariho ababatijwe hirya no hino ku isi bibwira ko icyo bategereje ku bukristu ari ukubaho neza kuri iyi si. Basenga basaba ahanini iby’isi. Mu gihe bigenda nta kibazo bafite, bajya mu kiliziya. Iyo bahuye n’ingorane nk’izo, batangira kwijujutira Imana bavuga ko itabumva. Bene uko kwemera ni igicagate. Ntigushobora kumurikira isi ngo kuyivane mu kangaratete. Iyo myumvire ntaho itaniye cyane n’abashobora kujya kwiyegurira Imana bashyize imbere iby’isi: kurya no kunywa neza, kwambara neza, guharanira ibigezweho, gushakisha ifaranga ku nyungu zabo, kwifurahisha mu buryo bwose. Kwemera YEZU KRISTU ni ukwemera kunyura mu nzira yanyuzemo kuva avukiye ahantu hakennye kugeza asuzuguriwe ku musaraba. Icyo YEZU yari ashyize imbere ni iki? Jyewe se, wowe se, icyo dushyira imbere ni iki?

Ikindi kitubuza gukora ibyo Imana ishima, ni ikinyoma. Isomo rya mbere rirabitwumvisha neza. Ikinyoma akenshi kijyana no kurwanya ukuri. Sitefano yari yuzuye Roho Mutagatifu akagaragaza ibimenyetso n’ibitangaza bikomeye. Abanzi ba YEZU KRISTU babibonye bahekenya amenyo. Baramuhagurukiye kugeza ubwo bakoresheje ibinyoma. Abashinjabinyoma barahamagajwe mu Nama Nkuru maze si ukumuharabika barasizora. Ibyo binyoma byari bigamije kumucisha umutwe kandi babigezeho nk’uko tuzakomeza kubisoma mu bindi bika by’iki gitabo cyitwa Ibyakozwe n’intumwa. Sekibi yangisha Ukuri iriho mu isi. Abemera KRISTU nibabe maso barangwe n’ubushishozi batsinde sekibi-sekinyoma. Ahari ikinyoma nta kuri kuhashakwa. Ahari ikinyoma ntibashaka utangaza ukuri. Sitefano aziregura ariko ntibazabura kumwica kuko bicariwe na sekinyoma yunze ubumwe n’amaco y’inda twavuze. Nta mukristu ukwiriye guhindurwa igikoresho cya sekinyoma. Ni ngombwa guhora dusaba imbaraga zo gutsinda ikinyoma nta bwoba mu Izina rya YEZU KRISTU WATSINZE URUPFU.

YEZU KRISTU ni muzima. Aduha imbaraga. Twihatire kuzikoresha twamamaza UKURI kwe. Nitumusanga tugamije kumwumva no kumubaza icyo dukwiye gukora, tuzatsinda urugamba rw’umwijima w’ibyaha by’inda nini n’ ibinyoma. Tuzakunda YEZU KRISTU we wenyine ushobora kutuyobora inzira y’ijuru.

BIKIRA MARIYA ADUHAKIRWE

YEZU ASINGIZWE.  

Padiri Sipriyani BIZIMANA

Catégories
Igihe cya Pasika Inyigisho UMWAKA B

Uhereye i Yeruzalemu abantu bagomba kwigishwa iby’ukwisubiraho

ICYUMWERU CYA GATATU CYA PASIKA

Ku wa 22 Mata 2012

AMASOMO:Intu 3, 13-15. 17-19; Zab 4; 1Yh2, 1-5; Lk 24, 35-48


‹ UHEREYE I YERUZALEMU ABANTU BO MU MAHANGA YOSE BAGOMBA KWIGISHWA MU IZINA RYE, IBYEREKEYE UKWISUBIRAHO N’IBABARIRWA RY’IBYAHA›

