Roho azabayobora mu kuri kose

KU WA GATATU W’ICYUMWERU CYA GATANDATU CYA PASIKA,

16 GICURASI 2012 

AMASOMO: 1º. Intu 17, 15.22-18,1

2º. Yh 16, 12-15

 

ROHO AZABAYOBORA MU KURI KOSE 

Nk’uko inyigisho y’ejo yabitwibukije, dukeneye Roho Mutagatifu kugira ngo twinjire mu kwemera kudukiza kugakiza n’abandi. Kwakira Roho Mutagatifu bisaba kwiyoroshya bituma twemera amabanga yose ya YEZU KRISTU.

Uko kwiyoroshya, ni ko kwabuze mu bahanga b’ i Atene mu Bugereki. Ariko cyane cyane ingingo batashoboye kumva, ni ihamya Urupfu n’Izuka bya Nyagasani YEZU. Biragaragara ko Pawulo yari afite ubuhanga bwo kwigisha. Abiyoroheje, bake cyane, bemeye Inkuru Nziza (Diyoniziyo n’umudamu witwa Damari). Amabanga y’ukwemera ntashyikirwa n’abashaka kumva iby’Imana mu buryo bwa gihanga (Science). Ukwemera gushingiye ku Rupfu n’Izuka bya KRISTU. Nta kindi intumwa zahereyeho zamamaza. Ni YEZU KRISTU WAPFUYE AKAZUKA. Udashoboye kwemera iryo banga, nta yandi mabango y’Inkuru Nziza ashobora gusobanukirwa. Inzira isobanutse kandi y’uko kwemera, ni Kiliziya ubwayo. Kuba muri Kiliziya Imwe Rukumbi YEZU KRISTU yashinze, ni amahirwe kuko muri yo duhora tuvuga tuti: “Turamamaza urupfu rwawe rwdukijije, tugahamya n’izuka ryawe, kugeza igihe uzaza mu ikuzo”. Mu guhamya uko kuri, Kiliziya inatubuganizamo inema ntagatifuza iyo iduha amasakaramentu. Muri yo, Roho Mutgatifu wagaragaye ku buryo bw’agatangaza ku munsi wa Pentekositi ya mbere, na n’ubu arigaragaza. Bityo abahuriye muri Kiliziya, bagenda gahoro gahoro basobanukirwa n’UKURI K’Umushobora byose. Ni yo mpamvu YEZU KRISTU yasezeranyije intumwa ze ati: “Roho Nyir’ukuri uwo naza, azabayobora mu kuri kose”.

Mu mateka yayo, Kiliziya yakomeje kuyoborwa na Roho Mutagatifu. Ibyemezo byose byagiye bifatwa mu Kiliziya, ni Roho Mutagatifu ubwe wabiyoboye. Hari igihe byabayeho ko bamwe muri Kiliziya bayoborwa n’urunturuntu. Ni yo mpamvu hagiye hagaragara ubwitandukanye n’amadini menshi cyane. Na n’ubu kandi, amadini ntahwema kuvuka. Benshi bitandukanya na Kiliziya bibwira ko ari Roho Mutagatifu ubibabwirije. Ibyo ntibishoboka. Ntibibaho rwose. Ubwitadukanye na Kiliziya bwose buturuka kuri rwa runturuntu navuze. Hariho abibwira ko uko Kiliziya yatangiye ari uko igomba gukomeza. Abo bibwira ko nta kantu na gato kahinduka cyangwa se ngo hatekerezwe akantu gashya gashobora gufasha ubusabaniramana bw’igihe iki n’iki. None se aya amagambo YEZU yavuze asobanura iki? “Ndacyafite byinshi nababwira, ariko ubu ntimwashobora kubyakira”. Ni ukuvuga ko azakomeza kubwira Kiliziya ibyo igomba gukora akoresheje Roho Mutagatifu. Hari n’abandi bibwira ko ibyo mu Kiliziya bikwiye guhora bihindagurika binakurikije uko isi ishaka. Mu mpande zombi, nta wahamya ko bene abo bantu bafata igihe gihagije cyo gutega amatwi Roho Mutagatifu. Usanga bapfa kuvuga gusa bitewe n’amarangamutima yabo kimwe n’ibyifuzo by’ibihe ibi n’ibi. Kiliziya ntishobora kubaho nk’ibuye. Na yo irinyagambura ikoreshejwe na Roho Mutagatifu. Ariko na none, Kiliziya ntishobora guhora ihindura amabara nk’uruvu. Kiliziya si umuderi (mode) uhindukana n’ibihe. N’ubuzima bw’umukristu, ni uko buteye. Bwinyagamburira muri Roho Mutagatifu bugashinga imizi mu KURI kwa YEZU KRISTU.

