Mbasigiye amahoro, mbahaye amahoro yanjye.

KU WA KABIRI W’ICYUMWERU CYA GATANU CYA PASIKA

Ku wa 8 Gicurasi 2012

AMASOMO: Intu 14, 19-28; Zab 145 (144); Yh 14, 27-31ª

Inyigisho yateguwe na Padri Jérémie Habyarimana

MBASIGIYE AMAHORO, MBAHAYE AMAHORO YANJYE. ARIKO SINYABAHAYE NK’UKO ISI IYATANGA. NTIMUKUKE UMUTIMA KANDI NTIMUGIRE UBWOBA” (Yh 14, 27)

Uyu munsi Yezu araha abigishwa be amahoro ye, kuko Kubabwira iby’urupfu rwe byabakuye rwose umutima. Nubwo yanababwiraga ko azazuka. Iby’izuka ntacyo babyumvagaho. Nyuma yaho Roho wa Yezu wazutse ni we uzabafasha gucengera muri iryo banga ry’ubugingo buhoraho. Yezu rero ntabasezeranya kuzabaha amahoro ye. Ahubwo arayabaha, agira ati “mbasigiye amahoro, mbahaye amahoro yanjye.” Ariko amahoro ya Kristu nta wundi ushobora kuyatanga. Nk’uko nta wundi ushobora kuyambura uwo yayahaye. Niyo mpamvu Yezu asobanurira intumwa ze ayo mahoro uko atangwa n’ikiyaranga. Umwami w’amahoro arababwira, ati “ariko sinyabahaye nk’uko isi iyatanga. Ntimukuke umutima kandi ntimugire ubwoba.” Ayo mahoro abigishwa bahawe barayakesha urugendo Yezu yateguraga gukora kubera urukundo akunda Se n’abo yamutumyeho. Yagombaga kunyura mu mva yinjira mu Ikuzo rye. Yagombaga kubabazwa n’umugenga w’iyi si mu rugamba rwo kumunyaga abo yari yaragize ingwate (Heb 2,14-18). None n’abigishwa be uyu munsi urwo rugamba barimo bararurwana (Intu 14,22). Ariko ubwo bubabare bwa Yezu si impanuka. Yabuhisemo ku bushake. Ntiyababajwe kuko yari yarushijwe imbaraga n’umugenga w’iyi si. Umugenga w’iyi si nta bubasha na busa afite kuri Yezu. Yezu arasobanurira iryo banga abigishwa be agira, ati “Sinkivuganye namwe byinshi kuko Umugenga w’iyisi aje. Nta bushobozi amfiteho, ariko aje agira ngo isi imenye ko nkunda Data, kandi ko nkora uko Data yantegetse.”

Natwe Yezu Kristu wapfuye akazuka aje iwacu kuduha amahoro ye. Dukingure amarembo y’ingo zacu maze Yezu yinjire aduhe amahoro. Dukingure inzugi z’ibyumba byacu maze Yezu yinjire aduhe amahoro. Dufungure ingufuri y’umutima wacu maze Yezu yinjire mu buzima bwacu bwose abusenderezemo amahoro ye. Koko rero Amahoro ya Kristu turayakeneye rwose. Ayo Mahoro y’agatangaza Pawulo Intumwa atubwira agira, ati “kandi amahoro ya Kristu naganze mu mitima yanyu kuko ari yo mwahamagariwe ngo mube umubiri umwe.” (Kol 3,15) Ayo Mahoro atuma Pawulo aterwa amabuye byo gupfa ntatakaze akanyamuneza ko kwamamaza Inkuru Nziza (Isomo rya mbere ry’uyu munsi). Ayo Mahoro atuma Abakristu badahwema gusingiza Uhoraho watwigaragarije muri Kristu batitaye ku mahindura y’ibihe by’isi nk’uko Zaburi ya none igira, iti “umunwa wanjye uzavuga ibisingizo by’Uhoraho, n’ikinyamubiri cyose kizarate izina rye ritagatifu, iteka ryose rizira iherezo.” Ayo Mahoro Pawulo Intumwa atubwira ko ari Yezu Kristu ubwe utwiha kugira ngo asenyeshe Amaraso ye inzangano zinuka hagati y’abantu, “koko rero ni We mahoro yacu; Abayahudi n’abatari bo yabahurije mu muryango umwe, maze aca urwango rwabatandukanyaga, rwari rumeze nk’urukuta ruri hagati yabo. Yazanywe no kubamamazamo inkuru nziza y’amahoro, mwebwe mwari kure, kimwe n’abari hafi. Ubu rero twese uko twari amoko abiri, tumukesha guhinguka imbere y’Imana Data, tubumbwe na Roho umwe.” (Ef 2, 13-18)