Uyu munsi Yezu Kristu wazutse mu bapfuye arabonekera intumwa ze ziteraniye hamwe. Mbere yaho yari yabonekeye bamwe muri bo. Yezu yasanze abo yari yabonekeye barimo kubitekerereza bagenzi babo nk’Inkuru yabashimishije ikanabatangaza. Ariko ikanabafasha gutangira gukongeza muri bo urumuri rwo kwemera ko Yezu ari muzima. Mu gihe abigishwa baganiraga iby’Izuka rye ni bwo Yezu na we yagize atya aba ahagaze hagati yabo. Abaha amahoro maze arabahumuriza. Dore ko babanje kumwikangamo umuzimu. Kugira ngo Yezu abereke rwose ko ari Muzima ntiyabaganirije gusa. Yabasabye kumwitegereza no kumukoraho hanyuma anafata ku ifunguro ryabo bose bamureba. Yakomeje kubigisha . Hanyuma abaha Ubwenge bwo gusobanukirwa Ibyanditswe. Maze arangije abaha ubutumwa bwo kwigisha abantu bose uhereye i Yeruzalemu. Ubutumwa Yezu abahaye ni ukwigisha mu izina rye ibyerekeye ukwisubiraho n’ibabarirwa ry’ibyaha. Naho abo abatumyeho ni abantu bose bo mu mahanga yose uhereye i Yeruzalemu.

Nka ziriya Ntumwa Yezu uyu munsi ni twe aje asanga aho duteraniye tuvuga iby’Izuka rye. Uyu munsi Yezu Kristu wapfuye akazuka aratubonekera rwose. Aratuganiriza, adusaba kumwitegereza. Tumukoreho. Dusangire na we. Kandi aduhugure ubwenge aduhe n’ubutumwa. Twitonde rero twoye kumwikangamo umuzimu. Yezu Kristu ni muzima rwose mu Misa. Yezu Kristu ni muzima mu Ukaristiya. Yezu Kristu ni muzima rwose mu musaseridoti uhagaze mu izina rye (Yezu) atanga inyigisho kandi atura igitambo cy’Ukaristiya. Twibuke ko Yezu yabwiye intumwa ze ati “ndababwira ukuri koko: uwakiriye uwo ntumye, ni jye aba yakiriye, kandi unyakiriye aba yakiriye Uwantumye”(Yh 13,20). Ntitugomba rero kumva ko Yezu ari uwapfuye none hakaba hari abantu bamuhagarariye barimo kutubwira ibye. Yezu si Nyakwigendera abe bafatiye ijambo bagira ngo babwire abantu ibigwi by’iyo ntwari yatabarutse. Oya,Nyagasani Yezu yazutse koko! Kandi yabonekeye abigishwa be. Nyagasani Yezu yazutse kandi aratubonekera. Yezu Kristu ni muzima rwose. Mu musaseridoti usoma Misa ni Yezu Kristu ubwe muzima uhagaze hagati yacu! Mbega ibanga ry’Urukundo rudukiza muri Yezu Kristu! Natwe hamwe na ziriya ntumwa twagombye guhora dutangara rwose. Ariko tukanataraka kubera ibyishimo. Yooo! Mbega urukundo! Mu Misa Yezu Kristu wapfuye akazuka ari kumwe natwe iminsi yose kugeza igihe isi izashirira (Mt 28,20). Si Padiri kanaka uduha umubiri we, ahubwo ni Yezu ubwe uduha umubiri we bwite. Si Padiri kanaka utubwira ijambo rye; ni Kristu ubwe utwigisha.Twishimire kwakira Yezu Kristu wapfuye akazuka uje adusanga ngo adusobanurire, adusonzore kandi adusabe gusakaza ku isi ubusukurwe bwisanzuye hose ku bw’amaraso ye(Heb 10, 24; Hish 1, 5-6).

Kubera iyo mpamvu rero Misa tugomba kuyikunda kuko tuhahurira na Yezu ubwe muzima. Abenshi bacitse mu misa kuko bitiranyije Yezu n’umuzimu. Uwo muzimu se twitiranyije na Yezu ni nde? Ashobora kuba ari ibikorwa bya kanaka mu maso y’abantu w’umukristu ukomeye. Ariko wowe ukaba uzi neza ko nta Yezu akorera rwose. Ibikorwa bye bitera urupfu (Heb 9,14) bikakubera ikigusha ugahitamo kuva muri kiriziya uhungira mu yandi madini. Cyangwa ugahitamo kwiyicarira mu rugo uvuga ko ariho hagufasha. Kuko iyo uhuye n’abantu biyita abakristu atari bo baragucumuza. Ari uwaguteye gutana, ari nawe ubwawe mwese uyu munsi Yezu Kristu wapfuye akazuka abasanze abasaba kwisubiraho kugira ngo mubabarirwe kandi mubabarirane. Impuhwe za Yezu ntawe ziheza. Kuki twakwifuza ko abo twita abanyabyaha kuturusha bava muri Kiriziya, kandi Yezu we arimo kuhabahamagara kugira ngo ahabakirize?

