Catégories
Inyigisho

Yezu Kristu yakunze abantu byimazeyo no kugeza ku ndunduro

Inyigisho yo kuwa kane mutagatifu, Umwaka B, ku wa 02 mata 2015

Amasomo: Iyim 12,1-8.11-14; 1 Kor 11,23-26; Yh 13,1-15

Bavandimwe, tumaze iminsi mu gihe cy’igisibo aho twiteguraga umunsi mukuru wa Pasika: dusenga, dusiba, twihana kandi dukora ibikorwa by’urukundo. Iyo myiteguro itugejeje mu minsi nyabutatu ya Pasika igaruka ku ibanga rikomeye ry’ubuzima n’urukundo mu bubabare, urupfu n’izuka bya Yezu Kristu. Tubizirikana kuri uyu wa kane tugaruka ku iremwa ry’ubusaseridoti n’Ukaristiya; kuwa gatanu tukazirikana ububabare n’urupfu rwa Kristu; naho mu gitaramo cya Pasika no mu gihe cya Pasika tukazirikana izuka rye ndetse n’ibyakurikiyeho. Mu kuzirikana ku iremwa ry’ubusaseridoti n’Ukaristiya, tubona ubumwe bukomeye bifitanye n’ubutumwa bwihariye.

  • Iremwa ry’ubusaseridoti

Bavandimwe, mu gitondo cy’uwa kane mutagatifu (keretse iyo byimuriwe ku munsi uhegereye kubera impamvu zumvikana), duhimbaza misa itangirwamo umugisha w’amavuta matagatifu (ay’abigishwa, ay’abarwayi na Krisma) azakoreshwa kugeza kuwa kane mutagatifu w’undi mwaka wa Kiliziya. Muri iyo misa, abapadiri basubira mu masezerano yabo. Ni umunsi abasaseridoti bakikiza kandi bifatanya n’umwepisikopi mu kuzirikana ubusaseridoti bwa Kristu bubahuza, ubutumwa bwabo ndetse n’amasezerano yabo. Uretse kuzirikana kuri izo ngingo za ngombwa, biba gahebuzo mu gitambo cy’ukaristiya cya nimugoroba ubwo hahimbazwa isangira rya nyuma Nyagasani Yezu Kristu yagiranye n’abigishwa be. Niho tubona koko isano ikomeye ihuza umupadiri n’ukaristiya. Ubutumwa Yezu Kristu yahaye intumwa ze nk’umurage n’igisobanuro cy’isangira ritagatifu bisobanura icyo intumwa zatorewe.

  • Iremwa ry’Ukaristiya

Igitabo cy’Iyimukamisiri kitubwira ibijyanye na Pasika y’Abayahudi yajyanye n’isangira ry’itungo; maze amaraso yaryo akaba ikimenyetso cy’aho bari bateraniye. Bakabikesha kurokoka ubwo Uhoraho yorekaga Misiri n’ibigirwamana byayo. Iyo Pasika n’iryo tungo byagenuraga ibizaba mu rupfu n’izuka rya Yezu Kristu. Ni byo duhimbaza mu gitambo cy’Ukaristiya. Nk’uko na gatigisimu ibitwibutsa, uwa kane mutagatifu ni umunsi mukuru ukomeye ku muryango w’Abakristu. Niho Yezu yaremye Ukaristiya mu isangira rya nyuma n’abigishwa be. Yemera kwitanga nk’isakaramentu ry’urukundo.

Ni byo tuzirikana mu Ivanjili aho tubona ko Yezu yakunze abe bari mu nsi, abakunda byimazeyo kandi abakunda kugeza ku ndunduro y’ubuzima bwe. Kugeza abiguranye yitanga ku musaraba. Nibyo kandi yivugiye ati ntawagira urukundo ruruta urw’utanga amagara ye kubera incuti ze.” Bityo agaragaza urukundo ruhebuje rukwiye kuranga abamukurikiye. Urukundo rugaragarira mu buzima n’ibikorwa kuko mu isagonda imwe ubwira umuntu ko umukunda, nyamara kubigaragaza no kubimwemeza bisaba ubuzima bwose muzabana. Ivanjili ni byo itwereka.

