Catégories
Inyigisho

Wowe uhagaze he?

Inyigisho yo ku wa Kane w’icyumweru cya 5 cy’Igisibo, 26 Werurwe 2015

Amasomo: Intangiriro 17, 3-9; Yohani 8, 51-59

Ukomera ku magambo yanjye, ntateze gupfa bibaho.

Yezu Kristu ni Jambo w’Imana kandi ijambo rye ritanga ubugingo. Ibyo Petero yabimenye kare ubwo yabwiraga Yezu ati «Nyagasani, twasanga nde wundi, ko ari wowe ufite amagambo y’ubugingo bw’iteka. Twe twaremeye, kandi tuzi ko uri Intungane y’Imana.» (Yh 6, 68-69). Nyamara ikibabaje ni uko hari bamwe mu bayahudi batigeze bamenya amahirwe bafite yo kuba barabanye imbona nkubone n’uwo mucunguzi. Ibyo byatumye bamufata nka rubanda rusanzwe. Mu kubasobanurira ukudapfa ku wakomeye ku ijambo ry’Imana Yezu yanaboneyeho gusobanurira abayahudi ko yabayeho mbere ya Abrahamu n’abahanuzi abayahudi bitwazaga basobanura ko gukomera ku ijambo ry’Imana bitabuza upfa gupfa nk’uko abaranzwe n’ukwemera bu bihe byashize batakiriho. Nyamara ariko Yezu arifuza ko abamuteze amatwi basobanukirwa n’ukudapfa Yezu yavugaga: Ubugingo bw’iteka kuko Yezu yafashe kamere muntu kugira ngo abamwemeye babikeshe gusangira na we kamere Mana kuko “Mu ntangiriro ya byose Jambo yariho, kandi Jambo yabanaga n’Imana, kandi Jambo akaba Imana. Ubwe mu ntangiriro yabanaga n’Imana. Ni we ibintu byose bikesha kubaho, nta n’ikiremwa na kimwe cyabayeho bitamuturutseho…..Kandi twese twahawe ku busendere bwe, tugirirwa ubuntu bugeretse ku bundi.” (Yh 1, 1-16).

Data ni we umpa ikuzo, ari na we muvuga ngo ni Imana yacu nyamara ntimumuzi.

Mu ndangakwemera tujya tubisubiramo ko Yezu ari Imana ikomoka ku Mana tukanavuga impamvu yaje ku isi ko ari twebwe abantu no kugira ngo dukire. Yezu ni we watugaragarije isura y’Imana. Mu ntangiriro y’ivanjiri ya Yohani 1, 18 batwibutsa ko kumenya Imana tubikesha Yezu: Nta wigeze abona Imana na rimwe; Umwana w’ikinege uba muri Se, ni We wayimenyekanishije. Ibyo rero nibyo byihishe bariya bayahudi bashakaga guhangana na Yezu Kristu ku bijyanye n’inkomoko ye. Bavugaga ko bemera Imana ariko ntibemere umwana wayo Yezu Kristu kandi yaraje kuyibamenyesha by’ukuri. Ni gute rero wakwiha kwigizayo Yezu kandi yunze ubumwe bw’indatana n’Imana? Waba koko ugaragaje ko utazi Imana. Ni gute wafata uwaremwe (Aburahamu ) ukamurutisha uwamuremye (Imana mu butatu bw’indatana: DUhange muntu mu ishusho ryaCU, mu misusire yaCU)?

Abrahamu atarabaho nari ndiho.

Aha Yezu aribwira abayahudi: NDI-HO. Ntibivuze ko tugomba kugereranya Yezu na Abrahamu mu myaka y’amavuko ko ahubwo mbere hose na kare kose Yezu yari asanzwe ari Imana naho Abrahamu akaba yaratangiye kubaho mu gihe kizwi kuri iyi si nayo yagize igihe cyo gutangira kubaho. Yezu yibwiye rero abayahudi nk’uko Imana yibwiye Musa: «NDI UHORA-HO» (Iyimukamisiri 3, 14) nyamara ntibashatse kumwumva. Ngaho aho Yohani atubwira muri Yohani 1, 5 ati “Nuko urumuri rumurika mu mwijima, ariko umwijima wanga kurwakira.” Uko kuguma mu mwijima byagaragajwe n’ibikorwa by’abantu: ni bwo bafashe amabuye yo kumutera !

Nibwo bafashe amabuye yo kumutera, Yezu arihisha, nuko aba ava mu rugo rw’Ingoro y’Imana

Mu ndangakwemera hari aho tuvuga ngo: Icyatumye amanuka mu ijuru ni twebwe abantu no kugira ngo dukire. Ni byo koko yaje kuko yabonaga uburwayi buri mu bantu. Bashatse kwikiza umukiza ngo bagumane uburwayi bwabo, bagume mu icuraburindi, baryane, bandavure mu bigirwamana, bakomeze babe ibirura bamwe ku bandi. Nyamara Abrahamu wabateraga ishema ntiyigeze arangwa n’imigirire nk’iyo we wamenye guca bugufi imbere y’Imana yubika umutwe ku butaka, agatega amatwi ibyo Imana imubwira (Isomo rya mbere) mu gihe bo barega agatuza imbere y’uwaje kubakiza, bakamwereka ko batamukeneye. Nguko bamwe mu b’icyo gihe bitwaye.

Ab’ubu bo (twe) bite?

Hari uwagira igishuko cyo gucira urubanza abatarakiriye neza Yezu Kristu nyamara na n’ubu hari abagikerensa ubutumwa bwa Yezu Kristu, bagapfobya ijambo rye, ntibumve ngo banemere ko ari umukiza. Imihihibikano ya buri munsi ibibagiza umwanya w’Imana mu buzima bwabo, ndetse bamwe bagaseka abafata umwanya wabo bakajya gusenga. Umurimo n’isengesho byakagombe kujyana.

Hari kandi abihandagaza bagashaka guhigika Yezu nka bariya bashatse kumutera amabuye. Gutera Yezu amabuye muri iki gihe ni ugutesha agaciro ibyo yaremye, guhohotera no gukandamiza ikiremwamuntu, kunnyega no kwita imburamukoro abasenga, gusuzugura umunsi w’Imana, kuvuga ko Yezu ntacyo yadukijije, kuvuga ko Imana itabaho, ibyo byose byagiye bituma abantu babaho nk’ababuramana kuko bamwirukanye mu ngo zabo.

Wowe uhagaze he?

Padiri Bernard KANAYOGE