Umutima wawe uzabe umunyamurava

Inyigisho yo ku wa Kabiri w’ Icyumweru cya 7 Gisanzwe C, kuwa 26 Gashyantare 2019

Amasomo 1º. Sir 2,1-11; Zab 37(36),3-4,18-19,27-28ab,39-40ac; 2º.Mk 9,30-37

Bavandimwe Kristu Yezu akuzwe,

Kuri uyu munsi wa kabiri w’icyumweru cya karindwi gisanzwe, Yezu Kristu aje atugana adusaba kumwigana mu kudahemuka mu bigeragezo     ( umusaraba), no kwiringira Imana mu bihe byose. Ibyo turabishishikarizwa dufashijwe n’amasomo ya liturjiya ya none.

Mu isomo rya mbere ryo mu gitabo cya Mwene Siraki, Umwanditsi arerurira buri wese wiyemeje gukorera Imana, ko ataabonye urukingo rumukingira ibigeragezo. Igitabo cya Yobu, kibitugaragariza ku buryo butomoye. Ari uwemera cyo kimwe n’utemera bagerwaho n’ibigeragezo byo muri iy’isi: indwara z’ibyorezo, amapfa n’inzara, intambara z’urudaca, urwango n’ishyari, uburakari n’umujinya, gukandamizwa n’akarengane, ndetse n’urupfu, twese biradushyikira.

Uyu mugabo w’umuhanga aratugira inama isumba izindi y’uko twakwitwara nk’abazi Imana igihe twugarijwe. “ ibikubayeho byose ujye ubyemera, kandi ujye wihanganira amagorwa aguca intege.” Iyi ni imyitwarire dusabwa kugira nk’abazi Imana kuko ibibazo byose duhura nabyo muri iyi si atari ko byose tubibonera ibisubizo, hari ibyo biba ngombwa ko tubana nabyo, twabyitwaramo neza bikatubera urufunguzo rudukingurira ijuru, kuko hahirwa abihangana. komeza… “Umutima wawe uzabe umunyamurava”

Yezu araduhamagara ngo tumubere abahamya mu bantu

Inyigisho yo ku cyumweru cya 5 gisanzwe, umwaka C, ku wa 10 Gashyantare 2019

Umunsi mpuzamahanga w’abarwayi

AMASOMO: Is 6, 1-2a.3-8; Ps 137; 1Cor 15, 1-11; Lc 5, 1-11. 

Kristu Yezu akuzwe. Kuri iki cyumweru cya gatanu gisanzwe C , umunsi mpuzamahanga w’abarwayi, amasomo matagatifu aradufasha kuzirikana ku muhamagaro. Hari indirimbo dukunda kuririmba tugira tuti: “ Yezu araduhamagara,…. ngo tumubere abahamya mu bantu.”

Ni koko Imana iraduhamagara twese. Mu isomo rya mbere  twumvise ihamagarwa rya Izayi, umuhanuzi. Iri hamagarwa rye, riratwumvisha neza uko Imana iduhamagara iteye: ni Nyirubutagatifu ! Uwo ihamagara ni umuntu w’iminwa yanduye, agatura mu muryango wahumanye. Imana rero iduhamagarira ubutagatifu bwayo. Ntawayegera itamuhamagaye kandi uwo ihamagaye iramusukura,  ikamukiza ibyaha nk’uko yahumanuye umuhanuzi Izayi. Ubuzima tubamo buri munsi, ntibusiba kutugaragariza ko Imana idatora abashoboye, ahubwo ishoboza abo yatoye.

Isomo rya kabiri riratwibutsa ko twahamagawe muri Yezu Kristu. Ko uwakiriye umuhamagaro wa Nyirubutagatifu ahora yibuka Yezu. Kwibuka Yezu ni ukwibuka urupfu rwe n’izuka rye ryadukijije. Hanyuma ibyo yibuka akaba ari na byo ahamya, nk’uko duhora tubisubiramo muri buri Gitambo cya Missa tugira tuti : « turamamaza urupfu rwawe Nyagasani, tugahamya n’izuka ryawe kugeza igihe uzagarukira mu ikuzo ».

