Catégories
Inyigisho

Tujye n’ahandi mpamamaze Inkuru Nziza, kuko ari cyo cyanzanye

Inyigisho yo ku wa gatatu w’icyumweru cya 1 gisanzwe, A, 2014

Ku ya 15 Mutarama 2014 – Mwayiteguriwe na Padiri Charles HAKORIMANA

1 Sam 3,1-10.19-20; Zaburi 39,2-10; Mk 1,29-39

Nyuma y’iminsi mikuru ya Noheli idusaba byinshi ku buryo bunyuranye , twinjiye mu gihe gisanzwe cy’umwaka wa Liturujiya. Bitavuze ko tugiye mu bisanzwe kuko na Nyagasani Yezu Kristu arabiduhamo urugero. Mu ivanjili ya Mariko y’uyu munsi arakora ubutaruhuka ngo yuzuze ibyamuzanye, ngo yuzuze inshingano ze.

Inshingano zacu

Igice kibanziriza icyo twumvise biraboneka ko Yezu n’abigishwa be bakoraga umwanya munini.

Abo Yezu yakoreraga ibitangaza bumvaga bamugumana. Nibyo kuko ugize amahirwe yo kubona ububasha bw’Imana yumva yabugumamo.

Yezu ati “ Nimucyo tujye ahandi, mu nsisiro za hafi, na ho mpamamaze Inkuru Nziza, kuko ari cyo cyanzanye”.

Igihe Yezu yari ku isi ntiyahamye ahantu hamwe. Ntabwo yagize ibiro ngo ajye yakira ibibazo ku munsi runaka cyangwa ngo n’abarwayi bajye bahamusanga abakize. Ntitwihende ku gihe cye ibiro byabagaho nk’uko tubibona henshi mu BYanditswe Bitagatifu.

“Kugenda, kujyana” biri muri kamere y’Inkuru Nziza. Inkuru Nziza barayijyana, bakayishyira abandi bakayigeza ku bandi. Iyo icyo cyo guhaguruka tukagenda tugasanga abakeneye Inkuru Nziza kibuze, haba habuze icy’ingenzi mu iyogezabutumwa.

Kwamamaza Inkuru Nziza ni inshingano zacu nk’abakristu. Bimwe mu byatubera ikimenyetso ko twamenye iyo Nkuru Nziza, ko twamenye Yezu Kristu ni ukujya kumubwira abandi. Niba ibyo twashyikirijwe tubigumanye hari ikibura.

Ntaho Ivanjili itubwira ko muri uko kuzenguruka kwe, Yezu hari ubundi buryo bworoshya urugendo yakoreshaga. Ntitwibwireko butariho bwari buhari: amafarasi, indogobe n’amagare. Mu ivanjili y’ uyu munsi baratubwira ko yazengurutse Galileya yose. Ku gihe cyacu nibwo dufite uburyo bwo kugera henshi nakure. Ariko se bidufasha kwamamaza Inkuru Nziza ?

Nimujyane amahoro ya Kristu”

Bakristu bavandimwe, hari igihe twakwibwira ko ku gihe cya Yezu aribwo hari benshi bakeneye kumenya Inkuru Nziza. Nyamara urebye abatuye isi, abatuye igihugu cyacu cyangwa abatuye paruwasi yacu usanga hari benshi bakeneye kumenya Inkuru Nziza. Ntibikabe ko tujya mu kiliziya ngo twikingirane “tugumane Kristu”, dusoke tumushyire abandi. Umuherezabitambo aratwohereza mu gusoza Misa atubwira ati “ Nimujyane amahoro ya Kristu”. Kuko gihe tuba twamaze turi kumwe na Kristu aba yaduhaye amahoro ye. Kuba hamwe na we bitanga amahoro. Ariko ayo mahoro ntitugomba kuyagumana tuyashyira abandi. Burya ijambo “Misa”, rifitanye isano n’ubutumwa (mission). Nyuma yo gushyikirana n’Imana mu Ijambo ryayo no guhabwa Yezu Kristu mu Ukaristiya nk’abavandimwe, tugomba kujya kuvuga ibyo bitangaza tuba twakorewe. Burya buri cyumweru umuherezabitambo atwohereza mu butumwa “ Nimujyane amahoro ya Kristu”, kandi turabyemera. Gusa sinzi niba ku cyumweru gikurikiyeho tuba twibuka ubutumwa twahawe ku cyumweru kibanza, ngo tubukorere isuzuma mikorere.

None se niba dukomeza kwakira ubutmwa ntitubusoze ni bite? Buri cyumweru duhabwa ubutumwa, tububika cyangwa tubusiga aho twicaye mu kiliziya! Cyaba ari ikibazo.

Yezu iyo agira ati “ nicyo cyanzanye” ni ukuvuga ngo azi inshingano ze. Kenshi ikitugora ni ukutamenya inshingano zacu. Turi intumwa tugomba kumenya abakeneye Inkuru Nziza aho baherereye. Ni mu gihe abari bamukeneye bari benshi. Nta kindi cyadushoboza ubutumwa bwacu uretse isengesho ritaretsa. Muri iyo mirimo myinshi Yezu yahoraga asenga: “ abyuka ku rukerera, arasoka, ajya ahantu hiherereye nuko arasenga”. Ni kenshi umunaniro uturutse ku mihihibikano yo muri iyi si utubuza gusenga. Tukumva twakwiryamira tukaruhuka byimazeyo. Zinduka, kanguka tsinda ubunebwe ujya gusenga.

Padiri Charles HAKORIMANA