Amahoro Kristu aje kuduha none ni we ubwe twakira mu Ijambo rye no mu Ukaristiya. Ni we ubwe twakira mu bo adutumaho ngo baduhe amahirwe yo gutura muri We iteka by’umwihariko abasaseridoti . Ni we ubwe twakira mu bantu bose duhura na bo bakatugirira neza cyangwa bagakenera ko tubatabara ku buryo bunyuranye. Ni we ubwe twakira igihe tugiriye imbabazi abatuzira. Ni we ubwe twakira igihe tubabarira abaduhemukiye ku buryo bwose. Twakire rero Kristu Yezu wapfuye akazuka aduhe amahoro maze na twe tuyahe abandi bose.

Yezu Kristu wapfuye akazuka naduhe rwose amahoro tubuze bityo tukayabuza n’abandi kuko umuntu atanga icyo afite. Iyo uteze amatwi ukitegereza, ubona amahoro ya Kristu tuyakeneye rwose. Dukeneye kwitwa na twe abanyahirwe Yezu atangaza agira, ati “hahirwa abatera amahoro kuko bazitwa abana b’Imana.” (Mt 5,9) Akenshi twe gutera amahane ni byo tuzi gukora. Mbega induru mu ngo! Mbega umunabi, mbega amagambo y’ubugome, mbega urugomo, mbega umushiha, mbega intonganya n’ibitutsi! Uko se ni ko duharanira amahoro ya Kristu! Mbega imvugo isesereza, mbega amagambo y’ubugambanyi no guteranya! Mbega mu maso hijimye n’ahandi hakanyaraye! Mbega amasura azira sourire (inseko iturutse ku mutima igasusurutsa mu maso)! Mbega gushinyiriza no gushinga iryinyo ku rindi, mbega kwishaririza no kwishabunga, mbega ikirungurira cy’umutima! Uko se ni ko gukwiza amahoro ya Kristu! Yezu ntaturenganye kuko ntawe utangaza utamutuyemo ngo bigire icyo bitanga. Yezu naduha amahoro tukayakira, tuzahindura isura. Kuko tuzaba twaruhutse ku mutima. Erega iyo umuntu aremerewe ku mutima, uwo mutwaro w’inabi byanze bikunze awusangira n’abandi. Iyo twabuze amahoro ku mutima tuyabuza n’abandi byanze bikunze. Dukeneye ko Kristu n’abe baduha amahoro. Turambiwe inabi duhora twukwa n’abimitse inabi mu buzima bwabo. Turambiwe ibigambo bibi bituva mu kamwa. Kristu Yezu Mahoro yacu naze ature iwacu.

