Catégories
Inyigisho

Yezu niwe udutsindira urupfu akaduha ubuzima

Inyigisho yo ku cyumweru cya 5 cy’Igisibo, Umwaka A, 2014

Ku ya 06 Mata 2014

Bavandimwe amasomo tuzirikana kuri icyi cyumweru cya 5 cy’igisibo turayasanga: Ezk 37,12-14;Rom 8,8-11;Yh11,1-45.

Mu minsi 15 tuzahimbaza Pasika ya Nyagasani, ishingiro ry’ibyo twemera kandi twizera binarimo bwa buzima buzira gupfa dukesha Yezu watsiratsije urupfu bityo agakingurira amarembo y’ubuzima twe abamwemera.

Nyuma yo kuzirikana mu byumweru byashize ku munyasamariyakazi, ku mpumyi yabuvukanye, amasomo yo kuri icyi cyumweru aradufasha kuzirikana ku buzima dukesha Kristu we ufite ububasha bwo gutsinda urupfu. Ni n’amasomo kandi yafasha twese ababatijwe kumva ubuzima bw’abana b’Imana buturimo kuko natwe twapfanye na Kristu igihe tubatijwe. Aya masomo kandi yagombye kurushaho gutera inyota y’ubuzima nyabuzima abigishwa bacu bazahabwa batisimu mu gihe cya bugufi.

1.Urupfu, ukuri kutugora kwakira

Mu buzima bwacu busanzwe tugira ibidushimisha, ibitubabaza, ibidutera ubwoba. Muri ibyo bidutera ubwoba harimo n’urupfu, uko kuri(réalité) tudapfa kwakira mu buryo butworoheye. Nyamara nubwo twarutinya dute, Ijambo ry’Imana riradutinyura rikanadusaba kudafata urupfu nk’ishyano cyangwa umuvumo ahubwo nk’ikiraro tugomba kwambuka kikadufasha kugera iwacu h’ukuri aho ubuzima butongera gupfa. Icyakora ibyo bikanatwibutsa kubaho tubiharanira mu mibereho yacu ya buri munsi. Iyo tugiye gushyingura abacu usanga turira, tugira tuti : ‘’Nyagasani yaba aretse kumutwara doreko twari tukimukeneye ‘’, nyamara tuba twibeshya kuko Nyagasani akunda abo yaremye kuturusha, bityo n’imigambi abafiteho tukaba tutagomba kuyivangamo no kwiha kuyigiraho ijambo. Natwe ku bijyanye n’urupfu tujye tuvuga mu kuri nk’abanyarwanda tuti: ‘’Iyo Nyirumuringa aje utega ukuboko’’. Amasomo yo kuri icyi cyumweru cya gatanu cy’igisibo yagarutse ku rupfu ariko cyane cyane ku buzima nyuma yarwo. Urupfu si ishyano n’umuvumo kuko na Yezu Kristu yarunyuzemo kandi rwazaniye n’isi umukiro.

2.Ubuzima bwacu tubukesha Imana yonyine

Abakristu benshi bafite umuco mwiza wo gusoma Ijambo ry’Imana bazi ibonekerw rya Ezekiyeli dusanga mu mutwe wa 37 w’igitabo cye aho dusanga umugani w’amagufa yumiranye. Isomo ririmo rikomeye ni uko Imana ariyo Soko y’ubuzima, no gusubiza abapfuye ubuzima ntibyayinanira, koko rero nta cyo Imana idashobora.

Umuhanuzi Ezekiyeli mu magambo meza yuje ihumure arabwira umuryango wa Isiraheli ko nta buzima ufite, ubucakara urimo mu gihugu cy’amahanga bunajyanye nuko bariho batariho mbese bameze nk’abari mu mva. Nyagasani arabatangariza ko agiye kubaha kongera kubaho.

Uwitwa umukristu wese iyo atihenze ashobora kubona mu buzima bwe bimwe mu bimenyetso by’ubuzima budafashije, ubuzima butari bwo, hahandi usanga asa n’uri kurushya iminsi atumva Imana muri we. Icyo gihe aba agomba kwegera kurushaho Nyagasani Soko y’ubuzima ngo yongere amuremareme. Ijambo rye rikwiye kwizerwa we ugira ati: ‘’Ngiye gukingura imva zanyu nzabavanemo, mwebwe muryango wanjye”(Ezk 37,12). Mu Ndangakwemera yacu duhamyako icyatumye Yezu amanuka mu ijuru ari twe abantu no kugira ngo dukire. Imana rero ntishaka ko duhera mu rupfu twishoramo,ishaka ko tuvamo tukabamo. No mu ivanjili ya none Yezu abwira Lazaro gusohoka mu mva nkuko abisaba buri wese. Uwo ukunda ntiwamwifuriza ikibi,a bo Imana ikunda ari bo twe Imana itwifuriza ubuzima.

3.Ukwemera ni wo muti wo kudapfa

Mu ndangakwemera yacu twiyibutsa kandi duhamya ko dutegereje izuka ry’abapfuye n’ubugingo bwo mu gihe kizaza.Uko kuri dukomeyeho nta handi gukomoka hatari ku izuka rya Kristu. Koko rero twiyibutsako ko abapfuye bizeye Kristu kandi bamwemera byose bitarangirira aho. Yezu abwe mu magambo yabwiye Marita yabigarutseho bityo ahumuriza ababaho bamwizeye ndetse anatumara intimba n’ishavu ku bapfuye bamwemera : “Ni jye Bugingo n’izuka unyemera wese n’aho yaba yarapfuye azabaho ,byongeye kandi uriho kandi akanyemera ntateze gupfa” (Yh11,26).

