Catégories
Inyigisho

Yezu Kristu ni We Muganga wa roho n’umubiri

Inyigisho yo ku wa gatanu, icyumweru cya 1 gisanzwe, A, 2014

Ku ya 17 Mutarama 2014 – Mwayiteguriwe na Padiri Balthazar NTIVUGURUZWA

Isomo rya mbere: 1 Sam 8, 4-7.10-22a; Ivanjili: Mk 2,1-12

(Reba hano indi nyigisho ya Padiri Théophile NIYONSENGA, ijyanye n’amasomo ya liturujiya ya none)

 Bavandimwe,

Ivanjili ikomeje kutwereka Yezu ari mu butumwa bwo kugeza kuri bene muntu Inkuru nziza y’umukiro. Uyu munsi mutagatifu Mariko atugejejeho inkuru y’uko Yezu yakijije ikirema. Aradufasha kurangamira Yezu Kristu nk’umuganga w’ukuri, ukiza kuri roho no ku mubiri.

« Mwana wanjye, ibyaha byawe urabikijijwe »

Ijambo rya mbere Yezu yabwiye uriya murwayi abantu bari bamuzaniye ni iryo kumubohora kuri roho, amubwira ko ibyaha bye abikijijwe. Ngo Yezu abonye ukwemera kwabo, abwira icyo kirema ati “Mwana wanjye, ibyaha byawe urabikijijwe”. Kumukiza indwara y’umubiri yabikoze ku rwego rwa kabiri, nk’igikorwa n’ikimenyetso kigaragaza ububasha afite bwo gukiza ibyaha: “None rero kugira ngo mumenye ko Umwana w’umuntu afite ububasha ku isi bwo gukiza ibyaha…” abwira ikirema ati “Ndabikubwiye: haguruka, ufate ingobyi yawe, wigendere!” (Mk 2, 10-11)

Mu kuvuga ko ari Umwana w’umuntu, Yezu yashatse gucira amarenga abari bamuteze amatwi n’abamuhanze amaso ko afite ububasha nk’ubw’Imana; ububasha bwo kugera ku mutima no gukiza imitimanama. Yezu azi koko ibyihishe mu mutima w’umuntu; azi ibiri mu ndiba y’umutimanama. Azi gucengera mu mutima akamenya icyo ihatse, agatahura aho idatunganiye Nyagasani, akamenya ibyifuzo n’ibitekerezo byawo, kugira ngo agorore ibigoramye, asukure ibyanduye, ahumanure ibyahumanye.

Yezu afite ubwo bushobozi kuko ari Imana; afite ubushobozi n’ububasha bwo gukiza ibyaha, gusukura imitima akayigira mishya, akayigarurira urumuri rupfukiranwa n’icyaha. Ni muri We dushobora kongera guhinduka bashya, kongera kubaho by’ukuri no kongera kugendera mu nzira iboneye.

Ubumuga bwacu bw’ukuri

Bavandimwe,

Imbere ya Yezu Kristu, ntawe udafite ubumuga. Ariko sinshaka kuvuga ubumuga bw’umubiri gusa, ahubwo ubumuga buterwa n’imungu y’icyaha; bwa bumuga butuma tutabasha gusanga Nyagasani no gutunganira bagenzi bacu.

Ndavuga ubumuga bw’amaso y’umutima; bwa bundi budatuma tubona ibintu cyangwa abantu nk’uko Imana ibishaka; butuma tureba bagenzi bacu ntitubabonemo ishusho y’Imana.

Ndashaka kuvuga ubumuga bw’amatwi atumva impuruza ya Nyagasani uduhamagarira kwisubiraho, kwakira Inkuru nziza ye no kuyamamaza muri bagenzi bacu. Ndatekereza ya matwi atumva bagenzi bacu bataka badutabaza; ya matwi yihunza abatugisha inama, akanga no kumva abadusaba cyangwa abaduha imbabazi.

Ubumuga bwacu bw’ukuri ni n’ubumuga bw’ururimi igihe cyose rugobwe, maze aho kwamamaza no guhamya ukwemera kwacu rukinumira; cyangwa igihe rutannye, aho guha umugisha rukavuma, aho kuvuga neza umuvandiwe rukamusebya; aho kugira impuhwe rugaca urubanza; aho kuvuga ukuri rukimika ikinyoma.

Mbese muri make ndashaka kuvuga ubumuga bwa wa mutimanama wasabitswe na Sekibi, ugahora ufata ibyemezo binyuranyije n’impumeko y’Ivanjili.

Bavandimwe

Imbere ya Yezu Kristu, Muganga w’ukuri, duhagaze dute? Aho ntidushishikarira kureba umukiro w’umubiri gusa? Aho ntitwihutira gusa kumubwira akababaro duterwa n’ubumuga bw’umubiri, n’indwara z’uruhu, ibidutera ubusembwa inyuma, inenge dufite ku mubiri, umubabaro duterwa na za rubagimpande, igifu n’indi myanya y’umubiri idakora neza? Uko dushikarira twihutira kumubwira uburwayi bwacu bw’umubiri bibe ari nako dushishikarira kumwereka uburwayi bwacu bwa roho; uburwayi bw’icyaha cyatubayemo karande.

Ubwo ni bwo bumuga tugomba kwihutira kwereka Yezu Kristu, umuganga w’umubiri na roho. Nitumugane rero tudatinze kugira ngo ubwo bumuga butaduhitana. Dushishikarire guhabwa kenshi kandi neza isakramentu rya Penentesiya. Tumwegerane ukwemera kwinshi twizeye ko adukiza.

Ubumuga bwa bagenzi bacu

Uriya muntu wo mu Ivanjili wari wugarijwe n’ubumuga ntiyashoboye kwigeza Yezu wenyine. Yakeneye ubufasha bw’abandi bamumugejejeho mu bwenge bwinshi, mu bwihangane no mu kwemera gukomeye.

Bavandimwe,

Hari bagenzi bacu benshi nabo bafite ubumuga butandukanye bwakizwa gusa na Yezu Kristu. Ariko wenda bakeneye ko twabaheka tukabageza kuri We. Tubaheke mu ngobyi y’isengesho. Bakeneye ko tubamenyesha Yezu. Bakeneye ko tubereka aho Yezu ari.

Niba koko Yezu ari We Muganga w’ukuri, ntidutinye kumwereka akababaro kacu, ariko ntitwibagirwe no kumuhereza akababaro k’abavandimwe bacu.

Mutagatifu Antoni twibuka uyu munsi nadusabire.

Padiri Balthazar NTIVUGURUZWA