Akenshi hari igihe twibaza impamvu kanaka ahora avuga nabi, mbese agabura inabi aho gutanga amahoro. Yezu aduha igisubizo agira, ati “niba mufite igiti cyiza, n’imbuto zacyo zizaba nziza; nyamara nimugira igiti kibi, n’imbuto zacyo zizaba mbi: kuko igiti kirangwa n’imbuto zacyo. Mwa nyoko mbi z’impiri mwe, mwashobora mute kuvuga amagambo meza kandi muri babi? N’ubundi akuzuye umutima gasesekara ku munwa! Umunyamico myiza avana mu mutima we ibyiza bibitsemo; n’umunyamico mibi akavana mu mutima we ibibi byawusabitse.”(Mt 12, 33-35) Amagambo mabi rero ari mu bibuza abandi amahoro. Niyo mpamvu Yezu ushaka kutugira abanyamahoro hari aho atuburira agira, ati “ndabibabwiye: ku munsi w’urubanza, abantu bazabazwa ijambo ryose ritagira aho rishingiye bazaba baravuze. Kuko amagambo yawe ari yo azatuma uba intungane, cyangwa se agatuma ucibwa.”(Mt 12, 37). Ni yo mpamvu aduhamagarana rwose urukundo ngo tuve muri ba karimí kabi, tureke kuba ba nyirantonganya , ba ntambara na ba senabi. Ahubwo tube ba rukundo, mahoro,muneza…Ducike ku muco wo gushihana, guconshomerana no gushimangiza ukuri kwacu cyangwa ikinyoma cyacu induru n’intonganya. Ahubwo tuvugishe ukuri kuje urukundo. Twihanganire abatakwakira kandi dukomeze kubabibamo amahoro kabona n’aho bo bakataza mu kutwanga no kutuvuma. Ubwo ni bwo buzima buranga abafite amahoro ya Kristu kandi bakayagabura ( Gal 5, 13-25; Mt 11, 28-31).

Bikira Mariya Umwamikazi w’Amahoro nadusabire kandi adufashe uyu munsi kwakira Yezu Kristu wapfuye akazuka uje adusanga ngo aduhe amahoro ye. Tuyakire. Nako tumwakire ni we ubwe Mahoro yacu. Maze kuva none tube abanyamahoro. Duhagarike intambara y’amagambo. Imvugo yacu kuva none yamamaze Kristu Yezu Mahoro ahoraho , agenewe abantu bose kandi agomba guhabwa abantu bose. Amahoro ya Kristu naganze inzangano, inzika n’inzigo. Amahoro ya Yezu Kristu wapfuye akazuka nahumurize abihebye, ahembure abahahamutse. Amahoro ya Kristu narimbure ku isi intambara zose z’abarwanirira insinzi y’icyaha n’icyago. Amahoro ya Kristu narengere abayoboke nyabo be, boye gucika intege ahubwo batsindishe kamere yabo Urupfu n’Izuka bye.Maze Amahoro ya Kristu yakirwe na bose kandi asakare ku isi yose ku bw’amasengesho mahire ya Bikira Mariya, Umwamikazi w’Amahoro.

Umenya amategeko yanjye kandi akayubaha, ni we unkunda

KU WA MBERE W’ICYUMWERU CYA GATANU CYA PASIKA,

7 GICURASI 2012

 

AMASOMO:

1º. Intu 14, 5-18

2º. Yh 14, 21-26

 

UMENYA AMATEGEKO YANJYE KANDI AKAYUBAHA, NI WE UNKUNDA

 

Ngiyo inyigisho YEZU KRISTU ashaka kutugezaho kuri uyu wa mbere. Inyigisho zose yahaye intumwa n’abigishwa be, inyigisho atugezaho natwe, zose zibumbiye mu ijambo rimwe: URUKUNDO. Ni We ariko urwo rukundo rwigaragarizamo. Kumumenya, ni ko kumenya gukunda. Gukunda nk’uko akunda, ni yo nzira yo kuzuza amategeko yose y’Imana Data Ushoborabyose. Umuntu wese ushaka umukiro kandi wagize amahirwe yo kumenya Imana y’ukuri, yihatira gutera imbere mu bintu bibiri by’ingenzi YEZU atubwiye uyu munsi.

Icya mbere, ni UKUMENYA AMATEGEKO YE. Kumenya amategeko ya YEZU KRISTU, ni intambwe ya mbere mu rugendo rutugeza kuri rwa RUKUNDO rudukiza. Kimwe mu bintu by’umwihariko biranga ikiremwamuntu, ni ubumenyi. Umuntu ashobora kwigishwa akumva. Muri kamere ye dusangamo inkeke yo kwibaza ibibazo, gushakashaka no kumenya. Bityo, bimwe mu bibazo ahura na byo, ashobora kubibonera ibisubizo akoresheje ubwenge Imana yamuhaye. Ikindi kandi, umuntu wese yifitemo urumuri rwo gushaka ukuri. Uko kuri ni ko gushobora kumuha amahoro y’umutima. Arashakashaka agashyira akagera ku mutuzo iyo ageze ku byo ashaka. Inyamaswa zindi, ntizibaza ku buzima bwazo. Zibona bucya bukira. Zibona zirya zigahaga. Nta kibazo zibaza. Ntizibaza uko zizamera ejo. Ni ukubona zinyagambura cyangwa zigenda. Nta cyo ziharanira kindi kuri iyi si.