Yezu Kristu wapfuye akazuka rero uyu munsi aratwohereje ngo mu izina rye duhamagarire abantu guhinduka. Bityo babonereho na bo kubabarirwa mu izina rye. Ntitugomba gukinisha ubu butumwa.Kuko ni ubutumwa bwerekeye ubucungurwe(Ijuru) cyangwa Ubucibwe Kuri muntu. Ni ubutumwa bwerekeranye no gupfa cyangwa gukira. Ni ibyerekeranye n’amagara amwe aseseka ntayorwe (Mk 16,16). Twagombye rwose kubukora uko Roho Mutagatifu abidushoboza kose. Erega Yezu si inama atugira. Ahubwo arabidutegeka. Abantu bo mu mahanga yose bagomba kwigishwa natwe mu izina rya Yezu. Mu kwamamaza Inkuru Nziza nta hezamoko n’irondakoko. Ni ubutumwa bureba abantu bose. Ndetse kimwe mu bimenyetso by’abakiriye Inkuru Nziza ni uko bareka kuvangura abantu. Bakumva ko twese dufite icyo dutegetswe gukora kugira ngo tubeho: kwisubiraho no kubabarirwa ibyaha muri Kristu. Ko bitureba twese. Kandi ko utari muri iyo nzira wese tugomba gukora ku buryo bwose ngo tumwinjize muri Kristu.

Umubyeyi Bikira Mariya, Nyina wa Yezu Kristu wapfuye akazuka n’Umwamikazi w’Intumwa nadusabire twese Kuri iki cyumweru. Twakire Yezu twemera kuva mu byaha byose. Twakire Yezu twemera kubabarirwa muri we. Twakire Yezu twemera guha bose amahirwe yose yo gukiza roho no kubaho iteka. Twakire Yezu wazutse tumubera abahamya b’ubuzima bushya bityo abantu boye kutwikangamo umuzimu bahereye ku bikorwa byacu bitera urupfu. Ahubwo batubonemo Kristu muzima bahereye ku bikorwa byacu by’urumuri (Mt 5,16).

 

Padri Jérémie Habyarimana

 

Catégories
Igihe cya Pasika Inyigisho UMWAKA B

Nimuhumure

KU WA GATANDATU W’ICYUMWERU CYA GATATU CYA PASIKA,

21 MATA 2012

 

AMASOMO:

1º. Intu 6, 1-7

2º. Yh 6, 16-21

 

NIMUHUMURE

 

Uyu munsi YEZU KRISTU aratubwira twese ati: “Nimuhumure, ni jye”. Muri iki gihe, nta muntu n’umwe ushobora kuvuga ko atekanye ijana ku ijana. Hari imiyaga n’imihengeri byinshi hirya no hino.

Umuyaga mwinshi wahushye n’inyanja ikitera hejuru mu gihe abigishwa ba YEZU bari binjiye mu bwato, bishobora kudushushanyiriza imiyaga myinshi ihuha hirya no hino ku isi. Iyo mihengeri ishobora gushushanya ibibazo by’ubukungu bugeze aharindimuka ku bari mu bihugu by’i Burayi. Iyo miyaga irashushanya ubukene burenze urugero bwa benshi muri Afrika. Iyo miyaga kandi ishobora gushushanya abareganiwe n’akarengane hirya no hino ku isi.

Abo bose uyu munsi YEZU ashaka kubahumuriza agira ati: “Nimuhumure ndi hafi yanyu. Mwigira ubwoba ntaho nagiye. Nimukomere mwubure amaso muyerekeze ku ijuru. Ni ho haturuka umutekano wuzuye. Ni jye uzabaha imbaraga zo guhangana n’ubukana bw’ab’isi”.

