Catégories
Inyigisho

Yezu Kristu ni We buzima bwacu na bumwe bwacu

Inyigisho yo ku wa gatandatu w’Icyumweru cya 5 cy’Igisibo, ku wa 28 Werurwe 2015

Bavandimwe,

Ineza n’amahoro bikomoka kuri Yezu wadukunze cyane kugeza aho kudupfira bihorane namwe.

Uyu munsi tugeze ku wa gatandatu w’Icyumweru cya gatanu cy’Igisibo. Ejo tuzatangira Icyumweru gitagatifu duhimbaza Icyumweru cy’Ububabare bwa Nyagasani. Mbere yo kuzirikana gato ku Ivanjiri y’uyu munsi, ndifuza ko twabanza tukisuzuma.

1. Twisuzume

Bavandimwe,

Tugeze mu mpera z’igisibo. Dusubize amaso inyuma; turebe uko twabayeho muri iki gihe cy’igisibo. Mbese imigambi twari twihaye twayisohoje dute? Dushobora kwisuzuma duhereye ku ngingo zimwe na zimwe z’Ijambo ry’Imana twagiye tuzirikana buri cyumweru, tutibagiwe n’iryo ku wa Gatatu w’Ivu.

Dutangira igisibo, ku wa Gatatu w’Ivu, Nyagasani Yezu yatwibukije ya migenzo myiza itatu yo gusenga, kwigomwa no gukora ibikorwa by’urukundo. Twayibayemo dute?

Ku cyumweru cya mbere cy’igisibo, Yezu yatweretse uko tugomba gutsinda ibishuko bya Sekibi kandi aduhamagarira kwisubiraho no kwemera Inkuru nziza. Tugeze he mu mugambi wo kwimura Sekibi tukimika Imana n’Ingoma yayo?

Ku cyumweru cya kabiri, igihe Yezu yihinduye ukundi mu mpinga y’umusozi, twumvise ijwi ritubwira riri Uyu ni umwana wanjye nkunda cyane nimumwumve (Mk 9, 7). Ese koko twaramwumvise? Twamuteze amatwi? Twashishikariye kumva inyigisho ze?

Ku cyumweru cya gatatu, Yezu yasukuye Ingoro y’Imana asuka hanze abayikoreragamo ibitajyanye n’icyo yakorewe agira ati Inzu ya Data mwiyigira inzu y’ubucuruzi (Yh 2, 16). Ni irihe shyaka tugirira Ingoro y’Imana ari yo Kiliziya?

Ku cyumweru cya kane, Ijambo ry’Imana ryagize riti Koko Imana yakunze isi cyane, bigeza n’aho itanga Umwana wayo w’ikinege, igira ngo umwemera wese atazacibwa, ahubwo agire ubugingo bw’iteka (Yh 3, 16). Ese twazirikanye koko urwo rukundo rw’Imana? Ukwemera kwacu guhagaze gute?

Ku cyumweru cya gatanu cy’igisibo, twumvise Abagereki bari baje gusenga i Yeruzalemu binginga Filipo kubageza kuri Yezu bagira bati Nyakubahwa, turashaka kubona Yezu (Yh 12, 21). Ese natwe turacyafite inyota yo kubona Yezu? Ni izihe nzira twanyuzemo kugira ngo tumugereho?

Buri wese yakwiyibutsa n’izindi ngingo z’Ijambo ry’Imana twasangiye iki gihe cyose cy’Igisibo ndetse n’imigambi yihariye yari yihaye ubwe. Twisuzume tutihenze; turebe imbuto tweze kugira ngo koko twinjirane ukwemera, ukwizera n’urukundo mu Cyumweru gitagatifu.

2. Hari n’icyo nibariza abanzi ba Yezu

Tumwise mu Ivanjiri uko abatware b’abaherezabitambo n’Abafarizayi bafashe icyemezo cyo kwica Yezu nyuma y’uko azuye Lazaro. Ndifuza kwibariza abo banzi ba Nyagasani ibibazo bimwe na bimwe.

Batware b’abaherezabitambo namwe Bafarizayi, nimunyemerere ngire icyo mbibariza.

Mbese ubwo bucuti buje bute, ko ubundi musanzwe mutavuga rumwe? Ni ukugira ngo mucure imigambi mibisha, mufatanye kugira nabi ? Mbega ubucuti buhujwe no kwica no kurimbura! Ubucuti nk’ubwo bugamije kumena amaraso ndabugaye! Ntimpumeho!

