Catégories
Inyigisho UMWAKA B

Umutungo w’umwibano ni ubusa buyoyoka

Ku wa kabiri w’icyumweru cya 25 B gisanzwe,

25 Nzeli 2012 

AMASOMO: 1º.Imig 21, 1-6. 10-13

2º. Lk 8,19-21 

Umutungo w’umwibano ni ubusa buyoyoka 

Duhereye ku magambo yo mu Gitabo cy’Imigani kugira ngo twumve icyo YEZU ashaka kutwigisha uyu munsi. Nta muntu n’umwe utifuza gutunga no gutunganirwa. Igihe umuntu atangiye kubaho akenera iby’isi ngo bimutunge. Iyo akiri muto, byose abihabwa n’ababyeyi be. Ugize ibyago akaba imfubyi akivuka, na we agobokwa n’abagiraneza. Ibimubeshaho, ni bo abikesha. Uko umuntu akura ariko, ni ko yitoza gukora uko yatojwe, bityo akagenda yibonera ibimubeshaho. Nta wabona ibimubeshaho atabiruhiye. Iryo ni iteka ryatangajwe nyuma y’icyaha cy’inkomoko. Hari abakora cyane bakabona byinshi ndetse n’ababakomokaho bakazabihabwaho umurage. Hari n’abandi bakora ariko ntibatunge ibya mirenge. Hari n’abandi bagira amayeri yo gusakuma ibyabo n’iby’abandi! Abo banyura mu nzira izira. Kwifuza iby’abandi n’imitungo yabo, gushaka kwikubira byinshi, ngiyo inzira ishora mu makuba ab’isi. 

Mu nama nyinshi kimwe mu bitabo by’ubuhanga kiduciramo imigani, tuvanamo isomo ry’uko ibyo twageraho twibye biduhindura ubusa buyoyoka: umutungo w’umwibano ni ubusa buyoyoka. Ubundi isi yifitemo ubukungu buhagije ku buryo nta wakagombye kubura ibimubeshaho. Byose byicwa n’iharaka rya bamwe bahora bashaka kwikubira. Ni yo mpamvu usanga abavandimwe bakembana bapfa iby’isi, ugasanga abandi batemana kubera kurengera. Ni na yo mpamvu usanga ibihugu bihanganye kandi ahanini n’imitungo yabyo isa n’aho yiharirwa n’abishyize ku ntebe. Tuvuze abishyize ku ntebe dushaka kuvuga ko n’ubutegetsi ubwabwo usanga ababugeraho hirya no hino ku isi atari ko bose baba babikwiye: muri bimwe mu bihugu bikennye cyane cyane kera wasangaga abaharanira kwicara ku ntebe z’ubutegetsi arabimirije imbere amaronko babukamamo! Ibi ni agahomamunwa kubona haboneka ubukene n’inzara hirya no hino akenshi bitewe n’uko abiyemeje kuyobora isi bikurikiranira inyungu zabo baronka basa n’aho bibye ibya rubanda! 

Nta nzira yindi nziza izatuma isi igenda itsinda amage y’inzara n’ubutindi usibye kwemera Ijambo YEZU KRISTU atugezaho. Amahirwe yo kubarirwa mu bavandimwe ba YEZU, ni yo azatugeza ku byiza. Abiyemeje kwigisha iryo Jambo ry’Umukiro nibakomeze gushyira imbere ubutungane n’ubutabera binyura Uhoraho kuko ibitambo byonyine bidahagije. Ubwo butungane n’ubutabera bukwiye kwigishwa igihe n’imbura gihe kugira ngo umururumba w’abantu ucogore haganze amahoro n’ituze mu bihugu byose. 

YEZU KRISTU ASINGIZWE

UMUBYEYI BIKIRA MARIYA ADUHAKIRWE UBU N’ITEKA RYOSE. 

Padiri Cyprien Bizimana