Catégories
Inyigisho

Tugane Yezu Kirisitu azaturuhura

Inyigisho y’uwa 3 w’icya II cy’Adiventi

Amasomo: Izayi 40,25-30; Matayo 11,28-30

Yezu Kirisitu naganze iteka ryose. Ni nde wakwirahira ati: “Ndihagije kandi ntakijya kimpangayikisha mu buzima”?. Ubanza uwavuga ko bigoye kubona umuntu wasanga atekanye mu bintu byose ari ihurizo mu yandi. Uwaba adafite ibimuruhije n’ibimuremereye yaba ari utagira umutima hamwe n’amaso areba akabona ukuri? Yewe na ho wowe ubwawe waba warageze iyo ujya, uzahangayikishwa n’abawe babuze amikoro n’amaramuko. Uzazengerezwa n’abaturanyi cyangwa abakuzi ariko bakaba babona ari wowe wabarasanaho, bazagutera hejuru, bakubuze amahoro ndetse n’utabatega amatwi bizarangira bakubujije amahirwe n’umugisha wari wiringiye. Niba dushaka kubaho dutekanye kandi tukaronka imbaraga zidufasha kurenga ibigeragezo, no kubona ibisubizo by’ibibazo duhura na byo, nimucyo tugarukire Imana tugane Yezu Kirisitu, Umucunguzi wacu, azatugeza ku mutsindo.

Duhereye mu isomo rya mbere, Umuhanuzi Izayasi aratwibutsa ikintu gikomeye aho yibutsa umuryango we natwe ubwacu ati: “Inzira yanjye yihishe Uhoraho, Imana yayobewe ibyanjye”. Aha tuributswa ko hari ubwo abantu tugera aho twagira amahirwe yo kuramuka no kugira ubwenge butuma ibyo dutekereje tubigeraho, aho guca bugufi ngo twibuke uwahanze isi n’ibiyiriho, harimo n’ubuzima bwacu, tukumva twageze iyo tujya. Tugatangira kwishongora no kwiyemera ko ibyo byose tubikesha umuhate n’ubwenge byacu. Nyamara se utabashije kubyuka ni iki wakora? Nta na kimwe rero dushobora kwiratana kuko ibyo dufite byose ni Impano y’Imana mbere na mbere ni uko tugashyiraho akacu, kuko tubereyeho gusiga isi ari nziza kurusha uko twayisanze, isi inogeye abayituye.

Uhoraho Imana rero ni we mugenga w’ibyaremwe byose, duhereye ku byo tubonesha amaso n’ibitabonwa na yo. Ni umunyampuhwe n’umunyambabazi akagabira buri wese ingabire zikwiye ariko akaturekera uburenganzira bwo kuzikoresha uko dushaka, kuko kubera urukundo rwe adashaka ko tumuyoboka kubera agahato. Umunyantege nke hamwe n’unaniwe arabagoboka akabatabara mu rugendo rwabo. Igikuru ni kimwe ni ukumwiringira, buri wese agashyiraho umuhate, ubundi imigisha n’imbaraga zitangwa na we zikamusesekaraho.

Ni byo Yezu ubwe, Umwana w’Imana waje kuducungura yashimangiye nk’uko twabyumvise mu ivanjili aho agira ati: “Nimungane mwese, abarushye n’abaremerewe, jye nzabaruhura”. Ubu butumire bwa Yezu, buratwibutsa ko ubuzima tubamo atari ikintu cyoroshye, aho duhura n’ibibazo binyuranye, bamwe bikaturenga, abandi bikadutesha umutwe, ndetse abadafite amizero bikabatera kwiyanga no kumva banze kubaho hakaba n’abagera aho biyambura ubuzima cyangwa bagakora amarorerwa babuza abandi amahoro. Ese ni iki dukora iyo duhuye n’ibibazo biturenze? Ese twibuka kwiringira Imana ngo idufashe kutiheba no kudacika intege mu rugamba rw’ubuzima?

Yezu kubera urwo adukunda, araduhamagarira kutamutera umugongo ahubwo tukamusanga, kuko hari igihe tugera mu bihe umuntu agasa n’utwikiriwe n’ibihu, atabona imbere y’aho agana, akumva ari wenyine, agacika intege, yewe n’icyo yagakoze akumva ntacyo kimaze. Iyo bigeze aha ni ngombwa kwegera Yezu kuko ntawe umwiringira ngo akorwe n’ikimwaro. Kenshi tugwirwaho n’urugogwe, kuko twiheba aho kwegera Imana, ngo idufashe kubona igikwiye kwitabwaho no kudacibwa intege mu bigeragezo.

Iyo Yezu atubwira ati: “umutwaro wanjye uroroshye n’ibyo mbakorera ntibiremereye” hari abahita bumva ko kumwizera bizabarinda guhura n’ingorane n’ibibazo. Oya, kuko ibibazo n’ibiturushya byose ni indasigana n’imibereho ya muntu. Ahubwo kumwizera, bitera ubikoze kwibuka ko kubaho ari urugamba, kandi akamuha imbaraga zo kurenga ibigeragezo kandi akabona urumuri rumufasha kubona igisubizo cya buri ngorane kandi ntiyihebe kuko uwo yiringiye ni we Nyir’ubuzima. Yibuka ko ku isi atari wenyine, ko ari kumwe n’abavandimwe, bashyira hamwe mu gushaka ejo heza, bikaborohera. Burya kwiheba, kwigunga no gucika intege biri mu bitera abantu kuremererwa n’ubuzima…kuko abashyize hamwe mu rukundo no mu bworoherane nta kibananira.

Kugana Yezu no kumureberaho ni ukwiyemeza kugira umwanya ukamumenya, ukamukomeraho kuko ahorana n’umushakashaka ubutarambirwa. Yezu uduha kuruhuka no kutaremererwa n’ubuzima, nagira nti: Ni Yezu, wowe ubwawe wihuriye na we. Ndavuga umwe wabwiwe n’ababyeyi n’abarezi banyuranye, kandi mugahura mu Byanditswe Bitagatifu n’Amasakaramentu duhabwa. Hanyuma wowe ubwawe ugashaka uko mushyikirana mwiherereye, ngo muganire. Ukamutega amatwi nk’uko na we ahora yumva amaganya n’ibyishimo, intege nke n’imiruho byawe ntakuvemo cyangwa ngo agutamaze, ahubwo agahora akwishimiye igihe cyose. Wamuhemukira cyangwa ukamubera imfura ahora ari we, ntahinduka, urwo agukunda ntiruhinduka n’ibihe, ntirucuya. Nyamara twe ugasanga n’iyo twamuhemukiye cyangwa tukarenga ku masezerano twamugiriye, aho guca bugufi ngo tumwitwareho, ugasanga ari we tugize kabitera na nyirabayazana, kandi tuzi ko nta ruhare na rukeya afite mu makosa tuba twamukoreye.

Bavandimwe twihatire kujya dufata umwanya, dusome kandi tuzirikane Ijambo rye, dufate umwanya tumusenge, tumusingize tumushengerera, ariko ibyo byuzurizwe mu kurangwa n’ineza, ubuntu n’ubumuntu muri bagenzi bacu, tubabanire nk’uko twifuza ko batubanira. Nitugenza gutyo Yezu azaturuhura ibiturushya n’ibitugora kandi aduhe imbaraga zo gukora ugushaka kwe, bituronkere amahoro y’umutima isi idashobora kutunyaga. Amina

Padiri Anselimi MUSAFIRI