Nimucyo dusabire abayoboke bose ba KRISTU gutega amatwi Roho Mutagatifu kugira ngo bamubere abahamya iteka n’ahantu hose. Dusabire ariko by’umwihariko abafite ubuyobozi muri Kiliziya nyine. Nta muyoboke “woroheje” (usanzwe) wigeze akwiza ubuyobe. Inyigisho z’ubuyobe zagiye zivangira Kiliziya, mu mateka maremare tuzi, zagiye zikwirakwizwa n’abayobozi (abasaseridoti, abanyacyubahiro) biyitaga abanyabwenge ariko nyamara badafata umwanya wo gutega amatwi Roho Mutagatifu. Duhore dusabira cyane rero abayobozi ba Kiliziya kwakira Roho Mutagatifu abahe kunga ubumwe na KRISTU by’ukuri. 

BIKIRA MARIYA ADUHAKIRWE

YEZU KRISTU ASINGIZWE MU MITIMA YACU

AMEN

 Padiri Cyprien BIZIMANA

Ngomba gukora iki kugira ngo nkire?

KU WA KABIRI W’ICYUMWERU CYA GATANDATU CYA PASIKA,

15 GICURASI 2012

 

AMASOMO: 1º. Intu 16, 22-34

2º. Yh 16, 5-11

 

NGOMBA GUKORA IKI KUGIRA NGO NKIRE? 

Iki ni ikibazo cy’ingenzi kiranga umuntu ukangutse ava mu bapfuye. Urupfu rwari rwaramuzindaje. Yibwiraga ko yashyikiriye. Nta cyo yari yarasobanukiwe. Ntiyari azi ko ari mu mazi abira. Ageze aho abona ibintu by’agatangaza bituma yibaza icyo agomba gukora. Afite amahirwe yo kugira abo abaza yizeye ko bamufasha koko: “Bategetsi banjye, ngomba gukora iki kugira ngo nkire?”. Abisinziriye mu mwijima w’urupfu, aho bari hose, bashobora kugeza igihe bagakanguka bagasiganuza icyerekezo cy’ubuzima bakwiye gufata. Ahantu hose turi, uko ibintu byaba bimeze kose, ntidukwiye gutinya kuhaba nk’abahamya b’Ukuri kwa YEZU KRISTU. Pawulo na Silasi baduhaye urugero igihe bateye umurinzi w’uburoko kwibaza ku mukiro we. Iryo ni rimwe mu masomo dukwiye gusigarana uyu munsi.

Ese koko abantu badukikije bashobora kumenya Inkuru Nziza y’Umukiro? Babuzwa n’iki se turamutse tugaragaje ubutwari nka Pawulo na Silasi! Twe dufite ubwoba, dushaka kwiberaho nta nkeke. Ntidushaka kwiteranya. Nta cyo dushaka guhindura. Ni yo mpamvu twiberaho nk’abandi bose nta ngorane twikururiye. Gusoma inkuru z’ubutumwa abatubanjirije mu kwemera bakoze, ntibikwiye kumera nko gusoma ikinyamakuru. Kubizirikana biradukangura tukaba twagira tuti: “Dukore iki, tubeho dute kugira ngo abantu bakizwe n’Inkuru Nziza ya YEZU KRISTU?”. Pawulo na Barinaba bo barakubiswe baremwa inguma barohwa mu buroko. Twebwe rero icyo dutinya ngo ni ukuvugwa nabi, kunengwa ku nyigisho dushobora gutanga…Ibyo bituma tubaho tutariho cyangwa tutari abo twagombye kubabo. Habura iki?

