Zuba-rirashe yaraje

“NIHASINGIZWE NYAGASANI, IMANA, WATUMYE ZUBA-RIRASHE ADUSURA”

Inyigisho yo ku ya 24 Ukuboza, mu gitondo

Amasomo: 2 Samweli 7,1-5.8b-11.16   Luka 1,67- 79

Harabura amasaha makeya tugahanika amajwi, abashoboye tugacinya umudiho, abandi bagashayaya tugira tuti: “Miryango y’isi yose, nimugire Noheli nziza; Umuremyi w’isi yose yatashye iwacu mu bantu”. Uwo turi butaramire, turi bushengerere, turi buvugirize impundu nta wundi ni Zuba-rirashe. Nyaguharirwa ibisingizo n’ikuzo, wemeye kuza kudusura kubera impuhwe Imana yacu iduhozaho. Urwo ruzinduko dukomeze kurwitegura, buri wese ategure kandi asukure aho ari bumwicaze, maze akamutuza mu mutima we, kuko ari yo ngoro imwizihira.

Muri iki gitondo rero, turazirikana ineza yagiriwe inyoko-muntu, ikadusesekaraho inyuze mu bantu bemeye kuyakira, iyo neza ni Yezu Kirisitu we Rumuli nyarwo rukamurikira abari batuye mu mwijima w’icyaha n’urupfu, nuko akatuyobora mu nzira y’ibyishimo n’amahoro. Imana mu kudusesekazaho impuhwe zayo, yifashishije abantu. Muri abo reka tuvuge none Zakariya, se wa Yohani Batisita.

Ivanjiri tumaze kumva, iratwereka Zakariya wasazwe n’ibyishimo maze akuzura Roho Mutagatifu, agasingiza Imana. Muribuka ko yari umuherezabitambo, wari intungane, agakurikiza amategeko n’amabwiriza yose ya Nyagasani adatezuka, ariko akaba nta mwana yagiraga kuko umugore we Elizabeti yari ingumba, bari no mu zabukuru. Nyamara burya inzira n’imigambi by’ Imana uko ari inshobera-muntu, Imana yumvise ugutakamba kwe, imusezeranya kuzabyara umwana w’umuhungu. Nyamara nk’umuntu w’umunyantege nke, yabonaga ko ibyo kugira umukomokaho byarangiye. Ibyo byatumye ashidikanya ku mugambi w’Imana yumva bidashoboka, ni uko asabye ikimenyetso kimuhamiriza ukuri kw’iyo nkuru nziza, Malayika Gaburiheli amubwira ko guhera uwo munsi agiye kuba ikiragi kuzagera igihe Imana yigeneye.

Zakariya yaratashye, nyuma y’igihe isezerano rirasohora, ni uko amaze gutangaza izina ry’umwana we Yohani, ururimi rwe ruhita rugobodoka, na we ntiyazarira atangira gusingiza Imana. Ntibyari byoroshye ndetse bamwe bashobora kubifata nk’igihano cy’Imana, mwibaze namwe kumara amezi icyenda yose utavuga, utunzwe no guca amarenga, kandi warigeze kuvuga.

Nyamara ahubwo iyo yari impano, Imana yamuhaye kuko yari asabye ikimenyetso gihamya ukuri k’ubutumwa yabwiwe na Malayika w’Imana. Icyo gihe yamaze atavuga, cyamubereye igihe cyiza cyo gucengera Ijambo ry’Imana no guhora yibuka ko ineza yayo igenera abayubaha. Ese tujya tuzirikana ko Imana itabereyeho guhana abayo no kubaremerera, ahubwo ko ibitubaho byose iyo tubyakiranye umutima mwiza, bituviramo umugisha wo kumenya kwakira ineza n’urukundo by’Imana, aho kwijujuta kuko ibintu bitagenze uko twabyifuzaga.

Ni byo byatumye nyuma y’igihe kirekire atavuga, ubwo yateruraga kuvuga, yinikije ashimira kandi asingiza Imana, aboneraho guhanura yibutsa ko Imana yasuye Umuryango wayo kandi ko igihe kigeze ngo iwurokore. Indirimbo isingiza Imana yinikije, itwibutsa isezerano Imana yagiriye abayo ko izabacungura ikabakiza icyaha n’urupfu.

Ese tujya twibuka gufata umwanya wacu tugashimira Imana ibyo yatugiriye cyangwa idahwema kutugirira, haba kuri twe ubwacu, mu muryango wacu cyangwa se mu gihugu cyacu. Muvandimwe unteze amatwi, jya wibuka gushimira Imana, kandi ineza yose ugiriwe ujye umenya kuyisingiriza Imana yaremye kandi igaha umutima mwiza uwayikugiriye. Abakuru bati: “Ibiganza bidashimira bihina ibiganza by’ugaba cyangwa utanga”. Zakariya atubere urugero, kandi tujye tuzirikana, ubu buhanuzi bwe, dusanga muri iki gisingizo twumvise.

Uyu munsi, dore turasoza igihe cya Adiventi twatangiye, igihe cyo kwitegura umucunguzi wacu, Yezu Kirisitu: Ese koko nashoboye gufata umwanya nitegura kwakira Yezu uje unsanga ngo tubane, ambere urumuri rumurikira ubuzima bwanjye? Ese mpimbajwe no kumwitegura nzirikana Ijambo rye   no mugusabana na we mu isengesho, ryaba iryanjye bwite, iryo mu ikoraniro cyangwa iry’abo tubana? Buri wese yibaze, arebe igikwiye.

Nk’uko Yohani yabaye integuza ikwiye y’amaza ya Nyagasani, natwe abahisemo kumubera abayoboke tukitwa abe ari bo “ABA-KRISTU” niduhagarare gitwari, duhamye ko ari Muzima ; Emanweli, Imana turi kumwe. Uwo Emanweli yuje ububasha budukiza, butumara ubwoba, budutera imbaraga, tukabasha gutsindisha icyiza ikibi, urukundo rugahashya urwango, ibyishimo bigahashya agahinda, amizero agatsinda ukwiheba, ishyaka tumufitiye rigatsinda ubwoba butuma duhemuka. Yezu ni umukiza watsinze icyitwa icyaha n’urupfu, ni uko akaba ari we Zuba-rirashe: akadususurutsa atumurikira ngo tumukurikire kandi tumukurikize tutadandabirana.

Ni uko rero nk’uko Imana yakuye Umwami Dawudi inyuma y’amatungo, ikamugira umutware wa Isiraheli, umuryango we. Ni na ko natwe nitwiringira Impuhwe z’Imana, Zuba-rirashe azadushoboza ibyo dukeka cyangwa tubona bitoroheye umwana w’umuntu, kuko nta kinanira Imana. Azagendana natwe mu byo dukora, aduhe ubwenge bwo kumenya ugushaka kwe kandi adushoboze ibimuhesha ikuzo natwe bikaturonkera amahoro n’umukiro.

Hamwe n’abanyu bose, mbifurije imyiteguro myiza y’iyi minsi mikuru tuzahimbaza yose, izatubere akanya ko kunagura umubano dufitanye n’Imana yacu ariko tutibagiwe ko mbere ya byose icyo Zuba-rirashe atwifuzaho, ari uko twakwivugurura tukabana neza na bagenzi bacu, mu mahoro, mu bworoherane n’ubwizige nk’abana b’Umubyeyi umwe, kuko ari byo bihesha ikuzo Imana SE. Amina

Padiri Anselimi MUSAFIRI

consequat. Praesent amet, et, eget venenatis Phasellus Curabitur