Uko ibyanditse bitagatifu bibiduhishurira, mu Isezerano rya Kera ni Imana Data yahamagaye Izayi, mu Isezerano rishya ni Yezu Kristu, Umwana w’ikinege w’Imana, uhamagara. Nk’uko yahamagaye Petero, Andreya, Yakobo na Yohani, Pawulo n’abandi benshi natwe araduhamagara. Yaduhamagaye twiga Gatigisimu, adutora tubatizwa, dukomezwa, dushyingirwa, tuba abasaserdoti cyangwa twiyegurira Imana. Aduhamagara buri gihe cyane cyane mu ikoraniro ryo ku cyumweru, ku munsi wa Nyagasani. Azakomeza kandi aduhamagarire kuzicarana nawe Ijabiro mu Bwami bwe.

Bavandimwe, muri Palestina, mu gihe cya Yezu, umwe mu mirimo y’ibanze y’abagabo baho wari uburobyi. Abahanga mu kuroba, batubwirako uwo murimo utanga umusaruro iyo ukozwe mu ijoro. Bityo byatumaga barara ijoro ryose baroba, ari nayo mpamvu hagomba kuba nta bagore baba barakoze uriya mwuga kubera imvune yawo.

Mu ivanjili tumaze kumva, ngo Simoni ari kumwe na bagenzi be, bari baraye bagotse ijoro ryose ariko babura na mba!!! Ibintu bibabaje. Mu yandi magambo umwuga wabo byari byanze, bari bameze nk’ikipe imaze gutsindirwa ku kibuga yitorezaho. Icyajyaga gukurikiraho nta kindi usibye guhindura umwuga. Ngo Yezu amaze kwigishiriza mu bwato bwa Simoni niko kumubwira ngo “Erekeza ubwato mu mazi magari, murohe inshundura zanyu murobe”. Yezu ababwirango barohe inshundura zabo mu mazi magari, ni uko yabonaga ko bo batinye ahari amazi maremare, ko bigumiye ku nkombe, ahatari na mba.

Bakiristu bavandimwe, kuba umukiristu ni urugamba nk’uko tujya tubiririmba, ni ugushora mu mazi magari, ni ukugera n’aho dushobora guhara amagara yacu kubera ukuri Yezu yatuzaniye. Ariko uwemereye Yezu akamuyobora, uwumvise Ijambo rye akarikurikiza , byose biramuhira. Ukuri kwacu ni Yezu Kristu. Niko byagenze kuri Simoni. Yagize ati “Ariko ubwo ubivuze, ngiye kuroha inshundura’. Baraziroha maze bafata amafi menshi cyane, inshundura zabo zenda gucika.” Nta kintu na kimwe kiza twakwigezaho tudafashijwe n’Imana. Kuriya kurara ijoro ryose baroba nyamara bakabura na mba , bishushanya ya nyota y’ibintu, amafaranga, ubutegetsi, ibyubahiro, duhorana, nyamara itazigera ishira. Imana yonyine niyo ishobora guhaza imitima yacu. Imitima yacu yaremewe Imana iyo dushatse kuyishyiramo ibindi bitariyo, ntiyuzura bibaho. Nibyo Mutagatifu Agustini yavuze agira ati “Umutima wanjye urahangayitse kandi ntuzigera utuza bibaho utaratura mu Mana”.

Bakiristu bavandimwe, ni uwuhe mwanya duha ijambo ry’Imana mu buzima bwacu? Ese tujya twibuka ko nta na gito twakora mu byo dushinzwe tutabifashijwemo n’Imana? Imbaraga za muntu burya ni nkeya, ndetse ni nke cyane. Iyo twirengagije Imana mu buzima bwacu, natwe birangira tugokeye ubusa ubuzima bwacu bwose.