Ivanjili ya none ishobora kutubwira icyo tubuze kugira ngo tube ku isi turi maso: “…namara kuza (Roho Mutagatifu), azereka ab’isi aho icyaha cyabo kiri, n’aho ubutungane buri, n’urubanza uko ruteye” (Yh 16, 8). Icyo tubura ni imbaraga za Roho Mutagatifu. Nk’uko YEZU abisezeranya abigishwa be, Roho Mutagatifu yaboherereje amaze gusubira mu ijuru, ni we wabacamuye abacaniramo ikibatsi cy’umuriro mutagatifu wabateye kwamamaza YEZU KRISTU hose nta gutinya ab’isi. Iyo batakira Roho Mutagatifu ntibaba barashoboye guhangana n’ibitotezo byose bahuye na byo. Babashije kwamamaza Ukuri. Kwamamaza Ukuri, ni ukwereka abantu aho ubutungane buri. Ni ukubaburira ngo bitandukanye na secyaha. Ni no kubasobanurira ko bishoboka kwitandukanya n’ibyaha byabo. Kurebana ubujiji ibibera ku isi, ni ko guhurikwa na sekibi maze umuntu akazindara akabura agatege ko kwirwanyamo icyaha no kukirwanya mu bandi.

Hasigaye iminsi Mike tugahimbaza ukuza kwa Roho Mutagatifu (Pentekositi). Kuva icyo gihe ntiyigeze ahwema kuyobora Kiliziya. Ni we ukorera mu bayoboke bose ba KRISTU. Tuzi neza uburyo Kiliziya itegurira abantu guhabwa Roho Mutagatifu. Tuzi akamaro k’isakaramentu ry’ugukomezwa. Hari ingorane nyinshi ariko zituma tutamwakira uko bikwiye bigatuma dukomeza kuba mu isi nk’abantu babisi batigeze babuganizwamo izo mbaraga za YEZU WAZUTSE. Imwe mu mpamvu y’uwo musinziro, ni ubwoba bw’abantu. Indi ni iharaka ryo kwibanda ku by’isi gusa. Nta wakwibagirwa n’amayeri shitani ihora ivugurura mu kureshya abantu no kubamurukana. Duhora dusabira abayobozi ku nzego zose za Kiliziya. Tubasabira kugira ubutwari bwo kuyobora abo bashinzwe kuri YEZU KRISTU. Twibutse ariko ko umuntu wese ashobora kwakira Roho Mutagatifu kandi agakorera Imana uko bikwiye afasha YEZU gukiza benshi bashoboka. Nizeye ko umuntu wese uzasoma iyi nyigisho, uko yaba ameze kose, uwo yaba ari we wese, azumva ko nta kindi akwiye gushakisha usibye gukora uko ashoboye kugira ngo Roho Mutagatifu amumanukireho yiyumvemo Umukiro kandi afashe n’abandi gukira. Ese ni iki dukwiye gukora kugira ngo nyine dukire?

Isomo rya mbere ryaduhaye kumenya igikwiye gukorwa kugira ngo twakire Roho Mutagatifu udukiza: “Wemere Nyagasani YEZU, uzakira, wowe n’urugo rwawe” (Intu 16, 31). Iyo intumwa zivuga kwemera, ntizishaka kuvuga imyemerere yo mu bwenge gusa. Uko kwemera zivuga ni ko YEZU ubwe yavugaga: guhindura ubuzima ukabuhuza n’ugushaka kw’Imana Data Ushoborabyose. Dufite abahanga benshi. Ntitwahamya ko dufite benshi batubera abahamya b’ukuri kwa YEZU KRISTU. Hari benshi mu bashakanye bize, basobanukiwe bafite ubushobozi buhagije ariko badashobora guha ukwemera abana babo. Icyo ni ikimenyetso cy’uko habuze mu rugo rwabo Roho Mutagatifu. Ntibashobora gusobanukirwa n’Umukiro w’ijuru. Mu isi hari abarimu benshi b’abahanga mu by’ubwenge busanzwe no mu bya tewolojiya. Ubasanga hirya no hino muri Kiliziya, mu maseminari, bitwa ko bategurira urubyiruko rw’abaseminari kuzajya kwamamaza YEZU KRISTU mu bantu bose. Ntitwahamya ko benshi muri bo bashishikajwe no kwakira Roho Mutagatifu ngo bigishe ibyo bumva neza. Akenshi ibyo bigisha babyumva ku buryo bw’ubwenge bwa muntu gusa. Kubyumva mu nzira y’Umukiro YEZU ATUBWIRA, ni ingorabahizi. Dukeneye guhora twivugurura kugira ngo tumenye igikwiye cyatugeza ku Mukiro wacu n’uwa bagenzi bacu. Tubisabirane.