Muntu we, kubera bwa bwenge yahawe ashobora gutekereza ibyiza. Arabyigishwa akanabisoma akaba yasobanukirwa. Iyo aharanira gushaka ibyiza byisumbuye, nta kabuza abigeraho. Ubwenge bwe bushobora kumugeza ku MUSUMBABYOSE. Bumuyobora ku byiza akamenya gutandukanya ikibi n’icyiza. Muri uko gukoresha neza ubwenge bwe, agera no ku kumenya UWAMUHANZE. Benshi bagera kuri ubwo bumenyi bw’Imana kuko babyigishijwe. N’ubusanzwe, tuzi ko muntu atari we wihimbiye ko Imana ibaho. IMANA ubwayo, Umuremyi w’ijuru n’isi, Data Ushoborabyose, ni We wimenyesheje abantu. Bamwe bakoresheje ubwenge yabahaye barumva. Abandi ariko bikurikiriye ibyo bumva bibashimishije. Ubwenge bwabo bwarayobye. Buri wese yaremanywe ubwende (ubushake n’ubwigenge). Ubukoresha neza ukamenya UKURI k’ UWAKUREMYE. Umenya amategeko ye cyangwa amabwiriza ye. Mu gihe tugezemo, ntawe ushobora kuvuga ko atigeze abwirwa iby’Imana yo ndunduro y’ibyiza by’ukuri. Nta mugabane n’umwe wo ku isi utaragenderewe n’abigishwa ba YEZU ari bo mu bihe byacu twita abamisiyoneri. Kugeza uyu munsi, hose hamamajwe Inkuru Nziza y’Umukiro. Abayemeye barakijijwe. Bemeye UMWANA W’IMANA Y’UKURI YEZU KRISTU. Bamenye amabanga ye. Binjiye mu ibanga ry’urupfu n’izuka bya KRISTU dukirizwamo. Bamenye ko ijuru ribaho. Bifuje kuryinjiramo. Bararitashye. Binjiye mu Bugingo bw’iteka. Ubuzima bwabo butwizeza ko igice cya kabiri cy’inyigisho ya YEZU uyu munsi gishoboka.

Icya kabiri umuntu wese ushaka umukiro atunganya, ni UKUBAHA YA MATEGEKO. Twavuze ko umuntu yigishwa akumva: amategeko y’Imana YEZU KRISTU yaje kutwibutsa no kudusobanurira, ubu hose ku isi yarigishijwe. Usibye kwirengagiza no guta igihe mu bindi bintu byo ku isi, nta muntu n’umwe utuye ahamamajwe Ivanjili ukwiye kuvuga ko atazi amategeko YEZU KRISTU yatwigishije. Kiliziya ye ikomeza kuyatwibutsa. Ni icumi abumbiye muri abiri: gukunda Imana no gukunda abantu. Dushobora no kuyahinira mu ijambo rimwe rukumbi: URUKUNDO. Kumenya YEZU KRISTU ni ko kumenya URUKUNDO rukiza. Kumenya ayo mategeko, biroroshye. Kuyubaha ni byo ngorabahizi. Impamvu atunanira kuyubaha, ni uko akenshi usanga kamere yacu yakomerekejwe n’icyaha cy’inkomoko ibangukirwa n’akayiryoheye. Ibyo bituma hari igihe tumera nka ya mbeba yakurikiranye akaryoshye mu nsi y’ibuye. Ikigaragaza ko tuzi YEZU KRISTU, ni ukurwana no gutsinda. Urugamba turwana, ni urwo kwitsinda ubwacu. Koko rero usanga akenshi umuntu yibaza byinshi, ashidikanya, akururwa n’ibyiza n’ibibi. Ibyiza bihuje na ya mategeko, bikunze gusharirira kamere yacu. Gutsinda ibyo twitekerereza, guhara ibiryoheye kamere yacu, ni ko gukunda by’ukuri YEZU KRISTU.