Izuka rya Lazaro nkuko tubibona muri iyi vanjili uko yanditswe na Yohani ni cyo kimenyetso cya nyuma Yezu yakoze kandi ibimentso byose yakoraga nta kindi byari bigamije usibye gukomeza ukwemera. Kwemera ko Imana ishobora byose , Isumba byose na bose, ishobora no gusubiza ubuzima ababubuze kuko ariyo mugenga wabwo.

Amagambo Yezu yabwiye Marita akwiye kudukomeza twe aba Kristu ndetse mu buzima bwacu aho kubaho duhangayikishijwe n’urupfu ngo ruzaza ryari? Ngo twakora iki ngo turuhunge? Tukabaho twihatira kubona umuti warwo urutsiratsiza.Uwo muti nta wundi ni ukwemera. Abafite ukwemera ntibapfa natwe muri icyi gisibo dukure mu kwemera,aho kubaho duhangayikishijwe no gupfa,niduhangayikishwe nuko ukwemera kwacu guhagaze maze dusabe Nyagasani aguhe gukomera.

4.Reka tujyane,natwe tuzapfane nawe

Kujyana na Yezu mu buzima bwacu biduha icyemezo cy’uko turi kujya heza,ndetse no gupfana new bikaduha ikindi cyemezo cy’ubuzima nya buzima. Benshi iyo batekereza ukuntu Tomasi yatinze kwemerako Yezu yazutse bashobora kwibeshya ko atamukundaga bihagije. Nyamara kuko Yezu nta numwe mu be ashakako azimira, yasanze Tomasi aramwiyereka, amufasha kugera ku kwemera gushyitse. Amagambo ya Tomasi yo kwiyemeza kujyana na Yezu aho rukomeye atanashidikanyako umuntu yahasiga ubuzima araturarikira gufata ibyemezo by’ubuzima bikomeye turi kumwe na Yezu. Aho kwibeshya ko turiho nyamara turi kure ya Yezu, twakwemera gupfana nawe dore ko gupfana na we ari ko kubaho.Pawulo Mutagatifu arabitwibutsa: ‘’ Nidupfana nawe tuzabaho hamwe nawe(2Tm,2,11)

5. Tumenye guhitamo ubuzima

Amagambo dusoma mu gitabo cya Ezekiyeli kuri ciyi cyumweru aratwibutsa ibyo kubaho tubikesha Nyagsani: ‘’Nzabashyiramo umwuka wanjye mubeho’’(Ezk 37,14) twayahuza cyane n’ubuzima Lazaro yasubiranye abukesha ububasha bwa Yezu Kristu. Uko Lazaro asohoka mu mva ameze ku bw’ijambo ryuje ububasha rya Kristu bishushanya uko natwe tubayeho tumeze. Lazaro yari aboshye ibiganza n’ibirenge kandi mu maso hagipfukishije ibitambaro.

Ese niba tuvuga ibyo guhitamo ubuzima twavuga iki ku bakristu batagira umutima wo gutanga ku byo batunze ngo baramire uwo bagize icyo basumbya babigiriye Imana? Abo ibiganza byabo biraboshye.Twavuga iki ku batabona imbaraga zo kujya gusenga,gukora ibikorwa by’urukundo nyamara mu bitaramo by’isi n’ahandi hari ibirangaza bya none ntibahatangwe.Abo nabo baboshye ibirenge.Twavuga kandiko n’uwirengagiza ukuri akauryamira, ntarishye yubura amaso ngo abone igikwiye gukorwa cyagirira abandi akamaro nawe ameze nk’ufite mu maso hagipfukishije ibitambaro.

Bavandimwe kumenya guhitamo ubuzima ni ukwemera mbere na mbere ubupfu rwacu tukabushyikiriza Kristu natwe tukamusaba kumva ijwi riranguruye rivuye mu kanwa ke rigira riti: “ngwino, Sohoka’’. Imva zacu ni nyinshi ni ibyo byose bitubuza kwisanzura ku bavandimwe bacu,bituma tubishisha bakatwishisha.Bikaba byiza kuduhunga kuruta uko batwegera. Amashyari,inzangano,amakimbirane y’amaoko yose,imivurungano n’ibindi nk’ibyo ni bimwe mu bidakwiye aba Kristu.Wakurikira ute Kristu ukiri mu mva.Kugirango tumukurikire ni ngombwa kuzisohokamo. Muri iki gihe gito dushugaje mu gisibo tubigire umugambi kandi bizashimisha Imana.

Bavandimwe mu gusoza nakwifuriza buri wese gukomeza gukura mu kwemera.Yezu amaze kuzura Lazaro ngo benshi mu bayahudi baramwemeye,icyakora si bose.Natwe duharanire kuba mu bamwemera bahereye ku magambo meza y’ubuzima atubwira no ku bimenyetso byinshi adahwema gukora mu buzima bwacu. Twemere kumva ijwi rye ridutegeka kuva mu bupfu bwacu maze dukunde tubeho.

Mugire icyumweru cyiza!

Padiri Fraterne NAHIMANA