BIKIRA MARIYA ADUHAKIRWE

YEZU KRISTU ASINGIZWE MU MITIMA YACU.

Padiri Cyprien BIZIMANA

Ni jye wabatoye

KU YA 14 GICURASI: MUTAGATIFU MATIYASI INTUMWA

 

AMASOMO: 1º. Intu 1, 15-17.20-26

2º. Yh 15, 9-17

 

NI JYE WABATOYE 

Uyu munsi, aho Kiliziya ya KRISTU yogeye ku isi yose, twahimbaje Mutagatifu MATIYASI na we wabaye umwe mu Ntumwa za YEZU. Iby’itorwa rye, twabibwiwe n’isomo rya mbere. Na ho Ivanjili ya none ari na yo tumaze iminsi twumva, yatugejeje ku ngingo y’umwihariko tugiye kuzirikanaho.

Yezu abwira intumwa ze ati: “Simwe mwantoye, ahubwo ni jye wabatoye, maze mbashyiraho kugira ngo mugende, mwere imbuto, kandi imbuto yanyu igumeho” (Yh 15, 16). Ayo magambo ahumuriza bihagije intumwa. Umurimo wazo, ntukwiye kubahangayikisha kuko atari bo ubwabo bitoratoje. Gukurikira YEZU KRISTU no kumwamamaza muri rubanda, si umurimo bazakora bonyine. Uwabatoye azakorana na bo iteka ryose. Ni we nyir’ubwite. Yarabatoye kandi yabahisemo abazi. Azi neza ko bazamuhamya kugera ku ndunduro. Aha twakwibaza: Ese na Yuda Isikariyote wa wundi wamugambaniye, YEZU yari amuzi neza? Kuki yamutoye azi neza ko azamugambanira? Icyo ntitwagisubiza ijana ku ijana ariko tuzi ko mugutora intumwa ze, YEZU atabanza kubacira urubanza. Arabatora akabareresha inyigisho y’Ingoma y’Imana agenda abagezaho. Ntawe utazi ko ingaruka z’icyaha cy’inkomoko zikurikirana muntu aho ava akagera. Ububasha yifitemo n’ubwigenge yahawe bimubera akenshi nk’inkota y’amaugi abiri. Abikoresha neza akubaha Urukundo rw’Imana. Iyo abikoresheje nabi bimugeza ahabi. YEZU yatoye YUDA amuzi ariko yashatse kugaragaza urukundo yari amufitiye kugera ku ndunduro. Kubera ubugambanyi yakururiwe n’umururumba w’iby’isi, yiyahuye adasabye imbabazi. Ntitwamenya uko urubanza rwe rwaciwe cyangwa ruzacibwa. Icy’ingenzi uyu munsi kuri twebwe, ni ukwirinda gupfusha ubusa umwanya KRISTU yadushyizemo. Kuwuhagararamo twirinda kuba ba Yuda Isikariyote cyangwa ingwizamurongo. Ni icyo twakwigira kuri Matiyasi.

MATIYASI ni izina risobanura “impano y’Imana”. Yari umwe mu bari bagendanye na YEZU n’intumwa ze kuva kuri Batisimu ya Yohani kugeza igihe YEZU asubiriye mu ijuru. Matiyasi yari intungane kandi yari yarakunze inyigisho za YEZU. Ni ngombwa ko mu makoraniro yacu haboneka abantu koko buzuye Roho Mutagatifu kugira ngo imirimo inyuranye ya Kiliziya ibashe gutunganywa. Nta muntu n’umwe kamara muri Kiliziya. Ariko kandi abashinzwe ubutumwa bunyuranye, bakwiye gufashwa kubwitangira bunze ubumwe na KRISTU Nyir’ubwite. Ba Yuda ntibazabura kubera impamvu navuze mbere. Ibyo ntibyaduca intege kuko YEZU KRISTU afite ubushobozi bwo guhora atora abashaka kumukorera mu ntama ze. Kimwe mu bituma ubuhemu cyangwa uburangare bwinjiza bamwe mu murongo wa Yuda, ni uburangare bw’abakuru batita bihagije ku ikenurabushyo mu bo bakuriye. Hakenewe abayobozi bifitemo ubuzima bwa gikristu, abantu bunze ubumwe na YEZU KRISTU. Abantu bakunda YEZU KRISTU n’amabanga ye yose. MATIYASI yadusigiye urugero muri urwo rwego.