Mu Ivanjili y’uyu wa kane mutagatifu, turazirikana ko urukundo rukomeye atari ugutanga gusa ahubwo ni ukwitanga. Ubwitange bugaragarira mu buryo bwinshi: Yezu yadutoje kwiyoroshya, yemera koza ibirenge by’intumwa ze kandi koza undi ibirenge wari umurimo w’abacakara. Yezu yemera koza na Yuda Isikariyoti wari ugiye kumugambanira. Muri icyo gikorwa abwira Petero ko “gusukurwa ari ngombwa” kuko urukundo ntirutana no kuba “muhorakeye.” Ni cyo gituma Nyagasani aduha uburyo bwinshi bwo kwisukura kuri roho: Batisimu na Penetensiya. Dukunde guhabwa kenshi Penetensiya kuko dutandukira kenshi urukundo Imana idukunda, tukihambira no kubatadukunda. Twemere ko urukundo rwacu ari ruke: rwaba urwo dufitiye Imana ndetse na bangenzi bacu. Nyamara Kristu atubwira ko ikizahamya ko turi abigishwa be ni uburyo dukunda n’uburyo dukundana. Ntabwo ari uburyo dukundwa n’uburyo badukundira. Yezu Kristu nta rugwiro yagaragarijwe, yishwe nabi ariko akiza bose n’abamwishe ati Dawe bababarire kuko batazi icyo bakora.”

Yezu Kristu rero ntabwo yagaragaje urukundo rwe yigira umuntu gusa, akiza abantu cyangwa abakorera ibitangaza, ahubwo yemeye no kutwitangira. Yitanga apfa ku musaraba. Yemera no kwitanga yiha abe cumi na babiri mu isangira ritagatifu. Ni byo mutagatifu Pawulo intumwa yashyikirijwe na Nyagasani: ko Nyagasani yitanze nk’ifunguro ry’ubugingo bw’iteka n’amaraso ye akatubera isezerano rizahoraho. Nyagasani arangiza adusaba guhora tumwibuka twamamaza urupfu n’izuka rye. Yanze ko dusigara twenyine, yemera kugumana na twe iteka ryose mu Ukaristiya.

Tuzi byinshi ku Ukaristiya ntagatifu, icyubahiro, umwanya n’imbuto dukesha iryo sakaramentu ririmo Yezu kristu ubwe rwose. Uretse abakristu gatolika, hari n’abandi bamenye cyangwa bumvise ibitangaza byinshi dukesha Yezu-Ukaristiya. Ni ubukungu bukomeye Imana yahaye Kiliziya. Ni ubukungu bukomeye n’ingwate y’agatangaza Kiliziya isangiza abana bayo. Ukaristiya ni yo ibeshaho Kiliziya kandi Kiliziya ni yo ikora Ukaristiya mu bubasha bwa Roho Mutagatifu uyiyobora. Ukaristiya ni isoko n’indunduro y’ubuzima bwa Kiliziya ndetse n’ubw’umukristu wese. Dusabe Nyagasani kutwumvisha kurushaho Ukarsitiya, tumuhabwe kenshi adukize ibyaha kandi aturinde ibyaha bikomeye. Dusabire abamutaye bamugarukire. Kandi tumuramye kenshi duhongerera ibyaha byacu, iby’abacu n’iby’isi yose.

