Yezu ati: “Ibuye ryajugunywe n’abubatsi ryabaye insanganyarukuta” ( Mt 21,42)

Inyigisho yo ku wa gatanu w’icyumweru cya 2 cy’Igisibo, Umwaka B // Ku ya 06 Werurwe 2015

Amasomo: Intg 37,3-4.12-13a.17b-28; Mt 21,33-43.45-46

Mu Ivanjili ya none, Yezu yaduciriye umugani w’abanyamizabibu b’abahotozi. Icyavuzwe cyose muri uyu mugani gifite icyo gisobanura: nyir’umurima, ashushanya Imana ubwayo; imizabibu igashushanya Israheli, umuryango w’Imana yitoreye; abagaragu bagiye boherezwa bashushanya abahanuzi; umwana utumwa ni Yezu ubwe uzi neza ko bazamwica vuba; abakozi b’abahotozi ni abayobozi b’abahemu b’Abayahudi naho abandi bahinzi nyir’umurima azatira imizabibu ye, ni abanyamahanga.

Muby’ukuri rero, Yezu aravuga iby’urupfu rwe rwegereje, kandi akazicwa n’abo yatumweho kubwira inkuru nziza y’Ingoma y’Imana mu bantu! Aka wa mugani ngo ‘abo Umwami yahaye amata, nibo bamwimye amatwi’.

« Nimuze tumwice »! aya magambo twayumvise no mu isomo rya mbere (Intg 37,20), aho batubwiraga Yozefu ugambanirwa n’abavandimwe. Iyi nkuru ikaba ishushanya uburyo na Yezu agirirwa nabi n’abo yaje kugirira neza.

Bavandimwe, ahantu hose batinyuka kwica umuntu, aho bamena amaraso y’inzirakarengane, aho batoteza ikiremwamuntu; ni isura ya Yezu iba ikomeza guhindanwa n’abagome. Ntibikwiye rwose kumva ko hari umukristu watinyutse kwishora muri ibyo bikorwa bibi.

Imana itegereje ko twera imbuto

Nyagasani akora byose kugira ngo tumererwe neza. Yewe niyo waca mu byago, biba ari ibigufasha gukomeza guhamya ukwemera n’ukwizera byawe. Ariko ikibabaje ni uko twanga tugatenguha Imana! Muvandimwe, isuzume urasanga hari byinshi Imana yagukoreye bitangaje, hari aho yakwambukije utari kunyura wenyine ; none se ntaho wowe watengushye Imana ? watanze umusaruro weze kuri ibyo byiza byose Imana yakuragije ? Hano ku isi hari umuzabibu waragijwe. Ariko se ni uwuhe ? Ni ibiki ngomba gutunganya nk’umukristu mwiza ? Ni bande nzabazwa nagombaga gufasha gukomera mu kwemera ? Mbese umunsi Imana yaguhamagaye uzamurika izihe mbuto zavuye mu muzabibu yakwatiye ?

Akenshi twirukana Imana

Nk’aba bakozi b’abahotozi, hari igihe twumva Imana itubangamiye, cyane cyane iyo ije kutubaza imbuto tweze, dore ko kenshi yohereza abagaragu bayo bakabinyuza mu Ijambo ryayo. Muri iki gisibo rero, tugenzure aho twateshutse ku nshingano zacu nk’abakristu, aho twagize ubugome, aho twaranzwe n’ubugugu, aho twishoye mu ngeso mbi zinyuranye ; hanyuma tubyihane, dusabe imbabazi Nyagasani.

Imana irihangana kandi ni inyampuhwe

Yozefu wagambaniwe n’abavandimwe be, ni we waje kubarwanaho igihe bari bugarijwe n’inzara. Yezu Kristu na we wishwe n’abo yaje azaniye urukundo, yaronkeye umukiro abantu bose. Umugambi w’Imana ntushobora kuburizwamo ; ahubwo abashaka kuwubangamira, bacirwa urubanza n’ibikorwa byabo bibi. Kuba hari umuntu wakwanga gukorera Imana, ntibyabuza ingabire zayo gukwira mu bandi nyamara we ahora mu gahinda, agatura mu mwijima aho shitani ihora imwoshya ko yihagije wenyine.

Bavandimwe, dusabirane kuba abagaragu beza ba Nyagasani kandi bahora bamutura ku byiza byinshi yaduhaye, twishimire kubakira ubuzima bwacu kuri Yezu Kristu no kumwitura urukundo yadukunze tugirira neza bagenzi bacu badukeneye. Amen

Padiri Jean Marie Vianney NTACOGORA

Publié le
Catégorisé comme Inyigisho