Catégories
Inyigisho

Inyigisho: Ukora ibyo Data ashaka azinjira mu ngoma y’ijuru

Inyigisho yo ku wa kane w’icyumweru cya 12 gisanzwe, A

Ku ya 26 Kamena 2014

Amasomo: 2 Bami 24, 8-17 ; Z 78, 1, 2, 3, 4a.5, 8, 9acd; Mt 7, 21-29.

Ukora ibyo Data ashaka azinjira mu ngoma y’ijuru

Yezu ashoje inyigisho yatangiye ku musozi, iri kuva mu ivanjili ya Mt 5,1-2: kugera Mt 7, 28-29. Mu ntangiriro z’iyi nyigisho batubwira impamvu Yezu yayitangiye ku musozi: “Yezu abonye ikivunge cy’abantu aterera umusozi, aricara, abigishwa baramwegera. Nuko araterura arigisha…”. Ntabwo ari ibihutiyeho. Kubona imbaga byamweretseko igihe kigeze cyo gutangaza iby’ingoma y’Imana. Abikoze ku mugaragaro (officiellement). Atangaje umurongo ngenderwaho, w’iyo ngoma y’Imana. Iki gice kigize umutima w’Ivanjili yanditswe na Matayo. Ibindi bikurikiyeho ni ibifasha kurushaho kumva ibiri muri iyi nyigisho yatangiwe ku musozi. Ni ibitangaza binyuranye Yezu yakoze ngo arusheho guhumura rubanda, ahandi ni ibisubizo by’ibibazo bamubazaga cyangwa impaka ajya n’abashaka guhinyura inyigisho ye.

Igice gikurikiyeho tubona ko Yezu yagendaga mu nsinsiro no mu mijyi inyuranye. Mu gihe inyigisho yatangiye ku musozi yayitangiye hamwe yicaye.

  1. Umuntu wese wumva ayo magambo maze kuvuga”

Mugusoza iyi nyigisho yo ku musozi aho Yezu agira ati “ Umuntu wese wumva ayo magambo maze kuvuga …” ni ukuvuga ibikubiye byose mu nyigisho yatangiwe ku musozi (Mt 5,1-8,1). Uwabasha gukurikiza ibiri muri iyi nyigisho yaba yiteganyirije umwanya mu ngoma y’ijuru. None se tuzi ibyo Yezu yavuze muri iyo nyigisho? Nubwo yenda tutarikiwe gufata mu mutwe nka “Kasuku” ijambo ry’Imana ariko tugomba kurimenya.

Nigeze kuba nganira n’urubyiruko ntangazwa n’uko hari abanyemereye ko batarasoma Bibiliya. Ko icyo bazi ari gatigisimu gusa. Ayo magambo Yezu yatubwiye hari benshi batazi ayo ariyo. Niyo waba udakunda gusoma byibuze iyo mitwe itatu wakagombye kuba uyisoma buri mwaka. Ayo magambo ukayumva ku giti cyawe.

Amagambo arimo niyo agenga imigenzereze yacu nk’abakristu? Kuyumva no kuyakurikiza. Kuyakurikiza utayazi byaba ari igitangaza.

  1. Umbwira ngo Nyagasani Nyagasani siwe uzinjira mu ngoma y’ijuru”

Amagambo meza gusa ntabwo ahagije. Imana si nk’abantu. Hagati y’abantu haba uburyarya bwinshi. Uburyarya ni ukuvuga ibihabanye n’ibihari cyangwa ibyo uteganya gukora ugira ngo ushimishe cyangwa urangaze uwo ubibwira. Muri iyi si hari ubwo usanga abazi “kwatsa umuriro bajunditse amazi” abafite akarimi keza ariko gatandukanye n’ibikorwa aribo barebwa neza. Hari ubwo ubuzima bumera nk’ikinamico abakina neza bakaba aribo bahivana. Turagowe igihe twakwibwira ko amacenga n’amayeri dukoresha mu maso y’abantu tuzayakoresha n’imbere y’Imana.

Iyo mbonye inyigisho itubuza uburyarya nibuka buri gihe ubutumwa bw’umubyeyi Bikiramariya i Kibeho “ Mwisubireho, mwihane musenge nta buryarya”.

Iyo ntekereje Kibeho rero nibaza ikibazo na n’ubu ntarabonera igisubizo neza ababibasha bazamfasha gushaka:

Kuki Bikira Mariya ariya magambo yagombye kuyabwira abanyarwanda, urubyiruko, rwabaga ahantu basenga buri gihe”

N’ubwo ubutumwa Umubyeyi Bikira Mariya yatanze ikibeho bureba abantu bose hari impamvu yabunyujije ku banyarwanda mu Rwanda, mu gihe runaka i Kibeho n’aho ubwaho hafite amateka yihariye.

  1. Umutu w’umunyabwenge

Ntako bisa nko kuba umunyabwenge. Ureba kure uzi kwiteganyiriza kandi akarebera n’abandi nta buryarya. Kuba umunyabwenge mu yandi magambo ni ukubona ukuri ukagurikira ukagukurikiza ukarangwa n’ukuri. Ahatari ukuri nta bwenge bushobora kuhaba. Umwanzi wa mbere w’ubwenge n’ikinyoma n’uburyarya.

Yezu aratuburiye. Dushobora guhanura no kwigisha zigata inyana, dushobora no kwirukana roho mbi aho tunyuze zigatigisa abantu, dushobora no gukora ibitangaza abantu bagahurura

Ariko Yezu akazatubwira ati “sinigeze mbamenya” birya byose mwakoraga mwarishushanyaga. Gukora ibinyuranye n’ibyo Yezu yatubwiye ni ukuba inkozi z’ibibi.

Aya magambo ya Yezu yakanga benshi. Ni ukuvuga ngo kwigisha, kwirukana roho mbi gukora ibitangaza ntibihagije, ntibyifitemo ireme.

Imbere y’ingorane n’ibibazo duhura nabyo : imvura, imivu n’imiyaga; dukeneye aho twishingikiriza. Yezu atwibukije ko iyo mivu tuzahura nayo. Byaba abakristu buri wese ku giti cya byaba umuryango w’Imana wahuye kandi ukomeza guhura n’iyo mivu n’iyo miyaga. Ntahandi uzavana ikiramiro atari mu magambo ya Yezu. Ntabwo ari mu ngamba zubakiye ku migambi y’abantu.

Uretse rero ibidutegereje uwo munsi hari n’ibyo duhura nabyo.

Ububasha buri mu magambo ya Yezu butuvugurure twigiremo imigambi mishya izira uburyarya, n’akarimi keza mu by’Imana mu muryango w’Imana.

Padiri Charles HAKORIMANA