Kugira ngo tugere aho KRISTU ashaka, ni ngombwa kwisuzuma duhereye ku mategeko yose y’Imana. Kuzirikana buri ryose. Kuvuga tutihenze ibyo tudatunganya byerekeranye na ryo. Gutinyuka gusaba imbabazi mu ntebe y’impuhwe za YEZU ari yo ya Penetensiya, nta bwoba, nta masoni, ni ko gutsinda urugamba no kumenya urukundo rwa YEZU KRISTU. Muri iki gihe, amwe mu mategeko y’Imana ararwanywa bikomeye. Ikibabaje cyane, ni uko abayoboye ibihugu bageze aho bashinga amategeko arwanya ay’Imana. Uwitwa umukristu wese akwiye gushishoza akamenya uko yifata. Nta bwo isi izagera ku mukiro kuko irwanya Imana ku buryo bw’amayeri bukoreshwa mu gushyiraho amategeko ya sebyaha. Kubaka isi usuzugura uwayiremye, ni ukubaka ku musenyi. Ni ugutegura irimbuka. Iryo rimbuka YEZU ashaka kuriturinda. Tumenye amategeko ye kandi tuyubahe, tumwumvire.

Nimucyo dusabe imbaraga za Roho Mutagatifu YEZU adusezeranya kugira ngo tubashe gusobanukirwa no kubaha AMATEGEKO YE. YEZU yatubwiye ati: “…Umuvugizi Roho Mutagatifu, Data azohereza mu izina ryanjye, ni we uzabigisha byose, kandi abibutse n’ibyo nababwiye byose” (Yh 14, 26).

BIKIRA MARIYA ADUHAKIRWE

YEZU ASINGIZWE.

Padiri Sipriyani BIZIMANA

Uba rero muri jye, nanjye nkaba muri we, yera imbuto nyinshi

ICYUMWERU CYA GATANU CYA PASIKA

Ku wa 6 Gicurasi 2012

AMASOMO: Intu 9,26-31; Zab 21; 1 Yh 3, 18-24; Yh 15,1-8


“UBA RERO MURI JYE, NA NJYE NKABA MURI WE, YERA IMBUTO NYINSHI; KOKO TUTARI KUMWE NTA CYO MWASHOBORA.” (Yh 15,5)

Uyu munsi Yezu Kristu arabwira abigishwa be amagambo akomeye yerekeranye n’ubumwe bagomba kugirana na We. Yezu arahera ku kigereranyo cy’umuzabuba n’amashami yawo. Yezu ni Umuzabibu. Abigishwa be bakaba amashami. Umuzabibu ni wo ubeshejeho amashami yawo. Kandi ishami ritagishoboye kurya ibyo umuzabibu urigaburira riruma; mu yandi magambo rirapfa: Maze ubundi rigacanwa. Yezu araburira abigishwa be ko ari uko na bo bizabagendekera niba batunze ubumwe na we. Usibye no kuba ntacyo bazashobora; ahubwo ntibazanabaho. Bazajugumywa mu muriro bashye. Kuko kubaroha muri uwo muriro atari cyo cyamuzanye, Yezu waje kuwubarokora abwira abigishwa be, ati “uba rero muri jye, na njye nkaba muri we, yera imbuto nyinshi; koko tutari kumwe nta cyo mwashobora.” Aho ni ho Yezu ararikira abigishwa be kwerekeza: kunga ubumwe na we kugira ngo bere imbuto nyinshi z’Ubugingo bw’iteka muri bo ubwabo no mu bandi.

