Catégories
Inyigisho

Uzaronka imbaraga zo gushobora ibinanira benshi

INYIGISHO YO KU WA 6 W’ICYUMWERU CYA MBERE CY’IGISIBO (07/03/2020)

AMASOMO TUZIRIKANA (n’ibitekerezo by’Ingenzi):

Ivug 26, 16-19: Nuhitamo amategeko n’Amabwiriza y’Uhoraho,Uhoraho azakubera Imana

                       nawe umubere umuryango w’Ubukonde uko yabisezeranye.

                       Kumvira Amategeko bikomeza kandi bikarinda Amasezerano.

Zab 119(118):  1-2,4-5, 7-8: Ukurikiza Amategeko y’Uhoraho arahirwa!

Mt 5, 43-48: Ubutungane bwacu ntibugomba kwiha intambwe y’igicagate.

                       “Muzabe intungane nk’Uko So wo mu Ijuru ari intungane”.

Tuzirikane ijambo ry’Imana

Bavandimwe, ncuti z’Imana, twongeye kugirirwa ubuntu bwo kumva Imana isezeranya umuryango wayo ko izawubera Imana. Ni n’amahirwe kandi kubwirwa n’Imana yo ubwayo ibizaduhesha umukiro.

Mu Isomo rya mbere ryavuye mu gitabo cy’Ivugururamategeko, twumvise Musa yibutsa imbaga y’Umuryango wa Israheli ko guhitamo neza, bahitamo gukurikiza Amategeko y’Imana bizabatera Amahirwe mu buzima. Guhitamo kumvira amategeko y’Imana no gukurikiza imigenzo myiza bizatuma isezerano risumba ayandi yose ryuzuzwa nta nkomyi.” Dore watumye Uhoraho avuga yeruye ko azakubera Imana””(Ivug 26,17).

Iyo Imana ivuze ko izabera Umuryango wayo Imana bivuga byinshi. Mu byo bisobanura harimo no kuba izawubera igisumba icyo abandi bose bashobora kuba bawubera. Imana irasezeranya abantu ikintu gikomeye kurusha ibyo bo bayisezeranya kuko kuyisezeranya ko bazayibera Umuryango w’Umwihariko ni igisubizo gisanzwe cy’Umutima unyuzwe kuko nta kindi cyo kururumbira cyasumba urukundo n’amasezerano y’Imana, cyane cyane ko icyo isezeranye igisohoza kuko Uhoraho ari Imana yuje Urukundo, Ubudahemuka n’Ubushoborabyose. Uwaduha kurushaho kujya tunyurwa, twahangayika gacye gashoboka.

Ivanjili ya none iratubwira inkuru y’ukuntu Yezu yavuguruye imyumvire y’abigishwa be, akabasaba kwigana Imana aho kwigana abantu. “Mwebweho rero Muzabe intungane nk’uko So wo mu ijuru ari intungane” (Mt 5,48).          

Imana iyo itanze amategeko si umutwaro iba ikoreje abayimenye ahubwo ni inama z’agakiza zifitiye akamaro abayakurikiza.

Kumvira Imana ni inzira yo guhamagara ububasha bwayo mu byacu kuko iyo twahisemo kwinyurira aho twishakiye tuba dusa nk’abahisemo guhusha. Imana idusaba guhitamo ibyo ishaka, kabone n’iyo byaba bigoye. Gukunda abakwanga mu gihe n’abagukunda bose utabasha kubakunda; gusabira abagutoteza mu gihe n’abagukunda utabasha kubasabira bose, mu gihe n’ababyeyi bawe, abana cyangwa abandi bo mu muryango ndetse na ba bandi bakwibutsa bakomeje bati unsabire na bo ubwabo utanabasha kubaha igihe gikwiye cyo kubasabira; ntabwo byoroshye ariko birashoboka. Yezu arasaba abigishwa be kugira Imyumvire mishya. Gukunda umuntu ukwanga ntabwo ari ibisanzwe; gusabira umuntu ugutoteza ntabwo bipfa kubangukira benshi. Yezu adusaba guhitamo kumwigana aho kwigana isi dutuyemo. Isi ya none irimo byinshi bikurura bijyana ahabi. Nitwigane Imana aho kwigana abashukanyi. Nitwigane abatagatifu aho kwigana abayobye. Nitwigane intwari aho kwigana ibigwari.

Imana ntirobanura abo ikunda, ivusha izuba kandi ikagusha imvura ku babi n’abeza (Mt 5,45).

Ubu buzima bwacu twabujemo atari impanuka ahubwo ari Umuhamagaro Imana yo ubwayo yadutumiyemo, kandi ibyibereyemo. Ni byo koko, “Uhoraho arahibereye” (Ezk, 48,35). Uwashaka, yavuga ko bumeze nk’Icyate cyo kurangiza Imana yaduhaye ngo kizasozwe no kubana na yo nituba twaragerageje kugenza nka yo; ariko kandi yanaduhaye ibikoresho by’ibanze byo kukirangiza neza. Kumvira amategeko, kwihangana no kwigana Imana, ni inshamake y’Ibanga ryo gukomera ku masezerano no gutuma ayo Imana yadusezeranyije yuzuzwa nta nkomyi. Ni ibanga ryo gutsinda ibyagutsindaga.

Ubwo Uhoraho yavuze ko niwumvira amategeko ye azakubera Imana, nutangira kugira ubwoba jya wibuka ko ntakiruta Imana, wibuke ko ntawuyirushamaboko, ko ari indahemuka, ko itarenganya kandi itarya ruswa. Nubona birimo bitinda gutungana jya uzirikana ko na yo itarambirwa maze uyigane mu bwihangane. “Namwe rero nimwihangane, mwikomeze umutima, kuko isesekara rya Nyagasani riri hafi. Ntimukijujute kugira ngo mudacirwa urubanza” (Yak 8-9).

Niwumvira Imana kandi ukihangana, uzaronka imbaraga zo gushobora ibinanira benshi, kandi biguheshe ubutungane, na bwo bukubere icyangombwa cy’inzira ijya mu ijuru.

Ntihazagire uguca intege, ntihazagire ugutega Iminsi ngo ibi cyangwa biriya ntuzabishobora. Niwumvira amategeko, ukihangana kandi ugakunda, ibyawe bizarangira neza kuko Imana izakubera ibyo abandi bose batabasha kukubera kandi yarabisezeranye.

Dufashijwe n’aya masomo matagatifu dusabe Imana muri iki Gisibo kumvira amategeko yayo kurushaho nta buryarya, kwihangana, no kureba kure duhitamo aho Imana ishaka n’ibyo Imana ishaka.

Nyagasani Yezu nabane namwe!

Padiri Jean Damascene HABIMANA M.