Catégories
Inyigisho

Ubukristu bwacu ntibuhere mu magambo meza gusa

Inyigisho yo ku wa kabiri w’icyumweru cya gatatu cya Adventi, ku wa 13 Ukuboza 2016
Amasomo:
– Sof 3,1-2.9-13; – Zab 33,2-3.6-7.17-18.19.23; – Mt 21,28-32

Kwitiranya iby’ingoma y’Imana n’imyanya n’ibyubahiro byo muri iyi si ni igishuko cy’ibihe byose. Nk’abantu dukeneye kugira inzego zidufasha gusoza ubutumwa. Aho abantu bateranaiye bakagabana ubutumwa kugira ngo umuryango w’Imana utunganirwe kanda uyirangamira.

Hari ubwo rero ubutumwa bunyuranye muri Kiliziya bwaba umwanya wo kwihereza no guherezwa. Ibyari gufasha gushaka Imana no kuyereka abandi bikaba impamvu yo kuarangara no guhugira muri byinshi.

Ibyo Yezu abwira abatware b’abaherezabitambo n’abakuru b’umuryango mu ivanjili ya none ni iby’igihe cyose. Ubutumwa bari bafite bwababereye umwanya wo kurangara ntibumva abahanuzi Imana ibatumaho. Aho guharanira icyafasha umuryango w’Imana baraharanira inyungu zabo. Twibuke ko Yezu ababwiye biriya nyuma y’uko bamubajije impamvu yirukana ubucuruzi bwabo bakoreraga mu Ngoro. Kuko bibwiraga ko imyanya bafite ibaha gukora ibyo bashatse. Bityo bakititiranya iby’ingoma y’Imana n’ibya hano.

Kuba bari bafite imyanya ikomeye mu muryango w’Imana n’uko bari bariyemeje kuyikorera na rubanda bose babibona batyo. Twibuke ko abaherezabitambo babaga hafi y’ingoro kugira ngo bature ibitambo. Nta wundi murimo bakoraga. Ubuzima bwabo babaga barabweguriye gutura ibitambo kandi bagatungwa n’amaturo (Lv 7,8-10.32-36). Bari bashinzwe kwita ku muzabibu wa Nyagasani. Nyamara byari kubigaragara gusa, mu kuri bashaka inyungu zabo mu bucuruzi bakoreraga mu ngoro. Ku buyo ikigereranyo Yezu abahaye cya bariya bahungu babiri bacyumva neza.
Ubukristu bwo kwerekana, abantu bakatubona bakadushima nyamara mu by’ukuri imibereho yacu ihishe ibindi bitajyanye na mba n’Inkuru Nziza ya Yezu Kristu buraducira urubanza. Kiliziya zacu zishobora kuzura benshi babatijwe, bafite amafishi ya batisimu, ariko atari abakristu. Hari uherutse kunsetsa ambwira ati burya abanyarwanda hafi ya bose bafite ifishi ya batisimu.

Amasakramentu duhabwa ashobora kuba imihango myiza ikozwe neza ariko arangirana no gushashagirana ntajyane n’imibereho yacu. Ntabwo ubukristu bwacu bwagombye kugarukira mu mihimbazo ikozwe neza gusa. Misa yagombye kuba guhimbaza ibyo tubamo, ubuzima bwacu bukaba gushyira mu bikorwa ibyo duhimbaza. Iyo ibyo duhimbaza bihabanye n’ibyo tubamo tuba tubeshya Imana.

Ubutumwa dukora mu muryango w’Imana bushobora kuba uburyo bwo kwihahira no kwishakira ubukire. Kiliziya tukayigira isoko, tukayitangamo amasoko, ibyakagombye kuba umuhamagaro wa buri wese bikaba amapiganwa, na yo ashobobora guherekezwa n’ubucabiranya. Tukagira ubutumwa bukomeye mu muryango w’Imana ariko ari uburyo bwo kwihereza no guhereza abacu. Nyamara umunyabyaha ruharwa wisubiyeho akaba aruta, umukristu bw’ifishi.

Twaracumuye, turi abanyabyaha. Iki gihe cya Adiventi kitubere umwanya wo kwisuzuma tutibeshyeye, tureke ibidatunganye bityo dukere kuzahimbaza ivuka rya Nyagasani tuberewe no kuba abe koko.

Padiri Karoli HAKORIMANA
Madrid/Espagne