Catégories
Inyigisho

« Yezu ni we rembo rigana ijuru »

Inyigisho yo kuwa mbere w’icyumweru cya 4 cya Pasika , Umwaka c

Amasomo : Int 11,1-18,

                   Zab 41,2-3 ; 42, 3,4

                  Yh10 ,1-10

« Umuntu utinjirira mu irembo ry’urugo rw’intama, ahubwo akurira ahandi, aba ari umujura n’igisambo »Yh10, 1.

Bakristu bavandimwe muri Kristu, Yezu Kristu akuzwe !

Turacyari mu byishimo bya Pasika ya Nyagasani.

Amasomo tuzirikanaho aragenda atwereka neza Yezu Kristu uwo ari we n’ubutumwa bwamuzanye ku isi.

Yezu Kristu ni we rembo ry’ukuri ritugeza mu bugingo bw’iteka. Yaje ku isi kugira ngo  tudaheranwa n’icyaha cyari cyarayogoje isi n’abayituye ndetse no gukoranya abana b’Imana batatanye,  maze ababumbira  hamwe (Yh11, 52). Yezu ati : «  Ni jye  rembo ; uzanyuraho yinjira azakizwa, azishyira yizane kandi abone urwuri » (Yh10, 9). Uwashyize amazero ye muri Nyagasani Yezu ntagenda yububa kuko aba yishingikirije urutare rutayegayezwa. Nyagasani amubera nk’umushumba uragiye ubushyo bwe, akabwegeranya n’ukuboko kwe ;abana b’intama akabatwara mu gituza  cye, maze imbyeyi akazemera mu rwuri rutoshye (Iz 40,11). Ntabwo yikanga ibirura. Umuririmbyi wa  Zaburi ni we  wahimbawe maze aratwarwa araterura, ati : «Uhoraho niwe Mushumba wanjye ntacyo nzabura ! Andagira  mu rwuri rutoshye,akanshora ku mariba y’amazi afutse, maze akankomeza umutima. Anyobora inzira y’ubutungane, abigiriye kubaha izina rye. N’aho nanyura  mu manga yijimye ntacyankura umutima, kuko uba uri kumwe nanjye, inkoni yawe y’ubushumba intera ubugabo » (Zab 23, 1b-4).

 Yezu Kristu ni we shusho y’Imana nyakuri ni we kandi wivugiye mu Ivanjili ya none, ati : «  Jye rero nazanywe no kugira ngo intama zigire  ubugingo, kandi zibugire busagambe ». (Yh10, 10). Intama Yezu yavugaga ni ikiremwamuntu  aho kiva kikagera. Ntawe uhejwe ku butungane. Isomo rya mbere ni ryo ryatweretse Petero wahawe kuyobora intama za Yezu abihamya neza  ubwo yasabwaga gutanga ibisobanuro ku myifatire ye kwa  Koruneli,  agira ati: «Niba se Imana yarahaye abo bantu ingabire imwe natwe igihe twemeye  Nyagasani Yezu Kristu, jyewe nari nde wo  kuburizamo umugambi w’Imana?» (Int 11, 17).

Icyanduye Petero yabonye mu mabonekerwa ye gishushanya abanyamahanga nk’uyu Koruneli Imana ishaka kugeza ku  kwemera nyakuri. Umugambi w’Imana ni uko ntawe uzimira. Roho Mutagatifu intumwa zahawe ni we n’abatari basangiye umuco (abanyamahanga) n’abayahudi bahawe.Imana ubwayo ntirobanura, ntiyita  ku muco cyangwa ku bitandukanya muntu. Icyo ireba ni uko ntawe urohama. Yatwoherereje Roho wayo kugira ngo atuyobore  kuri Yezu Kristu we rembo rigana ijuru.

Yezu Kristu ati : « Ndababwira ukuri koko : umuntu utinjirira mu irembo ry’urugo rw’intama ahubwo akuririra ahandi, uwo aba ari  umujura n’igisambo. Unyura mu irembo, uwo aba ari umushumba w’intama » (Yh10, 2). Umujura agenzwa no kwiba, no kwica cyangwa se no kurimbura. Uwo ugenzwa n’iyo mico mibi ni Shitani. Ihora irekereje ishaka aho yamenera ngo ihubuze imwe mu ntama; intama  ni twe twese abakristu. Turasabwa kutayiha urwaho ngo dusige aho yamenera. Ahubwo tugahora dufunguriye amarembo, tutananiza Roho Mutagatifu twahawe. Tukemera ko n’abandi nabo bafite umwanya  kimwe natwe mu Ngoma y’Ijuru. Uwakiriye Yezu mu buzima bwe amubera inkingi imurinda Sekibi. Buri wese asabwa gushyiraho ake agaca mu irembo.

Bavandimwe, Imana yo ubwayo  yatubumbiye mu bumwe ibigirishije  urupfu n’izuka by’Umwana wayo w’ikinege Yezu Kristu ku bwa Roho Mutagatifu, ni kangahe uzirikana kuri iyo neza yayo?  Muri uyu mwaka wa Yubile y’impuhwe z’Imana niturangwe n’impuhwe kuko turi abana b’Impuhwe, tugaragarize abandi isura y’Imana iturimo, twimike ubuvandimwe aho kuba ba nyamwigendaho. « Nimube abanyampuhwe nk’uko So ari Umunyampuhwe» (Lk 6, 36).

Kandi twisunge Bikira Mariya we mubyeyi w’impuhwe akaba n’ikigega cy’ingabire zose.

Nyagasani Yezu nabane namwe.

Diyakoni  Sylvain  SEBACUMI

Iseminari Nkuru ya Nyakibanda.