Catégories
Inyigisho

Inyigisho: Umugambi w’Imana wo gukiza abantu

Inyigisho yo ku wa mbere, Icyumweru cya 23 gisanzwe, C, 2013

Ku wa 09 Nzeri 2013

Mwayiteguriwe na Padiri Théoneste NZAYISENGA

AMASOMO: 1º. Kol 1,24-2,3; 2º. Lk 6,6-11

Kuri uyu wa mbere w’icyumweru cya 23 gisanzwe Yezu Kristu akomeje kuzuza umugambi w’Imana wo gukiza abantu.

  1. Ku wundi munsi w’Isabato Yezu yinjira mu isengero, arigisha:

Iyi mvugo y’umwanditsi w’Ivanjili itwereka akamenyero n’ubudahemuka bwa Yezu. Buri Sabato yajyaga mu ngoro, mu isengesho. Biratwibutsa natwe mbere na mbere ubudahemuka bwagombye kuturanga mu migambi yacu no mu masezerano twagiriye Imana.

  1. Ubwo hakaba umuntu ufite ikiganza cyumiranye.

Ubusanzwe ibiganza tubikoresha dushaka ikidutunga,twihereza cyangwa duhereza abandi, cyangwa se dutanga umugisha. Kumirana ikiganza ni ukutagira icyo wimarira cyangwa se wamarira abandi. Muri make ni ukubura uko wigira. Uwashyira mu nyurabwenge yakumva neza uburyo uyu muntu atari ababaye gusa ahubwo yari ababaje. Nyamara Abigishamategeko n’Abafarizayi ntacyo byari bibabwiye.

  1. Abigishamategeko n’Abafarizayi bakamugenzura ngo namukiza babone icyo bamurega.

Muri iki gihe usanga ibikorwa bibi binyuranye bivugwa hirya no hino ku maradiyo no ku mateleviziyo ndetse ugasa bamwe bishimye ngo havuzwe noneho amakuru ashyushye. Nyamara igikorwa cyiza cyakozwe ntawe ukitaho, ngo kivugwe cyangwa ngo gihabwe agaciro.

Uku kugenza no kugenzura Yezu by’Abafarizayi n’Abigishamategeko ntibyatewe n’urukundo bakunda Imana na mugenzi wabo, ahubwo byatewe no gukomeza kumvira muntu w’igisazira ubatuyemo. Koko rero, iyobokamana ridaha agaciro umuntu, ngo ryite ku bakene, abarwayi, imbabare n’indushyi ntacyo rimaze. Umuntu ntashobora gukunda Imana atabona, atabanje gukunda mugenzi we babana mu buzima bwa buri munsi.

  1. Abwira umuntu wari ufite ikiganza cyumiranye ati:” Haguruka uhagarare hano hagati!”

Ivanjili ntitubwira ko ari umurwayi wasabye Yezu kumukorera igitangaza. Ahubwo Yezu Kristu ubwe ni we wafashe iya mbere kubera ko umutima we uhorana inyota yo kwakira abababaye no kubahoza. Dukwiye rwose guhagurukira isengesho ngo dusabe inema yo gukunda no kwita ku mbabare n’indushyi. Ni na byo inama nkuru ya Vatikani ya II mu nyandiko yayo “Kiliziya muri ibi bihe turimo”, igika cyayo cya 1 igarukaho:”Ibyishimo n’amizero, ishavu n’agahinda by’abantu b’iki gihe cyane cyane abakene n’iby’abandi bose bababaye, ni na byo byishimo n’amizero, ishavu n’agahinda by’abigishwa ba Kristu”.

  1. Reka mbabaze: icyemewe ni ikihe? Ari ukugira neza cyangwa kugira nabi ? kwica umuntu cyangwa kumukiza?

Abafarizayi n’Abigishamategeko bibwiraga ko kutagira icyo bakora ku isabato n’iyo byaba ari ugukiza umuntu ko aribyo kubaha Imana by’ukuri. Byongeye ntabwo Yezu yigeze arwanya na rimwe icyubahiro abafarizayi bahaga Imana, ahubwo yifuza ko byose bigirirwa ikuzo ry’Imana n’umukiro w’abantu bose. Ni yo mpamvu Yezu atihambira kuri iyi migenzerere ya gifarizayi akabwira uwumiranye ikiganza ati:”Rambura ikiganza cyawe”.

  1. Ese turasabwa iki?

Bavandimwe hari benshi tubana bumiranye ibiganza cyangwa se natwe ibiganza byacu ugasanga byarumiranye. Kubera ko bidakora ngo bishake ikidutunga, bifashe abakene cyangwa ngo bitange umugisha ahubwo bigakora amahano. Pawulo Mutagatifu aratwibutsa ko kwitangira abandi ari ukuruhira Kristu maze ibyari bibuze mu mibabaro ye tukabyuzuriza mu mubiri wacu,tubigirira umubiri we ariwo Kiliziya.

Umubyeyi Bikira Mariya aduhakirwe, abatagatifu Petero Klaveri, Alani,Omeri na Gorgoni twizihiza none badusabire.

Padiri Théoneste NZAYISENGA