Catégories
Inyigisho

Umukoro muri iki Gisibo Gitagatifu: ubutungane mu rukundo

Inyigisho yo ku wa Gatatu w’ivu: Umwaka A

Amasomo: Yow 2,12-18; Z 51 (50); 2 Kor 5,20-21;6,1-2; Mt 6,1-6.16-18

Kuri uyu wa Gatatu w’Ivu, dutangiye Igisibo Gitagatifu, rwa rugendo rutuganisha kuri Pasika ya Nyagasani Yezu Kristu. Ivanjili Ntagatifu iduhaye umukoro tugomba kuzuza mu guhimbaza iki gihe gitagatifu, kandi uwujuje neza uwo mukoro aba aniteguriyemo kuzahimbaza mu ihirwe rihoraho Pasika ya Nyagasani.

Dore ibyo dusabwa muri uwo mukoro: Kwirinda kugira neza tugamije kwiyamamaza ahubwo tubigiriye ko turi abana b’Imana. Dusabwa kandi guharanira gukora igishimisha Imana. Umukristu nyawe yihatira kunogera Imana mu buzima bwe bwose maze abantu bakaboneraho. Kirazira gushimisha abantu ugamije ko Imana iraza kuboneraho, cyangwa gusagurirwa. Ibi ni ibyo bita kwiyamamaza, kwibonekeza kandi nta cyo uwibonekeza akwiye guhembesha ku Mana kuko ingororano ye aba yayibonye ku bantu. Twirinde gushakisha amashyi, amakuzo n’amashimwe tugamije kwemeza abantu abo turi bo cyangwa se icyo turi cyo. Icyiza cyose dukoze, tujye turangwa n’ubwiyoroshye, tuzirikane ko turi abagaragu b’imburamumaro.

Imana Data ni yo yonyine Nyirubutagatifu ikaba na Soko y’ubutungane: ku bw’iyo mpamvu, sinkwiriye kwishongora no kwirata kubera agakorwa keza nakorera undi, cyangwa impano naba nifitemo. Nta cyiza na kimwe ntunze ntahawe! Byose mbikesha Imana yo Soko y’ineza, ikaba Rukundo: ubwenge se? amashuri se? umutungo se? akazi se? ubuzima se?…byose ni Yo biturukaho, ikabiduha kugira ngo bitugirire akamaro kandi binakagirire umuryango wayo mutagatifu. Ibi byagombye kutwereka ko nta we ukwiriye kwiyima Imana cyangwa se kuyima igihe idusaba kuberaho abandi tubigiranye ukwemera, ukwizera n’urukundo nyarwo.

Undi mukoro dusabwa ku buryo bwihariye ni isengesho: gusenga ni ukuganira n’Imana Data ku bwa Yezu Kristu muri Roho Mutagatifu nka kumwe umwana mwiza aganira n’umubyeyi we. Mu isengesho twumva Imana, na Yo ikatwumva.  Isengesho kandi rigomba kuba rihuza mu busabane bukomeye imitima yombi: umutima w’Imana n’uw’usenga. Yezu atubwiye mu Ivanjili ko indyarya zo ziganira zijijisha zidahuje imitima; ziganira ibi by’inyuma, bidafashije. Usenga we yinjira mu mutima w’Imana kandi akareka na Yo ikinjira mu we.

Usenga neza kandi yigomwa bimwe mu byiza yizirikagaho kugira ngo yegukire Imana. Hari igihe twitiranya umukoro wo kwigomwa no kureka icyaha. Kureka icyaha ni ukwihana cyangwa kwisubiraho, ukareka ikibi wakoraga. Naho kwigomwa bijyana n’ikintu cyiza; ni ukwizitura ku kintu cyiza cyagutwaraga umwanya n’igice cyawe maze ukimika Imana kugira ngo abe ari yo yonyine iha icyerekezo ubuzima bwawe. Ikindi kandi kwigomwa bijyana no kwibabaza, kwizirika umukanda kugira ngo witsindemo ingeso runaka kandi ugoboke ababayeho nabi.

Muri iki Gisibo twihatire gukuza no kongera ubusabaniramana, dufashe abatishoboye mu rukundo no mu bwubahane. Igisumba byose twihatire gukundisha abandi Yezu Kristu, maze abatubona tumuhamya mu mvugo n’ingiro, bakurizeho kumwemera, kumukurikiza no kumwamamaza. Ineza ya Yezu Kristu iduhoreho  natwe dushingire kuri We amizero yacu.

Padiri Théophile NIYONSENGA/Espagne