Buri munsi, mu mushyikirano tugirana na YEZU KRISTU atubwira n’andi magambo menshi yo kudukomeza. Ibyo atubwira byose bigamije kudufasha guhugukira kuvoma umukiro n’ibyishimo mu Ijambo rye. Buri wese muri twe akwiye kwibaza niba yifitemo ako kuka gatuma akomeza kwizera ko ubwo YEZU ari muzima ashoboye kumukingurira icyanzu azanyuramo yinjira mu bugingo buhoraho. Uwifitemo uko kwizera gukomeye, ni we uzahangara amakuba yose ashobora guhura na yo muri iyi si irangwa n’umwijima. Mu gihe mu isi umwijima ubuditse, umucyo utangaje, umurikira umwigishwa wa YEZU agakomeza inzira ye igana ijuru.

Nta handi haboneka isoko y’uwo mucyo. Ni mu IJAMBO ry’Imana ryamamazwa buri munsi. Kwamamaza Ijambo ry’Imana bifite umwanya w’ibanze mu buzima bwa Kiliziya. Abashinzwe uwo murimo ku buryo bw’umwihariko, ni intumwa za YEZU KRISTU. Uko abantu bashakaga kwifatanya na zo mu gukurikira YEZU bagendaga biyongera, ni ko n’imirimo inyuranye mu ikoraniro yiyongeraga. Bityo intumwa zamaraga igihe kinini mu bibazo byo kubitaho, kubagaburira n’ibindi bijyanye n’imirimo inyuranye mu ikoraniro. Zageze aho zibona umwanya wo kuzirikana Ijambo ry’Imana warabuze. Ni bwo zigize zit: “Ntibikwiye ko tureka ijambo ry’Imana ngo tujye mu byo kugabura”.

N’uyu munsi Kiliziya ntishobora kwegukira gusa amajyambere y’umubiri. Ni ngombwa ko abayiyobora bashyira imbere mu buzima bwabo kuzirikana Ijambo ry’Imana no gusenga. Abantu ntibakeneye gusa kurya no kunywa. Hari benshi badafite ikibazo cy’ubukungu ariko bihebye rwose. Icyo bakeneye ni ukubegereza YEZU KRISTU we uhumuriza byuzuye. Kuva mu ikubitiro, Kiliziya ya YEZU KRISTU yitabiriye iby’amajyambere ya muntu: amavuriro, amashuri n’ibindi n’ubwo muri iki gihe hari abatabizi bavuga ko Kiliziya nta cyo yakoze. Na n’ubu Kiliziya ntiyigeze itezuka mu guharanira amajyambere yuzuye ya roho n’ay’umubiri.

Intumwa zatoye bariya bagabo barindwi ngo bunganire mu bikorwa by’urukundo. Zatangije zityo kugaragaza ko mu ikoraniro ry’abemera KRISTU, buri wese ashobora kugira umurimo akora, apfa kuwukora yumvira Roho Mutagatifu mu bwiyoroshye no mu bwicishebugufi arebera iteka kuri YEZU KRISTU.

Muvandimwe wazirikanye amasomo ya none, witeguye gukora iki kugira ngo utange umuganda wawe mu kubaka ingoma ya KRISTU muri iki gihe? Niba usanzwe uyifitiye ishyaka, sabagizwa n’ibyishimo ushimire Imana. Wowe uremerewe, ibibazo urimo ntibikwibagize ko YEZU KRISTU aguhagaze iruhande akubwira ati: “Humura ndi kumwe nawe, wigira ubwoba”. Ihate inzira y’Ijambo ry’Imana n’isengesho. Uzaronka imbaraga zo gutsinda isi. Niba uri mu nzira yo kwiyegurira Imana ihatire by’umwihariko kuzirikana Ijambo ry’Imana buri munsi. Ihatire kunga ubumwe na YEZU KRISTU mu isengesho. Uzashobora guhumuriza abihebye ubahuza na YEZU WATSINZE URUPFU AKAZUKA.

BIKIRA MARIYA ADUHAKIRWE.

YEZU ASINGIZWE. 

Padiri Sipriyani BIZIMANA