Ndababaza impamvu y’urwo rwango rucumba rucumbeka rugamije gukuraho Intore y’Imana. Kuki mubabazwa n’uko Yezu yigishanya ubuhanga n’ububasha, nuko rubanda rukaryoherwa, rugasobanukirwa maze rukamugana? Kuki mubabazwa n’uko Inkuru nziza ye igera no ku bakene? Kuki mubabazwa n’uko agira neza aho anyuze hose? Kuki mubabazwa n’uko Yezu akora ibitangaza, agakiza abarwayi, agahumuriza abababaye, akazura abapfuye? Ni kuki mubabazwa n’uko yazuye Lazaro, akamusubiza ubugingo maze benshi bakamwemera?

Ndababaza impamvu ishyari n’urwango byamahumye ubwenge n’umutima; mukawunangira, ntimubone icyiza, mukanga kumva, ngo hato mutisubiraho maze mugakira.

Harya ngo murashaka Yezu? Si amahoro habe n’icyiza mumushakira. Mwashandikishije rubanda ngo nihagira umenya aho Yezu aherereye, ahavuge kugira ngo mumufate mumwice !

Icyemezo mwagifashe pe? Mwagishyizeho umukono? Ariko ntimwibwire ko hari ububasha na buke mufite kuri Yezu. Nimumenye nibura ko Yezu atanga ubuzima bwe ku bwende bwe abigirira abo akunda. Mbese ntimwigeze mumwumva agira ati Ndetse nemera guhara ubugingo bwanjye, nkabutangira intama zanjye… Ngicyo igitera Data kunkunda, kuko ntanga ubuzima bwanjye kugira ngo mbusubirane. Nta we ubunyaga, ahubwo ni jye ubwanjye ubutanga. Mfite ububasha bwo kubutanga nkagira n’ububasha bwo kubwisubiza. Iryo ni itegeko nahawe na Data” (Yh 10, 15-18).

3. Yezu Kristu ni We buzima bwacu na bumwe bwacu.

Bavandimwe, igihe abanzi ba Yezu barimo gucura imigambi yo kumwivugana, twe duhagaze dute? Nimucyo twe tumwemere, tumuramye, tumukuze, tumushimire ineza ye itagira urugero: Turagusenga Yezu turagushima, kuko wakirishije abantu umusaraba wawe mutagatifu.

Nk’uko tumaze kubyumva mu Ivanjiri, Kayifa yahanuye atabizi kandi atabishaka iby’ukuri k’urupfu rwa Yezu: gupfa mu kigwi cy’imbaga kugira ngo ihonoke urupfu. Koko Yezu Kristu yaradukunze cyane bigeza aho kudupfira. Yapfuye mu kigwi cyacu, kugira ngo tugire ubuzima. Ni ibyaha byacu yazize, ni twe twese yapfiriye ngo abone kudukiza.

Yikoreye imibabaro yacu, ibyaha byacu byaramuremereye…; yahinguranyijwe kubera ibyaha byacu, yajanjaguriwe ibicumuro byacu: igihano cye cyadukomoreye amahoro, ibikomere bye tubikesha umukiro (Iz 53, 4-5). Yezu Kristu ni We buzima bwacu.

Si ibyo gusa. Yezu Kristu ni We bumwe bwacu: Twese twarabuyeraga nk’intama zazimiye, tugenda intatane, buri wese atomereye inzira ye, maze Uhoraho amugerekaho ububi bwacu bwose (Iz 53, 6). Mbese nk’uko na Yahoni yabivuze, ibyo ntibyari ugupfira rubanda gusa, ahubwo no gukoranya abana b’Imana batatanye, akababumbira hamwe (Yh 11, 52).

4. Dore ijambo rikwiye kwizerwa (2 Tm 2, 11)

Bavandimwe, muri iki gihe tugiye kwinjira mu Iyobera rya Pasika y’Umucunguzi wacu Yezu Kristu, ndifuza ko iri jambo Pawulo mutagatifu yambwiye Timote turigira iryacu.

Dore ijambo rikwiye kwizerwa:

Nidupfana na We, tuzabaho hamwe na We;

nituba intwari hamwe na We; tuzima ingoma hamwe na We;

nitumwihakana, na We azatwihakana;

nituramuka tubaye abahemu; We azaguma kuba indahemuka, kuko adashobora kwivuguruza (2Tm 2, 11-13).

Iri jambo rizaduherekeze mu kurangamira Yezu Kristu wababaye kubera urukundo yadukunze kugira ngo dukire. Rizadufashe gufatanya na We urugendo mu nzira ye y’umusaraba kugira ngo tuzasangire na We ibyishimo by’Izuka.

Ndabifuriza mwese Icyumweru cyiza gitagatifu; kandi muzagire Pasika nziza. Yezu akuzwe!

Padiri Balthazar NTIVUGURUZWA