Kilimenti wa Alexandiriya atubwira ko MATIYASI yitangiye ubutumwa muri Etiyopiya. Yigishize ashize amanga. Yahinduye abakristu abantu batagira ingano. Yarangije ubuzima bwe ahowe YEZU KRISTU ahabwa ikamba ry’ubumaritiri. Kuva muri ibyo bihe Kiliziya yakomeje kugira abantu b’intwari bitangira ubutumwa. N’uyu munsi bariho kuko YEZU KRISTU Nyir’ubwite ariwe ubwe ubitorera. Gusa rero, bamwe bashobora kumubera ba Yuda. Nta we bikwiye guca intege kuko, uko byagenda kose. Icy’ingenzi ni ugupfukama tugahora dusabira Kiliziya kugira ngo abayikuriye bahore bumvira Roho Mutagatifu mbere ya byose, bazashobore kujya bahangana n’ibihe bikomeye, bashaka ikintu cyose cyatuma abemeye KRISTU badacika intege kandi bakarindwa ibitekerezo bibayobya. 

MATIYASI INTUMWA, UDUSABIRE

BIKIRA AMARIYA ADUHAKIRWE

YEZU KRISTU ASINGIZWE UBU N’ITEKA RYOSE.

Padiri Cyprien BIZIMANA

Imana ntirobanura

ICYUMWERU CYA GATANDATU CYA PASIKA

13 GICURASI 2012 

AMASOMO: 1º. Intu 10, 25-26.34-35.44-48

2º. 1 Yh 4, 7-10

3º. Yh 15, 9-17

 

IMANA NTIROBANURA 

Amaze kubona ukuntu Koruneli w’i Kayizareya afite ishyushyu ryo kumva Inkuru Nziza, Petero intumwa yariyamiriye mu byishimo ati: “Noneho numvise mu by’ukuri ko Imana itarobanura, ahubwo inyurwa n’umuntu wa buri hanga iryo ari ryo ryose uyitinya kandi agaharanira ubutungane” (Intu 10, 34b-35). Ni uko rero Imana Data Ushoborabyose yigaragarije umuryango wayo Isiraheli. Mu mateka maremare abayisiraheli banyuzemo, si ko bahise bumva iyo mimerere y’Imana y’ukuri. Ni igihe kirekire bamaze bibwira ko Imana yabibwiye ibinyujije kuri Musa, yari umwihariko wabo. Nyamara Imana Ishoborabyose yakomeje umugambi wayo wo kwigaragariza n’andi mahanga yose yo ku isi. Ibyo byabaye impamo ubwo YEZU KRISTU yaje kuzuza umugambi w’Imana Data mu bantu. We nyine, ibyo kwifungirana mu bayahudi yagaragaje ko bidafite ukuri. Ni yo mpamvu yagiye agirira neza uwo bahuraga na we wese yaba umuyahudi cyangwa umunyamahanga. Kuri iki cyumeru, tureke amatwara yacu amurikirwe n’urwo rukundo rurenga imipaka yose y’abantu n’ibihugu.

