Catégories
Inyigisho

Iruhande rw’umusaraba wa Yezu hari hahagaze Nyina

Ku ya 15 Nzeri 2012: Ububabare bwa Bikira Mariya

AMASOMO: Hebureyi 5, 7-9; Zaburi 31(30), 2-3a, 3bc-4, 5-6,15-16, 20;

Yohani 19, 25-27 cyangwa Lc 2,33-35. 

Inyigisho yateguwe na Padiri Jérémie Habyarimana

Iruhande rw’umusaraba wa Yezu hari hahagaze Nyina

Uyu munsi muri Kiliziya turahimbaza iyobera ry’ububabare bwa Bikira Mariya Nyina wa Yezu. Koko rero nk’uko yari yabitegujwe abihanurirwa na Simewoni, Bikira Mariya yarababaye. Nitwibuke uburyo bagiye gutura Umwana Yezu mu Ngoro, Yozefu na Mariya bahahuriye n’ibyishimo byo kumva ibyiza byinshi byavugwaga kuri uwo Mwana. Kandi bivugwa n’abantu bazwiho ubushishozi. Ariko kandi baranaburirwa maze Bikira Mariya Nyina wa Yezu we amenyeshwa ingorane azahura na zo. Roho Mutagatifu akoresheje Simewoni yamubwiye yeruya ati ‹‹nawe kandi inkota izakwahuranya umutima. Bityo ibitekerezo biri mu mitima ya benshi bigaragare. ››(Lk 2,35).

Mu by’ukuri Bikira Mariya ahanurirwa iby’ububabare bwe, yari yaranabutangiye mbere yaho. Kuko urubwa yatewe atwite kugeza aho Yozefu ubwe ashaka kumusenda ntabwo byari ibintu byoroshye. Uwo musaraba rero yahanuriwe warakomeje maze isonga ryawo riba Karuvariyo. Koko rero tuzi uburyo Yezu yahizwe akivuka. Nuko we agashobora gucika ku icumu rya Herodi. Ariko abana b’ikigero cye n’abamuri hafi mu myaka bakicwa. Ibyo byashavuje bikomeye umutima wa Bikira Mariya. Kuko tubishyize mu mitekerereze yacu twakwibaza abo babyeyi bose biciwe abana, iyo bamenya koko ko ari Yezu bazize uko ababyeyi babo bari kugenza Yezu n’ababyeyi be. Nta gushidikanya ko yari gushinjwa ko ari nk’aho ari we ubishe.

Bikira Mariya yagize ububabare bukomeye mu Misiri. Urugendo rujyayo n’uruvayo ubwabyo ntibyabaye ibintu byoroshye. Aho Bibiliya itubwira ko byasabye imyaka mirongo ine ngo abasekuruza be bambukiranye ubutayu, ese bo urugendo ruhanyura wagirango rwaraboroheye? Imibereho yabo se mu Misiri? Nubwo batabigenje nka Aburahamu ( Intg 12, 10-20). Ariko sinshidikanya ko ingorane Sara na Aburahamu bahagiriye zitabuze kugwa kuri Yozefu na Mariya. Maze bagatsindira mu Kuri bari bahetse no mu Busugi n’Ubutasamanywicyaha Mariya yari yisesuyeho.

Icyo tutashidikanyaho gusa ni uko Mariya na Yozefu batabuze kwitwa abanyamahanga ngo batotezwe nk’abandi bose batari mu gihugu cyabo. Dore ko Nyagasani yaturemye ngo twuzure isi. Naho twe tukayicamo uduhugu n’uduhugu. Ngo tubone uko duhuguza abihitira. Kuvuga ni ugutaruka, ariko imipaka y’ibihugu nayo ni kimwe mu bimenyetso bya gipagani twese twakiriye nk’aho ari ikintu kizima. Ubonye ngo inyoni zo mu kirere ziturushe ubwisanzure? Ibyo na Bikira Mariya rero yahuye na byo kandi biramubabaza. Ni yo mpamvu kuri uyu munsi w’ububabare bwe aha imigisha ye myinshi abantu bose bafashwe nabi, batazira ibibi bakoze. Ahubwo bazira gusa ko batari mu gihugu cyabo. Kandi abo bantu bari mu bihugu byose byo ku isi. Kuko hano munsi y’iri zuba nta hantu na hamwe umunyamahanga afite uburenganzira nk’ubw’abiyita abanegihugu. Ako karengane k’abarenze iyo mipaka, Bikira Mariya yarakababaye biratinda. Inzozi za Yozefu zibasaba gutaha, bazakiriye nk’inkuru nziza ikomeye. N’ubwo urugendo cyari ikindi kibazo.

