Ni iki cyihariye wumva uzakora muri iyi minsi 40 y’igisibo?

Inyigisho yo kuwa gatatu w’Ivu. Umwaka B; tariki ya 18/03/2015

Amasomo: Yow 2, 12-18; Zab 50,3-4,5-6ab,12-13,14.17; 2Kor 5, 20- 6,2; Mt 6,1-6.16-18

Maze So umenya ibyihishe, azabikwiture.

Bavandimwe, Igisibo dutangiranye n’uyu wa gatatu w’ivu, dusanzwe tuzi uko tugomba kwitwara : dusabwa kwisubiraho twanga icyaha kandi turangwa n’ibikorwa byiza nko gutanga imfashanyo y’abakene, isengesho ndetse no kwigomwa bijyana no gusiba.

Ivanjili yatugiriye inama z’uko twabaho muri iki gihe, tukagira ibikorwa bifatika twiyemeza gukora mu bwiyoroshye maze Imana ibona ibyihishe akaba ariyo itwitura ku byiza tuba twakoze. Si ngombwa ko twiyerekana cyane mu byiza dukora kuko byatuviramo kwirata. Ivanjili yageze naho utubwira ko ikiganza cy’ibumoso kitakagombye kumenya igikozwe n’icy’iburyo!

Ariko se wowe muvandimwe, Ni iki cyihariye wumva uzakora muri iyi minsi 40 y’igisibo? Fata aka kanya ugire icyo uteganya kandi wiyemeze kuzagikora rwose; kuburyo utazasigarira aho, maze igisibo kikagusiga uko kigusanze!

Birakwiye ko mu isengesho ryacu: turi twenyine cyangwa mu ikoraniro, mu bikorwa byo gusiba, mu bikorwa by’urukundo; twabikora kubera Yezu. Ibikorwa byiza dukora dukwiye kubiterwa n’urukundo dufitiye Kristu, tudategereje gukomerwa amashyi ; ahubwo tukanezezwa no gushimwa n’Imana yonyine. N’ubwo kenshi bitagaragarira amaso y’abantu , gushimwa n’Imana nibyo by’ingenzi.

Akenshi dutwarwa no kugaragariza abandi ko turi indashyikirwa, dukora icyiza ngo dushimwe n’abantu! Ariko uyu munsi duhamagariwe gushaka uko ibyo bikorwa byaduhuza n’Imana; cyane cyane muri iki gisibo. Nyagasani arahari kandi abona ibyo tubamo n’ibyiza byose dukora, kandi ibyo nibyo by’igiciro gikomeye kurusha gusingizwa n’abantu.

Icyo Imana idutegerejeho muri iki gisibo ni uko “dutanga” kubyo dutunze tuzirikana bagenzi bacu bafite ibibazo, kandi barahari benshi; ni uko “dusenga” tukisabira kugumana nayo muri iki gihe kurusha uko byari bisanzwe; ni uko “ dusiba” tukagira ibyo twibuza mubyahoraga bitunezeza mu minsi isanzwe.

Mu gihe cy’igisibo, Imana yongera kuduha amahirwe yo kwicuza. Ni igihe Imana ishaka kutugaragariza impuhwe zayo zitagira urugero. Umuhanuzi Yoweli yatubwiye icyo Uhoraho yifuza, ati: “nimungarukire n’umutima wanyu wose… nimushishimure imitima yanyu, maze mugarukire Uhoraho, Imana yanyu, kuko agwa neza akagira impuhwe”.

Dusabirane muri iki gisibo, Imana izakomeze kutuba hafi, itwereke inzira zayo maze natwe tuyikundire muri uru rugendo rw’iminsi mirongo ine rugana Pasika, dukore ibiyishimisha kandi biyihesha ikuzo.

Nyagasani Yezu abane namwe!

Padiri Yohani Mariya Vianney NTACOGORA 

Publié le
Catégorisé comme Inyigisho