Ririya joro ryose Simoni na bagenzi be baraye nyamara bakabura na mba, rinashushanya ijoro ryari mu mitima yabo. Yezu, we Rumuri rw’amahanga ahageze, bararobye inshundura zenda gucika. Ese jyewe, wowe, buri wese, twese, ni uwuhe mwanya duha Yezu mu buzima bwacu ? Ese Yezu ni we Rumuri rwacu ? Cyangwa dufite ibindi twimitse mu mitima yacu; ibintu, amafaranga, abantu b’ibikomerezwa n’ibindi?

Ubundi tumenyereyeko Yezu yigishirizaga mu nsengero. Nyamara yahisemo kwigishiriza mu bwato. Ibintu bitari bisanzwe. Ni ikimenyetso ko buriya bwato bwashushanyaga Kiliziya. Kiliziya ni ababatijwe bose. Ni jyewe, ni wowe. Natwe uyu munsi turasabwa gushora mu mazi magari, maze turohore bagenzi bacu bakiri mu nyanja y’icyaha, y’inzangano, y’ubusinzi, y’ubusambanyi, y’ubusambo, y’ubuhemu, mbese ba bandi bataramenya Imana, babandi bataragerwaho n’urumuri rw’Ivanjili.

Bakiristu bavandimwe, nk’uko Petero na bagenzi be basize byose ( na ya mafi barobye ) bagakurikira Yezu, buri wese yakwibaza ati : ‘ jyewe uyu munsi ni iki nza gusiga kugirango nkurikire Yezu? Hari byinshi binzitira mu bukiristu, hari ingeso zananiye kureka. Uyu munsi nanjye ndasabwa kureka bya bindi byose bimbuza kubona Yezu.

Ikintu kiranga umuntu wese wahuye n’Imana, wahuye na Yezu, ni uguhinduka. Ngo Simoni Petero abibonye apfukama imbere ya Yezu avuga ati “Igirayo Nyagasani, kuko ndi umunyabyaha”. Mu isomo rya mbere ubwo umuhanuzi Izayi yahuraga n’Imana, yaragize ati “Ndagowe! Bincikiyeho kuko ndi umuntu w’iminwa yandavuye, ngatura mu muryango w’iminwa yahumanye”. Pawulo intumwa we ati “Sinkwiriye no twitwa intumwa kuko natoteje Kiliziya y’Imana”.

Bakiristu bavandimwe, natwe tumaze guhura na Yezu mu Ijambo rye. By’umwihariko, mu kumuhabwa wese m’Ukaristiya y’iki cyumweru, tumusabe aduhe guhinduka maze tubashe kujya kumwamamaza mu bataramumenya.

Ntitwibagirwe kandi gutura abarwayi bacu bose Yezu Kristu Umukiza wacu, tubamuzanire abakize. Ari abarwaye indwara z’umubiri n’abarwaye iza roho bose tubamuture natwe tutiyibagiwe. Ibyo tubigire nk’umuhamagaro kuri uyu munsi mpuzamahanga w’abarwayi, tuzirikana ko ari ubutumwa bwacu kwita ku barwayi, igihe cyose na hose.

NYAGASANI YEZU NABANE NAMWE!

Inyigisho yateguwe na Padiri Emmanuel NSABANZIMA, ukorera ubutumwa muri paruwasi Gisagara, diyosezi ya BUTARE.

Isi yose yabonye agakiza k’Imana yacu

Inyigisho yo k’Umunsi Mukuru wa Noheli, 25 Ukuboza 2018

Amasomo :Iz 52, 7-10, Zab 98(97); He1, 1-6; Yh1,1-18

Mu mwaka wa 42 w’ubwami bwa Okutaviani Agosto,

Mu mwaka wa 06 kuri karinadari yacu,

YEZU KRISTU, Umwana w’Imana Ihoraho, nyuma yo gusamwa na Bikira Mariya ku bubasha bwa Roho Mutagatifu, Yavukiye I Betelehemu ya Yudeya,

Nuko Jambo yigira umuntu abana natwe.