  • Hari igihango gikomeye hagati y’umusaseridoti n’Ukaristiya

Abasaseridoti bashinzwe umurimo nyabutatu wa Kristu: kwigisha, kuyobora no gutagatifuza. Bagatanga ubuzima bwabo kubera Kristu no mu rugero rwa Kristu. Muri uwo murimo bashinzwe, bazajya batura n’igitambo cya Kristu bahimbaza urupfu rwe n’izuka rye nk’umutsindo w’urukundo ku buhemu bwa Shitani, w’ubuzima ku rupfu, w’umugisha ku muvumo. Izo ntumwa zasigiye ubwo bubasha abepiskopi nabo babusangiza abapadiri. Abo nibo bakomeza igitambo cya Kristu. Yezu arabubaha cyane kuko bamuhamagara ku bubasha bwa Roho Mutagatifu akamanuka maze icyari umugati kikaba Umubiri wa Kristu, icyari divayi n’amazi kikaba Amaraso ya Kristu. Mbega ibanga rikomeye ! Rishobora kugora abadafite ukwemera !

Ibi biratwereka agaciro k’umusaserdoti : atariho, Yezu ntiyaza mu mugati na divayi. Mutagatifu Yohani Mariya Viyani ni we utangarira agaciro k’umusaserdoti avuga ati umusaserdoti ari mu cyimbo cy’Imana hano ku isi, ni umuhuza w’abantu n’Imana. ” Akomeza avuga ko ahuye n’umusaserdoti ari kumwe na Bikira Mariya ndetse n’abamalayika, we yabanza gusuhuza umusaserdoti kuko ari we uri mu mwanya w’Imana naho abamalayika bakaba intumwa zayo. Na Bikira Mariya, nubwo yabyaye Yezu, ntiyamumanura ngo umushyire muri hostiya!

Umusaserdoti rero tumukesha Ukaristiya. We n’Ukaristiya ni indatana kuko baremewe umunsi umwe no mu gikorwa kimwe cyo kuwa Kane Mutagatifu. Mu Ukaristiya, umusaserdoti yifatanya na Yezu mu kwitangaho igitambo cy’ubuzima bwe kuko avuga ati “ iki ni umubiri wanjye ubatangiwe, iki ni amaraso yanjye abamenewe ”. Ubuzima bw’umusaserdoti buba bwabaye bumwe hamwe n’ubwa Yezu mu gitambo cy’Ukaristiya. Nicyo gituma Umusaserdoti abereyeho Ukaristiya kandi Ukaristiya ibereyeho kumutunga. Mbega igihango!

Ndangije, mbasaba Bavandimwe kuzirikana ko Yezu Kristu yatugaragarije urukundo rukomeye. N’ubu kandi akomeza kudukunda mu buryo bwinshi. Buri wese yabibera umuhamya. Adutoza kugenza nkawe twitanga, tugira ubuntu, twiyoroshya kandi duharanira gucengera imigirire ye uko atubaba ati mumaze kumva icyo maze kubakorera!” . Bizatuma ibyo tuvuga, ibyo dukora n’uburyo tubaho bitera abandi kutubonamo Imana. Tukamenya kwishyira mu mwanya wa mugenzi wacu ngo dutsinde ubwikunde, ukwironda, ubudahambana, kwikubira no kwihambira ku bitujyana kure y’Imana n’umubano mwiza n’abantu. Birababaje kuba umuco wo kwitanga tugirira Imana ugenda ugabanuka kubera ko byose byajemo inyungu, imibare n’amafaranga. Abantu tugatakaza ubuntu, ubumuntu n’ubukristu. Ariko twizeye ko urukundo ruzatsinda. Dusabire abasaseridoti bacu, batwitangira, ngo babe benshi, beza kandi bagarurira uburyo iyi si yacu. Kandi natwe tubitangire mu buryo bwinshi kuko biyeguriye Imana ari twe bagiririra: ntawe uba umusaseridoti kubera we, ahubwo kubera abandi. Dusabire n’abemera batunzwe n’Ukaristiya ntagatifu ngo bemere gutwarwa n’urukundo tuvoma kuri Kristu watwitangiye wese ntacyo asigaje. Yaduhaye n’umubyeyi we Bikira Mariya. Uwo Mubyeyi wacu twaherewe ahakomeye aturengere kandi adusabire. Mbifurije imyiteguro myiza ya Pasika na Pasika nziza, ihindura ubuzima bwacu n’isi ikaboneraho guhinduka. Amen.

Padiri Alexis MANIRAGABA