Catégories
Inyigisho

« Ragira intama zanjye »

Inyigisho yo ku wa gatanu w’icyumweru cya 7 cya Pasika, ku wa 22 Gicurasi 2015

Bavandimwe,

Ivanjiri y’uyu munsi irahanura abepisikopi ku buryo bw’umwihariko. Imana yarabatoye ngo babere isi akarorero k’uko abitwa abategetsi bagomba kwitwara. Mu kiganiro Yezu yagiranye na Petero – papa wa mbere – yamweretse ko umushumba mwiza ari umukunda kuruta byose. Ndetse kuruta n’ubuzima bwe. Ivanjiri y’uyu munsi irasa nisubiza ikibazo kigira kiti : ese ubutegetsi bw’abepiskopi butandukaniye he n’ubw’abandi bategetsi ? Ibiranga ubutegetsi bwabo, ivanjiri ibihinira mu ngiro eshatu : gukunda Yezu kuruta byose, kwitegura gupfira intama ushinzwe, gukurikira Yezu nk’umwigishwa.

1. Bamaze kurya Yezu abaza Simoni Petero ati …« Simoni mwene Yohani, urankunda kurusha aba ngaba » ? Iri funguro ivanjiri ivuga ryabaye ubwo Yezu yabonekeraga intumwa ze zari zasubiye mu murimo wazo wo kuroba zikeka ko ibya Yezu byarangiranye n’urupfu rwe. Iki kibazo Yezu yasubiyemo gatatu kitwibutsa ko Petero – shefu w’intumwa – yihakanye shebuja ubugira gatatu. Mu mitegekere y’abanyeesi, umutegetsi nk’uyu yagombaga kwigizwayo, ndetse akaba yanicwa. Nyamara Petero, mu gihe yari yiteguye kwigizwayo nibwo Yezu yamusabye kuragira abana b’intama ze. Ariko amaze guhamya gatatu ko amukunda kuruta abandi bantu bose. Umushumba mwiza asabwa kugaburira izo ashinzwe. Ntazuzuza ibifu gusa, ahubwo azihagisha ijambo ry’Imana, amasengesho n’amasakaramentu.

2. Ragira abana w’intama zanjye. Petero yahawe ubutumwa bwo kuba umushumba azi neza ko atari igitangaza. Ko ari umunyantege nke. Ko yihakanye ubugira gatatu uwamukunze akamwizera. Ibi bitwereka ko kuba umwepisikopi ari umuhamagaro. Ko atari gihamya y’uko arusha abandi ubumenyi cy angwa ubushobozi. Ubaye umwepisikopi atizwa ubutegetsi bwa Yezu. Agomba rero kwitwararika kugirango abukoreshe nk’uko uwabumuhaye yabukoresheje. Uragira intama hari ibintu bitatu by’ingenzi agomba kwibandaho : kuziyobora mu rwuri rutoshye, kuziturira zikarisha no kuzirinda ibirura. Umushumba mwiza ajya imbere y’intama ze, aravuga kugirango zimenyere ijwi rye ziritandukanye n’iry’ikirura.

3. Kuragira abana b’intama za Yezu bikorwa bite ? Bisaba iki ? Icyambere gisabwa umushumba mwiza ni ukuba umwigishwa kugirango azabe umwigisha. Kuba umwigishwa ni ugukurikira Yezu. Ugaca inzira aciye. Ukamutega amatwi mu nzira. Ukazabwira abandi amagambo wamwumvanye aho kubabwira ayawe wihimbiye. Icya kabiri ni ukwigiramo urukundo. Burya umushumba wigiramo urwango aba yahindutse ikirura. Uwo umushumba mwiza agomba gukunda kuruta bose ni Yezu wamutumye, we wamwizeye akamutora kandi atari igitangaza. Icya gatatu ni ukwitegura gutanga ubuzima bwe arwana ku ntama yaragijwe. Kandi agomba gutanga urugero rwiza. Akavuga ibyo ashobora gukora kandi agakora ibyo yasezeranyije. Oya ye aba ari oya. Yego ye ikaba ari yego.

4. Petero ababazwa n’uko amubajije ubwa gatatu ati «Urankunda ?» Icyaha Petero yari yarakoze cyo kwihakana Yezu cyari gikomeye cyane. Umushumba mwiza ababazwa n’icyaha cyose. Cyane cyane iyo ariwe wagikoze. Cyane cyane iyo kigira ingaruka mbi ku ntungane n’abanyantege nke. Nka Petero, umushumba mwiza agomba kumenya gusaba no kwakira imbabazi z’ibyaha bye. Nka Yezu, umushumba mwiza asabwa kumenya kubabarira uwakosheje. Kandi akababarira abigiranye urukundo n’impuhwe.

5. Uzatega amaboko undi agukenyeze, kandi akujyane aho udashaka. Aya magambo Yezu yabwiye Petero yahanuraga urupfu rwari rumutegereje. Koko rero Petero mutagatifu yapfuye ari ku rugamba ahanganye n’ibirura byiraye mu ntama kugirango bizitatanye. Yabaye umumaritiri. Amaraso ye yabaye imbuto yera ubukirisitu. No muri ibi bihe ibirura byiraye mu ntama za Yezu. Tuzi abepisikopi bishwe banze guhunga ngo basige intama. Tuzi abashorewe bajyanwa aho badashaka kujya. Tuzi nanone abahunze kugirango bakize ubuzima bwabo. Aba ntabwo bakoze icyaha kirenze icya Petero wihakanye Yezu. Ariko Yezu ntabatera ibuye. Nta cyaha atababarira. Gusa arabasaba kwisubiraho, bakemera intege nke zabo, bagasaba uwabatumye kubongerera imbaraga kugirango batamutatira.

6. Nimucyo dusabire abepisikopi bacu. Ahenshi kw’isi abepisikopi bameze nka ba bigishwa Yezu yohereje mu butumwa akababwira ko abohereje nk’intama mu birura. Tubasabire kuba inyaryenge nk’inzoka, n’intaryarya nk’inuma (reba Mat 10, 16). Tubasabire gutinyuka maze bavuge. Intama zitabona iyo zerekeza, bazibwire ko Yezu ariwe nzira. Izifite ubwoba bwo kwicwa bazibwire ko Yezu ariwe buzima. Izirambiwe ibinyoma, zikaba zisonzeye ukuri, bazibwire ko Yezu ariwe kuri. Izarambiwe umwijima, bazereke Yezu we Rumuri rw’amahanga. Abepisikopi batanze ubuzima bwabo bagirira intama zabo nabo ntitukabibagirwe.

7. Bavandimwe, mu gihe twitegura kwizihiza umunsi mukuru wa Pentekositi, twibuke ko Bikira Mariya atigeze atererana abigishwa ba Yezu bari bakangaranyijwe n’urupfu rwe. Yari kumwe nabo mu isengesho kugeza Roho Mutagatifu aje akabamanukiraho. Uyu mubyeyi wa Yezu n’uwa Kiliziya, mu gihe cya Pasika tumwiyambaza tumwita Umwamikazi wo mw’ijuru. Mwamikazi w’amahoro, erekeza amaso yawe kubatayafite muri iki gihe !

Imyiteguro myiza y’umunsi mukuru wa Pentekositi.

Padiri Bernardin TWAGIRAMUNGU