Catégories
Inyigisho

“Utarya umubiri wanjye, ntabwo ambamo”

Inyigisho yo ku wa gatanu w’icyumweru cya 3 cya Pasika, Ku wa 24 Mata 2015

AMASOMO: 1º. Intu 9, 1-20; 2º. Yh 6, 52-59

1. Iby’Imana birenze imyumvire yacu

Uburyo Imana Data Ushoborabyose yakoresheje kugira ngo adukize burenze kure imyumvire yacu. Imana ni Imana ntiyakwigira umuntu ngo byumvikane mu bwenge bwa muntu; Yezu Kirisitu Umwana w’Imana na we ntiyakwigira umuntu mu gisa n’umugati ngo byumvikane neza mu bwenge bw’abantu. Yabwiye abayahudi ko bagomba kurya umubiri we maze byo bituma bamwe batangira gukuramo akabo karenge! Turi hasi cyane ugereranyije n’Umuremyi wacu ku buryo imikorere ye tutayumva neza. Impamvu abenshi bahakanye kuva mu ikubitiro byatewe n’ubwenge bwa muntu bwatokojwe n’icyaha cy’inkomoko. Nyamara ariko abemera YEZU KIRISITU, batungwa n’amayobera ye matagatifu bagataguza buri munsi gahoro gahoro baagana ijuru.

Biradutangaza cyane kubona ibitangaza byose yakoze n’ineza yagaragaje ntacyo byamariye bamwe bamwishe. Ariko na none biteye akantu kubona n’aho azukiye mu bapfuye abantu barakomeje kurwanya ibye kugeza aho banangira bagahiga bukware abigisha Ivanjili y’uko YEZU yapfuye akazuka! Iryo na ryo ni iyobera ry’ubunangizi bwa muntu. Ntitwabyumva ijana ku ijana. N’abatoteza ukuri kwa YEZU KIRISITU Sekibi ibabeshya ko ari yo nzira nziza, bazabyumva umunsi amaso y’umubiri yarangije akayo, igihe amaso y’umutima azasobanukirwa n’uko ubuzima bwabo bwose bwabaye mu cyaha gikomeye cyo kumvira Adamu wa kera na wa Mushukanyi Sekibi washutse Eva akoreka inyoko ye yose mu mwijima. Byari kugenda bite iyo Nyagasani arekera iyo? Impuhwe ze zihoraho iteka ni zo zitubeshejeho.

2. Abatagira ikindi batekereza kitari ukwica!

Mu Bayahudi habaye abantu banangira bakabaho nta kindi batekereza usibye kujujubya no kwica abigishwa ba Nyagasani! N’uwitwa Sawuli ni icyo kiyira yari yibereyemo. Igitangaza Imana yamukoreye Uwazutse mu bapfuye akamubonekera, na cyo gisumbye kure ibyo twitekerereza! Ese kuki abandi benshi barwanya Imana batabonekerwa n’urwo Rumuri? Kuki ababisha bidoga hirya no hino mu bihugu batabundikirwa n’Urumuri ngo bumve ubabwira ati Murantotereza iki?”. Kuki batumva ko inabi yabo ibangamiye abana b’Imana bose? Ese YEZU KIRISITU ananiwe gukora ibyo bitangaza? Ese bazarinda bapfa bakiri muri urwo? Iryo ni ibanga ry’Imana, icyo tuzi cyo ni uko uguhinduka kwa Sawuli kwabaye intangiriro y’umukiro w’amahanga menshi. N’ubwo yatotezaga abakirisitu, ngo Nyagasani yari yaramuziganyije nk’igikoresho gityaye yari yaritoranyirije. Ni ubushake bwe kandi twakirijwemo.

Muri iki gihe, mu gihe hirya no hino hari abantu bahora batekereza gutoteza no kwica abakirisitu, twe nta kindi twakora kitari ugusenga kugira ngo babone urumuri rw’ukuri bakiriho ku isi kuko nibapfana ubwo bunangizi bazabona ukuri bapfuye bababazwe iteka n’uko imibereho yabo yo ku isi yabaye iyo kwibeshya, kuyoba no kuriganywa na Kareganyi ya kera na kare. Ikindi, ni ugusabira abakirisitu cyane cyane abatotezwa kugira ngo iyo nkongoro y’umusaraba bagire imbaraga zo kuyinywa mu gihe bategereje kwishimana iteka n’Uwabapfiriye.

3. Nta handi bazakirizwa

Nta handi bazakura imbaraga, nta ho natwe twazikura atari muri YEZU KIRISITU utwiha muri Ukarisitiya. N’ubwo ubwenge bwacu ari buke bituma tutumva neza uko turya umubiri wa YEZU duhawe Ukarisitiya, dukomeze gusonzera no guhabwa iryo funguro, kandi ntitwaryivutsa kuko twibonera buri munsi ko uko dushyikirana n’ab’ijuru mu gitambo cy’Ukarisitiya, uko duhabwa umubiri wa YEZU tubanje no kumwitwaraho twisukura ku mutima ari na ko ibyishimo n’ihirwe rye twumva biducengezamo ibyiza ururimi rwa muntu rutabasha gusobanura.

Dusabirane gukunda YEZU KIRISITU no kumumenyesha abandi. Twisunge Umubyeyi Bikira Mariya n’abatagatifu duhimbaza none ari bo Fideli, Bona, Honore, Gerigora wa Elivira na Ewufaraziya Pellletier.

SINGIZWA YEZU KIRISITU WAPFUYE UKAZUKA!

Padiri Cyprien BIZIMANA