Catégories
Inyigisho

Yezu aratwibutsa Iyobokamana nyaryo iryo ari ryo

Inyigisho yo ku wa gatatu, Icyumweru cya 5 gisanzwe; mbang., A

Ku ya 12 Gashyantare 2014 Mwayiteguriwe na Padiri Jean Cobert NZEYIMANA

Amasomo: 1 Abami 10, 1-10, Zab 36 (37), Mk 7, 14-23

Bavandimwe dufatanya kuzirikana Ijambo ry’Imana,

Yezu Kristu akuzwe!

Mu minsi ishize twumvaga amateka y’umwami Dawudi. Amateka ashimishije yamutweretse nk’umuntu w’umunyabyaha uharanira ubutungane, ariko uzi neza ko bukomoka ku Mana. Ibyo bigatuma ayihanga amaso kenshi, cyane cyane igihe cy’ibikorwa bikomeye, cyangwa se yacumuye. Ubutungane Imana yarabumuhaye, atari uko yabaye umuziranenge, ahubwo kuko yamenye kandi akiringira impuhwe zayo. Ibi bitume natwe dutekereza ku muhamagaro wacu wo kuba intungane nk’uko Umubyeyi wacu wo mu Ijuru ari intungane.

Ese umuhungu we Salomoni azamenya kugera ikirenge mu cya se? Ijambo ry’Imana muri iyi minsi rirashaka kuduha igisubizo cy’icyo kibazo.

Isomo ry’uyu munsi rimutubwira mu ntangiriro y’ingoma ye yamaze imyaka miringo ine. Intangiriro nziza yaranzwe cyane cyane n’ibikorwa bikomeye by’Iyobokamana, gukundwa n’abaturage no kwamamara mu mahanga, kubera ubwenge n’ubushishozi yayoboranaga imbaga y’Imana. Ariko ijambo ry’Imana rikungamo ariko riti: “abikesha izina ry’Uhoraho”. Reka tuzumve niba azashobora kwitwararika muri ubwo bwamamare bwe, akamenya koko ko bukomoka kuri Uhoraho kandi akabigendera. Kuba icyamare ni byiza, ariko bisaba kwigengesera kugirango tutagwa mu bishuko. Ubishoboye afasha benshi kuyoboka Imana, cyane cyane muri iki gihe itangazamakuru n’itumanaho byihuse bihanga amaso ibyamamare gusa, nk’aho ari byo byonyine bigize amateka y’abantu.

Mu Ivanjili Ntagatifu Yezu aratwibutsa Iyobokamana nyaryo iryo ari ryo. Ab’Isezerano rya Kera barebaga cyane cyane imihango y’iyobokamana. Yezu ati tugomba kumenya gutandukanya imihango y’iyobokamana n’iyobokamana ubwaryo. Imihango igenwa n’amategeko, akanasobanura uko bigomba kugenda, ku buryo n’utazi icyo imihango igamije cyangwa ishushanya ashobora kwigana, wamureba ukaba wagira uti: “dore umuntu w’Imana koko!” Imihango y’iyobokamana ni myiza igihe idufasha kugera ku cyo igamije, ari cyo gutunganira Imana, byerekanwa ho gatoya n’ibikorwa by’urukundo, ariko bikaganza mu mutima, kandi bikamenywa n’Imana ubwayo, kurusha ndetse na nyirubwite. Bitari ibyo imihango nta cyo yaba imaze.

Ni na cyo Yezu apfa n’abanyamategeko b’umuryango we. Mu Ivanjili y’ejo hashize kuwa kabiri yabaye nk’aho atongana nabo, ndetse abita indyarya, kuko nk’abantu bize amategeko, bagombaga kumenya ko kudakaraba intoki kw’intumwa ze, n’ubwo ari umuco mwiza w’isuku y’umubiri, atari cyo gikorwa bagombye gushishikariza abantu mbere na mbere nk’abantu bashinzwe gutoza abandi Iyobokamana. Dore ko bo bavugaga ngo kudakaraba intoki byanduza umutima w’umuntu ushaka ubutungane. Yezu ati ibyinjira mu mubiri binyuze mu kanwa si byo byanduza umutima. Ahubwo ibibi byuzura umutima bigasesekara ku munwa ni byo bigaragaza ubwandu bwa muntu. Ingeso mbi zacu ntizikomoka ku byo turya, bityo ntacyo warya ngo bikubere icyaha.

Ushaka kurinda umutima kwandura icyo yibandaho si ukutarya ibiribwa ibi n’ibi kuko ibiribwa ntaho bihurira n’umutima. Icyo twakwirinda ahubwo ni imigambi ifitanye isano n’ingeso mbi zose. Umuntu ni ikiremwa kigizwe n’umutima, ubwenge n’umubiri (âme, esprit, corps). Mu gushaka ubutungane aho twakwitondera cyane si mu kurya no kunywa, ahubwo ni ukureba no kumva. Amaso n’amatwi byacu ni yo matara amurikira ubwenge n’umutima, bityo tukabasha kwigiramo ibitekerezo bitunganye. Kumenya no guhitamo ibyo duhanga amaso cyangwa dutega amatwi, ngibyo ibituma muri twe hirema ibitekerezo bitunganye. Naho kumenya ibyo turya cyangwa tutarya, n’ubwo usesenguye cyane hari aho bishobora guhurira n’iyobokamana, ariko iyo sano iri kure cyane, kandi itandukanye n’inyigisho z’Abafarizayi, ku buryo atari cyo twakwitondera mbere na mbere niba dushaka ko umutima wacu wuzuramo ibitekerezo bihuye n’iby’Imana.

Dushimire Imana yaduhaye Umwana wayo ngo atwigishe inzira iyinyuze, dusabe Roho w’Imana imbaraga n’ubutwari byo kumukurikira, aduhe kandi n’ubushishozi bwo kumenya icyo tugomba kwibandaho muri iyi si ihora mu mpinduka.

Muhorane na Nyagasani!

Padiri Jean Colbert NZEYIMANA