Yarababaye rwose Bikira Mariya mu butumwa bwose Yezu yakoze ku isi, abwira abatamwumva. Abwira abamwumvira ubusa. Abwira abaje kumuneka ngo baneshe Ingoma ye y’Ukuri yari ibangamiye ikinyoma cyabo. Nuko bigeze aho rukomeye na ba bandi bitwaga ngo baramwumvise bahunga ubutarora inyuma. Bamwe bata n’imyenda bari bambaye ngo bakize amagara. Uwa mugambaniye kandi yabaye umwe muri abo. N’ugize ngo arihagararaho amwihakanira imbere y’umuja. Mbega agahinda k’Umubyeyi Bikira Mariya wanyuze muri ibyo byose! Byageze ku musaraba byo biba ibindi. Ububabare bwa Yezu yabwumviraga koko mu mutima we. Tekereza nk’umubyeyi , bafashe umwana we w’ikinege w’umusore, bakamwambura ubusa. Bakamuteramo imisumari bakamumanika ku giti ngo apfire mu cyeregati. Ari Ijuru ari n’isi ntaho afite umwumva?

Koko rero, Ububabare bwa Bikira Mariya muri icyo gihe tuzabusobanukirwa nyabyo igihe tuzaba tuganira na we imbonankubone mu ikuzo ry’Ijuru niba twemeye kubamba umubiri wacu n’ingeso mbi n’irari ku Musaraba. Kugira ngo natwe hamwe na Bikira Mariya duhagarare twemye iruhande rw’Umusaraba. Nta kubebera dutinya kubabazwa. Nta guhungira ububabare mu bihambiro by’ibyaha. Ububabare rero bwa Bikira Mariya bwakomeje no mu ntangiro za Kiliziya, igihe yabonaga uburyo Kiliziya itotezwa. Twibuke ko Kiliziya ari umubiri wa Kristu Muzima. Buri Mukristu ni urugingo ruzima rw’uwo mubiri. Ni yo mpamvu Pawulo, Yezu yamubajije icyo yamutoterezaga (Intu 26,14). Kuko mu gutoteza abakristu, ni Yezu Kristu ubwe yagiriraga nabi. Na n’ubu rero aho Bikira Mariya ari mu ikuzo, akomeza kunga ubumwe n’iyo Kiliziya ya Kristu mu bihe binyuranye igenda inyuramo. Aracyababara igihe cyose duhemukira Yezu Kristu wapfuye akazuka maze tukimika Sekibi.

Kuri uyu munsi rero amasengesho y’Umubyeyi Bikira Mariya, Umubyeyi wababaye naduhe rwose kuzinukwa ibidutera gushavuza Kristu byose. Kandi ibitubabaza byose mu buzima bwacu bwose tujye tubyakirana ubwiyumanganye twunze ubumwe n’Umusaraba wa Kristu. Kuko nta handi hari umukiro usibye mu Musaraba wa Kristu. Kandi uwo Musaraba Bikira Mariya awuhagaze iruhande. Abamamaza Yezu Kristu wapfuye akazuka rero bose, bamenye ko batazigera babikora uko bikwiye Bikira Mariya atabigizemo uruhare. Uwo Mubyeyi wababaye nadufashe duhanike amajwi dusingiza Yezu Kristu wadupfiriye akazukira kudukiza icyaha n’urupfu.

Singizwa Yezu Kristu wapfuye ukazuka.