Inyigisho yo ku cyumweru cya 10 gisanzwe, Umwaka C, 2013

Ku wa 09 Kamena 2013

Yateguwe na Padiri Alexandre UWIZEYE

« Wa musore we, ndabigutegetse, haguruka ! » (Lk 7,11-17)

Bakristu bavandimwe ,

Ijambo ry’Imana tumaze gutega amatwi riratubwira ubuntu bw’Imana n’impuhwe zayo. Yezu yagaragaje impuhwe azura umwana w’ikinege w’umupfakazi. Si umugani cyangwa se igitekerezo. Ni ibintu byabayeho. Yezu yamuzuye ari ku manywa bose babireba. Aho byabereye ni hafi y’irembo ry’umugi wa Nayini, nko mu bilometero 10 mu majyepfo ya Nazareti aho Yezu yakuriye. Turebere hamwe abari bahari n’uko byagenze bityo dukuremo inyigisho itwubaka muri iki gihe turimo.

Inyigisho yo ku wa gatandatu – Umutima utagira inenge wa Bikira Mariya,C, 2013

Ku wa 08 Kamena 2013

Padiri Bernardin TWAGIRAMUNGU

Umunsi mwiza w’umutima utagira inenge wa Bikira Mariya

Bavandimwe, mbifurije umunsi mwiza w’umutima utagira inenge wa Bikira Mariya. Nta kuntu twakwibuka umutima mutagatifu wa Yezu ngo twibagirwe uw’umubyeyi we. Mu gihe twizihiza umunsi w’umutima utagira inenge wa Bikira Mariya ni ngombwa kwiyibutsa ubu buhanuzi bwa Simewoni burebana na Yezu n’umubyeyi we wari wamujyanye kumutura Imana muri Hekalu : «Dore uyu nguyu yashyiriweho kubera benshi muri Israheli impamvu yo korama cyangwa gukira, azaba n’ikimenyetso bazagiriraho impaka. Nawe kandi inkota izakwahuranya umutima. Bityo ibitekerezo biri mu mitima ya benshi bigaragare» (Lc 2, 34-35).

Ivanjii yaduteguriwe uyu munsi ntabwo itwereka umutima wa Mariya gusa ahubwo iratwereka umutima warangaga muri rusange umuryango mutagatifu w’i Nazareti wari ugizwe na Yezu, Mariya na Yozefu. Iyi vanjii itwigisha imigenzo myiza iranga urugo rwakiriye Kristu.

Imigenzo myiza ivuka mu mutima mwiza wa Yezu, Mariya na Yozefu

Umutima wa Bikira Mariya, Yezu na Yozefu ntabwo washoboraga kwibagirwa amasengesho yaberaga mu rusengero buri sabato kimwe n’ayaberaga i Yeruzalemu muri Hekalu. Bose barangwaga n’umutima wakira abandi. Bizeraga abaturanyi kandi nabo bakizerwa. Bitaga kukurangiza inshingano babazwa n’igihugu ndetse n’idini.

Inyigisho yo ku wa gatanu, Umutima Mutagatifu wa Yezu, C, 2013

Ku ya 07 Kamena 2013

Yateguwe na Padiri Bernardin TWAGIRAMUNGU

AMASOMO: Ez 34, 11-16; Zaburi ya 22(23);Rm 5,5-11; Lk 15, 3-7

Umunsi mwiza w’umutima mutagatifu wa Yezu

Bavandimwe, umunsi w’umutima mutagatifu utwibutsa kuzirikana ko Yezu ari umunyampuhwe n’umunyambabazi. Abashobora kujya mu misa byaba byiza baririmbye ya ndirimbo igira iti “Nyagasani agira impuhwe n’ibambe, atinda kurakara kandi akagira Ubuntu cyane”. Indi ndirimbo ya Zabuli yadufasha kumva icyo uyu munsi ushaka kutwigisha ni igira iti “Nimushimire Uhoraho kuko ari umugwaneza, kuko impuhwe ze zihoraho iteka”.

