Catégories
Inyigisho

Yezu Kristu aradukiza kandi akaduha icyerekezo gishya cy’ubuzima

Inyigisho yo ku wa 2 w’icyumweru cya 4 cy’Igisibo // kuwa 17 werurwe 2015

Amasomo: Ezk 47,1-9.12 // Yh 5,1-16

Bavandimwe, dukomeje urugendo rwacu rw’igihe cy’igisibo kizadushyikiriza ibirori bya Pasika: ishyingiro ry’umukiro wacu. Amasomo matagatifu y’uyu munsi aratwereka uburyo Yezu Kristu yazanywe no gukiza abantu bose kandi akadukiza byose akoresheje Ijambo rye n’ibindi bimenyetso bitagatifu harimo n’amazi. Ni ko yabyishakiye. Yezu adukiza ku mubiri no kuri roho kandi akaduhishurira ko icyaha kimugaza umuntu ku mutima, mu bwenge no ku mutima.

  • Yezu ahora ahangayikishijwe n’uburwayi n’imibabaro yacu

Bavandimwe, ubuzima bwa muntu ntibutana n’ibibazo, intege nke, imibabaro n’imiruho itandukanye. Ariko bigatera agahinda iyo bene iyo miruho imaze igihe kandi umuntu akabona ataronkera ihumure aho yari ateze umukiro. Bigatuma abihirwa n’ubuzima, akumva abantu baramutereranye, akabaza n’Imana uburyo yamuraze uwo muruho kandi yarayiyobotse. Nyamara iyo adacitse intege, kabone nubwo yahora atonganya Imana, uwizeye Imana abona ubuvunyi bwayo kandi ukwizera ntigutamaza. Ni byo tuzirikana mu Ivanjili ya none.

Mu by’ukuri, uyu muntu wari umaranye ubumuga imyaka mirongo itatu n’umunani, nta kindi yari yizeye uretse ubutabazi bw’abandi. Nyamara ntabwo yabonye kuko buri wese yarebaga iby’amagara ye cyangwa se ay’umuvandimwe yazanye. Icyakora Yezu arahagoboka ndetse aramugoboka, aramukiza. Mu gihe abandi bakizwaga no kumanukira mu cyuzi igihe umumalayika abirinduye amazi, Yezu, we, amukijije akoresheje ijambo rye gusa ati haguruka ufate ingobyi yawe maze ugende.” Kuba yari no mu ngobyi kandi akavuga ko nta muntu agira wo kumujugunya mu cyuzi, biratwereka akababaro k’uyu wamugaye. Yari ababaye ku mutima kuko yatereranywe ndetse no ku mubiri. Ibi bitwibutsa akababaro ka hano ku isi aho umuntu ashobora gutereranywa n’abe, uwo basezeranye, inshuti n’abo yari yiringiye. Birababaza kubura umuntu ukurengera, ukugirira impuhwe, ugukomeza nyamara isi yuzuyemo abantu. Icyakora Ivanjili iradusaba gukomera no kwizera Yezu Kristu, Inshuti nyanshuti. Mu gukiza ikirema, Yezu Kristu atweretse ko Imana izi abayo kandi ibatabara. Ni Yezu ubwe wabajije uyu wamugaye niba ashaka gukira. Yezu Kristu azi kandi abona ubumuga bwacu : ari ubw’umutima n’ubw’umubiri. Kandi nta mpamvu cyangwa se ibihe byamubuza kudukiza. Nicyo gituma adatinya gukiza umuntu ku isabato. Umuntu abereyeho kubaho neza, gukira no gukizwa iyo bikeneye.

  • Icyaha kigira ingaruka ku mutima, mu bwenge no ku mubiri

Bavandimwe, nubwo turi abakristu ndetse tukaba twariyemeje kwanga icyaha, gukurikira Yezu Kristu no kumwamamaza, nyamara dukomeza gukora ibyaha kandi tuzi ingaruka zabyo cyangwa se dukina mu bikomeye. Aburira uwo yakijije ngo arekere aho gucumura kugira ngo atazagubwaho n’icyago gikomeye, Yezu yagaragaje ko ibyago, amakuba n’imibabaro ikomeye y’abantu n’isi biterwa n’uko tuyoboka Sekibi. Ubugomeramana ni bubi kandi burica kurusha indwara zisanzwe. Ibi birumvikana kuko twese turi abanyabyaha. Bikatwibutsa amagambo tuvuga mu ntebe ya Penetensiya tuti “Dawe ubinkize, sinshaka kubisubira; ndashaka kuba uwawe.” Ni amagambo akomeye n’ubutumwa bukomeye.

  • Imana idukirisha Ijambo ry’ayo n’ibimenyetso yahaye Kiliziya

Bavandimwe, umukiro wacu tuwukesha Imana yadukunze mbere kandi yemera kutwihishurira mu buryo bwinshi kugeza mu Mwana wayo Yezu Kristu. Ni we Jambo ukiza abantu bose. Mu bitangaza yakoze, yatweretse ububasha bw’ijambo rye. Ni ryo shingiro ry’ibyo Kiliziya yigisha, umusokoro w’ibyo duhimbaza n’igisobanuro cy’amasakaramentu duhabwa: aduhaka kuba abana b’Imana, dukirizwamo, dukomerezwamo kandi atubeshaho, atubera n’ingwate y’ubugingo bw’iteka. Ijambo ry’Imana riratwubaka, rikatubungabunga, riratuyobora kandi rikaduhumuriza tugeze ahakomeye. Turikomereho kandi twemere ricengere imyumvire n’imitima yacu kugira ngo rihindure n’imibereho yacu.

Ntabwo duhurira n’Imana mu ijambo ryayo gusa, ahubwo hari n’amasakaramentu Yezu Kristu yahaye Kiliziya. Ikimenyetso cy’amazi tuzirikanaho mu masomo y’uyu munsi, kiratwibutsa Batisimu idukiza ibyaha n’ubumuga bwose bwa roho. Isoko yavaga mu ngoro yerekeye iburasirazuba kandi igatanga ubuzima aho inyuze hose, iratwibutsa ubuzima bushya turonka binyuze muri Kiliziya yashinzwe na Yezu Kristu, Zuba rirashe. Uko ayo mazi ahura n’ayanduye akayasukura ni ko amasakaramentu adusangiza kameremana.

Bavandimwe, Nyagasani adukorera ibikomeye kandi yiyemeza gutotezwa kubera twebwe. Yezu Kristu ahora agambiriye kudukiza ku mutima no ku mubiri akoresheje ijambo rye, akoresheje Kiliziya n’amasakramentu yayisigiye. Ni We utwunamuraho ibituremereye atubwira ati “Mwana wanjye, haguruka ugende wemye.” Yifuza kandi ko buri wese yafasha mugenzi we gukira no kwishimira ko twakijijwe. Ariko iyo ubuze ukurengera ku isi, Imana yo iradutabara kuko idukunda kuruta uko twikunda no kuruta uko abandi badukunda. Tuyemerere idukize kandi tuyitabaze twisabira imbaraga, tunasabira abandi n’isi yacu kuko birakenewe cyane. Yezu Kristu anadusaba gukomera ku mukiro twaronse ku buntu bw’Imana twirinda ibicumuro kuko icyaha cyangiza umutima, ubwenge n’umubiri. Umubyeyi Bikira Mariya, Umuziranenge, adutabare mu ntambara ikomeye y’ubutungane turimo. Amen.

Padiri Alexis MANIRAGABA