Catégories
Inyigisho

Senga kandi Ukore

Inyigisho yo ku wa 6 w’icyumweru cya 27, C, 2013

Ku ya 12 Ukwakira 2013 – Yateguwe na Padiri Théoneste NZAYISENGA

AMASOMO: 1º. Yow 4,12-21; 2º. Lk 11, 27-28

Bavandimwe, dushoje icyumweru cya 27 mu byumweru bisanzwe by’umwaka wa Liturujiya. Amasomo matagatifu cyane cyane Ivanjili ya Yezu Kristu twazirikanye, yaturarikiraga kumenya no gukunda isengesho. Mu rugero rwa Mariya na Marita, Yezu yadusabye guhuza isengesho n’ibikorwa. Ariko cyane cyane Yezu akagaragaza ko isengesho rifite umwanya w’ibanze kuko ari ryo riha ibikorwa byacu umurongo ufututse. Ntabwo Yezu yigishije isengesho gusa ahubwo yanagaragaje ko ari bwo buzima bwe. Intumwa zamwitegereje asenga, maze zitangarira iyo migirire myiza, ziramubwira ziti: “natwe dutoze gusenga”. Yezu yazigishije isengesho kandi yerekana ku buryo bwuzuye isano umuntu agirana n’Imana ayita “Dawe”. Byongeye, Yezu yagaragaje ko tugomba gusenga ubutarambirwa kuko Imana Umubyeyi wacu imenya ibidukwiye kandi ikabiduha igihe yagennye kigeze. Yezu kandi yatweretse ko ari mu isengesho avoma imbaraga zo kwigisha, guhamya uwamutumye no gukora ibitangaza. Nyamara hari ba mutanyurwa bagize bati: “umutware wa Belizeburi ni we yirukanisha roho mbi”. Icyakora urukundo rw’Imana ntiruburizwamo n’imyifatire mibi iyi n’iyi ya Kanaka cyangwa Nyirakanaka. Mu gihe Abafarizayi, Abigishamategeko n’abahanga benshi bitaga Yezu Belizebuli, umugore utazwi izina yaranguruye ijwi atangarira ububasha bwa Yezu n’ubwa Nyina umubyara. Ese twebwe tujya dutangarira ubwiza n’urukundo by’Imana byirangira mu buzima bwacu?

Hahirwa inda yagutwaye n’amabere yakonkeje

Uyu mugore aratwigisha gutangarira ubwiza bwa Nyina wa Yezu bityo bikadufasha kurushaho gutangarira ubwiza bwa Yezu, kimwe n’uko ubwiza bwa Yezu budufasha gutangarira ubwiza bw’umubyeyi we. Ntabwo uyu mugore yigeze acibwa intege n’ibigambo by’abatukaga Yezu bamwita Belizebuli ahubwo yatangariye ububasha bwa Yezu binamutera gukunda umubyeyi we. Bavandimwe, muri uku kwezi kwa Rozari dusabe ingabire yo gukunda Yezu n’Umubyeyi we Bikira Mariya. Gukunda yezu kandi ni ugukunda ijambo rye, kuryumva no kurikurikiza.

Hahirwa abumva ijambo ry’Imana bakarikurikiza

Si ubwa mbere mu Ivanjili ya Luka Yezu avuga aya magambo. Yari yarigeze kuvuga ati:” Mama n’abavandimwe banjye ni abumva Ijambo ry’Imana bakarikurikiza” (Lk 8,12).

Mu kutibanda cyane ku isano afitanye n’umubyeyi we n’ubwo ifite agaciro gakomeye, Yezu araha agaciro cyane isano y’ukwemera ishingiye ku kumva Ijambo ry’Imana no kurikurikiza. Ni na yo mpamvu Luka yifashishije amagambo ya Elizabeti atahwemye gutangarira Bikira Mariya agira ati: “urahirwa wowe wemeye ko ibyo watumweho na Nyagasani bizaba” (Lk 1,45). Bavandimwe, muri uyu mwaka w’ukwemera tugiye gusoza, dufate umugambi wo kwakira ijambo ry’Imana ryo soko y’ukwemera kwacu. Umuhanuzi Yeremiya we yaragiraga ati: “Uhoraho, iyo numvise amagambo yawe ndayamira. Ijambo ryawe ryaranyuze, rinsenderezamo umunezero (Yer 15, 16). Koko rero, Ijambo ry’Imana rirarema, rirakiza, rirahumuriza kandi ritanga ubugingo. Ni ryo Petero yatangariye agira ati: “ Nyagasani twasanga nde wundi atari wowe ufite amagambo y’ubugingo bw’iteka” (Yh 6,68).

Abahire by’ukuri ni abahe?

Abahanga mu gusesengura Bibiliya bagaragaza ko imvugo “hahirwa” igaragara incuro 50 mu Isezerano rishya, ikagaragara incuro 25 mu Nkuru nziza ya Yezu Kristu. Bikatwereka rwose ko amahirwe nyayo ya muntu ayakesha Imana. Ko Imana ari yo soko y’amahirwe n’ibyishimo by’ukuri. Tubyumve neza ariko si amahirwe aturuka ku by’isi, si n’amahirwe ayo ari yo yose: ni amahirwe duhabwa no kwakira Ijambo ry’Imana kandi tukarikurikiza. Ni amahirwe dukesha ubukene bw’umutima ukeneye Imana, ni amahirwe akomoka ku kwiyoroshya, ni amahirwe duterwa no kubabara kubera ingoma ya Kristu, ni amahirwe dukesha gusonzera ubutungane, ni amahirwe dukesha kugira impuhwe, kuba inkunzi z’amahoro. Dusabirane twese aya mahirwe.

Bikira Mariya umwamikazi wa Rozari aduhore hafi kandi abatagatifu Serafini, Wilffridi, Magsimiliyani, Salvini twizihiza none badusabire.

Padiri Théoneste NZAYISENGA