Uyu munsi rero Yezu ahagaze rwagati muri twe. Aratwigisha tumuteze amatwi nka ziriya ntumwa ze. Araduhamagarira kurumbuka imbuto nyinshi. Ibyo ariko ntibizashoboka niba tutaranduye umwirato mwinshi twifitemo.Koko rero wagira ngo Zaburi ya 10 (9) n’iya 12 (11) ni twebwe zagenewe. Koko imigambi yacu n’amagambo yacu usanga akenshi binyuranye rwose n’Ukwemera Yezu aduhamagarira. Koko rero twebwe twibwira ko dushoboye. Ndetse ko dushoboye byose. Dushobora kwibeshaho. Ndetse tukabeshaho n’abandi benshi. Twibwira ko twihagije. Ko n’Uwaduhanze niba abaho, yarangije umurimo we . Ubu ni twebwe tugomba gukorera twebwe dukoreshwa na twebwe duhembwa na twebwe. Turitunze. Turihagije. Turigenga. Muri makeya turi Imana yacu. Nta yindi Mana dukeneye kuyoboka kuko nta mana iyoboka iyindi. Ifite iyindi iyitegeka ntiyaba ikiri imana. Mu mishinga dukora no mu byo duteganya nta wundi ugomba kutugira inama, nta rindi jambo tugomba kubwirwa. Ijambo ni iryacu. Twariremye. Turirera turikuza. Kandi n’urupfu niruramuka rudutinyutse kuko ubusanzwe dufite byinshi na benshi baruturinze(ikoranabuhanga, urukingo, agakingirizo, imiti, abaganga, abashinzwe umutekano n’ingabo, amafaranga…), ariko nirunaduhangara, tuzamanukana ikuzimu ishema n’isheja. Tuzagenda twemye nk’abantu b’abagabo koko batigeze bahakirizwa Kuri iyo Mana yabo itagize icyo ivuze n’icyo imaze. Akenshi iyo ni yo mvugo yacu. Niba tutanabivuga, akenshi tubaho ari byo dukurikiza.Niba tutavuga n’ibyo byose tuvuga bimwe muri byo. None se ni bangahe muri twe koko bumva iri jambo rya Yezu ngo mutari kumwe na jye ntacyo mwashobora?

Ibyo ari byo byose, mu mwirato wacun’ uw’isi yacu si twe dufite ukuri. Turibeshya rwose. Dutege ahubwo amatwi Yezu, we utubwira ukuri: Mutari kumwe najye nta cyo mwashobora. Twibeshya ko kuyoboka Kristu no kwicisha bugufi imbere ye ari ubugwari n’ubucucu. Ko abanyambaraga, abahanga, abanyabwenge n’ibihangange badashobora guta igihe mu masengesho. Ntibakeneye guhazwa kuko bahora bahaze. Ntibakeneye Kubwirizwa (kwigishwa) kuko na bo ntibajya babura icyo bavuga. Ibigega by’amagambo barabigwije. Nta mukiro bakeneye kuko gukira byo barakize pe! Ndetse bakiza n’ubakeje. Ntibakeneye gusaba imbabazi kuko atari imbabare. Twese rero abibeshya bene ako kageni, uyu munsi Yezu Kristu Wapfuye akazuka, ari iwacu atwigisha agira ngo tubeho. Aje kuduha ubuzima nk’uko yabuhaye Pawulo akamukura mu ruhame rw’abahakanyi b’ububasha bwe. Maze akamushyira mu bamuhamya mu ruhame badatinya guterwa amabuye. Guhamya Kristu kandi nyako ni ukurangwa n’Urukundo rutaryarya, mbese ni ugutura nyine mu rukundo rwa Yezu ukunda abantu bose ntacyo abaca usibye kubacacura ngo abacungure. Urwo rukundo ni rwo rwahuje Pawulo na Barinaba. Maze bakorana ubutumwa bweze imbuto nyinshi kandi z’ibihe byose muri Kiriziya. Urwo rukundo ni rwo rugurumana mu mitima y’abantu bose bemera Kristu by’ukuri kandi bagakunda abantu bose batitaye ku bubi bwabo cyangwa ngo bagire abo batonesha batoneka abo batitayeho.

Bikira Mariya Umubyeyi wa Yezu Kristu, nadusabire none kuva ku izima; maze tuzinukwe kwikuza. Aribyo bidutera kutemera Ubuzima Yezu aha abemeye kumwizirikaho no kumwizihira. Bikira Mariya adusabire kumva rwose ko hanze ya Kristu Yezu wapfuye akazuka nta buzima, nta kuzo nta n’izimano. Bityo twese kuva none duharanire kunga Ubumwe na Kristu Yezu we Mukiza n’Umutegetsi rukumbi.