Bavandimwe, umwe mu minsi mikuru ihimbazwa cyane kuri iy’isi ndetse tutabura kwemeza ko ari uwa mbere ni umunsi mukuru wa Noheli. Abe ari abakiristu cyangwa abandi batagira irindi dini basengeramo, umunsi wa Noheli barawuzi. Ubu winjiye mu nzu z’abantu batari bake, kabone n’abatari abakiristu, ushobora kuhasanga ikirugu. Umunsi mukuru wa Noheli ni umunsi mukuru utera ibyishimo abantu hafi ya bose atari ukubera ubukiristu gusa, ahubwo kuko ari umunsi usanga imiryango yose iba yishimiye kuba hamwe. None ku bakiristu by’umwihariko, uyu munsi uvuze iki?

Ku Mukristu Noheli ni umunsi ukomeye cyane mu mateka y’ugucungurwa kwa muntu. Burya muri lituljiya ya Kiliziya, uretse iminsi yo guhimbaza Iyobera rya Pasika buri mwaka, nta wundi munsi mukuru uruta uwa Noheli ariwo abakristu duhimbazanya ibyishimo ivuka ry’Umukiza n’Umwami wacu Yezu Krsitu, Jambo wigize umuntu akabana natwe, Imana ubwayo igatura muri twe “ Imana turi kumwe: Emmanuel”. Sinzi niba tujya twiyumvisha uburyo ari kintu gikomeye kuba Imana yigira umuntu! Ni Inkuru itagira iy’isimbura mu mateka ya muntu.

Amasomo Matagatifu yo kuri uyu Munsi Mukuru aradufasha kubyumva neza atsindagira ingingo imwe y’ingenzi: Imana yigaragarije umuryango wayo kandi irawukiza. Ibyo bikaba impamvu y’ibyishimo ku batuye isi bose:Nitwishime kandi tunezerwe kuko twacunguwe.

Umuhanuzi Izayi ati: “Matongo ya Yeruzalemu nimuhanike murangururire icyarimwe amajwi y’ibisingizo, kuko Uhoraho ahumurije umuryango we agacungura Yeruzalemu. Uhoraho agaragaje mu maso y’amahanga ububasha bw’ukuboko kwe gutagatifu, bityo impande zose z’isi zizabone agakiza k’Imana yacu”. Aya magambo y’umuhanuzi Izayi ntiyavugaga ibiriho, ahubwo yahanuraga ibizaza na none agendeye ku byabaye cyangwa se ibiriho. Ari mu cyerekezo cy’amizero y’umuryango wa Israheli Imana yari yaritoreye ngo uzabe inzira Umucunguzi azacamo aje mu bantu. Kandi ari nako ategura abazamwakira. Uburanga bwa Jambo wigize umuntu bwose buri muri aya magambo y’Umuhanuzi Izayi. Ibyo avuga biratangaje koko, nyamara ntabwo avuga uwo yabonye, ahubwo ni uwo yari ategereje hamwe n’umuryango w’abemera bari mu rugendo rugana amaza ya Nyagasani. Aravuga amagambo ahumuriza umuryango w’Imana ati “Mbega ngo biraba byiza kurabukwa mu mpinga y’imisozi, ibirenge by’intumwa izanye Inkuru nziza, ivuga amahoro igatangaza amahirwe, ikabwira Siyoni iti Imana yawe iraganje!” Igihe rero cyarageze, ubuhanuzi bwa Izayi buruzuzwa, kandi ibi byabaye mu gihe cy’amateka azwi neza, nk’uko twabyibukije haruguru, mu myaka twagaragaje n’ubwo ari ukugereranya by’abahanga b’iy’isi. Yezu Kristu Imana nzima yaje muri twe aciye bugufi, ntiyaje ahutaza ahubwo yaje agaba amahoro, ni Umwami w’Amahoro. Nk’uko Izayi yari yarabihanuye ko ari intumwa izanye Inkuru nziza, ivuga amahoro n’ibindi byiza byose, niyo mpano idasanzwe natwe atuzaniye twese kuri uyu munsi wa Noheli ya 2018. Burya umunsi wa Noheli, ni umunsi tugomba kuzirikana ku mahoro,Urukundo n’Ineza twaronkewe n’Umukiza wacu Yezu Kristu. Ibyo bigatuma natwe tubiharanira kuri twe ubwacu ndetse no kubavandimwe bacu, tubivomye ku isoko ariyo Jambo wigize Umuntu.