Amateka y’umuryango w’Imana, Israheli, atwereka ko Imana idahwema kwereka abayo ko ibakunda kandi ko itajya ibatererana cyane cyane iyo batinyutse kuyigezaho isengesho ryabo. Igitabo cy’Iyimukamisiri kitubwira amagambo yuje urukundo Imana-Uhoraho yabwiye umuryango wayo wari mu buhungiro buvanze n’ubucakara mu Misiri. Yaragize ati

“Amagorwa y’umuryango wanjye uri mu Misiri narayitegereje, kandi imiborogo baterwa n’abakoresha b’imirimo narayumvise, n’imiruho barimo ndayizi. Ndamanutse ngo mbagobotore mu maboko y’Abanyamisiri, maze mbavane muri icyo gihugu, mbajyane ku butaka bw’indumbuke kandi bugari, mu gihugu gitemba amata n’ubuki. None ngaha induru y’Abayisraheli yangezeho, maze mbona ukuntu Abanyamisiri babica urupfu rubi.” (Iyim 3, 7-9).

Inyigisho yo ku wa kabiri – Icyumweru cya 9 gisanzwe, C, 2013

Ku ya 04 Kamena 2013

Padiri Cyprien BIZIMANA

AMASOMO: 1º. Tobi 2, 10-14; 2º Mk 12, 13-17

Ibya Kayizari mubisubize Kayizari

Ejo twahimbaje ABAHOWE IMANA B’I BUGANDE. Twihaye intego yo kuba abagaragu beza ba YEZU KRISTU. Twazirikanye ko kubigeraho ari ukwiyemeza kwihara no kumukurikira mu nzira iruhije yanyuzemo nk’uko ABAHOWE IMANA babigenje.

Ikindi gitekerezo kigize ayo matwara, ni ugutinyuka kwamamaza UKURI kw’Imana Data Ushoborabyose nta gutinya amaso y’abantu. Ayo matwara yo kudatinyatinya, n’abari mu mirwi y’Abafarizayi n’Abaherodiyani batemeraga YEZU, bari barayitegereje mu buzima bwe. Koko yigishaga iby’Ingoma y’Imana adatinya amaso y’abantu. Bamuteze umutego abatsinda rugikubita kuko bizeraga ubuhanga bwabo na ho ntibakamenye ko nta cyo bazi ugereranyije na Nyir’Ubuhanga. Kwegera YEZU KRISTU no kumukunda cyane bituma tugenda duhabwa ubuhanga n’ubushishozi bwo kutagwa mu mitego ab’isi badushandikira. Kuba ku isi urangaye cyangwa umeze nk’igitambambuga cy’igisekeramwanzi ni ko kugwa umusubizo mu mitego ya Sekibi. Dusabe cyane urumuri ruturuka kuri Rumuri maze tunamenye gutandukanya ibya Kayizari n’iby’Imana.

Iyi mvugo ya YEZU yabaye insigamugani. Nta muntu n’umwe utayizi. Ndetse akenshi n’ abategetsi b’inzego zinyuranye mu bihugu bakunze kuyitwaza cyane bashaka kumvikanisha ko umuntu wese agomba kumvira amategeko yabo. N’iyo ayo mategeko anyuranyije n’uburenganzira bwa muntu cyangwa abangamiye Amategeko y’Imana, bakunze gushyira imbere iyi mvugo: “Na YEZU yavuze koibya Kayizari bisubizwa Kayizari!” Ni nk’uko buri mutegetsi wese azi mu mutwe ko ubutegetsi bwose butangwa n’Imana! Yego ni byo, Imana ntibuza amahanga kuyoborwa n’abatorwa, ariko kandi si yo ibatuma gukora amahano mu bihugu biyoborwa nabi cyangwa se mu mategeko ashyirwaho agamije gutesha agaciro iby’Imana!

Ni ngombwa gusubiza Kayizari ibye, ariko na Kayizari na we agomba gusubiza iby’Imana mu mwanya wabyo. Kayizari ahagarariye abategetsi bose. Bakwiye kubahwa n’abo bayobora. Ariko kugira ngo bigende neza, na bo bagomba kubaha Imana Data Ushoborabyose Umutegeka n’Umugenga wa byose. Nibatamwubaha, ibintu bizadogera kuko iyo isi yitaruye Uwayiremye iba yitegura gusenyuka. Dusabire cyane abahagarariye YEZU KRISTU by’umwihariko kugira ngo imvugo zabo zihore zuje Ubuhanga YEZU KRISTU atanga, bwa bundi butuma bamamaza Inkuru Nziza ikiza badatinya amaso y’abantu kandi birinda kugwa mu mitego y’Abafarizayi na Kayizari. Dusenge cyane kandi twigomwe kugira ngo tuyoboke Imana bigirire bose akamaro.

YEZU KRISTU ASINGIZWE.

UMUBYEYI BIKIRA MARIYA ADUHAKIRWE UBU N’ITEKA RYOSE.