Mu Ivanjili ya YEZU KRISTU yanditswe na Yohani, twakomeje guvomamo muri iyi minsi inyigisho zidukangurira gukunda YEZU KRISTU no gukora byose dukurikije urugero yadusigiye. Zadukanguriye kugendera mu nzira z’urukundo, rwa rundi ruranga abana b’Imana by’ukuri kuko nyine “Imana ni urukundo” nk’uko Yohani yabitubwiye mu isomo rya kabiri. Imibereho iyobowe n’Urukundo, ni yo iranga umuntu wifitemo ubuzima bw’Imana y’ukuri. Tuzi ko imana nyinshi zo muri iyi si na zo zizeza abantu amahirwe. Izo mana abantu bihangira, ni imana zitabaho kuko ubuzima bw’uwazikurikiye busozwa n’urupfu nta kindi. Kugira amaboko, kugira amafaranga n’iby’isi bindi, ntibihagije. Ingorane zikomeye ariko, ni iz’umuntu washyize amiringiro ye muri ibyo byose by’isi maze akarwanya Imana y’ukuri, Data Ushoborabyose, Se wa YEZU KRISTU natwe twese. Ayobowe na shitani kuri iyi si cyane cyane iyo arwanya iby’Imana akanangira rwose mu mutima we. Uwo nguwo, sebyaha twita serupfu aba amutegereje. Rimwe na rimwe abantu nk’abo, ntibabura gupfana agahinda n’ugukuka umutima. Umunsi umwe, nahurujwe na benewabo b’umugabo wari urembye cyane mbese agiye gupfa. Yari mu kigero cy’imyaka nka mirongwine. Bambwiye ko ubuzima bwe bwabaye ubw’amaraha gusa. Ngo yiberaga mu bagore no mu nzoga. Ageze ku ruvumba rwa nyuma, bene wabo ba hafi bamubwiye ko bagiye guhamagara Padiri akamuzanira amasakaramentu. Yabasubije ko adakeneye ibyo! Ariko kubera bo bari bazi akamaro k’amasakaramentu, bantumyeho. Narahageze arasakuza cyane ngo nta byo ashaka, aranangira rwose. Icyadutangaje ni uko yapfuye yakutse umutima rwose avuga ngo arabona ibintu biteye ubwoba: ibiyoka n’ibikoko by’inkazi. Yapfuye mu by’ukuri ahangayitse cyane. Ntidushobora kwemeza ko amahoro n’Urukundo yivukije ku bwende, yabibonye avuyemo umwuka. Twemera impuhwe z’Imana isendereza ku bantu bose ababi n’abeza. Icyo duhamya ariko, ni uko zigirira akamaro uwemeye kuzakira. Uwemera YEZU KRISTU muri iyi si, azabana na we iteka. Azishima iteka mu ijuru.

Ikimenyetso cy’ibyishimo by’iteka, ni ukwigishwa ibya YEZU KRISTU ukabikunda ukemera kuyoborwa n’Inkuru Nziza ye. Uwo waba uri we wese: yaba umwirabura cyangwa se umwera, umugiraneza n’umugiranabi, umukire n’umukene, uwize n’utarize…bose iyo bumvise Inkuru Nziza y’Urupfu n’Izuka bya KRISTU bakabyemera, barakira. Ni ko byagendekeye Koruneli wari umunyamahanga akaba n’umutegeka w’abasirikare. Muri rusange, iyo umuntu atifitemo kabutindi y’umutima unangiye, ibyiza byose by’ukuri abikingurira umutima. Urugero ni Koruneli uwo. Ngo “yari umuntu wubaha kandi agatinya Imana, we n’urugo rwe rwose, akagirira Ubuntu bwinshi rubanda kandi agasenga Imana ubudahwema” (Intu 10, 2). Abantu bifitemo amatwara nk’ayo, ntibarwanya Urukundo rw’Imana. Igihe cyose babwiwe Inkuru Nziza bashobora kuyemera maze ikabakiza bagakiza n’abandi. YEZU bemera kwakirana urukundo abakiza ibyaha byabo byose kuko ni We “gitambo cyo guhonerera ibyaha byacu” (1 Yh 4, 10).

Imana ntirobanura. Nimucyo kuri iki cyumweru tuyerekezeho amaso y’umutima wacu. Dusabire abantu bifitemo umutima unangiye kugira ngo bakire impuhwe zayo, bashobore kwakira YEZU KRISTU mu ngo zabo, mu miryango yabo, mu karere kabo, mu bihugu byabo. Dusabire kandi abantu bose barengana hirya no hino biturutse ku ivangura iryo ari ryo ryose. Hari benshi bavutswa uburenganzira bwabo bitewe n’uko ababakuriye bimitse sebyaha mu mitima yabo. Tubasabire kwihangana no kurangamira YEZU KRISTRU kugira ngo ibikomere byabo bitabavutsa ubugingo bw’iteka. Twisabire natwe ubwacu kugira ngo buri munsi turusheho kuyoborwa n’Ijambo ry’Ukuri kwa YEZU KRISTU, dukunde bose nta vangura kandi twiyemeze kuvuga hose Inkuru Niza y’UMUKIRO NYAKURI.

Iki cyumweru cyahuje n’itariki ya 13 gicurasi, itariki itibagirana abana b’i Fatima muri Porutugali babonekewe. Hari mu mwaka w’ 1917. Bikira Mariya ashaka ko twakira Umutima mutagatifu wa YEZU wo soko y’URUKUNDO n’impuhwe za Nyagasani.

BIKIRA MARIYA ADUHAKIRWE

YEZU ASINGIZWE UBU N’ITEKA RYOSE.

Cyprien BIZIMANA