Catégories
Inyigisho

Tangara, Emera, Hinduka

INYIGISHO YO KU WA GATANDATU W’ICYUMWERU CYA II CYA ADIVENTI TARIKI YA 14/12/2019.

Amasomo:   Sir 48,1-4.9-11; Zab 80(79); Mt 17,10-13

Tangarira Ibyo Imana ikora maze Wemere kandi uhinduke!

Bakristu bavandimwe, kuri uyu wa Gatandatu w’icyumweru cya Kabiri cya Adiventi, amasomo matagatifu araturarikira gutangarira ibyo Imana ikora kandi twamara gutangara tukanemera.

Isi ya none yugarijwe n’Uburangare n’ihinyu (cyangwa ugupinga) ku buryo Imana ivuga ntibumve, yakora ntitubibone kandi abo ikoreramo batari kure yacu. Bangahe usanga baca imbere ya Kiliziya abandi basenga, bari mu Misa, bashengereye… ukabona hari abitambukira hanze basa nk’aho batazi ibyabaye cyangwa bakaba banari aho ariko barangariye kuri telefoni n’ibindi nk’ibyo? Bangahe usanga bari ahantu hakorerwa ingendo nyobokamana ariko kuba bahaturiye bikaba nta cyo byabahinduyeho nyamara abaje bagana ahongaho bo bafashijwe? Bangahe bajyanwa no kwiba cyangwa gukora amafuti yandi aho abandi baba bajyanywe no kuronkera ingabire z’Imana?

Mu isomo rya mbere ryavuye mu gitabo cya Mwene Siraki, Umwanditsi aratangarira uburyo Eliya yakoze ibintu bikomeye, bitangaje kandi byose akaba yarabikoreshwaga n’Imana kugira ngo abantu bemere kandi bahinduke. Eliya yaje ameze nk’Umuriro utwika, yategeje abigometse ibihano bikakaye, kandi byose yabikoranye ishyaka n’ubudacogora.

Mu ivanjiri yanditswe na Matayo, turabwirwa uburyo amateka ya Eliya atigeze asibangana ku buryo n’abigishamategeko, mu gihe Yezu yari ku isi ku buryo bugaragarira amaso ya muntu, bari bakivuga ko Eliya uwo agomba kuzaza mbere y’Uko Umukiza wari warategerejwe igihe kirekire yagombaga kwigaragaza.

Yezu arasobanura ko Eliya yaje, ariko kandi ntibamumenye. Eliya wavugwaga aha ni Yohani Batisita na we waje afite imibereho n’imigirire idasanzwe yo gutunganya neza amayira ya Nyagasani.

Imana yakoresheje abahanuzi bayo ibikorwa byinshi kandi na n’ubu iracyabikora. Kangahe twabonye abantu bava iwabo bakajya kwitangira abandi kubera Urukundo bafitiye Imana n’abantu kandi nta yindi nyungu bafite? Kangahe twabonye abantu barara amajoro basabira abandi kandi Imana igasubiza ibyifuzo byabo ndetse rimwe na rimwe ikanabikora mu buryo bw’ibitangaza? Kangahe twabonye abantu bemera bagatotezwa ariko bakanga kwihakana ukwemera kwabo?

Na n’Ubu ba Eliya na Ba Yohani Batisita baracyariho. Abashimirwa ko bacyaha abandi babarinda kwandavura baracyariho. Abigomwa imitungo, imyambaro myiza, aho batura heza nka Yohani waryaga isanane n’Ubuki bw’Ubuhura akambara umwambaro uciriritse kandi agatura mu butayu baracyahari.

None ko buri munsi tubona ibimenyetso bihagije by’Uko hari abakorera Imana, kuki tudatera intambwe ngo dukore nka bo? Kumenya ibyiza no kubishima ni byiza ariko kubyigana biruta kubimenya no kubivugaho gusa.

Iyo Yezu avuze ati: “Eliya yaraje”, aba atwibuta ko ubwo na we ubwe ahari, kuko yagombaga kuza amukurikiye. Iyo Ubonye umuntu ukora mu Izina ry’Imana wakagombye kwibuka ko Yezu atari kure y’aho uwo ari gukorera ibyiza kuko byose abishobora mu Izina rya Yezu bityo mu bwiyoroshye ugasaba Roho Mutagatifu ngo aguhe kumenya igikwiriye kandi aguhe n’ ubushobozi bwo kugisohoza mu gihe gikwiriye, kandi ukirinda kumurwanya, kugerageza kumucuyura cyangwa kumugerageza, kuko waba urwanya uwamutumye.

Twisunze Umubyeyi Bikira Mariya Umwamikazi wa Kibeho, dusabe Yezu adufashe gutangarira uko bikwiye ibyo Imana ikora no gutinyuka gukora ibyiza nka Eliya na Yohani kuko nitubyiyemeza nk’uko twabisezeranye muri Batisimu twahawe, nta kabuza natwe tuzuzurizwaho ibyabaye ku ntumwa nk’uko tubibwirwa ngo: “Naho bo baragenda, bajya kwigisha hose. Nyagasani yabibafashagamo, kandi Ijambo ryabo akarikomeresha ibimenyetso byariherekezaga”. (Mk 16,20). Burya iyo Yezu avuze ati: “Ndi kumwe namwe kugeza ku ndunduro y’ibihe”, (Mt 28,20) aba atubwiriramo ngo Mwigira Ubwoba.

Nyagasani Yezu nabane namwe!

Padiri Jean Damascène HABIMANA M.