Catégories
Inyigisho

Twasanga nde wundi ? (Yh6,68)

Inyigisho yo kuwa gatandatu w’icyumweru cya 3 cya Pasika, C, ku wa 16 Mata 2016

Amasomo: Intu 9,31-42; Zab116; Yh6,60-69

Bavandimwe, mukuzirikana ku masomo matagatifu Kiliziya umubyeyi wacu yaduteguriye uyu munsi, ibyo twumvise mu gitabo cy’ibyakozwe n’intumwa bidufashe kwibanda kuri izi ngingo ebyiri, bitabujije ko harimo n’izindi nyinshi zimurikira imibereho yacu hano ku isi:

Iya mbere, ni uko Yezu wazutse akomeza gukora ibitangaza abinyujije mu bagaragu be! Petero intumwa mu izina rya Yezu arakiza ubumuga bwa Eneya, ndetse arazura umwigishwakazi witwa Tabita.

Hari uwigishaga kuri Pasika, nuko abaza abakristu ati: “Ese muri mwe, ntawe urazura umuntu”? Ariko bo bati: “rwose habe n’inkoko, none ngo umuntu” ! Ariko yahise aboneraho icyo yashaka kubasobanurira, ati “urupfu si urw’ikirago gusa cyangwa impanuka. Yungamo ati “burya hari abapfa bahagaze” kandi abo natwe dushobora kubazura. Abemera imbaraga duterwa n’ izuka rya Yezu, bashobora gukora ibitangaza mu bantu. Iyo bageze imbere y’ikibi kirahunga.

Wenda twe nta gitangaza cyo kuzura uwashizemo umwuka nk’uko Petero yabihawe kugira ngo Yezu amenyekane hose; ariko hari icyo twakora tubikesha ukwemera kwacu: nakwerekana imbaraga natewe n’izuka nkacika ku kibi nimitse, naharanira kurwanya akarengane, nareka kwikunda bikabije, nayobora abandi kuri Yezu,naba umunyampuhwe, …

Ingingo ya kabiri, ni hariya abandi bigishwa bereka Petero ibyiza Tabita yakoraga kugira ngo amuzure. ‘abapfakazi bose bari bamukikije barira, bereka Petero amakanzu n’ibishura Tabita yadodaga akiri kumwe na bo‘ (Intu 9,39). Ese twebwe bavandimwe, ni iki dukora mu bandi ku buryo bajya bahora bifuza kubana natwe? Buri wese yisuzume! Niba nta cyiza wibonamo, tangira ugishake nonaha!

Udukorwa duto dukorana urukundo, Imana ituduhera ingororano kuko Yo, ibireba yitonze kandi ikabiha agaciro.

Ibitangaza Yezu adukorera mu kutwiha, umubiri n’amaraso bye nibitume ukwemera kwacu kwiyongera, tugire imbaraga zo gukora ibyiza kandi duhorane inyota yo kwibanira na we, aduhe ku butungane bwe.

Nyagasani Yezu abane namwe!

Padiri Jean Marie Vianney NTACOGORA