Catégories
Inyigisho

Rwana intambara nyayo y’ukwemera, uronke ubugingo bw’iteka

Inyigisho yo ku cyumweru cya 26 gisanzwe, giharwe, C, 2013

Ku ya 29 Nzeli 2013 – Mwayiteguriwe na Padiri Cyprien BIZIMANA

AMASOMO: 1º. Am 6, 1a. 4-7; 2º. 1 Tim 6, 11-16; 3º. Lk 16, 19-31

Kuri iki cyumweru, YEZU KRISTU ashatse kutwibutsa ko nta kindi tubereyeho usibye guharanira ubugingo bw’iteka. Nta gushidikanya twese tuzaburonka ku bw’Impuhwe ze z’igisagirane. Izo mpuhwe ariko ntizivanaho ubushake bwacu. Imana iduhamagara twese muri YEZU KRISTU, ariko si ko twese tubangukirwa no kuyikiriza. Hari ubwo duhibibikanira ibyo ku isi tukibagirwa ko iby’ijuru na byo biharanirwa ndetse cyane kuko bisaba imbaraga ndengakamere no kwigobotora ibitugota biturangaza. Twaba twararuhiye iki niba kuri wa munsi tuzakanura amaso nka wa mukungu wapfuye akicuza bitagishobotse?

Mu isomo rya mbere n’Ivanjili, Nyagasani agamije gucyamura abakungu muri iyi si, abo bose bakize maze bagaterera agati mu ryinyo batazi ko n’umukiro wabo wose uturuka ku byo Imana yaremye. Kimwe mu bitesha abantu umwanya bakarangara rwose, ni uguhibibikanira kwambara neza no kurya neza. Amosi yaburiye abituriye mu mazu meza bakiyambarira neza bakagandagaza mu ntebe nziza z’amadiva, bakarya neza by’agatangaza, bakimeza neza mu mariri akozwe mu mahembe y’inzovu. Iyo mibereho y’ubunyacyubahiro barimo, ntiyatumaga bareba abakene ngo babe babagoboka. Ivanjili na yo yagarutse ku bantu b’abaherwe batita ku bakene kandi bakibwira ko bashyikiriye badakeneye kuyoboka Imana Umuremyi wabo. Uko ibyabo bizarangira, YEZU yabigaragaje asobanura ko umukungu yapfuye bakamuhamba, ibyo yiratanaga byose bikaba birarangiye. Kuba yarageze ikuzimu agashavuzwa nububabare butagira uko buvugwa, bitugaragariza ko umuntu adapfa buheriheri, ko akomeza kubaho neza cyangwa nabi bitewe n’uko akiri ku isi yabayeho ari mwiza akunda Imana kuruta byose cyangwa se bitewe n’uko yabayeho ari gica nk’umurozi w’ibisebe.

Umugani ugana akariho. YEZU KRISTU ntaca imigani yivugira gusa. Dore umuriro w’iteka ubaho: ni wo abamurwanya banga kwemera ineza ye bazakongokeramo ubuziraherezo. Ijuru na ryo ribaho, ni ryo Lazaro wahoze ari umukene aganjemo. Igihe tugihumeka, dusabe imbaraga zo guhitamo neza ijuru aho kwiroha mu muriro dushukwa na Sekibi twibwira ko dukeye kuko twambaye neza cyangwa twariye neza! Rero kubera Sekibi no kwambara neza bisigaye byirengagizwa hagamije kwambara uko Shitani ishaka bitandukanye n’amatwara aturuka kuri Roho Mutagatifu. Guhugira muri ibyo ni uguta igihe cyacu no gutsindwa ku rugamba duhamagariwe kurwana.

Intambara y’ukwemera tuzayitsinda nitwitoza kumvira Roho Mutagatifu mu magambo no mu bikorwa. Ni ukwemera imibabaro igihe imibereho yacu ari uko amateka yayidushyikirije. Ni ukugira umutima wita ku mibabaro y’abandi tugerageza kubafasha uko dushoboye kuko natwe ntacyo twagezeho ku bwacu. Gutsinda intambara y’ukwemera ni ukubabara ariko tukirinda guha urwaho Sekibi mu buzima bwacu. Igishuko cyose kituzaho kiza akenshi cyifitemo rukuruzi n’uburyohere bubereye kamere yangijwe n’ubushukanyi bwa Sekibi. Gutsinda isi ni ukumenya kwitarura ikintu cyose kidutesha igihe kitubuza kuzirikana ibyiza YEZU KRISTU atubuganizamo uhereye ku masakaramentu yose duhabwa akadutera imbaraga mu rugendo turimo tugana ijuru.

YEZU KRISTU asingizwe kandi atube hafi kugira ngo twigobotore ibidushuka byo kuri iyi si. Umubeyi Bikira Mariya waranzwe n’ubudahemuka ijana ku ijana aduhakirwe. Abamalayika bakuru Mikayire, Gaburiheri na Rafayire baturwanirire. Abatagatifu bose badushyigikire mu ntambara y’ukwemera.