Nibyo Yohani umwanditsi w’Ivanjili yatwibukije muri aya magambo meza atangiza inyandiko ye agira ati: “Mu ntangiriro ya byose Jambo yariho, kandi Jambo yabanaga n’Imana, kandi Jambo akaba Imana. Ubwe mu ntangiriro yabanaga n’Imana. Ni we ibintu byose bikesha kubaho, nta n’ikiremwa na kimwe cyabayeho bitamuturutseho.”

Nkuko nta kiremwa na kimwe cyabayeho bitamuturutseho, ni nako nta mahoro, nta Rukundo, nta hirwe na mba muntu ashobora kugeraho atabigabiwe na We, kuko hanze y’Imana nta buzima.

Yohani akomeza atubwira ko muntu mu buhumyi bwe yagiye yanga kwakira Urumuri rwamurasiyeho akihamira mu mwijima. Niyo mpamvu no kuri uyu munsi twizihiza Noheli, ivuka ry’Umukiza, soko y’ibyiza byose, mu mpande zimwe na zimwe z’isi amahoro ari ntayo. Benshi baricana, baragambanirana, baracura imigambi y’ububisha, bari mu ngeso mbi n’ibindi bibi byinshi kuko Urumuri rwabarasiyeho ariko bagahitamo kwigumira mu mwijima. Ni agahoma munwa aho Umukiza aza ntitubimenye n’ababimenye bakanga kumwakira. Ntako atagira ngo atwegereze ibyiza twe tugahunga.

Hari urugero umuntu yaduhaye adushushanyiriza ikigereranyo cy’uko Imana yemeye kwigira umuntu, atwumvisha uburyo ari ukwicisha bugufi gukomeye kutagerwa n’ubinetse wese!

Yagiraga ati: “Dufate urugero ruto: tuvuge ko waba ufite amatungo, nk’inkoko wahaye ibyangombwa byose ngo zibeho. Ariko kumvikana bikananirana. Ni uko nyirazo, uko agerageje kuzikiranura ari hanze yazo bikananirana. Hanyuma kubera urukundo akunda inkoko ze, agahitamo kwigira inkoko, akazisanga, bakabana umunsi k’umunsi, bagasangira byose yewe kugera ku kigero cya nyuma cy’ubuzima bubi bwazo. Sinzi niba muri mwe hari uwakwemera kuba inkoko!

Noheli rero ni umunsi ukomeye, utwumvisha neza ibanga ryo kwicisha bugufi. Umwana w’Imana avukira mu kiraro cy’inka: “Yezu yigize umukene: ibyatsi ni byo byahi rwose. Uwaremyi ibintu byose yabuze abagaragu.”

Noheli ni umunsi w’iyuzuzwa ry’umugambi w’Imana wa kera na kare wo kuzatwoherereza Umucunguzi. Mu gihe muntu yari amaze kurenga ku itegeko ry’Imana akayisuzugura nk’uko tubisoma mu gitabo cy’Intangiriro ntabwo Imana yamuterera ngo aheranwe n’urupfu yari yigabije.Muntu agicumura Imana yateguye umugambi wo gucungurwa kwe, hari n’abahamya ko Imana yaremye muntu igamije kumucungura.

Ukwicisha bugufi k’uwemeye kwigira umuntu akavuka kuri buriya buryo bwo mu kiraro cy’amatungo, k’umukobwa nka Mariya w’intamenyekana, mu gace gakennye akarerwa n’umubaji Yozefu ni ikimenyetso gikomeye Imana itahwemye kugaragariza twebwe abantu ko ihitamo abaciye bugufi, abiyoroshya ngo ibakoreshe ibihambaye mu maso y’abantu n’aho abigira ibihangange bagacishwa bugufi. Ivanjili twazirikanye ejo mu gitaramo nayo yarabiduhamirije itwereka abantu batandukanye bari mu gisekuru Yezu Umwana w’Imana yavutsemo. Harimo indaya, abicanyi, abana bavutse mu busambanyi buherekejwe n’ubugambanyi, ibihubutsi byateje akaga umuryango w’Imana ukajyanwa bunyago n’abandi bafite imico itandukanye. Gusa ku bw’iherezo avuka ku mukobwa w’isugi utarangwaho inenge y’icyaha kandi afatanya mu burere bwa kibyeyi na Yozefu intungane!