Padri Jérémie Habyarimana

 

Data uhora muri jye, ni we ukora imirimo ye

KU WA GATANDATU W’ICYUMWERU CYA KANE CYA PASIKA,

5 GICURASI 2012

 

AMASOMO:

1º. Intu 13, 44-52

2º. Yh 14, 7-14

 

 

DATA UHORA MURI JYE, NI WE UKORA IMIRIMO YE

 

Duheruka kuzirikana ivanjiri y’uyu munsi ubwo twahimbazaga ibirori byo gusingiza intumwa Filipo na Yakobo muto mwene wabo wa YEZU. Kuri uwo munsi, YEZU yatubwiye ko umwemera azakora imirimo akora. Twishimiye ko intumwa za YEZU n’abigishwa be bo mu bihe byose bakora rwose nka we bamurikiwe na Roho Mutagatifu ababuganizamo. Mu nyigisho y’ejo, YEZU yatwibukije ko ari We Nzira, Ukuri n’Ubugingo. Uyu munsi aratwibutsa ko ibyo atugezaho byose, atari We ubyihimbira. Byose biva kuri Data Uhoraho ari na We ukora imirimo ye muri YEZU KRISTU nyine. Duhereye aho, nta kindi twakwifuza kitari ukunga ubumwe na YEZU KRISTU kugira ngo atugeze kuri DATA.

Mu butumwa bwe, YEZU ntiyigeze avuga ko akora wenyine. Nta n’ubwo yagaragaje ko ikuzo ryose ari we rigarukiraho. Ahubwo yerekana inzira iganisha kuri Data Ushoborabyose. Aho ashaka kugeza intumwa ze natwe twese, ni ukubona Data wa twese uwo. YEZU ati: “Nta we ugera kuri Data atanyuzeho”. Ariko na none, urwo rugendo rutugeza kuri Data tukamumenya, ntirutugendekera neza igihe cyose tutanyuze kuri YEZU: “Iyaba mwari munzi, na Data mwamumenya”. Ni uko bimeze rero: kumenya YEZU KRISTU bitugeza ku kumenya IMANA DATA USHOBORABYOSE. Nta wavuga ko azi Imana mu gihe yanga rwose kumenya YEZU KRISTU. Utarigeze amubwirwa, nta kosa rimurangwaho. Ariko umwumva akamwirengagiza cyangwa akamusuzugura mu mvugo no mu ngiro, nta ho twahera twemeza ko azagira ubugingo bw’iteka! Uko kuri ni ko kwatumye YEZU yohereza intumwa ze ku isi yose uhereye i Yeruzalemu ugana mu banyamahanga ba kure. Azi neza ko uwumvise Inkuru Nziza akamwemera aba yatangiye kumenya IMANA y’ukuri. YEZU KRISTU ntiyigeze ashinga Kiliziya ebyiri. Ni imwe gusa iyobowe n’intumwa ze. Ni yo yahaye ubutumwa bwo kugeza isi yose ku bumenyi bw’Imana y’ukuri. Kuki se hariho amadini menshi? Ibihe n’amateka bigenda bihindura abantu. Hari ibibazo byagiye byaduka mu gihe runaka bigacamo ibice abakristu hakavuka amadini anyuranye. N’uyu muni aracyavuka. Nta rubanza dushobora gucira abagiye baba intandaro yo kwitandukanya n’intumwa. Ukuri twemeza tutibeshya kandi tumurikiwe na Roho Mutagatifu, ni uko kuva kera kugeza igihe isi izashirira, muri Kiliziya havubuka isoko y’ingabire zose zishobora gukiza umuntu wese. Twakomeje, kandi tuzakomeza kwibutsa ko mu masakaramentu yose duhazwa ibyiza by’ijuru twerekwa na YEZU KRISTU ubwe We uhorana na DATA kandi akaba hafi y’abakunzi be nk’uko yabisezeranyije igihe ababwiye ati: “…ndi kumwe namwe iminsi yose, kugeza igihe isi izashirira” (Mt 28, 20b).

