Ububabare bwanyu bugenewe kubagorora

Inyigisho yo ku wa gatatu w’icyumweru cya 4 gisanzwe, B

Ku wa 04 Gashyantare 2015

AMASOMO: 1º. Heb 12, 4-7.11-15; 2º. Mk 6,1-6

Inyigisho y’ejo yadushishikarije gusaba ingabire yo kwiyumanganya mu bitubabaza. Twanabwirijwe ko uko kwiyumanganya atari ibyo umuntu yihangishaho; kwiyumanganya si n’ibintu bya mbuzukongira; ukwiyumanganya no kwihangana mu bubabare bivomwa mu buzima bwa YEZU KRISTU. Abamwemera bashobora kwihangana bagakomeza urugendo kabone n’aho baba barakomeretse; bagenda bazi ko ubomora bari kumwe kandi abakunda na bo bakiyemeza kumukunda kuruta byose. Iyo YEZU yitegereza abantu bagaragurika bonyine muri iyi si, atangazwa no kutemera kwabo (Mk 6,6). Uko kutemera YEZU, ni na ko gutuma ububabare butugeza kure kuko ubundi iyo tumwemereye akatuzamo, ibitangaza bye birigaragaza, ni ukuvuga ko ibimenyetso by’uko adukiza bidashidikanywaho.

Mbere yo gukomeza tuzirikana iyo ngingo y’ukuntu ububabare bugenewe kutugorora, reka tubanze twiyumvishe ibyo twasomye mu Ivanjili: YEZU yaziye gukiza abantu bose ahereye ku bo yavukiyemo ku murenge we no mu gihugu cye. Ariko uko byagendekeye abantu b’i Nazareti aho yarerewe twabyumvise: baramuhakanye bamukwena bannyega rwose Ijambo rye bamupinga bavuga ngo: “Uriya si wa mubaji tuzi…”. Iyo ni nyirandakuzi ikomeza gupfukirana umukiro abavandimwe bacu bakiriye muri YEZU bagombaga kudushyikiriza. YEZU ashimangira iyo nyirandakuzi avuga ko nta handi umuhanuzi asuzugurwa, uretse mu gihugu cye, muri bene wabo, no mu rugo iwabo. Ikibabaje ni uko iyi nyirandakuzi ivutsa abayitabira byinshi byiza: Aho i Nazareti YEZU ntiyahakoreye igitangaza na kimwe uretse gukiza abarwayi bakeya abaramburiraho ibiganza.

Abantu bose bahakana ibya YEZU baba ab’iwabo baba n’aba kure, bose barihemukira kuko ibyiza yatuzaniye bibanyura mu myanya y’intoki. Iyo mu rugo runaka habuze abayobora abandi mu kuri, iyo ababyeyi bananiye kuyobora abana babo mu kuri, ugasanga bamwe bannyegana, nta cyo bashobora kugeraho. Iyo mufite inshuti ishobora kubagira inama, akenshi ntimuyumva kubera innyega rituruka kuri ya nyirandakuzi. Tuvuge iki ku bihugu byorama cyangwa bikitegurira ukuzimu kuko byanze kumvira ababihanurira cyangwa habuze n’umwe utsinda ubwoba ngo atere ijwi hejuru agamije gukosora ibigoramye? Ngo umuhanuzi asuzugurwa mu gihugu cye! Ni akumiro.

Ingaruka zo kutumvira ubuhanuzi buturutse ku Mwana w’Imana, ni nyinshi cyane. Kutumvira Imana bitera kumvira ijeri. Ingaruka ziterwa n’ugutana zikaba ububabare bw’amoko yose bamwe bemeza ko ari ibimenyetso by’ibihano Nyagasani atanga! Ni uburyo bwo kuvuga dusanga akenshi mu Isezerano rya Kera. Tumenye ko Imana idahana ahubwo na yo ibabazwa n’amakuba abana bayo bikururira mu kunangira umutima no gutanagira. Imana ubwayo ibabazwa (nta kundi twabivuga) n’ibihano abana bayo bikururira kuko ikibi cyose, icyaha cyose cyifitemo imbuto mbi isenya nyiracyo. Cyakora imibabaro yo mu isi yose ituruka ku ngaruka z’icyaha, iha muntu guca akenge akagaruka mu nzira Imana yamushyizemo akabona kugira amahoro. Gutekereza ko isi yatannye, ko twitandukanyije n’Imana ariko tukemera kuyigarukira, iyo ni inzira yo kuzahuka no gukira rwose. Hari abantu batari bake bagiye bumvira ukuri kw’Imana no myotsi nk’iyo baririragamo! Ngaho rero, ntitukinubire ububabare duhura na bwo, ahubwo tujye tubuhagarara hagati turangamire uwo twaremewe kubera indahemuka.

YEZU KRISTU asingizwe. Bikira Mariya atube hafi maze abatagatifu duhimbaza none, Andereya Korsini, Jiliberiti,,Veronika, Yohana wa Valuwa,Katalina wa Rici, Yohani wa Brito na Rabano Mawuro duhimbaza none badusabire.

Padiri Cyprien BIZIMANA

Publié le
Catégorisé comme Inyigisho