YEZU AKUZWE

Inyigisho

Umwami w’amahoro

KIRISITU UMWAMI, Ku Cyumweru, 24 Ugushyingo 2019:

AMASOMO: 1º.2 Sam 5, 1-3;Zab 122 (121), 1-6a.7a . Kol 1, 12-20; 3º. Lk 23, 35-43.

Umwami w’amahoro

1.Nyagasani Yezu Kirisitu Umwami w’abami

Dusoza umwaka wa liturujiya twizihiza Umunsi Mukuru wa Nyagasani Yezu Kirisitu, Umwami w’ibiremwa byose. Muri we, isi yabonye umukiro. Muri we umuntu wese abaho yizeye kuzishima iteka mu ijuru. Kiliziya Umuryango we yashinze, ifite ubutumwa bwo kwamamaza Inkuru Nziza ye no gukora ubutumwa bubwiriza abantu bose ko batumiwe mu ihirwe ry’ijuru. Ariko se kuki na n’ubu benshi bataramumenya?

2.Umuvumo wadutse mu isi

Mu isi hadutse umuvumo kuva igihe Adamu na Eva bigira ibyigenge. Umurage w’umuvumo wakurikiranye mwene muntu kuva umunsi Gahini ahorahoje mwene se. Umurage w’amaraso wakurikiranye abantu, amahirwe y’amahoro akendera mu bisekuru byose. Kuva ku cyaha cya Gahini, tuzi uko amateka y’abantu yagenze. Muri kamere yacu hajemo umwuka wo kwishyira hejuru no gutegeka dupyinagaza abandi. Amahanga menshi yayobowe n’abami. Ndetse na Isiraheli umuryango w’Imana yaharaniye kugira ubutegetsi bwa cyami nk’ayandi mahanga yose. Ibyo byabaye igihe cy’Abacamanza kirimo kirangira. Igihe Samweli Umucamanza yari ageze mu zabukuru, abahungu be ntibabashije gukomeza umuco mwiza wo guca iminza za rubanda mu mucyo no mu butabera. Ni bwo rubanda isakabatse ibwira Samweli iti: “Twimikire umwami ajye atuyobora” (1 Sam 8, 6). Samweli yagononwaga ku matwara ya cyami azirikanye uko abami bari bifashe muri ibyo bihe. Samweli yegereye Uhoraho amusiganuza uko ibintu byari bikwiye kugenda. Uhoraho yabaye nk’aho aca intege abayisiraheli kugira ngo batekereze neza mbere yo kwikururira abitwa abami: “Dore uko umwami musaba azabategeka: azafata abahungu banyu, abagire abanyamagare ye n’abanyamafarasi ye, maze bazajye birukanka imbere y’igare rye…Azafata umugabane wa cumi w’amatungo yanyu, namwe ubwanyu muzahinduke abacakara be. Nuko uwo munsi muzacure imiborogo mutewe n’uwo mwami mwihitiyemo, nyamara uwo munsi Uhoraho ntazabasubiza” (1 Sam 8, 11-18). Ayo matwara yose Uhoraho yagaragarije Abayisiraheli agira ngo abakebure abarinde ibihe bibi, ntacyo yamariye rubanda. Bashatse kwigana andi mahanga yose uko yari ayobowe. Ni uko rero igihe cy’abami cyakunze kuba igihe cy’amage. Hariho abami babaye beza muri Isiraheli ariko abenshi babaye abagome. Ni uko umuryango wa Isiraheli wakomeje kujujubywa kenshi bitewe n’amatwara mabi y’abami. Abayoboraga Isiraheli binyuranije n’Amategeko y’Imana, abo bakururiraga ibyago rubanda.

3.Amaraso menshi y’inzirakarengane

Umurage wa cyami wakwiriye ku isi yose. Umwami yakunze kuba umuntu utavugirwamo wihaye uburenganzira ku biriho byose mu gihugu. Umwami yari afite ubushobozi bwo gutanga umuntu ngo yicwe. Igihe abami bategekaga aho babarizwaga mu mahanga ayo ari yo yose, hamenetse amaraso menshi y’inzirakarengane. Uwo si umuvumo basigiye isi? Amaraso abami bamennye muri Afurika, nta wabura kuvuga ko yakururiye rubanda umuvumo uzamara ibisekuru byinshi.

4.Umwami w’amahoro yaraje

Yezu we yaje ari umwami w’amahoro. Yemeye gupfira ku musaraba avugurura imitekerereze y’abantu. Mu Ivanjili, twumvise uko abamubambye bamukwenaga bamunnyega. Twumvise na wa mugizi wa nabi wokomeje umutima mubi na we atuka Yezu. Yezu ibyo byose yarabyemeye agaragaza ineza n’amahoro kugera ku ndunduro. Kumwemera, kumwakira mu mutima, ni ko kwakira amahoro mu buzima bwacu. Ni ko kwakira ibyishimo bifite ishingiro. Umwe mu bari babambanwe na Yezu, we yaratekereje neza maze yisabira Yezu kuzamwibuka mu ijuru. Yahise akizwa rwose Yezu amubwira ko nta gushidikanya bahurira mu ihirwe ridashira.

5.Umwami w’amahoro natahe imitima yacu

Kuri uyu munsi dusabe Umwami w’Amahoro atahe imitima y’abayoboke bose, avugurure abaguye mu byaha bahindanye, arembuze abagiye kuzarimbuka bisame batarasandara. Yezu ni we Mwami w’amahoro. Abami b’amahanga ku isi nibamumenya bazareka ubugome bwose bagirira abatishoboye. Ingabire ye niganze muri Afurika maze amaraso abami bameneye kuri uyu mugabane areke kuwukurikirana na wo utere imbere mu majyambere ya roho n’ay’umubiri.

Umubyeyi Bikira Maraiya Umwamikazi w’Amahoro, nakomeze adutakambire kuri Yezu Umwana we. Abatagatifu bose na bo, badusabire kuri Data Ushoborabyose.

Padiri Cyprien Bizimana            

Back to top id ut dolor ut mi, quis porta.