Ukundi kuri twemeza tutibeshya, ni uko uko umukunzi wa YEZU yihatira kunga ubumwe na We, ni na ko ashobora kwamamaza UKURI kukamenywa n’abamwumva. Ingero ni nyinshi mu mateka maremare ya Kiliziya ya YEZU KRISTU. Birumvikana ko ingero z’ikubitiro tuzihabwa mu gihe intumwa n’abisgishwa bari bashishikariye kwamamaza Inkuru Nziza (YEZU WAZUTSE MU BAPFUYE). No mu isomo rya mbere ry’uyu munsi twongeye kumva ubuhamya bwa Pawulo na Barinaba bigishije i Antiyokiya ho muri Pisidiya maze abantu benshi barahinduka bakemera YEZU KRISTU. N’ubwo hari benshi bemeye ariko, hari n’abandi bahakanye ndetse biyemeza gutoteza izo ntumwa. Ntidushobora kuvuga ko ayo matwara yo kwanga Ivanjili no gutoteza abayigisha adaturuka kuri sebyaha-shitani. Twumvise ukuntu Abayahudi bigaruriye abagore b’abapfasoni ndetse n’abanyacyubahiro bo muri uwo mugi maze bakaboshya, bakabatamika Pawulo na Barinaba. Barabatoteje bageza ubwo babamenesha.

Sekibi ikoresha uburyo bwose kugira ngo yangishe abantu YEZU KRISTU. Iyo sekibi yifatira abantu basanzwe bagerageza ikabatera kwanga inzira y’Inkuru Nziza. Iyo abantu- basanzwe bagerageza kwitwara neza- bemeye gukorera mushukanyi, iyo abantu b’abanyacyubahiro bahakanye ukuri, hari abandi benshi batwarwa na bo bakayoba. Ni uko byagiye bigenda muri Kiliziya: ni iy’IMANA ikaba n’iy’abantu. Abantu rero si ko igihe cyose bumvira Roho Mutagatifu. Si ko bose muri Kiliziya biyumvamo ikibatsi cyo gukurikira KRISTU WAPFUYE AKAZUKA. Hari igihe usanga tuvuga ko ari We dukurikiye nyamara tukaba mu bukristu bw’igicagate. Ubwo bukristu bukonje bworohera imigambi ya Sekibi inyura ku bantú bakomeye mu byubahiro by’isi cyangwa bagaragaza ubwiza budashingiye ku mutima ushaka ukuri maze ikayobya abanyantege nke.

Ubuyobe bwagiye buterwa n’izo mpamvu twavuze ntibwigeze buzimya Kiliziya. Ni iya YEZU KRISTU. Intumwa ze zirangiza umurimo wazo wo kwamamaza UKURI kwa KRISTU. Aho banangiye cyangwa bazirukanye zuzuza amagambo YEZU yazibwiye agira ati: “Nibanga kubakira no kumva amagambo yanyu, muve muri urwo rugo cyangwa muri uwo mugi, mukunguta umukungugu wo ku birenge byanyu” (Mt 10, 14). No muri iki gihe, nta bwo dukwiye kugira ubwoba bwo kwamamaza UKURI kwa KRISTU kuko ni ko KURI kuzuye kwa DATA udukunda. Igihe cyose tuvuga atari ibitekerezo byacu bwite dushaka gutambutsa, igihe twihatira kunga ubumwe na KRISTU udutuma, nta kintu na kimwe gikwiye kudutera ubwoba. Twabonye YEZU KRISTU, yatwereste DATA, ibyo biraduhagije.

Dusabirane guhora twunze ubumwe na YEZU KRISTU kugira ngo tumenye IMANA y’ UKURI. Dusabirane gutsinda ubushukanyi bwose. Dusabire abahora bayobagurika mu kwemera gushakashaka UKURI. Dusabire abatorewe gukomeza ubutumwa bwa YEZU KRISTU muri Kiliziya ye ntagatifu bamukomereho. Dusabire urubyiruko guhura n’abaruyobora neza mu KURI kwa YEZU KRISTU.

UMUBYEYI BIKIRA MARIYA ADUHAKIRWE

YEZU ASINGIZWE.

Padiri Sipriyani BIZIMANA