Uwo mugambi wo kuducungura binyuze muri ubwo buryo ni nawo umwanditsi w’Ibaruwa yandikiwe Abahebureyi yatwibukije mu isomo rya Kabiri agira ati: “Imana imaze kubwira abasokuruza bacu kenshi no ku buryo bwinshi, ikoresheje abahanuzi, natwe muri iyi minsi turimo, ari na yo y’imperuka, yatubwirishije Umwana wayo, ari We yageneye kwegurirwa byose, akaba ari na We yabiremesheje byose iyo biva bikagera. Mwana uwo, ni We buranga bw’ikuzo ry’Imana n’ishusho rya kamere yayo, ni na We kandi uhagaritse byose ku bubasha bw’ijambo rye. Amaze rero kuhagira abantu ibyaha byabo, yicaye iburyo bwa Nyirikuzomu ijuru. Asumba atyo abamalayika kuko n’izina yahawe ritambutse kure ayabo.”

Bavandimwe, niba dushaka kubona ikuzo ry’Umukiza watuvukiye, niduce bugufi, tumusange, twegere Abamalayika n’abashumba batubimburiye mu kumuramya, maze tureke Urumuri yifitemo rutuboneshereze mu icuraburindi ry’inzira y’ukwemera kwacu ubu n’aka kanya.

Uwo Mwana w’Imana watuvukiye natwe tumugane mu kirugu mu bwiyoroshye bw’umutima utarangwaho uburyarya maze aduhe kwizihiza Umunsi Mukuru w’Ivuka rye ku buryo bukwiye nk’abakristu, hato tutaza gusanga natwe twabaye nk’abapagani tukizihiza Noheli mu bibindi n’amasafuriya!

Kuri mwese rero bavandimwe iyi Noheli nibabyarire imbuto z’ukwemera gushyitse kandi umwaka mushya tugiye gutangira uzababere umwaka w’umugisha urukundo n’amahoro.  NOHELI NZIZA  KURI BURI WESE.

Nyagasani Yezu watuvukiye abane namwe!

Inyigisho yateguwe na Padri Emmanuel NSABAZIMA, GISAGARA/BUTARE.

Mu kebo ntihazaburamo ifu kugeza Uhoraho agushije imvura

Ku cya 32 gisanzwe B, 11/11/2018

AMASOMO: 1º.1 Bami 17,10-19; 2º. Hb 9, 24-28; 3º. Mk, 12, 38-44

Uhoraho Imana ya Israheli avuze atya: Mu kebo ntihazaburamo ifu, amavuta yo mu keso ntazatuba, kugeza umunsi Uhoraho azagusha imvura ku butaka.”

Bavandimwe Kristu Yezu akuzwe,

Amasomo matagatifu twateguriwe na liturjiya y’iki cyumweru araduha umwanya wo kuzirikana ku bintu byinshi bifite akamaro mu buzima bwacu nk’abakristu. Muri ibyo harimo kugirira Imana icyizere, ibyo bikadufasha kugira ubuntu tutizigamye kugeza n’aho dutanga tutitangiriye itama. Amasomo ya none arabigarukaho ku buryo butomoye, ashingiye cyane cyane ku rugero rwiza rw’abapfakazi twumvise mu isomo rya mbere no mu ivanjili. Aba bombi icyo bahuriyeho, ni uko babashije kwigobotora igishuko cyo kwireba ubwabo, bagatanga icyo na bo bakwifuje kugumana kuko uko ni ko gutanga nyako. komeza… “Mu kebo ntihazaburamo ifu kugeza Uhoraho agushije imvura”

ut et, porta. quis, ut luctus